Alọdlẹndonu Nuplọnwe Opli Gbẹzan po Lizọnyizọn po Tọn
3-9 MAI
NUHỌAKUẸ LẸ SỌN OHÓ JIWHEYẸWHE TỌN MẸ | SỌHA LẸ 27-29
“Ma Nọ Homẹnukuntapọn Blo”
w13 15/6 10 huk. 14
Yọ́n Pinpẹn Jẹhẹnu Jehovah Tọn lẹ Tọn to Gigọ́ Mẹ
14 Nọviyọnnu atọ́n lọ lẹ dọnsẹpọ Mose bo kanse e dọmọ: “Etẹwutu wẹ oyín otọ́ mítọn tọn lọ nado yin didesẹ sọn whédo etọn ṣẹnṣẹn, na ewọ ma tindo visunnu de wutu?” Yé vẹvẹna ẹn dọmọ: “Na nutindo de hlan mí to mẹmẹsunnu otọ́ mítọn tọn lẹ lọ ṣẹnṣẹn.” Be Mose gblọnna yé dọ, ‘Nude ma sọgan yin wiwà gando osẹ́n lọ go’ wẹ ya? Lala. Kakatimọ, e “hẹn whẹho yetọn wá OKLUNỌ lọ nukọn.” (Sọh. 27:2-5) Gblọndo tẹwẹ Jehovah na Mose? Jehovah dọna ẹn dọmọ: “Viyọnnu Zelofehadi tọn lẹ lọ dọho nugbo: hiẹ nugbonugbo na na nutindo ogú de tọn de yé to mẹmẹsunnu otọ́ yetọn tọn lẹ ṣẹnṣẹn; hiẹ nasọ hẹn ogú otọ́ yetọn tọn lọ nado juyi jẹ yé dè.” Jehovah sọ yinukọn hugan mọ bo hẹn gbedide enẹ zun osẹ́n to whenue e dọna Mose dọmọ: “Eyin sunnu de kú, bo ma tindo visunnu de gba, whenẹnu mìwlẹ na hẹn ogú etọn nado juyi jẹ viyọnnu etọn dè.” (Sọh. 27:6-8; Jọṣ. 17:1-6) Bẹsọn whenẹnu, Islaelivi yọnnu he tin to ninọmẹ sinsinyẹn mọnkọtọn mẹ lẹpo wẹ nọ mọaleyi sọn awuwledainanu enẹ mẹ.
w13 15/6 11 huk. 15
Yọ́n Pinpẹn Jẹhẹnu Jehovah Tọn lẹ Tọn to Gigọ́ Mẹ
15 Nudide he do homẹdagbe po mẹnukuntamahopọn po hia nankọ die! Jehovah doyẹyigona yọnnu agbátọnọ enẹlẹ kẹdẹdile ewọ nọ wà do na Islaelivi he tin to ninọmẹ dagbe mẹ lẹ. (Ps. 68:5) Ehe yin dopo poun to kandai Biblu tọn susu he do nugbo homẹmiọnnamẹ tọn ehe hia lẹ mẹ dọ: Jehovah nọ yinuwa hẹ devizọnwatọ etọn lẹpo matin mẹnukuntahihopọn.—1 Sam. 16:1-13; Owalọ 10:30-35, 44-48.
w13 15/6 11 huk. 16
Yọ́n Pinpẹn Jẹhẹnu Jehovah Tọn lẹ Tọn to Gigọ́ Mẹ
16 Nawẹ mí sọgan hodo apajlẹ mẹnukuntamahopọn tọn Jehovah tọn gbọn? Flindọ, mẹnukuntamahopọn bẹ adà awe hẹn. Nukun he mí do nọ pọ́n mẹdevo lẹ wẹ na zọ́n bọ mí na yinuwa hẹ yé matin mẹnukuntahihopọn. Na nugbo tọn, mẹde ma nọ jlo na lẹndọ emi nọ homẹnukuntapọn. Ṣigba, hiẹ na kọngbedopọ dọ e ma nọ saba bọawu nado yọ́n nuhe yin numọtolanmẹ mítọn gando mẹdevo lẹ go to gigọ́ mẹ. Enẹwutu, etẹwẹ mí sọgan wà nado yọnẹn eyin mẹdevo lẹ nọ pọ́n mí hlan taidi mẹhe ma nọ homẹnukuntapọn? To whenue Jesu jlo na yọ́n nuhe mẹdevo lẹ to didọ gando ewọ go, e kanbiọ họntọn dejidego etọn lẹ dọmọ: “Mẹnu wẹ gbẹtọ lẹ to didọ dọ Visunnu gbẹtọ tọn yin?” (Mat. 16:13, 14) Naegbọn mílọsu ma na hodo apajlẹ Jesu tọn to adà enẹ mẹ? Hiẹ sọgan kanhose họntọn dejidego de nado dọna we eyin vlavo hiẹ nọ homẹnukuntapọn. Eyin ewọ dọna we dọ, to whedelẹnu e nọ taidi dọ hiẹ nọ ṣinyan akọ̀, kavi dọ mẹhe sewé kavi mẹhe alọnu pọnte na lẹ ji wẹ a nọ hò jẹ hugan, etẹwẹ a dona wà? Hodẹ̀ vẹkuvẹku na Jehovah gando numọtolanmẹ towe lẹ go, bo vẹ̀ ẹ dọ ni gọalọna we nado jla pọndohlan towe do, na a nido sọgan nọ do mẹnukuntamahopọn etọn nkọ hia to gigọ́ mẹ.—Mat. 7:7; Kọl. 3:10, 11.
Onú Sisosiso Gbigbọmẹ Tọn Lẹ
it-2-F 850 huk. 1
Avọ́nunina Lẹ
Avọ́nunina nùnù lẹ. Avọ́nunina nùnù lẹ nọ yin bibasi to pọmẹ hẹ suhugan avọ́nunina he pò lẹ tọn, titengbe to whenue Islaelivi lẹ ko jẹ Aigba Pagbe tọn ji godo. (Sọh 15:2, 5, 8-10) Ehe nọ bẹ ovẹn (“ahàn sinsinyẹn”) hẹn, bọ e nọ yin kinkọndo agbà lọ ji. (Sọh 28:7, 14; yijlẹdo Eks 30:9; Sọh 15:10 go.) Apọsteli Paulu kanwehlan Klistiani he to Filipi lẹ dọmọ: “Eyin yẹn tlẹ to yinyin kinkọnyinai taidi avọ́nunina nùnù de do avọ́sinsan sinsẹ̀nzọn wiwe tọn he kọ̀n yise mìtọn ko plan mì jẹ lọ ji, yẹn yin homẹhunnọ.” Tofi, e zan apajlẹ avọ́nunina nùnù de tọn nado dohia dọ emi tindo ojlo nado yí emide zan do Klistiani hatọ lẹ tamẹ. (Flp 2:17) Ojlẹ kleun de jẹnukọnna okú etọn, e kanwehlan Timoti dọmọ: “Yẹn ko to yinyin kinkọnyinai taidi avọ́nunina nùnù de, podọ ojlẹ lọ na tundote ṣie ko sẹpọ.”—2Ti 4:6.
AWUWIWLENA LIZỌNYIZỌN KUNNUDEGBE TỌN
w07 1/4 17-18
Avọ́sinsan He Nọ Hẹn Homẹhun Jiwheyẹwhe Lẹ
“OGBẸ̀ wá sọn okú mẹ—nuhe Aztèque he yí gbẹtọ do sanvọ́ jẹ obá he nkọtọn ma ko yin mimọ pọ́n mẹ to Méso-Amérique lẹ yise niyẹn,” wẹ owe lọ The Mighty Aztecs dọ. Owe lọ yidogọ dọ, “Dile ahọluigba lọ to gbigblodeji, kiki ohùn yèdọ ohùn susu ji wẹ jidide etọn yin zize sinai do.” Sọgbe hẹ nuhe owe alọdlẹndonu tọn devo dọ, diblayi gbẹtọ 20 000 wẹ Aztèque lẹ nọ yí do sanvọ́ to whemẹwhemẹ.
To whenuho gblamẹ, gbẹtọ lẹ ko basi avọ́sinsan wunmẹ de kavi devo hlan yẹwhe yetọn lẹ, na obu po jide-matindo po kavi numọtolanmẹ whẹhuhu po whẹgbledomẹ tọn po wutu. To alọ devo mẹ, Biblu dohia dọ avọ́sinsan wunmẹ delẹ yin didoai gbọn Jiwheyẹwhe Ganhunupotọ lọ Jehovah dali. Enẹwutu, e sọgbe nado kanse dọ: Avọ́sinsan wunmẹ tẹlẹ wẹ nọ hẹn homẹ Jiwheyẹwhe tọn hùn? Podọ be avọ́nunina po avọ́sinsan lẹ po dona yin apadewhe sinsẹ̀n-bibasi tọn to egbehe ya?
Avọ́nunina po Avọ́sinsan lẹ po to Sinsẹ̀n-Bibasi Nugbo Mẹ
To whenue akọta Islaeli tọn yin didoai, Jehovah na anademẹ họnwun lẹ gando aliho he mẹ e jlo dọ Islaelivi lẹ ni nọ sẹ̀n ẹn te go, podọ ehe bẹ avọ́nunina lẹ po avọ́sinsan lẹ po hẹn. (Osọha lẹ, weta 28 po 29 po) Delẹ to avọ́nunina lọ lẹ mẹ nọ wá sọn sinsẹ́n aigba tọn mẹ; devo lẹ bẹ avọ́sinsan kanlin tọn lẹ hẹn taidi oyìnsú, lẹngbọ, gbọgbọẹ, awhànnẹ, po owhlé po tọn lẹ. (Levitiku 1:3, 5, 10, 14; 23:10-18; Osọha lẹ 15:1-7; 28:7) Avọ́nunina mimẹ̀ lẹ tin he dona nọ yin fifiọ mlẹnmlẹn to miyọ́n mẹ. (Eksọdusi 29:38-42) Avọ́sinsan jijọho tọn lẹ sọ tin ga, ehe mẹhe basi yé lẹ nọ tindo mahẹ to e mẹ gbọn dùdù sọn nuhe yin yíyí do sanvọ́ hlan Jiwheyẹwhe lọ mẹ dali.—Levitiku 19:5-8.
Avọ́nunina po avọ́sinsan he nọ yin zizedonukọnna Jiwheyẹwhe to Osẹ́n Mose tọn glọ lẹpo po yin aliho de nado sẹ̀n Jiwheyẹwhe bo kẹalọyi i taidi Nupojipetọ wẹkẹ lọ tọn. Gbọn avọ́sinsan ehelẹ gblamẹ, Islaelivi lẹ nọ do pinpẹn-nutọn-yinyọnẹn yetọn hia Jehovah na dona po hihọ́ etọn po bo nọ mọ jona ylando yetọn lẹ tọn yí. Dile yé to nugbonọ yin dẹnsọ to hihodo nubiọtomẹsi Jehovah tọn lẹ na sinsẹ̀n-bibasi mẹ, mọ wẹ yé nọ mọ dona susu yí do niyẹn.—Howhinwhẹn lẹ 3:9, 10.
Na Jehovah, nuhe yin nujọnu hugan lọ wẹ nuyiwa mẹhe to avọ́sinsan lọ basi lẹ tọn. Gbọn yẹwhegán etọn Hosea gblamẹ, Jehovah dọmọ: “Homẹdagbe wẹ yẹn jlo, avọ́sannu ma gba; podọ oyọnẹn Jiwheyẹwhe tọn hugan avọ́nunina mimẹ̀ lẹ.” (Hosea 6:6) Enẹwutu, eyin akọta lọ jo sinsẹ̀n-bibasi nugbo do bo doalọ to walọ gblezọn lẹ mẹ bosọ kọ̀n ohùn homẹvọnọ tọn dai, avọ́ he sán yé te to agbà Jehovah tọn ji lẹ ma doale depope. Nuhe zọ́n niyẹn bọ, Jehovah dọna akọta Islaeli tọn gbọn Isaia gblamẹ dọmọ: “Etẹwẹ avọ́ susu sinsán mìtọn yin hlan mi? . . . Yẹn gọ́ na avọ́ nina mimẹ̀ agbò tọn, podọ na ojó kanlin yìnyìn tọn; yẹn ma tindo homẹvivi do ohùn oyìnsú tọn go, kavi do lẹngbọvu tọn go, kavi do alúnkùn tọn go gba.”—Isaia 1:11.
“Ehe Yẹn Ma Degbena”
To vogbingbọn mẹ mlẹnmlẹn na Islaelivi lẹ, tòmẹnu Kenani tọn lẹ nọ yí ovi yetọn lẹ do sanvọ́ hlan yẹwhe yetọn lẹ, he bẹ yẹwhe Ammọninu lẹ tọn lọ hẹn he nọ yin yiylọ dọ Molẹki, bosọ yin yinyọnẹn taidi Milkomi kavi Moloki. (1 Ahọlu lẹ 11:5, 7, 33; Owalọ lẹ 7:43) Owe lọ Halley’s Bible Handbook dọmọ: “Kenaninu lẹ nọ yí fẹnnuwiwa zanhẹmẹ tọn zan taidi nuyiwa sinsẹ̀n tọn de nado basi sinsẹ̀n to yẹwhe yetọn lẹ nukọn; podọ to enẹgodo yé nọ hù viplọnji yetọn lẹ taidi avọ́sinsan de hlan yẹwhe ehelẹ dopolọ.”
Be nuyiwa mọnkọtọn lẹ nọ hẹn homẹhun Jehovah Jiwheyẹwhe ya? Paali. To whenuena Islaelivi lẹ ko pọ́ aigba Kenani tọn mẹ bibiọ, Jehovah na yé gbedide he yin kinkàndai to Levitiku 20:2, 3 mẹ dọmọ: “Hiẹ nasọ dọ hlan ovi Islaeli tọn lẹ dọmọ, Mẹdepope ewọ yin sọn ovi Islaeli tọn lẹ mẹ, kavi sọn jonọ lẹ lọ mẹ he wáwáṣi to Islaeli mẹ, he na sọn okún etọn mẹ hlan Molẹki: e na yin hùhù dandan: omẹ aigba lọ tọn lẹ na yí zannu lẹ do dlanzannu do e. Yẹn ga na ze nukunmẹ ṣie do omẹ nẹ go, bo na sán ẹn sẹ̀ sọn omẹ etọn lẹ ṣẹnṣẹn: na e ko na sọn okún etọn mẹ hlan Molẹki wutu, nado hẹn fiwiwe ṣie gble, podọ nado flu oyín wiwe ṣie.”
E sọgan vẹawu nado yise, ṣigba Islaelivi delẹ he jo sinsẹ̀n-bibasi nugbo do kẹalọyi nuyiwa aovi tọn ehe he yin nado yí ovi yetọn lẹ do sanvọ́ hlan yẹwhe lalo lẹ. Gando ehe go, Psalm 106:35-38 dọmọ: “[Yé] hẹn yede kọndopọ po kosi lẹ po, bosọ plọn azọ́n yetọn lẹ. Yé to boṣiọ yetọn lẹ sẹ̀n: ehe zun omọ̀ hlan yé. Nugbo, yé yí visunnu yetọn lẹ po viyọnnu yetọn lẹ po do sanvọ́ hlan aovi lẹ, bosọ kọ̀n ohùn homẹvọnọ dai, yèdọ ohùn ovi yetọn sunnu lẹ tọn po ovi yetọn yọnnu lẹ tọn po, he yé yí do sanvọ́ hlan boṣiọ Kenani tọn lẹ: yè sọ yí ohùn do hẹn aigba lọ flu.”
10-16 MAI
NUHỌAKUẸ LẸ SỌN OHÓ JIWHEYẸWHE TỌN MẸ | SỌHA LẸ 30-31
“Depà Towe Lẹ”
it-2-F 1164 huk. 10
Pàdido
Opà Nọ Yin Dido sọn Ojlo mẹ, Ṣigba Mẹhe Dopà to Dandannu Glọ Nado De E. Ojlo mẹ wẹ yè nọ desọn do nọ dopà. Amọ́, Jiwheyẹwhe dosẹ́n dọ eyin mẹde dopà, mẹlọ dona de e. Enẹ wẹ zọ́n bọ yè nọ dọ dọ mẹhe dopà ‘sìn alindọn etọn do opà lọ ji,’ na yè gán yí ogbẹ̀ etọn do nue e dọ lọ nù. (Sọh 30:2; sọ pọ́n Lo 1:31, 32.) Abajọ Owe-wiwe lẹ do biọ dọ yè ni payi taun bo mọnukunnujẹ nue na wà yè te lọ mẹ ganji whẹpo do dopà. Osẹ́n lọ dọmọ: “Eyin hiẹ dopà de na Jehovah . . . Jiwheyẹwhe towe na biọ ẹ sọn asi we dandan; eyin e ma yinmọ, e na lẹzun ylando de dokọna we. Ṣigba, eyin hiẹ ma dopà, e ma na yin ylando de dokọna we.”—De 23:21, 22.
it-2-F 1164 huk. 7
Pàdido
Opà vonọtaun he yin dido na Jiwheyẹwhe nado wà nude, nado basi avọ́nunina kavi na nunina de, nado biọ sinsẹ̀nzọn kavi ninọmẹ wunmẹ de mẹ, kavi nado nọla na onú delẹ he ma jẹagọdo osẹ́n dandan. Ojlo mẹ wẹ yè nọ desọn do nọ dopà. To whenuena e yindọ onú vonọtaun wẹ opà yin, e nọ yin pinpọnhlan di whiwhle nkọ, podọ to whedelẹnu, hogbe awe lọ lẹ nọ zọnpọ to Biblu mẹ. (Sọh 30:2; Mt 5:33) To paa mẹ, hogbe lọ “opà” nọ saba yin yiyizan nado dlẹnalọdo nue mẹlọ magbe nado wà, bọ hogbe lọ “whiwhle” uwọ nọ yin yiyizan to whenue mẹde dlẹnalọdo aṣẹpipa daho de nado dohia dọ nuhe emi dọ yin nugbo mlẹnmlẹn kavi dọ emi wleawufo nado dogbè nuhe emi dọ lọ tọn. To hohowhenu, mẹlẹ nọ saba dopà to whenue yé jlo na nùalẹ.—Jen 26:28; 31:44, 53.
w04 1/8 27 huk. 3
Nuagokun lẹ sọn Owe Osọha lẹ Tọn Mẹ
30:6-8—Be sunnu Klistiani de sọgan doalọtena opà asi etọn tọn ya? Gando pàdido lẹ go, Jehovah nọ yinuwa hẹ sinsẹ̀n-basitọ etọn lẹ dopodopo todin. Di apajlẹ, klandowiwe hlan Jehovah yin opà mẹdetiti tọn de. (Galatianu lẹ 6:5) Asu de ma tindo aṣẹpipa nado doalọtena opà mọnkọtọn kavi hẹn ẹn zun ovọ́ gba. Ṣigba, asi de dona dapana pàdido he jẹagọdo Ohó Jiwheyẹwhe tọn kavi azọngban etọn lẹ hlan asu etọn.
Onú Sisosiso Gbigbọmẹ Tọn Lẹ
it-2-F 1203 huk. 4
Jẹfta
Gbẹtọ lẹ gán yin kinklandovo mlẹnmlẹn nado wà sinsẹ̀nzọn to fiwiwe Jehovah tọn. Podọ, mẹjitọ lẹ tindo jlọjẹ bo gán klan ovi yetọn lẹ dovo na sinsẹ̀nzọn mọnkọ. Di apajlẹ, whẹpo Samuẹli do yin jiji wẹ onọ̀ etọn Hanna ko dopà dọ e na wadevizọn to gòhọtúntún mẹ. Asu etọn Ẹlkana kọngbedopọ hẹ opà he e do. Tlolo he Hanna deanọ́na Samuẹli, e ze e jo nado wadevizọn to gòhọtúntún mẹ. Whenue e plan ẹn jei, e hẹn kanlin de he e na yí do sanvọ́. (1Sa 1:11, 22-28; 2:11) Samsọni lọsu yin ovi de he yin kinklandovo na sinsẹ̀nzọn Jiwheyẹwhe tọn to aliho vonọtaun mẹ bo na wadevizọn taidi Nazilinu.—Whẹ 13:2-5, 11-14; yijlẹdo aṣẹ he otọ́ de tindo do viyọnnu etọn ji go dile e sọawuhia do to Sọh 30:3-5, 16 mẹ.
17-23 MAI
NUHỌAKUẸ LẸ SỌN OHÓ JIWHEYẸWHE TỌN MẸ | SỌHA LẸ 32-33
“Mì Yàn Mẹhe Nọ Nọ̀ Aigba lọ Ji Lẹpo Sẹ̀”
w10-F 1/8 23 huk. 4
Be Hiẹ Yọnẹn Ya?
Etẹwẹ “ofi yiaga” he go Owe-wiwe Heblu tọn lẹ donù pludopludo lọ lẹ yin?
Whenue Islaelivi lẹ jlo na biọ Aigba Pagbe tọn ji, Jehovah degbena yé dọ yé ni de nọtẹn he Kenaninu he nọ finẹ lẹ yizan nado basi sinsẹ̀n lẹpo sẹ̀. Jiwheyẹwhe dọmọ: “Mì dona . . . gbà boṣiọ yetọn he yè yí zannu pipà do basi lẹ po boṣiọ kinkọ̀n yetọn lẹpo po hányán, mì sọ dona họ́ ofi wiwe yiaga yetọn lẹpo liai.” (Sọha lẹ 33:52) Ahọnkan sinsẹ̀n-bibasi lalo tọn enẹlẹ gán ko yin nọtẹn flala he to okọ́ta lẹ ji kavi nọtẹn yiaga he yé wleawuna do fidevo lẹ, vlavo to atin lẹ sá kavi to tòdaho lẹ mẹ. (1 Ahọlu lẹ 14:23; 2 Ahọlu lẹ 17:29; Ezekiẹli 6:3) E yọnbasi dọ agbà lẹ, dòtin wiwe zannu tọn lẹ kavi dòtin wiwe lẹ, boṣiọ lẹ, agbà nuyọnwan tọn lẹ po onú mọnkọ devo lẹ po ni to nọtẹn mọnkọ lẹ.
w08 15/2 27 huk. 5-6
Plọnnu sọn Nuṣiwa Islaelivi lẹ Tọn Mẹ
To egbehe, mí nọ pehẹ whlepọn susu he taidi dehe Islaelivi lẹ pehẹ. Aihọn egbehe tọn gọ́ na boṣiọ wunmẹwunmẹ lẹ. Ehelẹ bẹ akuẹ, omẹ nukundeji ayidedai tọn lẹ, aihundatọ lanmẹyiya tọn he diyin lẹ, tito tonudidọ tọn lẹ, sinsẹ̀ngán delẹ, kakajẹ hagbẹ whẹndo tọn delẹ ji hẹn. Depope to onú ehelẹ mẹ sọgan wá yí otẹn tintan to gbẹzan mítọn mẹ. Gbẹdido pẹkipẹki hẹ mẹhe ma yiwanna Jehovah lẹ sọgan zọ́n bọ mí na jai to gbigbọ-liho.
Adà tangan de to sinsẹ̀n-bibasi Baali tọn mẹ he dọ̀n Islaelivi susu bo doyẹklọ yé wẹ nuyiwa zanhẹmẹ tọn he ma sọgbe lẹ. Omọ̀ mọnkọtọn lẹ gbẹsọ to yẹdoklọ delẹ to omẹ Jiwheyẹwhe tọn lẹ mẹ. Di apajlẹ, nọtẹn Internet tọn de ji yìyì poun to nuglọ to ohọ̀ mẹdetiti tọn mẹ sọgan ko pé nado hẹn ayihadawhẹnamẹnu dagbe mẹhe nọ dín tlintlindo kavi mẹhe ma tin to aṣeji de tọn gble. Lehe e na blawu do sọ dọ Klistiani de ni yin yẹdoklọ gbọn yẹdide fẹnnuwiwa Internet ji tọn dali!
it-1-F 392 huk. 4
Kenani
Na nuhe dù Kenaninu lẹ vivasudo, Jọṣua yinuwa po nuyọnẹn po bo “ma nọma wà dopo tata to nuhe Jehovah ko degbe etọn na Mose lẹpo mẹ.” (Jọṣ 11:15) Amọ́, Islaelivi lẹ ma hodo apajlẹ dagbe etọn bo ma de nuhe gán hẹn aigba lọ flu sẹ̀. Islaelivi lẹ ma setonu mlẹnmlẹn na anademẹ he yin nina yé nado sukúndona Kenaninu lẹpo, ehe zọ́n bọ Kenaninu lẹ gbọṣi ṣẹnṣẹn yetọn bo wá hẹn akọta Islaeli tọn flu, podọ dile ojlẹ to yìyì, e họnwun dọ enẹ dekọtọn do okú mẹ na mẹsusu. Kọdetọn ylankan devo lẹ wẹ sẹ́nhẹngba, fẹnnuwiwa po boṣiọ-sinsẹ̀n po. (Sọh 33:55, 56; Whẹ 2:1-3, 11-23; Slm 106:34-43) Jehovah ko na avase Islaelivi lẹ dọ eyin yé kọnawudopọ hẹ Kenaninu lẹ bo wlealọ hẹ yé bo wá jẹ yẹwhe yetọn lẹ sẹ̀n ji kavi joawuna aṣa sinsẹ̀n tọn yetọn lẹ gọna walọ gblezọn yetọn lẹ, emi ma na homẹnukuntapọn to whẹdida dodo emitọn mẹ bo ‘nasọ slú yé jẹgbonu’ sọn aigba lọ ji.—Eks 23:32, 33; 34:12-17; Le 18:26-30; De 7:2-5, 25, 26.
Onú Sisosiso Gbigbọmẹ Tọn Lẹ
it-1-F 933 huk. 6
Dogbó
To whenue ovò ko yin dide nado yọ́n lẹdo he mẹ hẹnnu dopodopo na nọ godo, nudevo sọ nọ magbe lehe aigba etọn na klo sọ tọn, enẹ wẹ lehe mẹhe to hẹnnu lọ mẹ lẹ sù sọ. “Mì dona gbọn ovò dide dali má aigba lọ taidi nutindo de to whẹndo mìtọn lẹ ṣẹnṣẹn. Na pipli daho lẹ, mì dona hẹn ogú yetọn klo, podọ na pipli pẹvi lẹ, mì dona de ogú yetọn pò. Fihe ovò dena mẹdopodopo wẹ na yin ogú etọn.” (Sọh 33:54) Lẹdo he yin didena hẹnnu de gbọn ovò dali ma nọ diọ, amọ́ e gán biọ dọ yè ni de gbigblo etọn pò kavi do e ji sọgbe hẹ lehe ogú lọ klo sọ. Abajọ, apadewhe ogú he yin nina hẹnnu Juda tọn yin mimá na hẹnnu Simeoni tọn to whenue yè wá mọdọ filọ klo gbau na hẹnnu Juda tọn.—Jọṣ 19:9.
AWUWIWLENA LIZỌNYIZỌN KUNNUDEGBE TỌN
w09-F 1/10 30, apotin
AWHÀN HE JIWHEYẸWHE NỌGODONA LẸ
Owhe kanweko susu whẹpo sinsẹ̀n Klistiani tọn do yin didoai, Jiwheyẹwhe de akọta Islaeli tọn di akọta vonọtaun de, podọ to whedelẹnu, e nọ na yé gbè nado yì funawhàn. Whẹpo Islaelivi lẹ do yì aigba Kenani tọn ji, yèdọ aigba he Jiwheyẹwhe dopà etọn na Ablaham, Islaelivi lẹ mọ anademẹ ehe yí: “Jehovah Jiwheyẹwhe towe na jo [akọta ṣinawe] do alọ towe mẹ bọ hiẹ na gbawhàn yetọn. Hiẹ dona và yé sudo dandan. Hiẹ ma dona basi alẹnu depope hẹ yé kavi do nukundagbe depope hia yé.” (Deutelonomi 7:1, 2) Nugbo, Jọṣua he yin Awhàngán Islaeli tọn gbawhàn kẹntọ etọn lẹ tọn “kẹdẹdile Jehovah Jiwheyẹwhe Islaeli tọn ko degbe etọn do.”—Jọṣua 10:40.
Be ehe zẹẹmẹdo dọ kanyinylan po nukunkẹn po wẹ nọ sisẹ́ Islaelivi lẹ nado funawhàn hẹ akọta he yin kẹntọ yetọn lẹ bo gbawhàn yetọn ya? Paali. Akọta lọ lẹ ko peve to boṣiọ-sinsẹ̀n, mẹhuhu po fẹnnuwiwa zanhẹmẹ tọn he gblezọn lẹ po mẹ. Yé tlẹ nọ fiọ ovi lẹ to miyọ́n mẹ nado basi avọ́sinsan. (Sọha lẹ 33:52; Jelemia 7:31) Jiwheyẹwhe de onú mawé he to otò lọ mẹ lẹpo sẹ̀, na ewọ yin omẹ wiwe he yiwanna whẹdida dodo bosọ yiwanna omẹ etọn lẹ wutu. Etomọṣo, Jehovah nọ gbeje ahun mẹdopodopo tọn pọ́n, yèdọ nude he awhàngán depope ma gán bayi to egbehe. Eyin Jehovah mọ to ahun mẹde tọn mẹ dọ mẹlọ jlo na jo walọ ylankan etọn lẹ do bo sẹ̀n emi, e nọ pò e dogbẹ̀.
24-30 MAI
NUHỌAKUẸ LẸ SỌN OHÓ JIWHEYẸWHE TỌN MẸ | SỌHA LẸ 34-36
“Nọ Dín Fibẹtado to Jehovah Mẹ”
w17.11 9 huk. 4
Be A to Fibẹtado Dín to Jehovah mẹ Ya?
4 Ṣigba, nawẹ Islaelivi lẹ nọ penukundo whẹho mẹhe hùmẹ to mayọnẹn mẹ de tọn go gbọn? Dile etlẹ yindọ hlọnhutọ he hùmẹ to mayọnẹn mẹ lọ ma desọn ojlo mẹ nado wàmọ, e gbẹ́ hùwhẹ ohùn homẹvọnọ tọn sinsọndai tọn. (Jen. 9:5) Etomọṣo, dotẹnmẹ yin nina ẹn gbọn lẹblanu dali nado họnyi dopo to tòdaho fibẹtado tọn ṣidopo lọ lẹ mẹ, na ahọsuyitọ ohùn tọn lọ nikaa hù i. To finẹ, e sọgan mọ hihọ́ yí. Hlọnhutọ he hùmẹ to mayọnẹn mẹ lọ dona gbọṣi tòdaho fibẹtado tọn lọ mẹ kakajẹ whenue yẹwhenọ daho lọ na kú.—Sọh. 35:15, 28.
Be A to Fibẹtado Dín to Jehovah mẹ Ya?
6 To whenue mẹde hùmẹ to mayọnẹn mẹ bo họ̀njẹgbé, e dona “jẹwhẹ ede tọn na mẹho” lẹ to họngbo tòdaho fibẹtado tọn he mẹ e họnyi lọ tọn ji. Mẹhe to finẹ lẹ dona yí i po homẹdagbe po. (Jọṣ. 20:4) To ojlẹ vude godo, e nọ yin didohlan mẹho tòdaho he mẹ e hùmẹ te lẹ tọn dè, bọ yé nọ dọ owhẹ̀ etọn. (Hia Sọha lẹ 35:24, 25.) Kiki eyin yé wá tadona kọ̀n dọ mayọnẹn mẹ wẹ mẹhe họ̀njẹgbé lọ hùmẹ te wẹ e sọgan lẹkọyi tòdaho fibẹtado tọn lọ mẹ.
w17.11 11 huk. 13
Be A to Fibẹtado Dín to Jehovah mẹ Ya?
13 Eyin mẹhe họ̀njẹgbé lọ ko gbẹ́ biọ tòdaho fibẹtado tọn lọ mẹ, e nọ tin to hihọ́ glọ. Jehovah dọ gando tòdaho enẹlẹ go dọmọ: “Yé nasọ yin fibẹtado de na mì.” (Jọṣ. 20:2, 3) Jehovah ma biọ dọ owhẹ̀ nisọ yin didá na hlọnhutọ lọ na whẹho dopolọ; mọjanwẹ jlọjẹ ma yin nina ahọsuyitọ ohùn tọn lọ nado biọ tòdaho lọ mẹ bo hù mẹhe họ̀njẹgbé lọ do niyẹn. Enẹwutu, mẹlọ masọ nọ dibu dọ yè na yiahọsu to emi go ba. To tòdaho lọ mẹ, e nọ tin to hihọ́ Jehovah tọn glọ bọ ayiha etọn nọ jai. E ma yin gànpa fibẹtado tọn de mẹ wẹ e te. Dotẹnmẹ gbẹ́ hundote na ẹn nado wazọ́n, gọalọna mẹdevo lẹ bosọ sẹ̀n Jehovah to jijọho mẹ to tòdaho lọ mẹ. Mọwẹ, e gán gbẹ́ tindo ayajẹ po pekọ po to gbẹzan etọn mẹ!
Onú Sisosiso Gbigbọmẹ Tọn Lẹ
w91-F 15/2 13 huk. 13
Ofligọ He Sọzẹn de Na Mẹlẹpo
13 Adam po Evi po ma na mọaleyi sọn ofligọ lọ mẹ. Nunọwhinnusẹ́n de to Osẹ́n Mose tọn mẹ dọmọ: “Mìwlẹ ma dona yí ofligọ depope do ogbẹ̀ hlọnhutọ he jẹna okú de tọn tamẹ gba.” (Sọha lẹ 35:31) Adam ma yin kiklọ, amọ́ ojlo mẹ wẹ e desọn bo waylando. (1 Timoti 2:14) Gbọnmọ dali, kúnkan etọn wẹ e hù, na yemẹpo wẹ dugu mape etọn tọn bo to whẹdida okú tọn glọ. E họnwun dọ okú wẹ Adam jẹna, na mẹpipe wẹ e yin bo desọn ojlo mẹ do gbàsẹ́n Jiwheyẹwhe tọn. Enẹwutu, e ma sọgbe hẹ nujinọtedo dodo Jehovah tọn lẹ dọ Adam ni mọaleyi sọn ofligọ lọ mẹ. Amọ́, ofligọ lọ suahọ ylando Adam tọn bo súnsún whẹdida okú tọn he to kúnkan etọn lẹ ji sẹ̀! (Lomunu lẹ 5:16) To osẹ́n-liho, ofligọ lọ hùaṣẹ na kọdetọn ylankan ylando tọn he yin okú petepete. Mẹfligọtọ lọ ‘dọ́ okú pọ́n do gbẹtọ lẹpo tamẹ,’ bo jiya kọdetọn vẹadi ylando tọn lẹ tọn do kúnkan Adam tọn lẹpo tẹnmẹ.—Heblu lẹ 2:9; 2 Kọlintinu lẹ 5:21; 1 Pita 2:24.
31 MAI–6 JUIN
NUHỌAKUẸ LẸ SỌN OHÓ JIWHEYẸWHE TỌN MẸ | DEUTELONOMI 1-2
“Jiwheyẹwhe Tọn Wẹ Whẹdida”
w96-F 15/3 23 huk. 1
Jehovah Yiwanna Dodowiwa po Whẹdida Dodo Po
To whedelẹnu, mẹho he yin dide do agun lọ nù lẹ nọ to dandannu glọ nado penukundo whẹho ylanwiwa sinsinyẹn tọn lẹ go. (1 Kọlintinu lẹ 5:12, 13) Ṣigba, yé nọ flindọ whẹdida dodo Jiwheyẹwhe tọn nọ biọ dọ lẹblanu ni yin didohia eyin e yọnbasi. To whenue dodonu depope ma tin na lẹblanu, di apajlẹ eyin ylanwatọ lọ ma lẹnvọjọ, lẹblanu ma gán yin didohia. Amọ́, ehe ma zẹẹmẹdo dọ kanyinylan wẹ nọ sisẹ́ mẹho lẹ nado de ylanwatọ mọnkọtọn sẹ̀ sọn agun mẹ. Kakatimọ, todido yetọn nọ yindọ tito mẹdesẹ sọn agun mẹ tọn lọ na gọalọna mẹlọ nado gọ̀ biọ ede mẹ. (Yijlẹdo Ezekiẹli 18:23 go.) Na mẹho lẹ to devizọnwa to anademẹ Klisti tọn glọ wutu, yé nọ yiavùnlọna whẹdida dodo he nọ biọ dọ yé ni yin “bẹtẹn de sọn jẹhọn nù.” (Isaia 32:1, 2) Enẹwutu, yé ma dona nọ homẹnukuntapọn podọ yé sọ dona nọ nọ̀ jlẹkaji.—Deutelonomi 1:16, 17.
w02 1/8 9 huk. 4
Litaina Aṣẹpipa Jiwheyẹwhe Tọn po Nugbonọ-Yinyin Po
4 Ṣigba, nado yin whẹdatọ bẹ onú susu hẹn hugan nukunnumimọjẹ Osẹ́n lọ mẹ. Na yinyin mapenọ wutu, sunnu mẹho lọ lẹ dona tin to aṣeji sọta ayilinlẹn ylankan depope he yé tindo—taidi ṣejannabi, mẹnukuntahopọn, po nukunkẹn po—he sọgan hẹn whẹdida yetọn tindo oblọ. Mose dọna yé dọmọ: ‘Mìwlẹ ma na hò gbẹtọ nukuntapọn to whẹdida mẹ gba; mì na nọ se yọpọ po mẹho po do zẹnzẹn; mì ma na dibuna nukunmẹ omẹ de tọn gba; na Jiwheyẹwhe tọn wẹ whẹdida lọ.’ Mọwẹ, whẹdatọ Islaeli tọn lẹ to whẹda na Jiwheyẹwhe. Lẹblanulọkẹyi he dobu bosọ jiawu nankọtọn die!—Deutelonomi 1:16, 17.
Onú Sisosiso Gbigbọmẹ Tọn Lẹ
w13 15/9 9 huk. 9
Mí Sọgan Dejido Nuflinmẹ Jehovah Tọn lẹ Go
9 To whenue Islaelivi lẹ bẹ gbejizọnlin jẹeji gbọn “zungbo daho bosọ dobu” de mẹ, yèdọ gbejizọnlin de he wá dẹn na owhe 40, Jehovah ma na yé nudọnamẹ gigọ́ jẹnukọn gando lehe ewọ na deanana yé, penukundo yé go bosọ basi hihọ́na yé do go. Etomọṣo, e dohia yé pludopludo dọ yé sọgan dejido emi po anademẹ emitọn lẹ po go. Jehovah flinnu Islaelivi lẹ dọ emi to godona yé to zungbo owùnọ enẹ mẹ gbọn dòtin aslọ tọn de yiyizan to okle gọna dòtin miyọ́n tọn de yiyizan to zánmẹ dali. (Deut. 1:19; Eks. 40:36-38) Ewọ sọ penukundo nuhudo tangan yetọn lẹ go. “Avọ̀ yetọn lẹ ma dohó, podọ afọ yetọn lẹ masọ ji.” Na nugbo tọn, “yé masọ ba nude pò.”—Nẹh. 9:19-21.
AWUWIWLENA LIZỌNYIZỌN KUNNUDEGBE TỌN
w13 15/8 11 huk. 7
Ma ‘Gblehomẹ Do Jehovah Go’ Gbede Blo
Hodidọ agọ̀ mẹdevo lẹ tọn sọgan yinuwado mí ji. (Hia Deutelonomi 1:26-28.) Islaelivi lẹ ṣẹṣẹ yin tuntundote sọn kanlinmọgbenu to Egipti. To azọ́njiawu-liho, Jehovah hẹn azọ̀nylankan ao wá akọta kọgbidinamẹtọ enẹ ji, podọ to enẹgodo, e và Falo po awhànpa etọn lẹ po sudo to Ohù Vẹẹ mẹ. (Eks. 12:29-32, 51; 14:29-31; Ps. 136:15) Omẹ Jiwheyẹwhe tọn lẹ ko wleawufo nado biọ Aigba Pagbe tọn lọ ji. Ṣigba to ojlẹ vonọtaun enẹ mẹ, Islaelivi lẹ jẹ nuhlundọ ji gando Jehovah go. Naegbọn yé do yinuwa po yise matindo po? Ahun yetọn lẹ gbàdo, na linlin agọ̀ he delẹ to mẹhe yì bẹ̀ aigba lọ pọ́n lẹ mẹ na wutu. (Sọh. 14:1-4) Etẹwẹ yin kọdetọn lọ? Jehovah gbẹ́ dọ whẹndo enẹ blebu ma na yì “aigba dagbe” enẹ ji ba. (Deut. 1:34, 35) Be mílọsu ma nọ dike hodidọ agọ̀ mẹdevo lẹ tọn ni hẹn mí gbọjọ bo sisẹ́ mí nado mọhodọdo aliho he mẹ Jehovah nọ yinuwa hẹ mí te go nẹ?
GBẸZAN KLISTIANI TỌN
nwtsty adà nupinplọn tọn do Mt 24:8 ji
awufiẹsa he taidi ajipanu tọn lẹ: To paa mẹ, hogbe Glẹkigbe tọn lọ to alọdlẹndo awufiẹsa sinsinyẹn he yè nọ mọ to vijiji whenu. Tofi, e to alọdlẹndo ayimajai, awufiẹsa po yajiji po to paa mẹ, amọ́ e sọ sọgan zẹẹmẹdo dọ taidi awufiẹsa ajipanu tọn lẹ, nuhahun po awufiẹsa he yè dọ dọdai etọn lẹ po na to jijideji, susudeji bosọ dẹn-to-aimẹ whẹpo nukunbibia daho he yin nùdego to Matiu 24:21 mẹ lọ nido bẹjẹeji.
od 176 huk. 15-17
Kọnawudopọ Pẹkipẹki hẹ Titobasinanu Jehovah Tọn
15 Whlepọn he awhàn, gufinfọn, kavi homẹkẹn po alọhẹndotenamẹ osẹ́n tọn lẹ po nọ hẹnwa lẹ sọgan hẹn ẹn zun nuhe ma yọnbasi nado zindonukọn to sinsẹ̀n-bibasi gbangba Klistiani tọn mẹ. E sọgan glo nado nọ pli taidi agun. Aliho hodọdopọ tọn hẹ wekantẹn alahọ tọn sọgan yin sinsán. Dlapọn nugopọntọ lẹdo tọn lẹ tọn sọgan yin alọhẹndotena. Owe mítọn lẹ mimọyi sọgan glo. Eyin depope to onú ehelẹ mẹ jọ, etẹwẹ hiẹ dona wà?
16 Gblọndo lọ wẹ yindọ, wà nuhe go a pé lẹpo to ninọmẹ lọ mẹ. Nudepope ma sọgan gbẹ́ oplọn mẹdetiti tọn. Pipli kleun lẹ sọgan gbẹ́ nọ pli na nupinplọn to owhé lẹ gbè. Owe he ko yin pinplọn wayi lẹ po Biblu lọsu po sọgan yin yiyizan na opli lẹ. Ma hanú kavi lẹzun ayimajainọ blo. To paa mẹ, Hagbẹ Anademẹtọ lọ na penugo nado wleawuna aliho hodọdopọ tọn delẹ hẹ mẹmẹsunnu azọngbannọ lẹ to ojlẹ kleun de gblamẹ.
17 Eyin hiẹ tlẹ wá mọ dewe to fie Klistiani mẹmẹsunnu towe devo de ma sẹpọ, hẹn do ayiha mẹ dọ Jehovah po Visunnu etọn, Jesu Klisti po ma dẹn do we. Hiẹ sọgan gbẹ́ hẹn todido towe lodo. Jehovah sọgan gbẹ́ sè odẹ̀ towe lẹ, podọ e sọgan yí gbigbọ etọn do hẹn we lodo. Nọ dín anademẹ sọn ewọ dè. Flindọ devizọnwatọ Jehovah tọn de wẹ hiẹ yin podọ devi Jesu Klisti tọn. Enẹwutu, nọ yí dotẹnmẹ hundote lẹpo zan nado dekunnu. Jehovah na dona vivẹnudido towe lẹ, bọ to madẹnmẹ mẹdevo lẹ sọgan wá kọnawudopọ hẹ we to sinsẹ̀n-bibasi nugbo lọ mẹ.—Owalọ 4:13-31; 5:27-42; Flp. 1:27-30; 4:6, 7; 2 Tim. 4:16-18.
g17.5-F 4
Afọdide Delẹ He Gán Whlẹn Ogbẹ̀ to Nugbajẹmẹji Whenu
WLEAWU JẸNUKỌNNA NUGBAJẸMẸJI LỌ!
NUGBAJẸMẸJI gán wá aimẹ bo gando mẹdepope go. Onú daho hugan he gán whlẹn we wẹ awuwiwle jẹnukọn. Amọ́, etẹwẹ ehe nọ biọ?
• Wleawuna ayiha towe. Yọnẹn dọ nugbajẹmẹji lẹ nọ wá aimẹ podọ e gán gando hiẹ po mẹvivẹ towe lẹ po go. Podọ eyin e ka jọ, whenu na ko fẹ́ nado wleawu.
• Tẹnpọn bo yọ́n nugbajẹmẹji wunmẹ he gán wá aimẹ to lẹdo towe mẹ lẹ. Yọ́n fie yè gán họnbẹ do lẹ. Lẹnnupọndo lehe owhé towe yin gbigbá do po fie e te po ji nado yọnẹn eyin e do hihọ́. De nudepope he gán zọ́n bọ owhé lọ na jimiyọ́n sẹ̀. Nọ to aṣeji taun gando nudepope he gán tì azọ̀ go bo nọ yawu yinuwa eyin a doayi onú mọnkọ de go.
• Wleawuna nuhe sin hudo a gán do to nugbajẹmẹji de whenu lẹ. Miyọ́n lẹtliki tọn gán nọma tin, alokan gán nọma wazọ́n, e gán vẹawu nado mọ ohún do, podọ osin gán hán. Eyin kẹkẹ kavi mọto wẹ a do, dike amì he to e mẹ ni nọ sù jẹ obá de mẹ. Tẹnpọn na núdùdù po osin po ni ma nọ hán to whégbè blo. Podọ, saki de he bẹ onú dandan tọn lẹ hẹn ni nọ to alọji.—Pọ́n apotin lọ “Nue Sin Hudo A Gán Do Lẹ.”
• Sọha alokan họntọn lẹ tọn ni nọ to alọji na we, vlavo mẹlọ lẹ to yakẹ kavi fidindẹn.
• Basi tito nue yè gán wà nado họ̀ngán lẹ tọn bo bayi zepọn. A dona yọ́n fie yè gán yawu gbọn do họ̀n tọ́n sọn owhé towe gbè, gọna tito he wehọ ovi towe lẹ tọn bayi na hihọ́ yetọn, eyin owù-nujijọ de jọ. Mì de fie mì gán pé te lẹ, e gán yin to nọtẹn gbangba tọn de kavi ofi mọnkọ devo. Nọtẹn dopo ni to lẹdo mìtọn mẹ podọ devo ni to olá. Tohọluduta lẹ na ayinamẹ dọ nuyọnẹnnu wẹ e yin dọ mì ni zinzọnlin yì nọtẹn lọ lẹ whlasusu po whẹndo mìtọn po.
• Bayi tito nado gọalọna mẹdevo lẹ, etlẹ yin mẹhomẹ po madogánnọ lẹ po.
g17.5-F 6
NUE SIN HUDO A GÁN DO LẸ
Titobasinanu he nọ penukundo nujijọ ajiji go lẹ na ayinamẹ dọ whẹndo lẹ ni nọ wleawuna nuhe sin hudo yé na do to nugbajẹmẹji whenu lẹ bo nọ vọ́ yé pọ́n to whemẹwhemẹ nado yọ́n nuhe yé gán diọ lẹ. Ninọmẹ towe kavi fie a nọ nọ̀ gán zọ́n bọ nue sin hudo a na do na gbọnvona dehe mẹdevo na do hudo etọn. Eyin mẹhe nọ penukundo nujijọ ajiji go lẹ to lẹdo towe mẹ, kanhose yé nado yọ́n nue sin hudo a na do lẹ.
Ayinamẹ he nọ saba yin nina wẹ yindọ e whè gbau osin litli 11 ni tin na mẹdopodopo. Podọ, núdùdù he ma na yawu gble bo masọ biọ didà, ehe yè gán dù na azán atọ̀n ni tin.
Gbọnvona enẹ, whẹndo delẹ ko wleawuna saki he bẹ onú dandan tọn delẹ hẹn he yé sọgan ze nado yawu họ̀n. Delẹ to nuhe yé bẹ do e mẹ lẹ mẹ die:
(Delẹ to nuhe yin sislẹ tofi lẹ mẹ gán nọma yọ́n-na-yizan na we kavi gán nọma yọ́n-na-yizan to awà he ji a nọ nọ̀. E gán biọ dọ a ni yí nudevo he ma yin sislẹ tofi lẹ dogọ.)
■ Avọ̀ he yè gán ṣinyọ́n lẹ, awù he gán hlá yozò lẹ po afọpa titli he gán zọ́n bọ yè ma na yawu gbleawu po
■ Tọṣi, ladio (he nọ zan opẹ́n [pile] kavi ladio he do awà bọ yè nọ lilẹ́), gọna opẹ́n he yè ma ko zan lẹ
■ Agbá kleun he mẹ amasin, apà-tlẹ́nú po onú mọnkọ lẹ po te, gọna ován he yè na kún nado biọ alọgọ
■ Núdù-panu, ohí pẹvi po fọ́fi po
■ Nuhe yè gán ṣinyọ́n do awọ̀nnù po awọntin po (masque anti-poussière), nuhe yè gán do tlẹ́nù bọ e ma na kùn osin, gọna singlọnnu he yè gán do bayi azava bo nọ e mẹ
■ Nùmẹ-klọ́nu, adí, awusúnsúnvọ̀, po wema he yè nado yì adàdo ji po
■ Núzinzan yọpọvu tọn lẹ gọna núzinzan dandan tọn lẹ na mẹhomẹ kavi madogánnọ lẹ
■ Saki pẹvi he ma na nù osin, ehe mẹ amasin he a nọ do hudo etọn lẹ te, wema he doto do kàn amasin na we lẹ, gọna wema vivẹ́ devo lẹ
■ Todohukanji sọha alokan he sin hudo a na do to niyaniya mẹ lẹ tọn, kandai nọtẹn he mì gán pé te to nujijọ ajiji whenu lẹ tọn, po kalti lẹdo mìtọn tọn po
■ Kalti akuẹ-yíyí tọn po akuẹ pẹẹde po
■ Họnhungan owhé, ohún po kẹkẹ po tọn lẹ
■ Wema, wekantin, owe, po aihundanu yọpọ lẹ tọn po
■ Biblu
7-13 JUIN
NUHỌAKUẸ LẸ SỌN OHÓ JIWHEYẸWHE TỌN MẸ | DEUTELONOMI 3-4
“Osẹ́n Jehovah Tọn lẹ Sọgbe bo Gọ́ Na Nuyọnẹn”
it-1-F 1199 huk. 2
Nukunnumọjẹnumẹ
Mẹhe nọ plọn Ohó Jiwheyẹwhe tọn po gbedide etọn lẹ po bo nọ yí nuhe e plọn do yizan mẹ gán tindo zinzin hú mẹhe yin mẹplọntọ etọn lẹ bo gán sọ tindo nukunnumọjẹnumẹ hú mẹhomẹ lẹ. (Slm 119:99, 100, 130; yijlẹdo Luk 2:46, 47 go.) Whẹwhinwhẹ́n lọ wẹ yindọ, aṣẹdai wiwe po nudide whẹdida tọn Jiwheyẹwhe tọn lẹ po nọ gọ́ na nuyọnẹn po nukunnumọjẹnumẹ po; enẹwutu eyin Islaelivi lẹ setonu mlẹnmlẹn, akọta he lẹdo yé lẹ na nọ mọ yé di “akọta . . . nuyọnẹntọ po zinzintọ po.” (De 4:5-8; Slm 111:7, 8, 10; yijlẹdo 1Ah 2:3 go.) Mẹhe tindo nukunnumọjẹnumẹ nọ yọnẹn dọ Ohó Jiwheyẹwhe tọn nọ sọgbe janwẹ, enẹwutu e nọ jlo na nọgbẹ̀ sọgbe hẹ ẹ, bo nọ biọ alọgọ Jiwheyẹwhe tọn nado wàmọ. (Slm 119:169) E nọ hẹn owẹ̀n Jiwheyẹwhe tọn zun etọn titi (Mt 13:19-23), nọ kàn ẹn do ahun etọn mẹ (Hwh 3:3-6; 7:1-4), bo nọ plọn nado gbẹwanna “ali lalo tọn lẹpo” (Slm 119:104). To whenue Visunnu Jiwheyẹwhe tọn to aigba ji, e dohia dọ emi tindo nukunnumọjẹnumẹ bo ma tẹnpọn nado họ̀nna okú to yatin ji, na e yọnẹn dọ emi dona kú to aliho enẹ mẹ na Owe-wiwe lẹ nido mọ hẹndi.—Mt 26:51-54.
w99 1/11 20 huk. 6-7
To Whenuena Alọtútlú Lẹzun Susugege
Na yinyin pipaṣa gbọn nuhe e sè bosọ mọ lẹ dali wutu, ahọsi lọ yí whiwhẹ do gblọn dọmọ: “[Ayajẹnọ, NW ] wẹ mẹmẹsi towe helẹ, he nọ ṣite tẹgbẹ̀ to nukọn towe, po he to nuyọnẹn towe sè lẹ po.” (1 Ahọlu lẹ 10:4-8) Ewọ ma lá devizọnwatọ Sọlọmọni tọn lẹ dọ ayajẹnọ na yé yin lilẹdo pé gbọn adọkun susugege dali gba—yèdọ dile etlẹ yinmọ na yé do. Kakatimọ, devizọnwatọ Sọlọmọni tọn lẹ yin didona na yé sọgan dotoai na nuyọnẹn heyin ninamẹ sọn Jiwheyẹwhe dè Sọlọmọni tọn wutu. Apajlẹ dagbe nankọ die ahọsi Ṣeba tọn yin na omẹ Jehovah tọn lẹ to egbehe, he to aglinjẹ to nuyọnẹn Mẹdatọ lọ lọsu titi tọn mẹ podọ enẹ heyin Visunnu etọn, yèdọ Jesu Klisti tọn mẹ lẹ!
Nudevo he sọ jẹ na ayidego wẹ hodidọ ahọsi lọ tọn he bọdego hlan Sọlọmọni dọmọ: “Donanọ OKLUNỌ Jiwheyẹwhe towe [ni] yin.” (1 Ahọlu lẹ 10:9) E họnwun dọ, ewọ mọ alọ Jehovah tọn to nuyọnẹn po kọdetọn dagbe tintindo Sọlọmọni tọn po mẹ. Ehe tin to gbesisọmẹ hẹ nuhe Jehovah ko dopagbe jẹnukọn hlan Islaeli. ‘Tonusisena gbedide ṣie lẹ,’ wẹ ewọ dọ, “wẹ nuyọnẹn mìtọn po wuntuntun mìtọn po to nukun gbẹtọ lẹ lọ tọn mẹ, he na sè aṣẹdai helẹ pó, bo dọmọ, Nugbonugbo gbẹtọ nuyọnẹntọ podọ wuntuntọ de wẹ akọ daho he.”—Deutelonomi 4:5-7.
w07 1/8 29 huk. 13
Be Hiẹ Yin “Adọkunnọ Gbọn Jiwheyẹwhe Dali” Ya?
13 Eyin Jehovah kọ̀n dona jẹgbonu do omẹ etọn lẹ ji, nunina dagbe hugan lẹ wẹ e nọ na yé to whepoponu. (Jakobu 1:17) Di apajlẹ, to whenuena Jehovah na fininọ de hlan Islaelivi lẹ, “aigba . . . he yí oyìnnọ po owín po do to sisà” de wẹ e na yé. Dile etlẹ yindọ aigba Egipti tọn lọsu ko yin zẹẹmẹ basina to aliho enẹ mẹ, aigba he Jehovah na Islaelivi lẹ gbọnvo e whè gbau to aliho tangan dopo mẹ. Mose dọna Islaelivi lẹ dọ ‘aigba de he Jehovah Jiwheyẹwhe towe to nukunpedego’ wẹ e yin. To hogbe devo mẹ, yé na tindo kọdetọn dagbe na Jehovah na to nukunpedo yé go wutu. Dile Islaelivi lẹ gbọṣi nugbonọ-yinyin mẹ hlan Jehovah dẹnsọ, yé yin didona susugege gbọn ewọ dali bo duvivi aliho gbẹninọ de tọn he yiaga tlala hú akọta he lẹdo yé pé lẹ tọn. Mọwẹ, dona Jehovah tọn wẹ “nọ hẹnmẹ wàdọkun”!—Osọha lẹ 16:13; Deutelonomi 4:5-8; 11:8-15.
Onú Sisosiso Gbigbọmẹ Tọn Lẹ
w04 15/9 25 huk. 3
Nuagokun lẹ sọn Owe Deutelonomi Tọn Mẹ
4:15-20, 23, 24—Be osẹ́n lọ he gbẹ́ boṣiọ pipà zẹẹmẹdo dọ yẹdide yẹyi tọn lẹ bibasi yin nuhe jẹagọ wẹ? Lala. Nuhe gbẹ́ osẹ́n ehe te wẹ boṣiọ lẹ pipà na sinsẹ̀n-bibasi—kavi ‘taliliaina boṣiọ lẹ bo sẹ̀n yé.’ Owe-wiwe lẹ ma gbẹ́ atinpipa kavi yẹdide yẹyi tọn lẹ tintindo gba.—1 Ahọlu lẹ 7:18, 25.
14-20 JUIN
NUHỌAKUẸ LẸ SỌN OHÓ JIWHEYẸWHE TỌN MẸ | DEUTELONOMI 5-6
“Plọn Ovi Towe lẹ Nado Yiwanna Jehovah”
w05 15/6 20 huk. 11
Mẹjitọ lẹ Emi, Mí Penukundo Nuhudo Whẹndo Mìtọn Tọn lẹ Go
11 To whẹho ehe mẹ, dibla yindọ Deutelonomi 6:5-7 wẹ nọ saba yin alọdlẹndo hugan. Jaale hùn Biblu towe bo hia wefọ enẹlẹ. Doayi e go dọ mẹjitọ lẹ yin didọna jẹnukọn nado wleawuna gbigbọnọ-yinyin yetọn titi, bo yiwanna Jehovah bosọ yí ohó etọn lẹ do ayiha yetọn mẹ. Mọwẹ, mì dona yin Ohó Jiwheyẹwhe tọn plọntọ vivẹnunọ, bo nọ hia Biblu to gbesisọmẹ bosọ nọ lẹnayihamẹpọn deji nado sọgan yọ́n aliho, nunọwhinnusẹ́n, po osẹ́n Jehovah tọn lẹ po ganji bosọ yiwanna yé. Taidi kọdetọn de, ahun mìtọn na gọ́ na nugbo ojlofọndotenamẹ Biblu tọn lẹ he na whàn mì nado tindo ayajẹ, sisi, po owanyi po hlan Jehovah. Mì na tindo onú dagbe susugege nado plọn ovi mìtọn lẹ.—Luku 6:45.
w07 15/5 15 huk 5
Nawẹ Yẹn Sọgan Gọalọna Ovi ṣie lẹ Nado Mọ Oplọn Dagbe Yí Gbọn?
Mẹwhinwhàn, nujinọtedo, walọ dagbe po nuhe a tindo ojlo na lẹ po ma nọ sọawuhia to hodidọ towe kẹdẹ mẹ gba ṣigba to nuhe a nọ wà lẹ mẹ ga. (Lomunu lẹ 2:21, 22) Sọn ovu whenu, ovi lẹ nọ plọnnu gbọn sọwhiwhe yíyí do doayi nuhe mẹjitọ lẹ to wiwà go dali. Ovi lẹ nọ doayi nuhe nọ duahunmẹna mẹjitọ yetọn lẹ go, podọ onú enẹlẹ wẹ nọ saba lẹzun nujọnu na yé. Eyin hiẹ yiwanna Jehovah nugbonugbo, ovi towe lẹ na yọnẹn. Di dohia, yé na mọ dọ Biblu hihia po nupinplọn po nọ duahunmẹna we. Yé na doayi e go dọ hiẹ ze dagbenu Ahọluduta lọ tọn lẹ do otẹn tintan mẹ to gbẹzan towe mẹ. (Matiu 6:33) Opli Klistiani tọn lẹ yìyì to gbesisọ mẹ po mahẹ tintindo to azọ́n yẹwhehodidọ Ahọluduta lọ tọn mẹ po na dohia yé dọ sinsẹ̀n-bibasi wiwe ṣeke hlan Jehovah wẹ yin nujọnu hugan na we.—Matiu 28:19, 20; Heblu lẹ 10:24, 25.
w05 15/6 21 huk. 14
Mẹjitọ lẹ Emi, Mí Penukundo Nuhudo Whẹndo Mìtọn Tọn lẹ Go
14 Dile Deutelonomi 6:7 dohia do, dotẹnmẹ hundote susu tin he mì mẹjitọ lẹ sọgan yizan nado dọho hẹ ovi mìtọn lẹ do gbigbọnu lẹ ji. Vlavo mì to gbejizọnlinzin, to whégbè-zọ́n lẹ wà, kavi to ayidedai to pọmẹ, mì sọgan dín dotẹnmẹ hundote lẹ nado penukundo nuhudo gbigbọmẹ tọn ovi mìtọn lẹ tọn go. Nugbo wẹ dọ mì ma dona nọ bẹ nugbo Biblu tọn lẹ “zindo” ovi mìtọn lẹ ji madoalọte gba. Kakatimọ, mì tẹnpọn na hodọdopọ whẹndo tọn lẹ ni yin mẹjlọdote tọn, bo nọ sinai do gbigbọnu lẹ ji. Di apajlẹ, Réveillez-vous! nọ bẹ hosọ susu hẹn he dọhodo onú voovo lẹ ji. Hosọ mọnkọtọn lẹ sọgan hùnali dote na hodọdopọ lẹ gando kanlin he Jehovah dá lẹ, nọtẹn whanpẹnọ jọwamọ tọn lẹ lẹdo aihọn pé, gọna vogbingbọn ayidego tọn he tin to aṣa po aliho gbẹninọ gbẹtọvi lẹ tọn po ṣẹnṣẹn go. Hodọdopọ ehelẹ sọgan whàn jọja lẹ nado nọ hia owe he afanumẹ nugbonọ nuyọnẹntọ lọ wleawuna lẹ susu dogọ.—Matiu 24:45-47.
Onú Sisosiso Gbigbọmẹ Tọn Lẹ
w19.02 22 huk. 11
Owanyi po Whẹdida Dodo po to Islaeli Hohowhenu Tọn
11 Nuplọnmẹ lẹ: Jehovah nọ mọnú zẹ̀ awusọhia gbonu tọn gbẹtọ tọn go. E nọ mọ mẹhe mí yin to homẹ nugbonugbo, yèdọ to ahun mítọn mẹ. (1 Sam. 16:7) Linlẹn, numọtolanmẹ kavi nuyiwa depope ma sọgan yin whiwhla do e. E nọ dín nudagbe he to mí mẹ lẹ bosọ nọ yọ́n pinpẹn yetọn. Ṣigba, e jlo dọ mí ni nọ doayi linlẹn ylankan lẹ go bo dava yé whẹpo yé nido hẹn mí nado wà nuylankan lẹ.—2 Otàn. 16:9; Mat. 5:27-30.
21-27 JUIN
NUHỌAKUẸ LẸ SỌN OHÓ JIWHEYẸWHE TỌN MẸ | DEUTELONOMI 7-8
“Hiẹ Ma Dona Biọ Kanṣiṣa Alọwle Tọn Depope mẹ hẹ Yé”
w12 1/10 22 huk. 2
Naegbọn Jiwheyẹwhe Do Biọ Dọ Sinsẹ̀n-Basitọ Emitọn lẹ Ni Wlealọ hẹ Yisenọ Hatọ lẹ Kẹdẹ?
Tintan, Jehovah yọnẹn dọ Satani jlo na hẹn omẹ Emitọn lẹ flu gbọn lilẹ́ yé biọ sinsẹ̀n-bibasi hlan yẹwhe lalo lẹ mẹ dali. Enẹwutu, Jiwheyẹwhe na avase dọ mayisenọ lọ lẹ “na gọ̀ visunnu towe sẹ̀ sọn hihodo mi mẹ, na yé nido nọ sẹ̀n yẹwhe devo lẹ.” Ehe sọgan hẹn nuhahun susu wá. Eyin Islaelivi lẹ jẹ yẹwhe devo lẹ sẹ̀n ji, yé na hẹn nukundagbe po hihọ́ Jiwheyẹwhe tọn po bu bo gbọnmọ dali jẹ alọ kẹntọ yetọn lẹ tọn mẹ po awubibọ po. To whelọnu lo, nawẹ akọta lọ sọgan wleawuna Mẹsia dopagbe lọ gbọn? E họnwun dọ lẹndai de wutu wẹ Satani do klọ Islaelivi lẹ nado wlealọ hẹ mayisenọ lẹ.
w15 15/3 30 huk. 7
Alọwiwle “to Oklunọ mẹ Kẹdẹ”—Be E Gbẹ́ Yin Nuyọnẹnnu Ya?
Etomọṣo, Jehovah ko na mí anademẹ lẹ to Ohó etọn mẹ nado wlealọ to Oklunọ mẹ kẹdẹ. Etẹwutu? Na e yọ́n nuhe na wà dagbe na omẹ etọn lẹ wutu. E ma yindọ ewọ jlo na basi hihọ́na devizọnwatọ etọn lẹ sọn awufiẹsa he yé nọ tindo to whenu yé basi nudide he ma sọgbe lẹ si kẹdẹ wẹ gba, ṣigba na e sọ jlo dọ yé ni tindo ayajẹ wutu. To azán Nẹhemia tọn gbè to whenue Juvi lẹ to alọwle hẹ jonọ he ma nọ sẹ̀n Jehovah lẹ, Nẹhemia dọ̀n ayiha yetọn wá apajlẹ ylankan he Sọlomọni zedai ji. Dile etlẹ yindọ Sọlomọni “yin mẹyiwanna sọn Jiwheyẹwhe etọn dè, . . . ewọ wẹ yọnnu jonọ lẹ hẹn nado waylando.” (Nẹh. 13:23-26) Enẹwutu, Jiwheyẹwhe na anademẹ devizọnwatọ etọn lẹ nado nọ wlealọ hẹ sinsẹ̀n-basitọ nugbo lẹ kẹdẹ, na dagbe mítọn wutu. (Ps. 19:7-10; Isa. 48:17, 18) Klistiani nugbo lẹ yọ́n pinpẹn mẹtọnhopọn owanyinọ Jiwheyẹwhe tọn bo nọ ganjẹ anademẹ etọn go. Yé nọ litaina ẹn taidi Ogán yetọn bo nọ gbọnmọ dali dohia dọ ewọ wẹ yin Nupojipetọ Wẹkẹ lọ tọn.—Howh. 1:5.
w15 15/8 26 huk. 12
Payi Gbẹdido Towe Go to Azán Godo Tọn Ehelẹ Mẹ
12 Nujọnu taun wẹ e yin na Klistiani tlẹnnọ he jlo na wlealọ lẹ nado nọ payi mẹhe yé nọ dogbẹ́ hẹ lẹ go. Ohó Jiwheyẹwhe tọn na ayinamẹ he họnwun dọmọ: “Mì biọ zẹgẹ he ma sọzẹn de glọ hẹ mayisenọ lẹ blo. Na haṣinṣan tẹwẹ dodowiwa po sẹ́nhẹngba po tindo? Kavi mahẹ tẹwẹ hinhọ́n tindo hẹ zinvlu?” (2 Kọl. 6:14) Biblu na ayinamẹ devizọnwatọ Jiwheyẹwhe tọn he to alọwlemẹ dín lẹ nado wlealọ “to Oklunọ mẹ kẹdẹ,” enẹ wẹ nado dà mẹhe ko klan yede do wiwe lẹ kẹdẹ, yèdọ mẹhe ko yí baptẹm bosọ lẹzun sinsẹ̀n-basitọ Jehovah tọn he nọ nọgbẹ̀ sọgbe hẹ nuplọnmẹ Owe-wiwe tọn lẹ. (1 Kọl. 7:39) Gbọn alọwiwle hẹ yisenọ hatọ lẹ dali, Klistiani lẹ nọ duvivi gbẹdohẹmẹtọ he ko klan yede do wiwe na Jehovah bo na gọalọna yé nado hẹn tenọgli yetọn go lẹ tọn.
Onú Sisosiso Gbigbọmẹ Tọn Lẹ
w04 1/2 13 huk. 4
Jehovah Nọ Wleawuna Nuhudo Egbesọ Tọn Mítọn Lẹ
4 Dẹ̀hiho na núdùdù egbesọ tọn sọ dona flinnu mí dọ mí tindo nuhudo núdùdù gbigbọmẹ tọn ga. Dile etlẹ yindọ huvẹ to Jesu hù sinsinyẹn to nùbibla na azán susu godo, e nọavunte sọta whlepọn Satani tọn nado diọ zannu zun akla, bo dọmọ: “Yè ko wlanwe etọn dọ, gbẹtọ ma to ogbẹ̀ gbọn akla dopo kẹdẹ sinmẹ gba, adavo gbọn ohó he tọ́nsọn onù Jiwheyẹwhe tọn mẹ lẹpo dali.” (Matiu 4:4) Tofi, Jesu yihodọ sọn yẹwhegán Mose dè, mẹhe dọna Islaelivi lẹ dọmọ: “[Jehovah] sọ hòhuwhẹ we, bo hẹn huvẹ hù we, bosọ yí mana do yìn we, he hiẹ ma yọnẹn, mọ otọ́ towe lẹ ma yọnẹn gba; na e nido hẹn we yọnẹn dọ gbẹtọ ma togbẹ̀ gbọn núdùdù kẹdẹ dali gba, ṣigba gbọn onú dopodopo he tọ́nsọn onù OKLUNỌ lọ tọn mẹ jẹgbonu dali wẹ gbẹtọ togbẹ̀ te.” (Deutelonomi 8:3) Aliho he mẹ Jehovah na mana lọ Islaelivi lẹ te hẹn yé nado mọ núdùdù agbasa tọn dù bosọ wleawuna nuplọnmẹ gbigbọmẹ tọn lẹ na yé ga. Di apajlẹ, yé dona “ṣinyan mimá azán dopo tọn egbesọegbesọ.” Eyin yé ṣinyan hú dehe yé na dù to azán dopo gbè, lankan lọ nọ jẹ wánlùn ji bosọ nọ jìwé. (Eksọdusi 16:4, 20) ṣogan, ehe ma nọ jọ to azán ṣidopotọ he gbè yé dona bẹ donù awe sọha he yé nọ ṣinyan egbesọegbesọ tọn pli na núdùdù Gbọjẹzangbe tọn. (Eksọdusi 16:5, 23, 24) Enẹwutu mana lọ nọ flin yé gbọzangbọzan dọ yé dona yin tonusetọ podọ dọ e mayin akla kẹdẹ wẹ to yé hẹn do ogbẹ̀ gba ṣigba “onú dopodopo he tọ́nsọn onù OKLUNỌ lọ tọn mẹ jẹgbonu.”
AWUWIWLENA LIZỌNYIZỌN KUNNUDEGBE TỌN
w06 1/1 28 huk. 14-15
Afọdidona Dodo Na Basi Hihọ́na Mí
14 Ojlẹ vude whẹpo Islaelivi lẹ do biọ Aigba Pagbe tọn mẹ, Jehovah na yé avase ma nado wọ̀n emi. E dọmọ: “Payiha hiẹ nikaa wọ̀n OKLUNỌ lọ Jiwheyẹwhe towe, to gbedide etọn lẹ ma yìn mẹ, po whẹdida etọn lẹ po, po aṣẹdai etọn lẹ po, he yẹn degbena we to egbehe: hiẹ nikaa ko dù bosọ yin gigọ́, bo ko dó ohọ̀ dagbedagbe lẹ, bo nọ nọ̀ e mẹ; podọ whenuena kanlinpó towe lẹ po kanlinpa towe lẹ po sudeji, bọ yè sọ hẹn fataka towe po sika towe po sudeji, bọ yè sọ hẹn ehe hiẹ tindo lẹpo sudeji; whenẹnu bọ ayiha towe yin zizedaga, bọ hiẹ wọ̀n OKLUNỌ lọ Jiwheyẹwhe towe.”—Deutelonomi 8:11-14.
15 Be onú mọnkọtọn sọgan jọ to egbehe ya? Mọwẹ, eyin mí ze nuhe ma sọgbe lẹ do otẹn tintan mẹ. Ṣigba, eyin mí nọ dín dodo Jiwheyẹwhe tọn whẹ́, sinsẹ̀n-bibasi wiwe ṣeke wẹ mí na ze do otẹn tintan mẹ to gbẹzan mítọn mẹ. Dile Paulu na tuli mí nado wà do, mí na nọ ‘fli ojlẹ’ bo hẹn ẹn do ayiha mẹ dọ lizọnyizọn mítọn yin nuhe mí dona wà to niyaniya mẹ. (Kọlọsinu lẹ 4:5; 2 Timoti 4:2) Nalete, eyin gbọjẹyíyí kavi afọdidona gbẹdudu wá yíta to opli lẹ po sinsẹ̀nzọn kunnudegbe tọn po si, mí sọgan wọ̀n Jehovah na mí ko ze e do otẹn awetọ mẹ to gbẹzan mítọn mẹ wutu. Paulu dọ dọ to azán godo tọn lẹ mẹ, gbẹtọ lẹ na lẹzun “wanyina aṣọ́ [kavi gbẹdudu] hú Jiwheyẹwhe tọ́.” (2 Timoti 3:4) Klistiani ahundoponọ lẹ nọ gbeje yede pọ́n whẹwhẹ nado hẹn ẹn diun dọ nulẹnpọn mọnkọtọn ma yinuwado yé ji.—2 Kọlintinu lẹ 13:5.
28 JUIN–4 JUILLET
NUHỌAKUẸ LẸ SỌN OHÓ JIWHEYẸWHE TỌN MẸ | DEUTELONOMI 9-10
“Etẹwẹ Jehovah to Bibiọ sọn Hiẹ Si?”
w10 1/1 20 huk. 3-4
Etẹwẹ Jehovah Biọ to Mí Si?
Etẹwẹ sọgan whàn mí nado setonuna Jiwheyẹwhe sọn ahun mẹ? Mose donù onú dopo go dọmọ: “Dibusi OKLUNỌ lọ Jiwheyẹwhe towe.” (Wefọ 12) Ehe ma zẹẹmẹdo nado to sijọsijọ ji na mí to budina kọdetọn ylankan lẹ wutu gba, kakatimọ e dlẹnalọdo osi sisosiso tintindo na Jiwheyẹwhe podọ nado yọ́n pinpẹn aliho etọn lẹ tọn. Eyin mí tindo sisi sisosiso na Jiwheyẹwhe, mí ma na jlo nado hẹn homẹgble e.
Ṣigba, etẹwẹ dona yin onú tintan he na whàn mí nado setonuna Jiwheyẹwhe? Mose dọmọ: “Yiwanna [Jehovah, bo] nọ sẹ̀n OKLUNỌ lọ Jiwheyẹwhe towe po ayiha towe lẹpo po, podọ po alindọn towe lẹpo po.” (Wefọ 12) Wanyina Jiwheyẹwhe bẹ nususu hẹn hugan numọtolanmẹ kẹdẹ. Owe alọdlẹndonu tọn de basi zẹẹmẹ dọmọ: “To whedelẹnu, hogbe he Heblugbe nọ yizan nado do numọtolanmẹ hia lẹ sọ nọ dlẹnalọdo nuyiwa he nọ dekọtọn sọn numọtolanmẹ mọnkọtọn lẹ mẹ.” Owe dopolọ sọ dohia dọ wanyina Jiwheyẹwhe zẹẹmẹdo nado nọ “yinuwa po owanyi po” hlan ẹn. To hogbe devo mẹ, eyin mí yiwanna Jiwheyẹwhe, mí na nọ yinuwa to aliho he mí yọnẹn dọ e na hẹn homẹ etọn hùn lẹ mẹ.—Howhinwhẹn lẹ 27:11.
w10 1/1 20 huk. 6
Etẹwẹ Jehovah Biọ to Mí Si?
Eyin mí desọn ojlo mẹ bo setonu, enẹ na hẹn dona wá. Mose wlan dọmọ: “Nọ payi gbedide OKLUNỌ lọ tọn lẹpo go . . . he yẹn degbena we to egbehe na dagbe towe.” (Wefọ 13) Mọwẹ, gbedide Jehovah tọn lẹpo—yèdọ nuhe e nọ biọ to mí si lẹpo—wẹ yin na dagbe mítọn. Enẹ ma paṣa mí, na Biblu dọ dọ “Jiwheyẹwhe wẹ owanyi.” (1 Johanu 4:8, NW) Enẹwutu, gbedide he na hẹn ale tẹgbẹ tọn wá na mí lẹ kẹdẹ wẹ e nọ na mí. (Isaia 48:17) Nuhe Jehovah biọ to mí si lẹpo wiwà na whlẹn mí sọn flumẹjijẹ susu mẹ todin, bo na dekọtọn do dona mavọmavọ lẹ mẹ na mí to sọgodo to gandudu Ahọluduta etọn tọn glọ.
cl 16 huk. 2
Be Hiẹ Sọgan ‘Dọnsẹpọ Jiwheyẹwhe’ Nugbonugbo?
2 Ablaham he nọgbẹ̀ to hohowhenu duvivi kanṣiṣa mọnkọtọn tọn. Jehovah ylọ tọgbo enẹ dọ “họntọn ṣie.” (Isaia 41:8) Mọwẹ, Jehovah pọ́n Ablaham hlan taidi họntọn etọn. Ablaham mọ haṣinṣan pẹkipẹki mọnkọtọn yí na ewọ “yí Jiwheyẹwhe sè” wutu. (Jakobu 2:23) To egbehe ga, Jehovah nọ dín dotẹnmẹ hundote lẹ nado ‘dọnsẹpọ’ mẹhe nọ sẹ̀n ẹn sọn owanyi mẹ wá lẹ. (Deutelonomi 10:15) Ohó etọn dotuhomẹnamẹ dọmọ: “Mì sẹpọ Jiwheyẹwhe, ewọ nasọ sẹpọ mì.” (Jakobu 4:8) Mí mọ oylọ-basina po opagbe po to hogbe ehelẹ mẹ.
Onú Sisosiso Gbigbọmẹ Tọn Lẹ
it-1-F 115 huk. 3
Anakimi Lẹ
Mẹhe to akọ̀ ehe mẹ lẹ nọ súnte taun, bo nọ nọ̀ hùwaji Kenani tọn, to lẹdo osó tọn lẹ mẹ podọ to lẹdo he to huto delẹ. To ojlẹ de mẹ, sunnu ayidego tọn atọ̀n sọn akọ̀ lọ mẹ, enẹ wẹ Ahimani, Ṣeṣai po Talmai po, nọ Heblọni. (Sọh 13:22) Podọ finẹ wẹ amẹ́ Heblu 12 lọ lẹ mọ Anakimi lẹ te whla tintan bọ 10 to yé mẹ na linlin he dobu gando mẹhe to otò lọ mẹ lẹ go bo dọ dọ kúnkan Nẹfilimi he nọgbẹ̀ jẹnukọnna Singigọ lọ tọn wẹ yé, bọ yewu Heblu lẹ taidi “obọ̀” to nukọn yetọn. (Sọh 13:28-33; De 1:28) Na Anakimi lẹ nọ súnte taun wutu, yè nọ yí sunnu gángánsu Emimi po Lefaimi po tọn lẹ jlẹdo yé go. Vlavo huhlọn he yé do wẹ zọ́n bọ mẹlẹ do nọ dọ dọ: “Mẹnu wẹ sọgan nọte to visunnu Anaki tọn lẹ nukọn?”—De 2:10, 11, 20, 21; 9:1-3.