Jọja He Nọ Hẹn Homẹ Jehovah Tọn Hùn Lẹ
“Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.”—HOWHINWHẸN LẸ 27:11.
Hosọ nupinplọn tọn ehelẹ yin awuwlena titengbe na jọja he tin to Kunnudetọ Jehovah tọn lẹ ṣẹnṣẹn. Enẹwutu, mí na tuli jọja lẹ nado plọn hosọ ehelẹ ganji bo na gblọndo po awuvivo po to whenuena yé yin dogbapọnna to Oplọn Atọ̀họ̀-Nuhihọ́ Lọ Tọn agun tọn whenu.
1, 2. (a) Basi zẹẹmẹ vlavo eyin ojlo tintindo na onú aihọn tọn lẹ zẹẹmẹdo dọ hiẹ ma jẹ nado yin Klistiani de ba. (Lomunu lẹ 7:21) (b) Etẹwẹ hiẹ plọn sọn apajlẹ Asafi tọn mẹ? (Pọ́n apotin, weda 13.)
MÌ NI dọ dọ hiẹ yì ahimẹ nado họ̀ avọ̀. Dile a to avọ̀ lọ lẹ kàn, a mọ avọ̀ de he a yiwanna to afọdopolọji. Sinmẹ po wunmẹ avọ̀ lọ tọn po taidi nuhe jẹ towe ji pẹpẹ, podọ akuẹ etọn pọ̀ taun. Ṣigba hiẹ wá vọ́ ẹ pọ́n kitokito todin. E paṣa we tlala nado doayi e go dọ avọ̀ lọ ko wọ̀ sọn adà mẹ podọ titọ̀ lọ masọ ló paali. Dile etlẹ yindọ avọ̀ lọ yọnwhanpẹ, nususu jẹdò to e go. Be a na yí akuẹ towe do họ̀ avọ̀ mọnkọtọn ya?
2 Yí ehe jlẹdo ninọmẹ he sọgan pannukọn we taidi jọja Klistiani de go. Onú aihọn tọn lẹ mimọ to tintan whenu—taidi avọ̀ enẹ—sọgan taidi nuhe dọnmẹdogo tlala. Di dohia, wehọmẹvigbẹ́ towe lẹ sọgan nọ yì agọ́ he vivi lẹ tẹnmẹ, zan amasin adínọ, nùahàn, dó dope matin gbemima alọwle tọn, bo tindo zanhẹmẹ jẹnukọnna alọwle. Be aliho gbẹninọ tọn mọnkọtọn nọ jlo we to whedelẹnu wẹ ya? Be e nọ jlo we nado dọ́ nuhe yé ylọ dọ mẹdekannujẹ yetọn pọ́n wẹ ya? Eyin mọwẹ, ma yawu wá tadona kọ̀n dọ hiẹ yin mẹylankan bo ma jẹ nado yin Klistiani de blo. To popolẹpo mẹ, Biblu dohia dọ aihọn sọgan yinuwadomẹji tlala—etlẹ yin mẹhe jlo nado hẹn homẹ Jiwheyẹwhe tọn hùn lẹ.—2 Timoti 4:10.
3. (a) Naegbọn afọdidona onú aihọn tọn lẹ do yin nuvọ́? (b) Nawẹ Klistiani de basi zẹẹmẹ ovọ́-yinyin yanwle aihọn tọn lẹ tọn gbọn?
3 Todin jaale bo yí nukun homẹ tọn do pọ́n nuhe tin to aihọn mẹ lẹ kitokito, kẹdẹdile a na pọ́n avọ̀ he a jlo na họ̀ de do. Kanse dewe dọ, ‘Onú dagbe tẹwẹ tin to aihọn ehe mẹ?’ Biblu dọ dọ ‘aihọn to jujujei.’ (1 Johanu 2:17) Awuvivi depope heyin mimọ sọn e mẹ to ninọmẹ dagbe hugan lẹ glọ ma na dẹn-to-aimẹ gba. Humọ, kọdetọn walọ ylankan tọn lẹ vẹahi taun. Na jide tọn e nọ vẹadi taun. Klistiani de he dona doakọnna nuhe e ylọ dọ “awufiẹsa he wá sọn jọja whenu ṣiṣizan mẹ,” dọmọ: “Aihọn sọgan taidi nuhe dọnmẹdogo bo yin awuvivinu. Podọ e jlo dọ a ni yise dọ hiẹ sọgan dugbẹ matin awufiẹsa depope. Ṣigba ehe ma yọnbasi. Aihọn na tafu we bo na ze we dlan to enẹgodo poun wẹ.”a Naegbọn a na hẹn jọja whenu towe gú do aliho gbẹzan ylankan mọnkọtọn ji?
Hihọ́ sọn ‘Mẹylankan lọ’ Si
4, 5. (a) Etẹwẹ Jesu hodẹ̀ bo biọ to Jehovah si whẹpo do kú? (b) Naegbọn obiọ ehe do sọgbe?
4 Jọja Kunnudetọ Jehovah tọn lẹ yọnẹn dọ aihọn ehe ma tindo nujọnu de nado zedonukọnnamẹ, enẹwutu yé nọ dovivẹnu nado dapana họntọnjiji hẹ aihọn. (Jakobu 4:4) Be hiẹ yin dopo to jọja nugbonọ ehelẹ mẹ ya? Eyin mọwẹ, a jẹna pipà. Nugbo wẹ dọ e ma nọ bọawu nado nọavunte sọta kọgbidinamẹ hagbẹ tọn bo yin yinyọnẹn taidi mẹhe gbọnvo, ṣigba hiẹ tindo alọgọtọ de.
5 Ojlẹ vude whẹpo Jesu do kú, e hodẹ̀ dọ Jehovah ni ‘basi hihọ́na’ devi etọn lẹ ‘na mẹylankan lọ tọn wutu.’ (Johanu 17:15) Whẹwhinwhẹ́n dagbe wutu wẹ Jesu basi obiọ ehe. E yọnẹn dọ tenọgligo hinhẹn ma na bọawu na hodotọ etọn lẹ, mahopọnna owhe he yé tindo. Etẹwutu? Na, dile Jesu dọ do, whẹwhinwhẹ́n dopo wẹ yindọ devi etọn lẹ na pehẹ kẹntọ huhlọnnọ, mayinukundomọ de—yèdọ ‘mẹylankan lọ,’ Satani Lẹgba. Biblu dọ dọ nudida ylankan gbigbọnọ ehe “to zọnlinzin pé, bo to mẹhe e na tlẹndu dín.”—1 Pita 5:8.
6. Nawẹ mí wagbọn do yọnẹn dọ Satani ma yiwanna jọja lẹ?
6 To whenuho gblamẹ, Satani ko mọ homẹhunhun okà tọn to danú he ylan hugan hinhẹnwa gbẹtọvi lẹ ji mẹ. Lẹnnupọndo nugbajẹmẹji vẹadi lẹ ji he Satani hẹnwa Job po whẹndo etọn po ji. (Job 1:13-19; 2:7) Vlavo hiẹ sọgan flin linlin nujijọ he wá aimẹ to gbẹwhenu towe lẹ tọn he tindo ohia gbigbọ danuwiwa Satani tọn. Lẹgba to lìlì dánpe, bo ma nọ wà lẹblanu na jọja lẹ to ogbé mẹhe e na tlẹndu lẹ tọn yinyan mẹ. Di dohia, to bẹjẹeji owhe kanweko tintan W.M. tọn, Hẹlodi blasé nado hù visunnu he tindo owhe awe kavi whè humọ lẹpo to Bẹtlẹhẹm. (Matiu 2:16) Satani wẹ na ko whàn Hẹlodi nado wà ehe—to vivẹnudido mẹ nado hù ovi he na wá lẹzun Mẹssia dopagbe Jiwheyẹwhe tọn to gbèdopo bo nasọ hẹn whẹdida Jiwheyẹwhe tọn ṣẹ do Satani ji! (Gẹnẹsisi 3:15) E họnwun dọ Satani ma yiwanna jọja lẹ paali. Yanwle etọn dopo akàn lọ wẹ nado tlẹ́n mẹsusu dù dile e yọnbasi do. Na taun tọn, ehe yin nugbo todin, na Satani ko yin yinyan sọn olọn mẹ wá aigba ji, bo ‘tin to homẹgble daho ji, na e yọnẹn dọ whenu gli de wẹ emi tindo.’—Osọhia 12:9, 12.
7. (a) Nawẹ Jehovah gbọnvo mlẹnmlẹn na Satani gbọn? (b) Etẹwẹ Jehovah lẹn gando gbẹdudu towe go?
7 To vogbingbọnmẹ na Satani he tin to ‘homẹgble daho ji,’ Jehovah tindo ‘awuvẹmẹ he siso.’ (Luku 1:78) Ewọ wẹ yin apajlẹ pipé owanyi tọn. Na nugbo tọn, Mẹdatọ mítọn nọ do jẹhẹnu yiaga ehe hia taun bọ Biblu dọmọ: “Jiwheyẹwhe wẹ owanyi.” (1 Johanu 4:8) Vogbingbọn nankọtọn die to yẹwhe titonu ehe tọn po Jiwheyẹwhe he hiẹ tindo lẹblanulọkẹyi nado sẹ̀n po ṣẹnṣẹn! To whenuena Satani nọ dín nado tlẹnmẹ dù, Jehovah “ma jlo dọ mẹdepope ni dọ̀n” gba. (2 Pita 3:9) Ogbẹ̀ gbẹtọvi lẹpo tọn wẹ họakuẹ na ẹn—gọna towe! To whenuena Jehovah dotuhomẹna we to Ohó etọn mẹ ma nado yin apadewhe aihọn tọn, e ma to tintẹnpọn nado glọnalina gbẹdudu kavi mẹdekannujẹ towe gba. (Johanu 15:19) Kakatimọ, e to hihọ́ basina we na mẹylankan lọ tọn wutu. Otọ́ olọn mẹ tọn towe jlo dọ hiẹ ni duvivi nuhe pọnte tlala hugan gbẹdudu ojlẹ gli aihọn ehe tọn tọn. E jlo dọ hiẹ ni mọ “ogbẹ̀ nugbonugbo”—yèdọ ogbẹ̀ madopodo to aigba paladisi tọn ji. (1 Timoti 6:17-19) Jehovah jlo dọ a ni tindo kọdetọn dagbe bosọ to tudohomẹna we nado jẹ yanwle enẹ kọ̀n. (1 Timoti 2:4) Humọ, Jehovah to oylọ vonọtaun de basi na we. Oylọ tẹwẹ?
“Hẹn Homẹ Ṣie Hùn”
8, 9. (a) Nunina tẹwẹ a sọgan na Jehovah? (b) Dile e yin didohia to whẹho Job tọn mẹ do, nawẹ Satani vlẹ Jehovah gbọn?
8 Be a ko họ̀ nunina de na họntọn vivẹ de pọ́n bo mọ nukunmẹ họntọn towe tọn he gọ́ na awujiji po pinpẹn-nutọn-yinyọnẹn po to whenuena e mọ ẹn yí godo ya? Vlavo a lẹnnupọn taun do nunina he na jẹna omẹ enẹ ji. Todin lẹnnupọndo kanbiọ ehe ji: Nunina tẹwẹ a sọgan na Jehovah Jiwheyẹwhe, heyin Mẹdatọ towe? Linlẹn ehe sọgan taidi nuhe ma sọgbe hẹ lẹnpọn dagbe to tintan whenu. Etẹwẹ Ganhunupotọ lọ tindo nuhudo etọn sọn gbẹtọ tata dè? Etẹwẹ e ma ko tindo bọ hiẹ sọgan na ẹn? Biblu na gblọndo to Howhinwhẹn lẹ 27:11 mẹ dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.”
9 Dile a sọgan ko yọnẹn sọn Biblu pinplọn towe mẹ do, Satani Lẹgba wẹ to Jehovah vlẹ. E tẹkudeji dọ mẹdepope he to Jiwheyẹwhe sẹ̀n to mọwà na whẹwhinwhẹ́n ṣejannabi tọn lẹ wutu, e mayin sọn owanyi mẹ gba. Satani sọalọakọ́n dọ eyin devizọnwatọ Jiwheyẹwhe tọn lẹ jiya ganji, yé na jo sinsẹ̀n-bibasi nugbo do to niyaniya mẹ. Di dohia, lẹnnupọndo nuhe Satani dọna Jehovah ji gando dawe dodonọ lọ Job go dọmọ: “Hiẹ ma ko basi osopa de lẹdo e, podọ lẹdo owhé etọn, podọ lẹdo ehe e tindo lẹpo, to adà lẹpo ji? Hiẹ ko dona azọ́n alọ etọn lẹ tọn, podọ yè hẹn nubẹpli etọn sudeji to aigba lọ ji. Ṣigba dealọ towe jẹgbonu lo, bo doalọ popo he e tindo go, e bo nasọ gbẹ́ we dai to nukun towe mẹ.”—Job 1:10, 11.
10. (a) Nawẹ mí wagbọn do yọnẹn dọ e mayin tenọgligo hinhẹn Job kẹdẹ tọn wẹ Satani hẹn biọ ayihaawe mẹ? (b) Nawẹ whẹho nupojipetọ-yinyin tọn gando gowe gbọn?
10 Dile kandai Biblu tọn lọ dohia do, e mayin nugbonọ-yinyin Job kẹdẹ tọn wẹ Satani hẹn biọ ayihaawe mẹ gba ṣigba mẹhe nọ sẹ̀n Jehovah lẹpo tọn—gọna towe. Na nugbo tọn, to hodidọ gando gbẹtọvi lẹ go to paa mẹ, Satani dọna Jehovah dọmọ: “Ehe gbẹtọ [e mayin Job kẹdẹ gba ṣigba mẹdepope] tindo lẹpo wẹ e na jo na ogbẹ̀ etọn.” (Job 2:4) Be a mọ azọngban towe to whẹho titengbe ehe mẹ ya? Dile Howhinwhẹn lẹ 27:11 dohia do, Jehovah dọ dọ nude tin he hiẹ sọgan na emi—yèdọ dodonu de nado gblọnhona mẹvlẹtọ etọn, Satani. Lẹn enẹ pọ́n—Nupojipetọ Wẹkẹ lọ tọn to oylọ basina we nado tindo mahẹ to whẹho daho hugan whenuho tọn dididẹ mẹ. Azọngban podọ lẹblanulọkẹyi jiawu nankọtọn die a tindo! Be a sọgan hẹn nuhe Jehovah to bibiọ to hiẹ si di ya? Job wàmọ. (Job 2:9, 10) Jesu lọsu wàmọ gọna mẹsusu devo lẹ to whenuho gblamẹ, he bẹ jọja susu hẹn. (Filippinu lẹ 2:8; Osọhia 6:9) A sọgan wà nudopolọ. Ṣigba hẹn do ayiha mẹ dọ a ma sọgan dapana adà awe lẹpo to whẹho ehe mẹ gba. Gbọn nuyiwa towe dali, a na dohia eyin vlẹko Satani tọn wẹ a nọgodona kavi gbeyiyi Jehovah tọn. Detẹ wẹ a na nọgodona?
Jehovah Nọ Hò Towe Pọ́n!
11, 12. Be nudide towe nado sẹ̀n Jehovah kavi lala nọ yinuwado ewọ ji ya? Basi zẹẹmẹ.
11 Be nudide he a basi dù Jehovah wẹ ya? Be mẹhe ko gbọṣi nugbonọ-yinyin mẹ lẹ ma ko pé na ewọ nido sọgan gblọnhona Satani wẹ ya? Na nugbo tọn, alọsọakọ́n Lẹgba tọn wẹ yindọ mẹdepope ma to Jehovah sẹ̀n sọn owanyi mẹ gba, yèdọ whẹsadokọnamẹ de he ko yin didohia nado yin lalo. Etomọṣo, Jehovah jlo dọ hiẹ ni nọ̀ adà etọn mẹ to whẹho nupojipetọ-yinyin tọn mẹ na ewọ nọ hò towe pọ́n wutu. Jesu dọmọ: “E ma yin onú jijlo de to Otọ́ [ṣie] he tin to olọn mẹ nukọn, dọ dopo to pẹvi helẹ de mẹ ni dọ̀n.”—Matiu 18:14.
12 Matin ayihaawe, Jehovah tindo ojlo to nudide towe mẹ. Humọ, e nọ yinuwa do ewọ ji. Biblu hẹn ẹn họnwun dọ Jehovah tindo numọtolanmẹ sisosiso he nọ yin finfọndote gbọn nuyiwa dagbe kavi ylankan gbẹtọvi lẹ tọn dali. Di apajlẹ, to whenuena Islaelivi lẹ ṣiatẹ pludopludo, e ‘vẹ́’ na Jehovah. (Psalm 78:40, 41) Jẹnukọnna Singigọ azán Noa gbè tọn, to whenuena “kanyinylan gbẹtọ tọn sù gbau,” e ‘doadi na Jehovah to ayiha etọn mẹ.’ (Gẹnẹsisi 6:5, 6) Lẹnnupọndo nuhe enẹ zẹẹmẹdo ji. Eyin a de aliho nuyiwa tọn he ma sọgbe, a sọgan hẹn awufiẹsa wá na Mẹdatọ lọ. Ehe ma zẹẹmẹdo dọ Jiwheyẹwhe yin madogánnọ kavi nọ yin dududeji gbọn numọtolanmẹ dali gba. Kakatimọ, e yiwanna we bo nọ hò dagbemẹ-ninọ towe pọ́n. To alọ devo mẹ, eyin a wà nuhe sọgbe, homẹ Jehovah tọn nọ hùn. E nọ jaya e mayin na e mọ mẹdevo he na zọ́n bọ e na gblọnhona Satani dogọ wutu kẹdẹ wẹ gba ṣigba na e sọgan sọ lẹzun Ahọsutọ towe todin. Podọ nuhe e jlo nado lẹzun niyẹn. (Heblu lẹ 11:6) Otọ́ owanyinọ nankọtọn die Jehovah Jiwheyẹwhe yin!
Dona Susugege lẹ Todin
13. Nawẹ Jehovah sinsẹ̀n nọ hẹn dona lẹ wá todin gbọn?
13 E mayin to sọgodo kẹdẹ wẹ mí na tindo numimọ dona he nọ wá sọn Jehovah sinsẹ̀n mẹ lẹ tọn gba. Susu to jọja he tin to Kunnudetọ Jehovah tọn lẹ ṣẹnṣẹn nọ mọ ayajẹ po pekọ po todin, podọ na whẹwhinwhẹ́n dagbe wutu. “Ogbedai OKLUNỌ tọn lẹ jlọ, yé nọ hẹn ayiha jaya,” wẹ psalm-kàntọ lọ wlan. (Psalm 19:8) Jehovah yọ́n nuhe na hẹn mí jaya hugan mẹdevo depope. E dọ gbọn yẹwhegán Isaia gblamẹ dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n. Eyin dọ hiẹ ko dotoai hlan osẹ́n ṣie! Whenẹnu wẹ jijọho towe do ko taidi otọ̀, dodo towe di agbówhẹn ohù tọn.”—Isaia 48:17, 18.
14. Nawẹ nunọwhinnusẹ́n Biblu tọn lẹ sọgan gọalọna we nado dapana ahọ́dudu gbọn?
14 Gbẹninọ sọgbe hẹ nunọwhinnusẹ́n Biblu tọn lẹ na gọalọna we nado dapana awufiẹsa po ayimajai susu po. Di apajlẹ, Biblu dọ dọ mẹhe ko wleawuna owanyi akuẹ tọn lẹ “yí homẹgble susu do sọwhán yede.” (1 Timoti 6:9, 10) Be depope to hagbẹ towe lẹ mẹ ko mọ kọdetọn vẹadi wefọ ehe tọn ya? Jọja sunnu po yọnnu delẹ po ko tlọ́ biọ ahọ́ mẹ kiki na yé jlo na tindo avọ̀ yọyọ po onú yọyọ gigẹdẹ he to zoji lẹ po wutu. Yinyin agbàn pinpẹn dó na po ahọsusu whenu gaa tọn he tindo akuẹvi he yiaga lẹ po na nuhe a ma tindo nugopipe etọn na taun tọn lẹ yin wunmẹ afanumẹ-yinyin yasanamẹ tọn de!—Howhinwhẹn lẹ 22:7.
15. Aliho tẹlẹ mẹ wẹ nunọwhinnusẹ́n Biblu tọn lẹ nọ basi hihọ́na we sọn awufiẹsa he nọ wá sọn fẹnnuwiwa zanhẹmẹ tọn si te?
15 Lẹnnupọndo whẹho fẹnnuwiwa zanhẹmẹ tọn ji ga. To whemẹwhemẹ lẹdo aihọn pé, jọja aflanmẹ madosọha he ma wlealọ lẹ wẹ nọ mọho. Mẹdelẹ nọ ji ovi he yé ma jlo bo masọ tindo nugopipe nado penukundo lẹ. Mẹdevo lẹ nọ dehò bosọ nọ jiya ayihadawhẹnamẹnu he hoapa tọn. Enẹgodo jọja sunnu po yọnnu po he nọ bẹ asamẹzọ̀n, taidi SIDA lẹ tin. Humọ, na mẹhe ko yọ́n Jehovah lẹ, kọdetọn he ylan hugan popolẹpo lọ wẹ haṣinṣan yetọn hinhẹngble hẹ Jehovah.b (Galatianu lẹ 5:19-21) Abajọ, Biblu dọmọ: “Mì họ̀n na galilọ.”—1 Kọlintinu lẹ 6:18.
‘Jiwheyẹwhe Ayajẹnọ lọ’ Sinsẹ̀n
16. (a) Nawẹ mí wagbọn do yọnẹn dọ Jehovah jlo dọ hiẹ ni duvivi jọja whenu towe tọn? (b) Naegbọn Jehovah ze anademẹ he a na hodo lẹ dai?
16 Biblu ylọ Jehovah dọ ‘Jiwheyẹwhe ayajẹnọ.’ (1 Timoti 1:11) E jlo dọ hiẹ lọsu ni tindo ayajẹ ga. Na nugbo tọn, Ohó etọn tlẹ dọmọ: “To ayajẹ to vuwhenu towe, hiẹ omẹ winyanwinyan E.” (Yẹwhehodọtọ 11:9) Ṣigba Jehovah nọ mọnú zẹ̀ alọnu go bo sọgan mọ kọdetọn dẹn-to-aimẹ walọyizan dagbe kavi ylankan tọn lẹ hlan nukọn. Nuhe zọ́n niyẹn bọ e dotuhomẹna we dọmọ: “Flin [Mẹdatọ Daho] towe to azán vuwhenu towe tọn, whenuena azán oylan tọn ma ko wá, bọ owhe ma ko sẹyamẹ, whenuena hiẹ na dọmọ, yẹn ma tindo homẹhun to yé mẹ gba.”—Yẹwhehodọtọ 12:1.
17, 18. Nawẹ jọja Klistiani de do ayajẹ etọn hia to Jehovah sinsẹ̀n mẹ gbọn, podọ nawẹ hiẹ sọgan mọ ayajẹ dopolọ gbọn?
17 To egbehe, jọja susu ko mọ ayajẹ daho to Jehovah sinsẹ̀n mẹ. Di apajlẹ, Lina, owhe-15-mẹvi dọmọ: “Yẹn nọ doawagun to dee mẹ. Yẹn tindo agbasalilo dagbe na yẹn ma nọ nù azọ̀ po amasin adínọ lẹ po wutu. Anademẹ họakuẹ he yẹn mọyi gbọn agun gblamẹ ko gọalọna mi nado diahi hẹ kọgbidinamẹ ylankan Satani tọn. Nukunmẹ ṣie nọ sẹ́ na ayajẹ na gbẹdido mẹjlọdote tọn he tin to Plitẹnhọ Ahọluduta tọn mẹ wutu. Hú popolẹpo, yẹn tindo todido dagbe hugan lọ nado nọgbẹ̀ kakadoi to aigba ji.”
18 Taidi Lina, jọja Klistiani susu to avùn sinsinyẹn hò na yise lọ, bọ ehe sọ nọ hẹn ayajẹ wá na yé. Yé yọnẹn dọ ogbẹ̀ yetọn—he gọ́ na nuhahun po ayimajai po to whedelẹnu—tindo lẹndai po sọgodo nujọnu tọn de po. Enẹwutu, to Jiwheyẹwhe he nọ hò dagbemẹ-ninọ towe pọ́n na taun tọn lọ sẹ̀n zọnmii. Hẹn homẹ etọn hùn, podọ ewọ na hẹn we tindo ayajẹ todin podọ kakadoi doi!—Psalm 5:11.
[Nudọnamẹ Odò Tọn]
a Pọ́n hosọ lọ “La vérité m’a rendue à la vie,” he sọawuhia to zinjẹgbonu Réveillez-vous! 22 octobre 1996 tọn mẹ.
b Homẹmiọnnamẹnu wẹ e yin nado yọnẹn dọ eyin mẹde lẹnvọjọ, bo doalọtena ylanwiwa, bosọ yigbe ylando etọn lẹ tọn, Jehovah na “jona susugege.”—Isaia 55:7.
Be Hiẹ Flin Ya?
• Owù tẹwẹ hiẹ pannukọn sọn ‘mẹylankan lọ,’ Satani dè?
• Nawẹ hiẹ sọgan hẹn homẹ Jehovah tọn hùn gbọn?
• Nawẹ Biblu dohia dọ Jehovah nọ hò towe pọ́n gbọn?
• Dona tẹlẹ wẹ nọ wá sọn Jehovah sinsẹ̀n mẹ?
[Apotin to weda 13]
Dawe Dodonọ de Dibla Jai
Asafu yin hànsinọ Levinu he diyin de to tẹmpli Jehovah tọn mẹ to Islaeli hohowhenu tọn mẹ. E tlẹ pà ohàn heyin yiyizan to sinsẹ̀n-bibasi mẹ lẹ. Ṣigba, mahopọnna lẹblanulọkẹyi vonọtaun etọn lẹ, Asafu jẹ walọyizan ylankan hagbẹ etọn lẹ tọn jlo ji, na e taidi dọ yé to osẹ́n Jiwheyẹwhe tọn lẹ gbà matin yasanamẹ depope wutu. “Afọ ṣie ko bla fẹ́; zọnlin ṣie bla tlẹ,” wẹ Asafu yigbe dọ to godo mẹ. “Yẹn ko to awuwhàn hẹ awagundotọ lẹ, whenuena yẹn mọ jijọho mẹylankan lẹ tọn.”—Psalm 73:2, 3.
To nukọnmẹ, Asafu yì tẹmpli Jiwheyẹwhe tọn mẹ bo hodẹ̀ do whẹho lọ ji. Gbọn pọndohlan gbigbọmẹ tọn tintindo do whẹho lẹ ji todin dali, e mọnukunnujẹemẹ dọ Jehovah gbẹwanna ylanwiwa podọ to madẹnmẹ, mẹylankan po mẹdagbe lẹ po na gbẹ̀n nuhe yé dó. (Psalm 73:17-20; Galatianu lẹ 6:7, 8) Na nugbo tọn, aigba he dídí ji wẹ mẹylankan lẹ tin te. To madẹnmẹ, yé na jai to whenuena Jehovah na và titonu ylankan ehe sudo.—Osọhia 21:8.
[Yẹdide to weda 15]
Jehovah nọ hò dagbemẹ-ninọ towe pọ́n, to whenuena Satani to díndín nado tlẹ́n we dù
[Yẹdide to weda 16]
Jọja susu to ayajẹ daho mọyi gbọn Jehovah sinsẹ̀n hẹ Klistiani hatọ lẹ dali