Họ̀gbigbá po Kọdetọn Dagbe po Jẹnukọnna Azọ̀nylankan Lọ

Gbẹtọ fọtọ́n donu kanweko susu wẹ nọ yí bạptẹm to whemẹwhemẹ, enẹwutu mí do hudo ohọ̀ susu tọn dogọ na azọ́n yẹwhehọluduta tọn. Nado jẹ yanwle ehe kọ̀n, azọ́nwatẹn Họ̀gbigbá tọn lẹ lẹdo aihọn pé basi tito nado gbá nọtẹn sinsẹn-bibasi tọn 2 700 linlán, kavi vọ́ yé jlado to owhe sinsẹ̀nzọn tọn 2020 tọn mẹ.a

Amọ́, e blawu dọ azọ̀nylankan COVID-19 tọn lọ wá bẹpla tito enẹlẹ. Nado basi hihọ́na mẹ’sunnu po mẹ’yọnnu mítọn lẹ po, bosọ setonuna anademẹ aṣẹpatọ lẹ tọn, Wedegbẹ́ Wezinjẹgbonu Tọn Hagbẹ Anademẹtọ lọ tọn doalọtena suhugan tito họ̀gbigbá tọn lẹ tọn lẹdo aihọn pé. Etomọṣo, to owhe sinsẹ̀nzọn tọn 2020 tọn mẹ, nọtẹn sinsẹ̀n-bibasi tọn 1 700 linlán wẹ ko yin gbigbá kavi yin vivọjlado lẹdo aihọn pé jẹnukọnna azọ̀nylankan lọ. Humọ, tito họ̀gbigbá tọn vọnọtaun 100 linlán he gando alahọ lẹ go wẹ yin tadona. Pọ́n ale he awe to tito họ̀gbigbá tọn ehelẹ mẹ hẹnwa na mẹ’sunnu po mẹ’yọnnu mítọn lẹ po.

Alahọ Cameroun tọn. Fie alahọ lọ te dai to Douala whè taun, enẹwutu hudo ohọ̀ he gbló hugan lẹ tọn tin. Wedegbẹ́ Wezinjẹgbonu tọn lẹnnupọndo alahọ lọ vivọjlado ji, amọ́ akuẹ he e na biọ sọ hugan akuẹ ohọ̀ he to finẹ to alọnu lẹ tọn. Yé sọ pọ́n eyin e yọnbasi nado gbá ohọ̀ yọyọ lẹ do fidevo, kavi họ̀ ohọ̀ he ko yin gbigbá lẹ bo wá vọ́ yé jlado, amọ́ e ma yọ́nbasi.

To jlẹ de godo, mẹ’sunnu lẹ sè dọ jei agewaji Douala tọn, aṣẹpatọ lẹ basi tito nado deali daho de gbọn Plitẹnhọ Plidopọ tọn mítọn dopo sin nukọn. Aliho enẹ na zọ́n bọ e na bọawu nado yì nọtẹn lọ bọ osin po miyọ́n lẹtliki tọn po sọgan yin dindọ̀n wá finẹ. Nue alahọ lọ do hudo etọn pẹẹ niyẹn. Enẹwutu, Hagbẹ Anademẹtọ lọ kẹalọyi dọ yè ni gbá alahọ yọyọ lọ do apadewhe aigba Plidopọ lọ tọn ji.

Kunnudetọ lẹ gọna họ̀gbátọ he yin hihaya devo lẹ wẹ wazọ́n dopọ to tito lọ kọ̀n—enẹ gọalọ ma nado hẹn whenu po akuẹ po gú. Dọla Amelika tọn livi awe linlán kavi francs cfa liva dopo linlán wẹ pò to akuẹ he yin didedovo na azọ́n lọ mẹ! Whẹndo Bẹtẹli tọn penugo nado sẹtẹn jẹ ohọ̀ yọyọ lọ lẹ mẹ jlẹ vude whẹpo azọ̀nylankan COVID-19 tọn do gbajẹgbonu.

Mẹhe to sinsẹ̀n to Bẹtẹli Cameroun tọn lẹ to vivi azọ́nwatẹn gọna nọten he yọnhugan de tọn dù, podọ yé nọ mọdọ nunina de wẹ alahọ yọyọ lọ yin sọn Jehovah dè. Asu po asi po de dọ, “Mí jlo na wazọ́n sinsinyẹn dogọ nado do obá he mẹ mí yọ́n pinpẹn nunina enẹ tọn jẹ hia.”

Azọ́nwatẹn Lẹdogbedevomẹ Tọn (RTO) Tojolabal-Gbè Tọn, Mexique. Na owhe susu lẹ, mẹhe nọ basi lẹdogbedevomẹ do Tojolabal-gbè mẹ lẹ nọ wazọ́n to alahọ Amérique Centrale tọn mẹ, sẹpọ tòdaho Mexico tọn. Amọ́, fie Tojolabal-gbè nọ yin dido te hugan wẹ tòpẹvi Altamirano po Las Margaritas po tọn lẹ mẹ, fie dẹn do alahọ lọ na nudi kilomẹtlu 1 000 linlán! Taidi kọdetọn de, e nọ vẹawuna lẹdogbedevomẹ-basitọ lẹ nado yọ́n nue to didiọ gando Tojolabal-gbè go lẹ. Podọ e ma nọ bọawu na alahọ lọ nado mọ mẹ’sunnu po mẹ’yọnnu lẹ po to lẹdo lọ mẹ na lẹdogbedevomẹ po hoyidokanji lẹ po to Tojolabal-gbè mẹ.

Na whẹwhinwhẹ́n ehelẹ wutu, Wedegbẹ́ Wekinkan tọn Hagbẹ Anademẹtọ lọ tọn jlo na sẹtẹn na pipli lẹdogbedevomẹtọ lẹ tọn lọ yì lẹdo he mẹ Tojolabal-gbè nọ yin dido te de mẹ. Nado jẹ yanwle enẹ kọ̀n, alahọ basi dide nado họ̀ petlèzin de bo vọ́ ẹ jlado. Mọwiwà ma vẹakuẹ sọ ohọ̀ gbigbá kavi azọ́ntẹn de hihaya.

Dopo to lẹdogbedevomẹ-basitọ lẹ mẹ dọ lehe tito enẹ hẹn ale wá na ẹn do dọmọ: “Sọn owhe ao die he n’o to sinsẹ̀n taidi lẹdogbedevomẹ-basitọ to alahọ mẹ, n’ma dukosọ hẹ whẹndo dopo tata he nọ do ogbè ṣie. Todin he azọ́nwatẹn mítọn to lẹdo Tojolabal-gbè tọn de mẹ, egbesọegbesọ wẹ n’nọ dukosọ hẹ Tojolabal-gbè dotọ lẹ. Ehe zọ́n bọ n’yọ́n hogbe susu dogọ, podọ e yidogọna azọ́nyinyọnẹn ṣie.”

Tito lẹ Na Owhe Sinsẹ̀nzọn 2021 Tọn

Na owhe sinsẹ̀nzọn 2021 tọn, mí to tito basi nado wazọ́n do azọ́nwatẹn lẹdogbedevomẹ tọn po nọtẹn wẹhọmẹ Biblu pinplọn tọn 75 po go, eyin ninọmẹ lẹ hẹn ẹn yọnbasi. Azọ́n he to yinyin wiwà to alahọ voovo ṣinatọ̀n delẹ mẹ, ehe bẹ tito Ramapo, New York tọn hẹn, gọna tẹnsisẹ na alahọ Argentine po Italie po tọn lẹ na zindonukọn. Humọ, hudo tin na Plitẹnho Ahọluduta tọn yọyọ 1 000 linlán, yè sọ dona diọ nọtẹn opli tọn 6 000 linlán, podọ Plitẹnhọ Ahọluduta tọn 4 000 dona yin vivọjlado.

Fie wẹ mí nọ mọ akuẹ sọn na azọ́n họ̀gbigbá po nuvọjlado po tọn ehe lẹpo? Mẹ’sunnu Lázaro González, he yin hagbẹ Wedegbẹ́ Alahọ Amérique Centrale tọn de, na gblọndo to whenue e to hodọ gando tito azọ́nwatẹn lẹdogbedovomẹ tọn Tojolabal-gbè tọn lọ go. E dọ : “To aigba-denamẹ alahọ mítọn tọn ji, mí ma do alọnu sọmọ. Enẹwutu, eyin godonọnamẹ pipli mẹ’sunnu lẹ tọn lẹdo aihọn pé tọn dẹ́n wẹ, e ma na’o yọnbasi nado gbá azọ́nwatẹn lẹdogbedevomẹ tọn lọ lẹ na yisenọ hatọ mítọn lẹ. Nunina mẹ’sunnu lẹ tọn lẹdo aihọn pé wẹ hẹn ẹn yọnbasi nado hẹn lẹdogbedevomẹ-basitọ lẹ sẹpọ mẹhe nọ do ogbè yetọn lẹ. Mí jlo na dọnudo mẹ’sunnu mítọn lẹpo lẹdo aihọn pé na alọtútlú yetọn.” Mọwẹ, nunina he mì nọ basi nado nọgodona azọ́n lẹdo aihọn pé tọn lọ to paa mẹ gbọn donate.jw.org ji wẹ nọ hẹn azọ́n họ̀gbigbá tọn ehelẹ yọnbasi.