Tindo Homẹhunhun to Ohó Jiwheyẹwhe Tọn Mẹ

AYAJẸNỌ wẹ mẹhe “homẹhunhun etọn tin to osẹ́n OKLUNỌ tọn mẹ.” Omẹ mọnkọtọn nọ hia Ohó Jiwheyẹwhe tọn ‘po ogbè dẹẹdẹ po to okle po ozán po.’ (Ps. 1:1, 2) Be hiẹ nọ tindo numimọ homẹhunhun enẹ tọn ya? Nawẹ hiẹ sọgan hẹn ayajẹ he Ohó Jiwheyẹwhe tọn nọ na we jideji gbọn?

Dotoai Dile Jehovah to Hodọ

Ma hia hogbe lẹ poun blo. Yí nukun homẹ tọn do pọ́n ninọmẹ he lẹdo nuhe hiẹ to hihia lẹ. Lẹnnupọndo ogbè mẹhe yin hoyidọ sọn e dè lẹ tọn ji. Dile hiẹ to weta tintan Biblu tọn lẹ hia, sè lehe Jehovah lọsu to nuhe yin wiwà nado hẹn aigba jẹ na fininọ gbẹtọ tọn dehia, to aliho debọdo-dego tọn mẹ do. Dotoai dile e dọna Visunnu etọn, yèdọ Azọ́nwatọgán lọ, dọ ojlẹ ko sọ̀ nado dá gbẹtọvi tintan lẹ. Yí nukun homẹ tọn do pọ́n nujijọ lọ: Adam po Evi po ṣiatẹ, Jiwheyẹwhe dawhẹna yé bọ, to godo mẹ, e yàn yé sọn Paladisi mẹ. (Gẹnẹsisi, weta 1-3) Tindo numọtolanmẹ obu tọn to whenuena hiẹ hia dọ ogbè de sọn olọn mẹ bo do Jesu Klisti hia taidi Visunnu Jiwheyẹwhe tọn, mẹyiwanna, mẹhe Jiwheyẹwhe dohlan nado ze ogbẹ̀ etọn liai na gbẹtọvi. (Mat. 3:16, 17) Tẹnpọn nado yí nukun homẹ tọn do pọ́n nuyiwa apọsteli Johanu tọn to whenuena e sè bọ Jehovah lá dọmọ: “Pọ́n, yẹn diọ onú lẹpo zun yọyọ.” (Osọ. 21:5) Na nugbo tọn, Ohó Jiwheyẹwhe tọn hihia to aliho ehe mẹ yin nuwiwa homẹhunhun tọn de!

To kandai gbọdo lọ hia zọnmii, podọ hiẹ na wá yọ́n Jehovah taidi huhlọnnọ he jẹ nado dibusi. Hiẹ na jlo nado dọnsẹpọ Mẹlọ he yiwanna mí, he nọ yinuwa hẹ mí po lẹblanu po, he nọ gọalọna mí eyin mí gbọn whiwhẹ dali to vivẹnudo nado wà ojlo etọn, podọ he nọ do lehe mí na tindo kọdetọn dagbe to nuhe mí wà lẹpo mẹ do hia mí.—Jọṣ. 1:8; Ps. 8:1; Isa. 41:10.

Lehe hiẹ yí whenu zan dogọ nado hia Biblu do, mọwẹ pekọ towe na sù sọ dile hiẹ whẹ́n-deji to oyọnẹn ojlo Jiwheyẹwhe tọn na we mẹ. Ṣigba homẹhunhun lọ na yì tlala zẹ̀ enẹ go. To whenuena wehihia towe na we alọgọ he hiẹ tindo nuhudo etọn nado yí nuyọnẹn do didẹ̀ nuhahun lẹ, numọtolanmẹ towe na taidi psalm-kàntọ lọ tọn, he dọmọ: “Nujiawu wẹ [nuflinmẹ] towe lẹ: enẹwutu wẹ ayiha ṣie do yìn yé.” (Ps. 119:129) Hiẹ lọsu na jaya dile hiẹ tunwun nunọwhinnusẹ́n he nọ gọalọ nado deanana nulẹnpọn po ojlo towe lẹ po to aliho jijọ-di-Jiwheyẹwhe tọn mẹ lẹ go sọn Owe-wiwe mẹ.—Isa. 55:8, 9.

Biblu nọ wleawuna anademẹ walọ dagbe tọn he nọ basi hihọ́na mí sọn awugble si bo nọ do aliho he sọgbe hia mí. Dile mí to hihia ẹ, mí na mọ dọ Jehovah yin Otọ́ de he yọ́n nuhahun he na dekọtọn lẹ eyin mí joawuna ojlo agbasalan mapenọ tọn lẹ. E ma jlo dọ mí ni jiya kọdetọn ylankan he na wá sọn nukunpẹvi yíyí do pọ́n nujinọtedo yiaga walọ dagbe tọn etọn lẹ mẹ gba. E nọ hò mítọn pọ́n bo jlo dọ mí ni duvivi aliho gbẹninọ he yọ́n hugan tọn. Ohó etọn hihia nọ gọalọna mí nado tindo nukunnumọjẹnumẹ gigọ́ gando lehe e yin dona de do sọ nado tindo ewọ taidi Jiwheyẹwhe mítọn po Otọ́ olọn mẹ tọn mítọn po go.

Nọ Hia Biblu Egbesọegbesọ

Psalm-kàntọ lọ dọ gando mẹhe nọ hia Ohó Jiwheyẹwhe tọn egbesọegbesọ go dọmọ: “Nudepope e to wiwà na [tindo kọdetọn dagbe].” (Ps. 1:3) Mọwẹ, mahopọnna mapenọ-yinyin mítọn, mahopọnna dọ mí to gbẹnọ to titonu ylankan Satani tọn mẹ, podọ mahopọnna vivẹnudido Lẹgba tọn nado tlẹ́n mí dù, Ohó Jiwheyẹwhe tọn hihia to gbesisọmẹ po yíyí nuhe tin to e mẹ lẹ do yizan mẹ po na hẹn mí penugo nado tindo kọdetọn dagbe to nuhe gando haṣinṣan mítọn hẹ Jehovah go lẹpo mẹ.

To whenuena e yindọ mí tin to kọgbidinamẹnu glọ sọn titonu hoho ehe si, linlẹn Mẹdatọ lọ tọn lẹ yíyí do gọ́ ayiha mítọn mẹ etlẹ yin na ojlẹ he họakuẹ kleun delẹ to azán dopodopo gbè sọgan na mí huhlọn. Mẹdelẹ he yin zizedo ganmẹ na yise yetọn wutu nọ tindo wefọ taun taun he yé mọ to hosọ linlinwe tọn lẹ mẹ kẹdẹ to alọnu. Yé nọ sán ehelẹ, bo nọ hẹn yé do tamẹ, bo nọ lẹnayihamẹpọn do yé ji. Jehovah dona vivẹnudido yetọn lẹ na yé wà nuhe go yé pé lẹpo nado mọ oyọnẹn yí sọn Ohó Jiwheyẹwhe tọn mẹ. (Mat. 5:3) Ṣogan, suhugan mítọn tindo mẹdekannujẹ he sù tlala hugan enẹ. Mí ma dona wá tadona lọ kọ̀n dọ wefọ Biblu tọn de hihia po awuyiya po to gbèdopo, na tindo nugandomẹgo jiawu delẹ to ede mẹ gba. Ṣigba, eyin mí basi vọjladona nuhe tin to otẹn tintan mẹ na mí lẹ nado sọgan nọ hia adà de sọn Biblu mẹ egbesọegbesọ, bo nọ lẹnnupọndo e ji, bo nọ yí ì do yizan mẹ to gbẹzan mítọn lẹ mẹ, mí na mọ dona yí.

Na nugbo tọn, nude sọgan ján biọ tito dagbe hugan mítọn lẹ mẹ. Eyin enẹ jọ, mí dona na ayidonugo hlan nuhe yin nujọnu nugbonugbo lẹ. Di apajlẹ, mí ma na desọn ojlo mẹ wá bo gọ̀n osin ma nù na azán dopo kavi awe gba. Enẹwutu, mahopọnna nuhe mí pehẹ to gbẹninọ egbesọegbesọ tọn mítọn mẹ, mí dona yí whenu delẹ zan nado fakọna mídelẹ po osin nugbo lọ tọn po.—Owalọ 17:11.

Hia Ohó Jiwheyẹwhe Tọn Pete

Be hiẹ ko hia Biblu lọ blebu ya? Pọndohlan lọ nado hia ẹ sọn Gẹnẹsisi jẹ Osọhia nọ hẹn apọ̀ṣi mẹdelẹ. Enẹwutu, susu mẹhe jlo nado hia Biblu lọ blebu lẹ tọn nọ hia Owe-wiwe Klistiani Glẹki tọn jẹnukọn. Etẹwutu? Vlavo na yé sọgan yawu mọ lehe owe Biblu tọn enẹlẹ yọn-na-yizan na yé do taidi mẹhe to dindin nado zinzọnlin to afọdòmẹ Klisti tọn lẹ mẹ wutu. Kavi vlavo na Owe-wiwe Klistiani Glẹki tọn ma taidi nuhe sù gbau nado hia wutu—yèdọ vude poun wẹ e yí do sù hugan mado-ẹnẹ Biblu tọn. Ṣigba to owe  27 enẹlẹ hihia pó godo, yé nọ lẹ́ ayidonugo yetọn hlan owe 39 Owe-wiwe Heblu tọn hihia ji bo nọ jẹ vivi yetọn dù ji. To whenuena yé dotana Owe-wiwe Heblu tọn, yé na ko wleawuna aṣa Biblu hihia gbesisọ tọn de, enẹwutu yé nọ zindonukọn to Owe-wiwe Klistiani Glẹki tọn hihia whla awetọ mẹ, podọ yé ma ko doalọte gbede gba. Na hiẹ lọsu ni yí Ohó Jiwheyẹwhe tọn hihia egbesọ tọn do basi aṣa gbẹ̀whenu towe tọn.

Be mẹde tin to whẹndo kavi agun towe mẹ he ma sọgan hiawe ya? Naegbọn hiẹ ma nado kanse e eyin a sọgan nọ hia Biblu na ẹn to gbesisọmẹ? Hiẹ na mọaleyi, podọ ewọ lọsu na mọaleyi ga dile e na to ayihamẹlẹnpọn do nuhe e sè lẹ ji bo yí yé zan to gbẹzan etọn mẹ.—Osọ. 1:3.

To madẹnmẹ, hiẹ sọgan jlo nado bẹ azọ́n vonọtaun de jẹeji to kọndopọmẹ hẹ Biblu hihia towe. Delẹ to ehelẹ mẹ sọgan yidogọna nukunnumọjẹnumẹ towe na lehe adà voovo Biblu tọn lẹ gando yedelẹ go do. Eyin Biblu towe tindo alọdlẹndonu ṣẹnṣẹn tọn lẹ, ehelẹ sọgan deanana we nado mọ zẹẹmẹ gigọ́ whenuho tọn lẹ po nujijọ he gando yé go lẹ po. Yé sọgan gọalọna we nado mọ ninọmẹ he zọ́n bọ psalm voovo lẹ do yin kinkàn gọna wekanhlanmẹ he apọsteli Jesu Klisti tọn lẹ wlan. Étude perspicace des Écritures wleawuna nudọnamẹ họakuẹ do dodonu gbẹtọ lẹ tọn, nọtẹn lẹ, po jẹhẹnu he go yè donù to Biblu mẹ lẹ po ji. Apotin nudọnamẹ tọn lẹ dọ̀n ayidonugo hlan hẹndi dọdai Biblu tọn lẹ ji, bo do ahọlu po yẹwhegán he nọgbẹ̀ to ojlẹ dopolọ mẹ lẹ po hia, bosọ na azán nujijọ Biblu tọn susu tọn.

Dile hiẹ to ayihamẹlẹnpọn do nuhe hiẹ plọn lẹ ji, hiẹ na mọnukunnujẹ whẹwhinwhẹ́n he wutu ninọmẹ tangan delẹ do wá aimẹ to omẹ Jiwheyẹwhe tọn lẹ ṣẹnṣẹn mẹ. Hiẹ nasọ mọdona nuhewutu Jehovah yinuwa hẹ omẹ etọn lẹ dile e wà do. Hiẹ na mọ nukun he Jehovah nọ yí do pọ́n nuwiwa gandudu lẹ, gbẹtọ lẹ, po mẹdopodopo lẹ po tọn. Ehe na na we wuntuntun dogọ do linlẹn etọn ji.

Whenuho Biblu tọn na lẹzun ojlofọndotenamẹnu dogọ na we eyin hiẹ yí nukun homẹ tọn do pọ́n agbegbe he nujijọ lẹ wá aimẹ te. Yẹdide aigba Biblu tọn lẹ do lẹdo aigba lọ tọn podọ lehe nọtẹn lọ lẹ dẹ̀n do yedelẹ sọ hia. Di apajlẹ, fie wẹ mí sọgan dọ dọ Islaelivi lẹ dasá Ohù Vẹẹ te? Nawẹ Aigba Pagbe tọn lọ klo sọ? Otò tẹlẹ mẹ wẹ Jesu yì to lizọnyizọn aigba ji tọn etọn wiwà whenu? Etẹlẹ wẹ Paulu mọ to gbejizọnlin mẹdehlan tọn etọn lẹ whenu? Yẹdide otò tọn lẹ po zẹẹmẹ agbegbe aigba tọn lẹ po wleawuna zẹẹmẹ gigọ́ he na hẹn wehihia towe yin awuvivinu. Fie wẹ hiẹ sọgan mọ yẹdide aigba Biblu tọn lẹ te? Delẹ sọawuhia to Les saintes Écritures traduction du monde nouveau mẹ. Bladopọ Étude perspicace tọn lẹ bẹ yẹdide otò tọn 70 delẹ hẹn, podọ alọdlẹndonu yẹdide otò tọn de tin to vivọnu bladopọ tintan tọn. Yí Index des Publications de la Société Watch Tower zan nado dín yẹdide otò tọn devo lẹ mọ. Eyin azọ́nwanu ehelẹ ma tin-to-aimẹ, yí yẹdide otò tọn he nọ yin zinzinjẹgbonu to Atọ̀họ̀-Nuhihọ́ Lọ Tọn mẹ lẹ zan nado gọalọna we to Biblu hihia towe mẹ.

To Owe-wiwe Heblu tọn mẹ, Ahọlu Davidi pagigona Jehovah, bo dọmọ: “OKLUNỌ E, na [linlẹn] towe lẹ hlan mi yin nuhọakuẹ sọ! Na sọha yetọn klo sọ!” (Ps. 139:17) To Owe-wiwe Klistiani Glẹki tọn mẹ, apọsteli Paulu pagigona Jehovah na Ewọ “ko họnwun to ayiha mítọn lẹ mẹ, nado na hinhọ́n oyọnẹn gigo Jiwheyẹwhe tọn tọn omẹ to nukun . . . Klisti tọn mẹ.” (2 Kọl. 4:6) Owhe kanweko susu wẹ tin to ṣẹnṣẹn na ojlẹ he mẹ Davidi po Paulu po nọgbẹ̀ te; ṣogan, yé omẹ awe lẹ hùnhomẹ to Ohó Jiwheyẹwhe tọn mẹ. Hiẹ lọsu sọgan wàmọ eyin a yí whenu zan nado hia nuhe Jehovah ko na we to Ohó gbọdo etọn mẹ lẹpo.