Jonamẹ gán ṣimiyọ́n na gbemanọpọ lẹ
NA ASU PO ASI PO LẸ
4 Jonamẹ
NUHE E ZẸẸMẸDO
Jonamẹ zẹẹmẹdo nado wọnji nuṣiwa go bo ma hẹnmẹdohomẹ. E ma zẹẹmẹdo dọ a yí nukunpẹvi do pọ́n nuṣiwa lọ kavi dọ a yinuwa di dọ nude ma jọ pọ́n nkọ.
AYINAMẸ BIBLU TỌN: “Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po.”—Kolosinu lẹ 3:13.
“Eyin a yiwanna mẹde, a na nọ mọnú zẹ̀ awugbopo mẹlọ tọn go, bo nọ pọ́n vọjlado he e to bibasi lẹ.”—Sunnu de he nọ yin Aaron.
NUHEWUTU E YIN NUJỌNU
Eyin a nọ hẹnmẹdohomẹ, e gán bẹpla dagbemẹninọ towe bo gán sọ gbà alọwle mìtọn.
“To ojlẹ de mẹ, asu ṣie do jaale na mi, na e wà nude he vẹna mi taun wutu. E vẹawuna mi nado jona ẹn. N’wá jona ẹn to nukọn mẹ, amọ́ e vẹna mi dọ ma yawu jona ẹn. Enẹ bẹpla haṣinṣan mítọn.”—Yọnnu de he nọ yin Julia.
NUHE A SỌGAN WÀ
KANSE DEWE
Eyin a gblehomẹ to whedevonu, na nuhe alọwlemẹ towe dọ kavi wà wutu, kanse dọ:
‘Be n’nọ yawu gblehomẹ wẹ ya?’
‘Be nue e wà lọ sinyẹn sọmọ bọ n’dona donukun vẹvivẹ wẹ, kavi n’gán wọnji e go poun?’
DỌHODOPỌ HẸ AWETỌ TOWE
Nawẹ e nọ dẹnsọ whẹpo mí do nọ jona ode awetọ?
Etẹlẹ wẹ mí gán wà nado nọ yawu jona ode awetọ?
AYINAMẸ DELẸ
Eyin alọwlemẹ towe ṣinuwa, ma nọ lẹndọ e yọnẹn do bayi blo.
Nọ tẹnpọn nado jona ẹn, bo nọ flindọ “mímẹpo wẹ nọ ṣinuwa whlasusu.”—Jakọbu 3:2.
“E nọ bọawu nado jona ode awetọ eyin whẹ̀ mì mẹ awe lẹ tọn wẹ ma whẹ́n, amọ́ e nọ vẹawu taun eyin mẹdopo go wẹ nuhahun lọ sọn. Nado kẹalọyi vẹvivẹ bo jonamẹ nọ biọ mẹdezewhè taun.”—Yọnnu de he nọ yin Kimberly.
AYINAMẸ BIBLU TỌN: “Yawu gbọwhẹ.”—Matiu 5:25.
Eyin a nọ hẹnmẹdohomẹ, e gán bẹpla dagbemẹninọ towe bo gán sọ gbà alọwle mìtọn