Naegbọn Mí Do Nọ Jiya, Poyọnho bo Kú?

Mẹjitọ Mítọn Tintan lẹ Wẹ Tlọ Mí

“Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè.”—LOMUNU LẸ 5:12.

To whenue Jiwheyẹwhe dá mẹjitọ mítọn tintan lẹ, Adam po Evi po, ayiha po agbasa pipé po wẹ yé do. E sọ ze yé do paladisi de mẹ to aigba ji. Filọ nọ yin jipa Edẹni tọn. Jiwheyẹwhe dọna yé dọ yé gán dù atin-sinsẹ́n he to jipa lọ mẹ lẹpo, amọ́ dopo tin bọ yé ma dona dù. Etomọṣo, Adam po Evi po yọnẹn gán-an bo dù atin-sinsẹ́n he Jiwheyẹwhe dosẹ́n etọn na yé bo waylando. (Jenẹsisi 2:15-17; 3:1-19) Tolivivẹ yetọn zọ́n bọ Jiwheyẹwhe yàn yé sọn jipa lọ mẹ, bọ oyà bẹ. Dile ojlẹ to yìyì, yé jẹ viji ji bọ yelọsu bẹ oyà. Yemẹpo wá poyọnho bo kú. (Jenẹsisi 3:23; 5:5) Mílọsu nọ jẹazọ̀n, poyọnho bo kú, na okún yetọn mẹ wẹ mí tlọ́n.

Angẹli Ylankan lẹ Tọn Lọsu Demẹ

“Aihọn lọ pete tin to huhlọn mẹylankan lọ tọn glọ.”—1 JOHANU 5:19.

Satani wẹ “mẹylankan” enẹ. Angẹli ylankan enẹ fọngu do Jiwheyẹwhe ji. (Johanu 8:44; Osọhia 12:9) To nukọn mẹ, angẹli devo lẹ hopódona Satani. Yewlẹ wẹ nọ yin aovi lẹ. Yé nọ yí huhlọn he yé tindo zan do klọ gbẹtọvi lẹ bo nọ dọ̀n yé sọn Mẹdatọ lọ godo. Mẹsusu wẹ yé nọ sisẹ́ nado wà nuhe ma sọgbe. (Salmu lẹ 106:35-38; 1 Timoti 4:1) E nọ vivi na Satani po aovi lẹ po eyin yé dọ̀n nuhahun wá gbẹtọvi lẹ ji.

Whedelẹnu, E Nọ Yin Owhẹ̀ Mílọsu Tọn

“Nudepope he mẹde to dido, enẹ wẹ e na gbẹ̀n ga.”—GALATIANU LẸ 6:7.

To aliho de kavi devo mẹ, mímẹpo wẹ to yaji na ylando he mí dugu etọn, podọ na Satani to nuyiwa do aihọn lọ ji wutu. Amọ́ whedelẹnu, mílọsu wẹ nọ yí alọ mítọn do tlọ míde do nuhahun mẹ. Gbọnna? Mẹdelẹ nọ wà nuylankan kavi ma nọ lẹnnupọn whẹpo do yinuwa bo nọ wá gbẹ̀n nuhe yé do. To alọ devo mẹ, mẹhe nọ wà nudagbe lẹ nọ gbẹ̀n sinsẹ́n dagbe. Di apajlẹ, mẹhe do asi po ovi po bo nọ dọ nugbo, nọ wazọ́n ganji, bo yiwanna whẹndo etọn na gbẹ̀n nudagbe susu bọ whẹndo etọn nasọ do ayajẹ. Amọ́, eyin e yiwanna akọ̀ hihò, wá pò na ahàn kavi yin adidọnọ, e gán tlọ ede po whẹndo etọn po do ohẹ́n mẹ. Enẹwutu, nuyọnẹnnu wẹ e yin nado setonuna Mẹdatọ lọ. Nudagbe susu wẹ Mẹdatọ lọ jlo dọ mí ni gbẹ̀n, bo tindo “jijọho susugege.”—Salmu lẹ 119:165.

Mí to “Azán Godo Tọn lẹ” Mẹ

“To azán godo tọn lẹ mẹ . . . , gbẹtọ lẹ na yin wanyina mẹdetiti tọ́, wanyina akuẹtọ, . . . , tolivẹ do mẹjitọ lẹ go tọ́, . . . wazẹjlẹgonọ, kanylantọ, owanyi dagbewà tọn matindotọ.”—2 TIMOTI 3:1-5.

Jijọ enẹlẹ pẹpẹ wẹ mí nọ mọ to mẹsusu go to egbehe. Ehe dohia hezeheze dọ mí to “azán godo tọn” aihọn lọ tọn lẹ mẹ. Owe-wiwe lẹ sọ dọ ga dọ awhàn, núdùdù whèdomẹ, aigba sisọsisọ po azọ̀n po na sù to ojlẹ mítọn mẹ. (Matiu 24:3, 7, 8; Luku 21:10, 11) Onú ehelẹ sọ nọ zọ́n bọ mí nọ jiya bo nọ kú.