Adà 1

Be Jiwheyẹwhe Nọ Hò Mítọn Pọn Nugbo Nugbo Ya?

1, 2. Kanbiọ tẹlẹ wẹ gbẹtọ lẹ nọ kanse dogbọn Jiwheyẹwhe dali, podọ etẹwutu?

TO OJLE delẹ mẹ to gbẹ̀zan towe mẹ, hiẹ sọgan ko kanse dọmọ: ‘Eyin Jiwheyẹwhe he nọ hò mítọn pọn de tin nugbo nugbo, naegbọn e do jotẹnna yajiji susu sọmọ? ’ Mímẹpo ko tindo numimọ yajiji tọn kavi yọn mẹde he tindo e.

² Na nugbo tọn, gbọn gblagbla whenuho tọn mẹ, gbẹtọ lẹ ko jiya awufiẹsa po adukundudu po sọn awhàn, kanyinylan, sẹ́nhẹngba, whẹdida agọ̀, ohẹ́n, azọ̀n, po okú mẹyiwanna tọn lẹ po sí. To owhe kanweko 20tọ mítọn kẹdẹ mẹ, awhàn lẹ ko hù livi 100 gbẹtọ lẹ tọn. Kanweko donu livi livi mẹdevo lẹ tọn ko yin awugblena kavi hẹn owhé yetọn lẹ po nutindo yetọn lẹ po bú. Sọn whenẹnu gbọ́n obúdonamẹnu susu wẹ ko jọ to ojlẹ mítọn mẹ, he dekọtọn do awubla daho, dasin plẹplẹ, po linlẹn todido matindo to adà madosọha gbẹtọ lẹpo tọn mẹ.

3, 4. Etẹwẹ yin numọtolanmẹ mẹsusu tọn dogbọn tẹnjona yajiji Jiwheyẹwhe tọn dali?

³ Mẹdelẹ nọ lẹzun adinọ bo nọ tindo numọtolanmẹ dọ eyin Jiwheyẹwhe de tin, ewọ ma nọ hò mítọn pọn nugbo nugbo gba. Kavi yé tlẹ sọgan tindo numọtolanmẹ dọ Jiwheyẹwhe de matin gba. Di dohia, dawe he jiya homẹkẹn akọta tọn de he dekọtọn do okú họntọn po whẹ̀ndo etọn lẹ tọn po mẹ to Wẹkẹ Whàn I whenu kanse: “Fie wẹ Jiwheyẹwhe tin te to whenue mí tindo hudo etọn?” Mẹdevo he lùn mẹhuhu livi susu Nazi tọn tọ́n to Wẹkẹ Whàn II whenu, tindo awubla talala gbọn yajiji he é mọ dali kaka bọ e dọmọ: “Eyin hiẹ sọgan dídọ́ ahún ṣie, be a ko dù núdido.”

⁴ Nalete, gbẹtọ susu lẹ ma sọgan mọnukunnujẹ nuhewutu Jiwheyẹwhe dagbe de nado jotẹnna onu ylankan lẹ nado jọ̀ gba. Yé kanse vlavo eyin ewọ nọ hò mítọn pọn nugbo nugbo kavi vlavo eyin ewọ tlẹ tin lala. Podọ susu yetọn tindo numọtolanmẹ dọ yajiji na to apadewhe tintin gbẹtọvi tọn yin zọnmii janwẹ.

[Yẹdide to weda 2, 3]

Be aihọn yọyọ he tin to mẹdekannu sọn yajiji mẹ de sẹpọ ya?