Akọndidona Yajiji Sọgan Hẹn Ale Wá Na Mí
‘Míwlẹ nọ hia yé he doakọnnanu lẹ di ayajẹnọ.’—JAKOBU 5:11.
1, 2. Etẹwẹ dohia dọ Jehovah ma dá gbẹtọ nado jiya?
GBẸTỌ he to ganji de ma nọ jlo nado jiya; mọjanwẹ Mẹdatọ mítọn, Jehovah Jiwheyẹwhe, ma jlo dọ gbẹtọvi lẹ ni jiya do niyẹn. Mí sọgan mọnukunnujẹ ehe mẹ eyin mí gbadopọnna Ohó gbọdo etọn bo doayi nuhe jọ go to whenuena e dá sunnu po yọnnu po godo. Jẹnukọn whẹ́, Jiwheyẹwhe dá sunnu lọ. “OKLUNỌ Jiwheyẹwhe do gbẹtọ sọn kọ́gudu aigba tọn mẹ; bo gbọ do awọntinslo etọn lẹ mẹ gbigbọ ogbẹ̀ tọn; gbẹtọ sọ lẹzun alindọn gbẹ̀tenọ.” (Gẹnẹsisi 2:7) Agbasa po ayiha Adam tọn po yin pipé, podọ e ma dona jẹazọ̀n kavi kú.
2 Etẹwẹ dogbọn ninọmẹ gbẹninọ tọn Adam tọn lẹ dali? “OKLUNỌ Jiwheyẹwhe do jipa de do whèzẹtẹn dali to Edẹni mẹ; finẹ wẹ e yí sunnu he e do lọ do. Podọ sọn aigba mẹ wẹ OKLUNỌ Jiwheyẹwhe hẹn atin hunkọhunkọ wú jẹgbonu, he yọnwhanpẹ na pinpọ́n, bosọ yọ́n na núdùdù.” (Gẹnẹsisi 2:8, 9) Mọwẹ, Adam tindo fininọ dagbe hugan de. Yajiji depope ma tin to Edẹni mẹ.
3. Todido tẹlẹ wẹ asu po asi po tintan lọ tindo?
3 Gẹnẹsisi 2:18 dọna mí dọmọ: “OKLUNỌ Jiwheyẹwhe sọ dọmọ, E ma yọ́n na sunnu lọ ni yin dopo kẹdẹ gba, yẹn na hẹn ẹn basi alọgọtọ de he jẹ na ẹn.” Jehovah sọ dá asi pipé de na Adam, bo gbọnmọ dali wleawuna todido gbẹzan whẹndo ayajẹ tọn de. (Gẹnẹsisi 2:21-23) Biblu sọ dọna mí yinukọn dogọ dọmọ: “Jiwheyẹwhe dona yé; Jiwheyẹwhe sọ dọ hlan yé, dọmọ, Mì yin sinsẹ́nnọ, bo sudeji, bosọ gọ́ aigba ji, bo dugán do e ji.” (Gẹnẹsisi 1:28) Adam po Evi po na tindo lẹblanulọkẹyi jiawu lọ nado dlẹnkanna Paladisi Edẹni mẹ tọn kakajẹ whenuena aigba lọ pete na lẹzun paladisi de. Podọ yé na tindo ovivi ayajẹnọ lẹ, he na vò sọn yajiji si. Bẹjẹeji gigonọ nankọtọn die!—Gẹnẹsisi 1:31.
Yajiji Bẹjẹeji
4. Etẹwẹ whenuho dohia gando ninọmẹ gbẹtọvi lẹ tọn go?
4 Ṣogan, eyin mí pọ́n ninọmẹ whẹndo gbẹtọvi tọn to whenuho gblamẹ, e họnwun dọ nude jẹdò taun. Onú ylankan lẹ ko jọ, podọ whẹndo gbẹtọvi tọn ko jiya susu. To owhe kanweko lẹ gblamẹ, ovivi Adam po Evi po tọn lẹpo ko tindo numimọ azọ̀n, yọnhopipo, po okú po tọn. Na jide tọn, ninọmẹ aigba tọn dẹn tlala do paladisi he gọ́ na gbẹtọvi ayajẹnọ lẹ. Ninọmẹ lọ yin zẹẹmẹ-basina po gbesisọ po to Lomunu lẹ 8:22 mẹ dọmọ: “Nudida lẹpo pete wẹ to winwẹ̀n bosọ to ajipanu to awufiẹsa mẹ . . . kakajẹ dinvie.”
5. Nawẹ mẹjitọ mítọn tintan lẹ tindo mahẹ to yajiji hinhẹnwa whẹndo gbẹtọvi tọn ji mẹ gbọn?
5 Jehovah ma dona yin whẹgbledo na yajiji he ko sayana gbẹtọvi lẹ sọn ojlẹ dindẹn die lẹpo gba. (2 Samuẹli 22:31) Gbẹtọvi lẹ lọsu wẹ dona yin whẹgbledo jẹ obá de mẹ. “Yé gble, yé to azọ́n gbigble wà.” (Psalm 14:1) Onú dagbe kẹdẹ wẹ yin nina mẹjitọ mítọn tintan lẹ to bẹjẹeji. Nuhe yin bibiọ lẹpo na ninọmẹ mọnkọtọn nido zindonukọn wẹ nado setonuna Jiwheyẹwhe, ṣigba Adam po Evi po de nado jẹ yedekannu sọn anademẹ Jehovah tọn glọ. Na mẹjitọ mítọn tintan lẹ gbẹ́ Jehovah dai wutu, ewọ ma na hẹn yé do ninọmẹ pipé tọn mẹ ba. Agbasa yetọn na gọyì godo vudevude kakajẹ whenuena yé kú. Mí ko dugu mape tọn sọn yé dè.—Gẹnẹsisi 3:17-19; Lomunu lẹ 5:12.
6. Adà tẹwẹ Satani yiwà to yajiji hinhẹnwa mẹ?
6 Mẹhe sọ tindo mahẹ to bẹjẹeji yajiji lẹpo tọn mẹ wẹ nudida gbigbọnọ he wá yin yiylọ to godo mẹ dọ Satani Lẹgba. Mẹdekannujẹ nudide bibasi tọn yin nina ẹn. Ṣigba, e ṣì nunina enẹ zan to vivẹnudido mẹ nado yin sinsẹ̀n-basina. Ṣogan, Jehovah kẹdẹ wẹ dona yin sinsẹ̀n, e ma yin nudida etọn lẹ gba. Satani wẹ klọ Adam po Evi po nado dín mẹdekannujẹ sọn anademẹ Jehovah tọn glọ, taidi dọ yé sọgan gbọnmọ dali “tin di Jiwheyẹwhe, bo nọ yọ́n onú dagbe po oylan po.”—Gẹnẹsisi 3:5.
Jehovah Kẹdẹ Wẹ Tindo Jlọjẹ Nado Dugán
7. Etẹwẹ kọdetọn atẹṣiṣi sọta Jehovah tọn lẹ dohia?
7 Kọdetọn ylankan atẹṣiṣi tọn lẹ dohia dọ Nupojipetọ Wẹkẹ lọ tọn, Jehovah kẹdẹ wẹ tindo jlọjẹ nado dugán podọ gandudu etọn kẹdẹ wẹ yin dodo. Owhe fọtọ́n he wayi lẹ ko dohia dọ Satani, he lẹzun “ahọvi aihọn he tọn,” ko wleawuna gandudu ylankan, mawadodo, po danuwiwa tọn po he ma hẹn pekọ depope wá. (Johanu 12:31) Gandudu ylankan gbẹtọvi lẹ tọn he ko nọ̀ aimẹ na ojlẹ dindẹn to anademẹ Satani tọn glọ ko sọ dohia dọ yé ma tindo nugopipe lọ nado dugán to dodo mẹ. (Jẹlemia 10:23) Enẹwutu, gbọnvona gandudu Jehovah tọn, gandudu gbẹtọvi tọn wunmẹ lẹpo na gboawupo janwẹ. Whenuho ko do nugbo ehe hia hezeheze.
8. Etẹwẹ yin lẹndai Jehovah tọn gando wunmẹ gandudu gbẹtọvi tọn lẹpo go, podọ nawẹ e na hẹn lẹndai enẹ di gbọn?
8 Todin he Jehovah ko na dotẹnmẹ gbẹtọvi lẹ nado dugán do yede ji na owhe fọtọ́n susu lẹ matin anademẹ etọn, e tindo whẹjijọ nado de gandudu ehe lẹpo sẹ̀ sọn aigba ji bo yí gandudu etọn titi do diọtẹnna yé. Dọdai de dọ gando ehe go dọmọ: “To azán ahọlu nẹlẹ tọn lẹ [gandudu gbẹtọvi tọn lẹ] mẹ wẹ Jiwheyẹwhe olọn tọn na ze ahọludu de [gandudu olọnmẹ tọn etọn to anademẹ Klisti tọn glọ] daga, he ma na yin viva gbede, . . . e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) Gandudu ylankan gbẹtọvi tọn lẹ na yin didesẹ, podọ Ahọluduta olọnmẹ tọn Jiwheyẹwhe tọn kẹdẹ wẹ na tin bo dugán do aigba lọ ji. Klisti na yin Ahọlu, podọ gbẹtọvi nugbonọ 144 000 he yin ṣinṣinyan sọn aigba ji na dugán hẹ ẹ.—Osọhia 14:1.
Yajiji Sọgan Hẹn Ale Wá
9, 10. Nawẹ Jesu mọaleyi sọn onú he e jiya etọn lẹ mẹ gbọn?
9 Ojlofọndotenamẹnu wẹ e yin nado gbadopọnna jẹhẹnu mẹhe na dugán to Ahọluduta olọnmẹ tọn mẹ lẹ tọn. Tintan whẹ́, Jesu Klisti dohia dọ ewọ pegan mlẹnmlẹn nado yin Ahọlu. E ko yí owhe madosọha lẹ zan hẹ Jehovah bo to ojlo Otọ́ etọn tọn wà, bosọ yin “azọ́nwatọgan” Etọn. (Howhinwhẹn lẹ 8:22-31) To whenuena Jehovah basi tito dọ e na wá aigba ji, Jesu kọngbedopọ sọn ojlo mẹ. To aigba ji, e ze ayidonugo etọn lẹpo do hodidọ na mẹdevo lẹ gando nupojipetọ-yinyin Jehovah tọn po Ahọluduta etọn po go ji. Jesu ze apajlẹ dagbe dai na mímẹpo gbọn taliliai mlẹnmlẹn na nupojipetọ-yinyin enẹ dali.—Matiu 4:17; 6:9.
10 Jesu yin homẹkẹndo bosọ yin hùhù to godo mẹ. To lizọnyizọn etọn whenu, e penugo nado doayi ninọmẹ blawu he mẹ gbẹtọvi lẹ tin te go. Be ninọmẹ enẹ mimọ po oyà he ewọ lọsu ji lẹ po hẹn ale depope wá na ẹn ya? Mọwẹ. Heblu lẹ 5:8 dọmọ: “Le e tlẹ yin Ovi [Jiwheyẹwhe tọn], ganṣo e plọn tonuse gbọ̀n onú he mẹ e jiya te.” Numimọ he Jesu tindo to aigba ji lẹ hẹn ẹn penugo nado mọnukunnujẹ gbẹtọ lẹ mẹ bo vẹawu yé dogọ. Ewọ lọsu tindo numimọ ninọmẹ whẹndo gbẹtọvi lẹ tọn na ede. Enẹwutu, e sọgan vẹawu mẹhe to yaji lẹ bo mọnukunnujẹ azọngban etọn mẹ dogọ nado gọalọna yé. Pọ́n lehe apọsteli Paulu zinnudo ehe ji to owe Heblu lẹ tọn mẹ do dọmọ: “To onú lẹpo mẹ, e jẹ yè ni basi i di mẹmẹsunnu etọn lẹ, na e nido yin yẹwhenọ daho, lẹblanunọ, nugbonọ to onú he yin Jiwheyẹwhe tọn mẹ, nado basi ovẹsè na ylando gbẹtọ lẹ tọn. Na le ewlọsu ko jiya, bọ yè whlé e pọ́n, e sọgan gọalọna yé he yè to whiwhlepọn lẹ.” “Míwlẹ ma tindo yẹwhenọ daho he ma yọ́n vivẹ madogán mítọn lẹ tọn; ṣigba to onú lẹpo mẹ he yè whlepọn kẹdẹdi míwlẹ, ṣigba to matin ylando mẹ. Enẹwutu mì gbọ mí ni yí tugbigbo do wá ofìn ojọmiọn tọn kọ̀n na mí nido mọ lẹblanu yí, na mí nido mọ ojọmiọn yí nado [mọ alọgọ yí] to nukunbibia whenu.”—Heblu lẹ 2:17, 18; 4:14-16; Matiu 9:36; 11:28-30.
11. Nawẹ numimọ he ahọlu po yẹwhenọ sọgodo tọn lẹ po tindo to aigba ji na hẹn ale wá na yé taidi gandutọ lẹ gbọn?
11 Onú dopolọ sọgan yin didọ gando gbẹtọ 144 000 he “yè fligọ” sọn aigba ji nado dugán hẹ Klisti Jesu to Ahọluduta olọnmẹ tọn mẹ lẹ go. (Osọhia 14:4) Yemẹpo wẹ yin jiji taidi gbẹtọ to aigba ji bo whẹ́n to aihọn he gọ́ na yajiji de mẹ bosọ tindo numimọ yajiji tọn. Susu yetọn yin homẹkẹndo bọ delẹ tlẹ yin hùhù na yé hẹn tenọgligo hlan Jehovah bo tindo ojlo nado hodo Jesu wutu. Ṣigba yé ‘ma kuwinyan okunnu Oklunọ yetọn tọn, bo yin mahẹtọ to nukunbibia wẹndagbe tọn lẹ mẹ.’ (2 Timoti 1:8) Numimọ he yé tindo to aigba ji lẹ hẹn yé pegan dogọ nado dawhẹna whẹndo gbẹtọvi tọn sọn olọn mẹ. Yé ko plọn nado nọ vẹawumẹ dogọ, do homẹdagbe hia, bo tindo ojlo vẹkuvẹku nado gọalọna gbẹtọ lẹ.—Osọhia 5:10; 14:2-5; 20:6.
Ayajẹ Mẹhe Tindo Todido Nado Nọ̀ Aigba Ji lẹ Tọn
12, 13. Nawẹ yajiji sọgan hẹn ale wá na mẹhe tindo todido aigba ji tọn lẹ gbọn?
12 Be mẹhe tindo todido nado nọgbẹ̀ kakadoi to aigba paladisi tọn ji he vò sọn azọ̀n, awubla, po okú po si lẹ sọgan mọaleyi sọn oyà he yé to jiji todin mẹ ya? Mí ma nọ mọ awuvivi depope to awufiẹsa po adúkúnkún he yajiji nọ hẹnwa po mẹ gba. Ṣigba to whenuena mí doakọnna yajiji mọnkọtọn, jẹhẹnu dagbe mítọn lẹ sọgan pọnte dogọ bo na dekọtọn do ayajẹ mẹ.
13 Lẹnnupọndo nuhe Ohó gbọdo Jiwheyẹwhe tọn dọ do ehe ji: “Eyin mì tlẹ jiya na dodo wutu, donanọa wẹ mì.” “Eyin yè to mì vlẹ na oyín Klisti tọn wutu, donanọ wẹ mì.” (1 Pita 3:14; 4:14) “Donanọ wẹ mìwlẹ, whenuena gbẹtọ lẹ na to vivlẹ mì kò, bo to homẹkẹndo mì, bosọ to oylan hunkọhunkọ dọ do mì go to lalo mẹ, na ṣie wutu. Mì ni jaya, na mì nisọ to ayajẹ susu; na ale mìtọn wẹ daho to olọn mẹ.” (Matiu 5:11, 12) “Donanọ wẹ dawe lọ he doakọnna whlepọn: na whenuena yè tẹ́n ẹn pọ́n, e na yí jẹgbakun ogbẹ̀ tọn.”—Jakobu 1:12.
14. To linlẹn tẹ mẹ wẹ yajiji sọgan hẹn sinsẹ̀n-basitọ Jehovah tọn lẹ jaya te?
14 Na nugbo tọn, e ma yin oyà he mí nọ ji lọ wẹ nọ hẹn ayajẹ wá na mí gba. Mí nọ mọ ayajẹ po pekọ po na mí yọnẹn dọ mí to yaji na mí to ojlo Jehovah tọn wà bosọ to afọ̀domẹ Jesu tọn hodo wutu. Di apajlẹ, to owhe kanweko tintan whenu, delẹ to apọsteli lẹ mẹ yin wiwle do ganmẹ podọ to enẹgodo yin hinhẹnwa whẹdatẹn daho Ju lẹ tọn nukọn bo yin whẹgbledo na yé to yẹwheho Jesu Klisti tọn dọ wutu. Yé yin hihò bosọ yin jijodo to enẹgodo. Nawẹ yé yinuwa gbọn? Kandai Biblu tọn dọ dọ yé “sọ yì sọn agun tòhódọtọ lẹ tọn nukọn bo to ayajẹ na yè lẹn yé jẹ nado jiya na oyín etọn wutu.” (Owalọ lẹ 5:17-41) E ma yin obá po awufiẹsa lọ po wẹ hẹn ayajẹ wá na yé gba, ṣigba yé jaya na yé yọnẹn dọ tenọgligo hinhẹn yetọn hlan Jehovah po afọ̀domẹ Jesu tọn hihodo po wẹ hẹn yajiji enẹ wá.—Owalọ lẹ 16:25; 2 Kọlintinu lẹ 12:10; 1 Pita 4:13.
15. Nawẹ akọndidona yajiji todin sọgan hẹn ale wá na mí to sọgodo gbọn?
15 Eyin mí tindo pọndohlan he sọgbe dile mí to akọndona nukundiọsọmẹ po homẹkẹn po, e sọgan hẹn mí nado doakọnnanu dogọ. Ehe na gọalọna mí nado doakọnna yajiji sọgodo tọn lẹ. Mí hia dọmọ: “Mì mẹmẹsunnu ṣie emi, whenuena mì jẹ whlepọn hunkọhunkọ mẹ, mì hia ẹ na ayajijẹ popo; na mì nisọ yọ́n ehe dọ whlepọn yise mìtọn tọn wẹ nọ wazọ́n” akọndonanu tọn. (Jakobu 1:2, 3) Mọdopolọ, Lomunu lẹ 5:3-5 dọna mí dọmọ: “Mí to awagundo to tukla lẹ mẹ ga, le mí yọnẹn dọ tukla nọ wazọ́n [akọndonanu] tọn; [akọndonanu] nọ wazọ́n whlepọn tọn; whlepọn sọ nọ wazọ́n todido tọn: todido ma nọ dowinyanmẹ.” Enẹwutu lehe mí doakọnna whlepọn lẹ todin na Klistiani-yinyin mítọn wutu sọ, mọ wẹ mí na pegan dogọ nado doakọnna whlepọn devo lẹ to aihọn ylankan ehe mẹ do niyẹn.
Jehovah Na Suahọ Mí
16. Etẹwẹ Jehovah na wà na ahọlu po yẹwhenọ sọgodo tọn lẹ po nado suahọ yajiji yetọn?
16 Eyin mí tlẹ hẹn nutindo agbasa tọn lẹ bu na nukundiọsọmẹ kavi homẹkẹn he nọ wá mí ji na titẹdo aliho Klistiani tọn go gligli wutu, mí sọgan jaya to yinyọnẹn mẹ dọ Jehovah na suahọ mí to gigọ́ mẹ. Di apajlẹ, apọsteli Paulu wlanwe hlan mẹdelẹ he tindo todido olọn mẹ tọn dọmọ: “Mìwlẹ . . . yí homẹhunhun do yí agbàn mìtọn yè hẹngble lẹ, na le mì ko yọnẹn to mìde homẹ dọ, mì tindo adọkun he pọnte he ma nọ gble” taidi gandutọ lẹ to Ahọluduta Jiwheyẹwhe tọn mẹ. (Heblu lẹ 10:34) Podọ lẹnnupọndo ayajẹ he yé na tindo ji to whenuena yé na tindo mahẹ to dona jiawu lẹ hinhẹnwa gbẹtọvi lẹ ji to aihọn yọyọ lọ mẹ to anademẹ Jehovah po Klisti po tọn glọ. Lehe ohó he apọsteli Paulu dọna Klistiani nugbonọ lẹ yin nugbo do sọ dọmọ: “Yẹn hia dọ oyà whenu dinvie tọn ma jẹ nado yijlẹdo gigo he yè na sọhia to mí mẹ go gba.”—Lomunu lẹ 8:18.
17. Etẹwẹ Jehovah na wà na mẹhe tindo todido aigba ji tọn bo to sinsẹ̀n ẹn po nugbonọ-yinyin po todin lẹ?
17 Mọdopolọ, mahopọnna nudepope he mẹhe tindo todido aigba ji tọn lẹ sọgan ko hẹnbu todin kavi yí ojlo do jodo nado sẹ̀n Jehovah, ewọ na suahọ yé susugege po nuhe e na wà to sọgodo po. E na na yé ogbẹ̀ pipé kakadoi to aigba paladisi tọn de ji. To aihọn yọyọ enẹ mẹ, Jehovah na “súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” (Osọhia 21:4) Opagbe jiawu nankọ die! Nudepope he mí yin hinhẹn gánnugánnu kavi desọn ojlo mẹ do jodo to aihọn ehe mẹ na ojlo Jehovah tọn wiwà wutu ma sọgan yin yiyijlẹdo ogbẹ̀ jiawu sọgodo tọn, he ewọ na na devizọnwatọ nugbonọ etọn he doakọnna yajiji lẹ go gba.
18. Opagbe homẹmiọnnamẹ tọn tẹwẹ Jehovah do na mí to Ohó etọn mẹ?
18 Yajiji depope he mí sọgan doakọnna to nukọn mẹ ma na glọnalina mí nado duvivi ogbẹ̀ madopodo tọn to aihọn yọyọ Jiwheyẹwhe tọn mẹ gba. Ninọmẹ dagbe aihọn yọyọ lọ tọn lẹ na sú odò enẹ lẹpo tọn. Isaia 65:17, 18 dọna mí dọmọ: “Yè ma na flin [onú] hoho tọn, mọ yé ma na wá linlẹn mẹ. Ṣigba homẹ mìtọn ni hùn, na mì nisọ to ayajẹ kakadoi to enẹ he yẹn dá mẹ.” Abajọ nọvisunnu daa Jesu tọn sọgan dọmọ: ‘Míwlẹ nọ hia yé he doakọnnanu lẹ di ayajẹnọ.’ (Jakobu 5:11) Mọwẹ, eyin mí yí nugbonọ-yinyin do doakọnna yajiji to egbehe, mí sọgan mọaleyi todin podọ to sọgodo.
[Nudọnamẹ Odò Tọn]
a Hogbe he sọgbe devo na “donanọ” wẹ “ayajẹnọ.”
Nawẹ Hiẹ Na Na Gblọndo Gbọn?
• Etẹwẹ yin bẹjẹeji yajiji gbẹtọvi lẹ tọn?
• Ale tẹlẹ wẹ yajiji sọgan hẹnwa na mẹhe na duahọlu do aigba ji to sọgodo lẹ po mẹjidugando yetọn lẹ po?
• Naegbọn mí sọgan yin ayajẹnọ todin mahopọnna yajiji?
[Yẹdide to weda 27]
Mẹjitọ mítọn tintan lẹ tindo sọgodo jiawu de to nukọn yetọn
[Yẹdide to weda 29]
Yajiji mẹdevo lẹ tọn mimọ wleawuna Jesu nado yin Ahọlu po Yẹwhenọ Daho dagbe de po
[Yẹdide to weda 31]
Apọsteli lẹ ‘jaya na yè lẹn yé jẹ nado jiya’ na yise yetọn wutu