Adà 10
Aihọn Yọyọ Jiawu lọ He Jiwheyẹwhe Basi
1, 2. Etẹwẹ na jọ to awhàn nuklówe Amagẹdọni tọn godo?
TO AWHÀN nuklọ́we Jiwheyẹwhe tọn Amagẹdọni godo, etẹwẹ na bọdego? To whelọnu lo, gbẹ̀ninọ gigonọ de na bẹjẹeji. Amagẹdọni lùntọ́ntọ lẹ, to nugbonọ-yinyin yetọn didohia hlan gandudu Jiwheyẹwhe tọn godo, na yin kúavọdona biọ aihọn yọyọ lọ mẹ. Lehe e na yin ojlẹ ayajẹnọ de to whenuho mẹ do sọ dile alè jiawu lẹ na jẹ sisà do whẹndo gbẹtọvi lẹ tọn ji sọn Jiwheyẹwhe dè!
2 To anademẹ Ahọluduta Jiwheyẹwhe tọn glọ́, lùntọ́ntọ lọ lẹ na jẹ awuwlena paladisi de ji. Huhlọn yetọn lẹ na yin zizéjona yanwle mayin-ṣejannabi tọn lẹ he na yin alè na enẹnọ he to gbẹ̀nọ to whenẹnu lẹpo. Aigba na jẹ didiọji do owhé pekọ whanpẹnọ, jijọho, tọn de mẹ na gbẹtọvi lẹ.
Dodo Yítẹn to Ylanwa Sí
3. Kọgbọ niyaniya tọn tẹwẹ na yin numọtolanmẹ etọn tindo tololo to Amagẹdọni godo?
3 Ehe lẹpo na yọnbasi gbọn vivà aihọn Satani tọn sudo dali. Sinsẹ̀n lalo bẹwlunọ lẹ, nuzédai ogbẹ́ tọn lẹ, kavi gandudu tọn lẹ ma nasọ tin bà. Nulilá Satani tọn nado klọ̀ gbẹtọ lẹ ma nasọ tin gbede bà; azọ́nyiwatọ he to huhlọn na ẹn lẹ na họ́liai po titonu Satani tọn po. Saa lẹnnupọn: yèdọ lẹdo adínọ aihọn Satani tọn pete na yin piplọ yingbe! Lehe e na yin kọgbọ do sọ!
4. Basi zẹẹmẹ diọdo nupinplọn he na wá aimẹ tọn.
4 Enẹgodo linlẹn nugbakíṣa gandudu gbẹtọvi lẹ tọn na yin tẹndiọna gbọn nuplọnmẹ he nọ jlọmẹdote he na nọ wá sọn Jiwheyẹwhe de dali. “Ovi towe lẹpo nasọ yin pinplọ́n sọn Oklunọ [“Jehovah,” NW] de.” (Isaia 54:13) Po nudọnamẹ wiwé ehe po sọn owhe de mẹ jẹ devo mẹ, “aihọn na gọ́ na nuyọnẹn Oklunọ [“Jehovah,” NW] tọn, dile osin ṣinyọn ohù ji do.” (Isaia 11:9) Gbẹtọ lẹ ma nasọ plọn nuhe ylan ba, ṣigba “omẹ he to aihọn mẹ lẹ na plọn dodo.” (Isaia 26:9) Linlẹn po nuyiwa he nọ jlọmẹdote lẹ po wẹ na yin aliho walọyizan gbẹtọ lẹ tọn.—Owalọ lẹ 17:31; Filippinu lẹ 4:8.
5. Etẹwẹ na jọ do ylanwiwa po mẹylankan lẹ po go?
5 Nalete, mẹhùhù, nuhẹngble, huhlọn-yido-zanhẹmẹ, jaguda, kavi osẹ́nhẹngba devo depope ma na tin bà. Mẹdepope ma na jiya na walọylankan mẹdevo lẹ tọn bà. Howhinwhẹn lẹ 10:30 dọmọ: “Yè ma na diọtẹnna dodonọ gbède: Ṣigba mẹylankan ma na nọ aihọn mẹ gba.”
Agbasalilo Pipé Yin Gigọdo Otẹ̀n Etọn Mẹ
6, 7. (a) Nugbo sinsinyẹn tẹwẹ gandudu Ahọluduta tọn na hẹn wá opodo? (b) Nawẹ Jesu do ehe hia to whenue é tin to aigba ji gbọn?
6 To aihọn yọyọ lọ mẹ, nugandomẹgo aovi tọn lẹpo na atẹṣiṣi dowhenu tọn wutu ma na tin bà. Di dohia, gandudu Ahọluduta lọ tọn na dè awutu po yọnhopipò po sẹ. To egbehe, eyin hiẹ tlẹ nọ duvivi agbasaliho dagbe jlẹkaji tọn, nugbo he vẹawu lọ wẹ yindọ dile hiẹ to yọnho pò, nukun towe lẹ ma nọ mọnu ganji bà, adú towe lẹ na wọ̀, hiẹ ma na sèho ganji bà, ayú agbasa towe tọn lẹ na jẹ wiwlo ji, azọ́nwanu agbasamẹ towe tọn lẹ na gbẹazọ́n, bọ to godomẹ hiẹ na kú.
7 Ṣigba, nugandomẹgo awufiẹsa tọn he mí dugú etọn sọn mẹjitọ mítọn tintan lẹ dè nẹlẹ to madẹnmẹ na lẹzun onú he juwayi. Be hiẹ flin nuhe Jesu dohia gando agbasalilo go to whenuena e tin to aigba ji ya? Biblu na linlin dọmọ: “Agùndaho lẹ sọ wá e dè, yé po sẹkúnọ lẹ po, nukuntọnnọ lẹ, unbọpẹn lẹ, klegbesatọ lẹ, po omẹ susu devo lẹ po, yè zlọ́n yé dai to afọ etọn go; e sọ hẹnazọ̀ngbọna yé: Sọmọ bọ avò vò agùndaho lọ, whenuena yé mọ unbọpẹn lẹ to hodọ, klegbesatọ lẹ jẹ gángán, bọ nukuntọnnọ lẹ númọ.”—Matiu 15:30, 31.
8, 9. Basi zẹẹmẹ ayajẹ he na wá to aihọn yọyọ lọ mẹ to whenuena agbasalilo he pé na yin hinhẹn gọwa.
8 Ayajẹ daho nankọ wẹ na wá to aihọn yọyọ lọ mẹ dile awutu mítọn lẹpo na yin didèsẹ! Yajiji he nọ dekọtọn sọn agbasalilo matindo mẹ ma na sọ dotukla mí gbede bà. “Finẹnu lẹ ma to na dọmọ, yẹn to azọ̀njẹ.” “Whenẹnu wẹ nukun nukuntọ́nnọ lẹ tọn na hùn, otó tókúnnọ lẹ tọn na sọ hùn. Whenẹnu wẹ potẹn na lọ́n di agbanlin, odẹ́ unbọpẹn tọn na sọ jihàn.”—Isaia 33:24; 35:5, 6.
9 Be e ma na yin ayajẹnu nado nọ fọn to azán dopodopo gbè bo nọ mọdọ hiẹ todin to vivi agbasalilo dagbe tọn dù ya? Be e ma na yin ayajẹnu na mẹhomẹ lẹ nado mọdọ yé ko yin gigọ̀jẹ huhlọn gigọ́ yọpọ tọn mẹ bo mọ pipé-yinyin ehe Adam po Evi po duvivi etọn to dowhenu yí ya? Opagbe Biblu tọn wẹ yin dọ: “Agbasa etọn na yin jẹemẹ hú ovi de tọn; e lẹ́gọ̀ do azán ovú etọn lẹ kọ̀n.” (Job 33:25) Ayajẹ nankọ wẹ e na yin nado bẹ́ gandonukun nẹlẹ, nuhe nọ gọalọna tonusise lẹ, sẹ́kunọpò lẹ, oján sẹ́kunọ tọn lẹ, po amasinkún lẹ po dlan! Nuhudo dotowhé lẹ, doto lẹ, doto-adúgopọntọ lẹ tọn ma nasọ tin gbede bà.
10. Etẹwẹ na jọ̀ do okú go?
10 Enẹnọ he nọ duvivi agbasalilo dagbe tọn lẹ ma na jlo nado kú gba. Podọ yé ma dona kú, na gbẹtọvi lẹ ma nasọ tin to adúkúnkún mapé tọn he yè dugú etọn po okú po tọn dù gba. Klisti “ma na nọ maduahọlu kaka é na do zín kẹntọ lẹpo dai to afọ etọn glọ́. Kẹntọ he yè na sudo gbọn godo wẹ okú.” “Nunina Jiwheyẹwhe tọn wẹ ogbẹ̀ madopodo.”—1 Kọlintinu lẹ 15:25, 26; Lomunu lẹ 6:23; sọ pọn Isaia 25:8 ga.
11. Nawẹ Osọhia blá alè aihọn yọyọ lọ tọn lẹ dopọ gbọn?
11 Nado wá dotana alè he na sà sọn Jiwheyẹwhe he nọ hò mẹtọn pọn dè wá whẹndo gbẹtọvi lẹ tọn ji to Paladisi mẹ dali, owe he gbọngodona Biblu dọmọ: “Jiwheyẹwhe nasọ súnsún dasin lẹpo sẹ̀ sọn nukun yetọn mẹ, okú ma nasọ tin bà kavi awubla, kavi avi, mọ awufiẹsa ma nasọ tin bà: Na onu tintan lẹ ko juwayi.”—Osọhia 21:3, 4.
Oṣiọ Lẹ Gọwá
12. Nawẹ Jesu do huhlọn fọ́nsọnku tọn he Jiwheyẹwhe na ẹn hia gbọn?
12 Jesu basi nuhe hugan hinhẹn awutunọ lẹ jẹ gángán po sẹ́kunọ lẹ hinhẹn jẹ gángán po. E sọ hẹn gbẹtọ lẹ gọwá sọn yọdo mẹ ga. Ewọ gbọnmọ dali do do huhlọn jiawu fọ́nsọnku tọn he Jiwheyẹwhe ko na ẹn hia. Be hiẹ flin nujijọ lọ to whenuena Jesu wá owhé dawe he viyọnnu etọn kú de tọn gbè ya? Jesu dọna viyọnnu he kú lọ dọmọ: “Oviyọnnu, yẹn dọ hlan we fọ́n.” Po kọdetọn tẹ po wẹ? “To afọdoponẹji oviyọnnu lọ sọ fọ́n bo to zọ̀nlinzin.” To mimọ enẹ, “avò sọ vò yé [gbẹtọ he tin to finẹ lẹ] talala.” Yé ma sọgan zé ayajẹ yetọn whla gba!—Malku 5:41, 42; sọ pọn Luku 7:11-16; Johanu 11:1-45 ga.
13. Gbẹtọ wunmẹ tẹlẹ wẹ na yin finfọ́nsọnku?
13 To aihọn yọyọ lọ mẹ, “fọ́nsọnku dodonọ lẹ tọn, po mawàdodonọ lẹ po de na tin.” (Owalọ lẹ 24:15) To ojlẹ enẹ mẹ Jesu na yí huhlọn he Jiwheyẹwhe na ẹn zán nado fọ́n oṣiọ lẹ na, dile ewọ dọ do: “Yẹn wẹ fọ́nsọnku po ogbẹ̀ po; mẹhe yí mi sè, eyin e kú, e nasọ tin to ogbẹ̀.” (Johanu 11:25) E sọ dọmọ: “Omẹ he tin to yọdo [oflin Jiwheyẹwhe tọn] mẹ lẹpo na sè ogbè [Jesu] tọn, bo na tọ́njẹgbonu.”—Johanu 5:28, 29.
14. Na okú ma na tin wutu, onu tẹlẹ wẹ ma na tin bà?
14 Lehe ayajẹ lẹdo aihọn pé lọ na klo do sọ to whenuena hagbẹ́ debọdo-dego oṣiọ lẹ tọn na gọwá ogbẹ̀ nado kọnawudopọ hẹ mẹyiwanna yetọn lẹ! Adà nulilá mẹkuku tọn to linlinwe lẹ mẹ ma na tin nado hẹn awubla wá na lùntọ́ntọ lẹ bà. Kakatimọ, dehe yin adà awetọ etọn kẹdẹ wẹ na tin: yèdọ nulilá mẹhe ṣẹṣẹ fọ́nsọnku lẹ tọn nado hẹn ayajẹ wá na enẹnọ he yiwanna yé lẹ. Enẹwutu ṣiọdidi lẹ, nuwiwa ṣiọdidi tọn lẹ, ṣiọ-mẹ̀tẹn lẹ, kavi tẹ́pamẹ lẹ ma na tin bà!
Aihọn Jijọho Nugbo Tọn De
15. Nawẹ dọdai Mika tọn na yin mimọ to gigọ́mẹ gbọn?
15 Jijọho nugbo to awa gbẹ̀ninọ tọn lẹpo ji na yin mimọ. Awhàn lẹ, mẹhe nọ doawhàn te lẹ, po awhànfunnu lẹ bibasi po na yin nuhe ko juwayi. Etẹwutu? Na ojlo hunyanhunyan akọta, otò, po akọ̀, tọn po na búsẹ sọn aimẹ pete. Enẹgodo, to linlẹn gigọ́ mẹ, “akọta ma na sọ zé ohi daga do akọta ji, mọ yé ma nasọ plọn awhàn gbede bà.”—Mika 4:3.
16. Nawẹ Jiwheyẹwhe na mọdọ awhàn lẹ na lẹzun nuhe ma yọnbasi bà gbọn?
16 Ehe sọgan taidi nupaṣamẹ to pọndohlan mẹ na whenuho gbẹtọ tọn heyin nugbla-ohùn awhàn gbọzangbọzan tọn. Ṣigba enẹ yinmọ na gbẹtọvi lẹ ko tin to gandudu gbẹtọvi po aovi tọn po glọ wutu wẹ. To aihọn yọyọ lọ mẹ, to gandudu Ahọluduta lọ tọn glọ, ehe wẹ yin nuhe na jọ: “Mì wá pọn azọ́n Oklunọ [“Jehovah,” NW] tọn . . . E hẹn awhàn gbọ kakajẹ aigba podo; É wẹ́n ogá, bosọ sán owhán do awe; É hẹn kẹkẹ awhàn tọn fiọ to miyọn mẹ.”—Psalm 46:8, 9.
17, 18. To aihọn yọyọ lọ mẹ, haṣinṣan tẹwẹ na tin to gbẹtọvi lẹ po kanlin lẹ po ṣẹnṣẹn?
17 Gbẹtọ po gbékanlin lẹ po nasọ tin to jijọho mẹ, dile yé te do dai to Edẹni. (Gẹnẹsisi 1:28; 2:19) Jiwheyẹwhe dọmọ: “Podọ azán nẹ mẹ wẹ yẹn na basi alẹnu de na yé hẹ gbékanlin danji tọn lẹ, podọ hẹ ohẹ olọn tọn lẹ, podọ hẹ onu he nọ lin aigba ji tọn lẹ yẹn . . . bo nasọ hẹn yé nado mlọnai blẹo.”—Hosea 2:18.
18 Nawẹ jijọho enẹ na yitẹn do sọ? “Ohla ga na nọ nọ̀hẹ lẹngbọvu dopọ́, kinnikinni ovú na mlọnai hẹ́ gbọgbọẹvu; oyìnvú po kinnikinni po, po kanlin yìnyìn po na nọnọ̀ pọ; yọpọvu na sọ hẹn yé dán pé.” Kanlin lẹ ma nasọ yin owù hlan gbẹtọ lẹ kavi hlan yédelẹ gbede bà. Yèdọ “kinnikinni na dùama di oyin asú”!—Isaia 11:6-9; 65:25.
Aigba Yin Didiọ Zun Paladisi De
19. Aigba na yin didiọ zun etẹ?
19 Aigba lọ blebu na yin didiọ zun owhé paladisi tọn de na gbẹtọvi lẹ. Enẹwutu wẹ Jesu do sọgan dopagbe na dawe he tindo yise to ewọ mẹ de dọmọ: “Hiẹ na nọ hẹ́ mi to paladisi” mẹ. Biblu dọmọ: “Zùngbo po aigba he to atò po na jaya, . . . bo sọ gbasẹ́ di vòvo lii . . . Na osin na ví sọn zùngbo mẹ jẹgbonu, po asisa po to ozùn mẹ.”—Luku 23:43; Isaia 35:1, 6.
20. Naegbọn huvẹ ma nasọ dotukla gbẹtọvi lẹ bà?
20 To Ahọluduta Jiwheyẹwhe tọn glọ, huvẹ ma nasọ sayana livi susu lẹ gbede bà. “Gbadó susugege na tin finẹ to osó lẹ ji.” “Atin dànji tọn lọ na nọ jó osinsẹ́n etọn, podọ aigba lọ nasọ nọ jó ojideji etọn, yé bo nasọ yin masavònọ to aigba yetọn mẹ.”—Psalm 72:16; Ezekiẹli 34:27.
21. Etẹwẹ na jọ do ohọ matindo, gohọ lẹ, po kọmẹnu ylankan lẹ po go?
21 Ohẹ́n, gbẹtọ he matindo ohọ lẹ, gohọ lẹ, kavi lẹdo fie osẹ́nhẹngba su te lẹ ma na tin bá. “Yé na gbá ohọ, bo sọ nọnọ̀ yé mẹ, yé na do vẹngle, bo sọ dù sinsẹ́n yetọn. Yé ma na gbá ohọ bọ mẹdevo na nọ̀ e mẹ; yé ma na dó bọ mẹdevo na dù.” “Yé na sinai omẹ dopodopo to vẹntin etọn glọ́ podọ to ovòtin etọn glọ; podọ mẹde ma na sọ hẹn yé savò gba.”—Isaia 65:21, 22; Mika 4:4.
22. Nawẹ Biblu basi zẹẹmẹ dona gandudu Jiwheyẹwhe tọn lẹ gbọn?
22 Gbẹtọvi lẹ na yin didona po onu helẹ po, podọ húmọ, to Paladisi mẹ. Psalm 145:16 dọmọ: “Hiẹ [Jiwheyẹwhe] kẹalọ towe, bo sọ hẹnnupékọna ojlo nutẹgbẹ lẹpo tọn.” Abajọ dọdai Biblu tọn do lá dọmọ: “Ṣigba homẹmimiọnnọ lẹ na dugú aigba tọn; yé na hẹn homẹhun yede to jijọho susu mẹ. . . . Dodonọ wẹ na dugú aigba tọn, bo nasọ nọnọ̀ e mẹ kakadoi.”—Psalm 37:11, 29.
Dide Onu Hoho Lẹ Sẹ̀
23. Nawẹ Ahọluduta Jiwheyẹwhe tọn na dè yajiji he mí ko tindo numimọ etọn lẹ sẹ̀ gbọn?
23 Gandudu Ahọluduta Jiwheyẹwhe tọn na dè hẹngble he ko yin bibasi do whẹndo gbẹtọvi tọn ji na owhe fọtọ́n ṣidopo he wayi lẹ sẹ̀. Ayajẹ ojlẹ enẹ mẹ tọn lẹ na yitẹn to yajiji he gbẹtọvi lẹ ko tindo numimọ etọn sí. Gbẹninọ ma na yin tuklado gbọn oflin ylankan yajiji he ko wayi tọn lẹ dali gba. Linlẹn mẹjlọdote po nuwiwa gbẹ̀zan egbesọegbesọ tọn he na tin to filẹpo lẹ na súnsún oflin awufiẹsa tọn lẹ sẹ̀.
24, 25. (a) Etẹwẹ Isaia dọdai dọ e na jọ? (b) Naegbọn mí do sọgan tindo jide dọ oflin yajiji dai tọn lẹ na búsẹ mlẹnmlẹn?
24 Jiwheyẹwhe he nọ hò mẹtọn pọn lá dọmọ: “Yẹn dá aihọn yọyọ lẹ [gandudu olọnmẹ tọn de do gbẹtọvi lẹ ji] po aigba yọyọ [ogbẹ́ gbẹtọvi dodonọ lẹ tọn] de po: yè ma na flin hoho tọn, mọ yé ma na wá linlẹn mẹ, ṣigba homẹ mìtọn ni hùn na mì ni sọ to ayajẹ kakadoi to enẹ he yẹn dá mẹ.” “Aihọn lẹpo gbọjẹ, bo sọ nabọẹ: yé sọ dabobo to hànjiji mẹ.”—Isaia 14:7; 65:17, 18.
25 Enẹwutu gbọn yizan Ahọluduta etọn tọn dali, Jiwheyẹwhe na didẹ ninọmẹ he ko dẹ̀n to aimẹ taun lọ sẹ̀ pete. Ewọ na do nukunpedomẹgo etọn hia kakadoi gbọn kinkọ̀n dona he na hugan nudepope he mí ko mọyí wayi lẹ do mí ji. Tukla he mí ko tindo numimọ etọn dai lẹ na búsẹ̀ sọn ayiha mẹ gbidigbidi to whelọnu, eyin mí tlẹ jlo nado flin yé.
26. Naegbọn Jiwheyẹwhe nado súahọ na yajiji dai tọn depope mí?
26 Mọwẹ Jiwheyẹwhe na suahọ yajiji he mí ko doakọnna to aihọn ehe mẹ do niyẹn. É yọnẹn dọ e ma yin owhẹ̀ mítọn wẹ mí do yin jìjì po mapé po gba, na mí dugú mapé tọn sọn mẹjitọ mítọn tintan lẹ dè wutu wẹ. E ma yin owhẹ̀ mítọn wẹ mí do yin jìjì do aihọn Satani tọn mẹ gba, kakatimọ eyin Adam po Ẹvi po ko yin nugbonọ wẹ, mí na ko yin jìjì do paladisi de mẹ. Enẹwutu po awuvẹmẹ talala po Jiwheyẹwhe na wà hugan hinhẹn ylankan he yè ko yí do sayana mí lẹ gbọ.
27. Dọdai tẹlẹ wẹ na mọ hẹndi jiawu yetọn yí to aihọn yọyọ lọ mẹ?
27 To aihọn yọyọ lọ mẹ, gbẹtọvi lẹ na tindo numimọ mẹdekannujẹ heyin didọdai to Lomunu lẹ 8:21, 22 mẹ dọmọ: “Na yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ. Na mí yọnẹn dọ nudida lẹpo pete wẹ to winwẹn bo sọ to ajipanu to awufiẹsa mẹ hẹ mí kakajẹ dinvie.” Gbẹtọ lẹ to whenẹnu na mọ hẹndi pete odẹ̀ lọ tọn he dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Ninọmẹ jiawu lẹ to Paladisi mẹ na yin ojlẹmọ ninọmẹ olọn mẹ tọn lẹ.
[Yẹdide to weda 23]
To aihọn yọyọ lọ mẹ, mẹhomẹ lẹ na gọjẹ huhlọn jọja tọn mẹ
[Yẹdide to weda 24]
Azọ̀n lẹ po nugomape agbasa tọn lẹ po na yin didèsẹ to aihọn yọyọ lọ mẹ
[Yẹdide to weda 25]
To aihọn yọyọ lọ mẹ, oṣiọ lẹ na yin finfọ́nsọnku do ogbẹ̀
[Yẹdide to weda 26]
‘Yé ma na plọn awhàn bà’
[Yẹdide lẹ to weda 27]
Gbẹtọvi lẹ po kanlin lẹ po na tin to jijọho mẹ mlẹnmlẹn to Paladisi mẹ
[Yẹdide to weda 27]
‘Jiwheyẹwhe na hùn alọ etọn bo na hẹnnupekọna ojlo nutẹgbẹ lẹpo tọn’
[Yẹdide to weda 28]
Ahọluduta Jiwheyẹwhe tọn na wà hugan hinhẹn yajiji he mí ko doakọnna lẹpo gbọ