Nuhe Jesu Plọnmẹ Gando Ede Go

“Jesu ma tindo ayihaawe depope gando mẹhe ewọ yin, fie e wá sọn, nuhewutu e do wá aigba ji, po nuhe sọgodo etọn na yin po go.”—WEKANTỌ HERBERT LOCKYER.

WHẸPO mí nado kẹalọyi nuhe Jesu plọnmẹ lẹ bo yí yé sè, mí dona yọ́n omẹ nankọ he ewọ yin. Mẹnu wẹ Jesu yin na taun tọn? Fie wẹ e wá sọn? Etẹwẹ yin lẹndai etọn to gbẹ̀mẹ? To owe Wẹndagbe tọn lẹ mẹ—enẹ wẹ Matiu, Malku, Luku po Johanu po—mí sọgan sè gblọndo he Jesu lọsu yí onù etọn do na lẹ.

E ko nọgbẹ̀ pọ́n whẹpo do yin jiji do aigba ji Jesu dọ to gbèdopo dọmọ: “Whẹpo Ablaham do wá tintin mẹ, yẹn ko tin.” (Johanu 8:58) Ablaham nọgbẹ̀ to nudi owhe 2000 jẹnukọnna jiji Jesu tọn. Ṣogan, Jesu ko tin hoho whẹpo tọgbo nugbonọ enẹ do nọgbẹ̀ to aigba ji. Ṣigba, fie wẹ Jesu te to whenẹnu? E basi zẹẹmẹ dọmọ: “Yẹn ko jẹte sọn olọn mẹ wá.”—Johanu 6:38.

Visunnu Jiwheyẹwhe tọn Jehovah tindo angẹli susu he yin visunnu etọn lẹ. Ṣigba Jesu gbọnvo. E do ede hia taidi “Visunnu detọ́n dopo akàn Jiwheyẹwhe tọn.” (Johanu 3:18) Hogbe enẹ zẹẹmẹdo dọ Jesu wẹ omẹ dopo gee he Jiwheyẹwhe dá tlọlọ. Gbọn Visunnu detọ́n dopo akàn lọ gblamẹ wẹ Jiwheyẹwhe dá nuhe pò lẹpo.—Kọlọsinu lẹ 1:16.

“Visunnu gbẹtọ tọn” Hogbe ehe wẹ Jesu yizan hugan nado dlẹnalọdo ede. (Matiu 8:20) E gbọnmọ dali dohia dọ emi ma yin angẹli he ze agbasa gbẹtọ tọn dó kavi gbigbọ he vọjọ de. Kakatimọ, gbẹtọvi de wẹ e yin to gigọ́ mẹ. Gbọn gbigbọ wiwe etọn gblamẹ, Jiwheyẹwhe diọtẹnna ogbẹ̀ Visunnu etọn tọn sọn olọn mẹ wá aigba ji, bo ze e do vidọ̀ awhli alọji Malia tọn mẹ. Taidi kọdetọn de, Jesu yin jiji taidi gbẹtọvi pipé he ma do ylando depope.—Matiu 1:18; Luku 1:35; Johanu 8:46.

Mẹssia dopagbe lọ Yọnnu Samalianu de dọna Jesu dọmọ: “Yẹn yọnẹn dọ Mẹssia . . . lọ na wá.” Jesu gblọn dọmọ: “Yẹn mẹhe to hodọna we wẹ omẹ lọ.” (Johanu 4:25, 26) Hogbe lọ “Mẹssia” kavi “Klisti” zẹẹmẹdo “Mẹyiamisisadode.” Jesu yin yíyí amisisadode, kavi dide gbọn Jiwheyẹwhe dali nado yí adà vonọtaun de wà to hẹndi opagbe Jiwheyẹwhe tọn lẹ tọn mẹ.

Azọ́ndenamẹ tangan etọn Jesu dọ to gbèdopo dọmọ: “Yẹn dona . . . lá wẹndagbe ahọluduta Jiwheyẹwhe tọn, na ehe wutu wẹ yẹn do yin didohlan.” (Luku 4:43) Dile etlẹ yindọ Jesu wà dagbe susu na mẹhe tin to nuhudo mẹ lẹ, Ahọluduta Jiwheyẹwhe tọn lilá wẹ to otẹn tintan mẹ to gbẹzan etọn mẹ. Nuhe e plọnmẹ gando Ahọluduta enẹ go na yin hodọdeji to nukọn mẹ.

E họnwun dọ Jesu ma yin gbẹtọ paa de.a Dile mí na wá mọ do, gbẹzan he e zan to olọn mẹ yidogọna nujọnu-yinyin ohó he e dọ to aigba ji lẹ tọn. Abajọ nuplọnmẹ etọn lẹ do yinuwado gbẹtọ livi susu ji lẹdo aihọn pé.

[Nudọnamẹ odò tọn]