Be Hiẹ Flin Ya?
Be a duvivi zinjẹgbonu Atọ̀họ̀-Nuhihọ́ lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:
• Naegbọn Mẹssia lọ dona kú?
Okú Jesu tọn dohia dọ gbẹtọvi pipé de sọgan do “mẹdezejo na Jiwheyẹwhe” hia mahopọnna lehe whlepọn lẹ sinyẹn sọ. Podọ, e suahọ ylando he kúnkan Adam tọn lẹ dugu etọn, bo hùnali ogbẹ̀ madopodo tọn dote.—15/12, weda 22-23.
• Etẹwẹ hodọdopọ dagbe hẹ ovi lẹ bẹhẹn?
E bẹ nususu hẹn hugan nado nọ dọhona ovi towe lẹ poun. E nọ bẹ kanbiọ lẹ kinkanse po sọwhiwhe yíyí do dotoaina gblọndo yetọn lẹ po hẹn. Mẹsusu ko mọdọ ojlẹ núdùdù tọn lẹ nọ hùn dotẹnmẹ hodọdopọ dagbe tọn lẹ dote.—15/1, weda 18-19.
• Whetẹnu wẹ e sọgan biọ dọ mẹde ni vọ́ baptẹm yí?
Enẹ na yinmọ eyin mẹde to nude wà to nuglọ kavi to mahẹ tindo to walọ delẹ mẹ to whenue e jlo na yí baptẹm bọ e yindọ e ko yí baptẹm dai wẹ, e sọgan yin didesẹ sọn agun mẹ.—15/2, weda 22.
• To oló Jesu tọn gando likun po ogbé ylankan lẹ po go mẹ, etẹwẹ okún dagbe lọ nọtena?
Jesu, Visunnu gbẹtọ tọn, jla ogle lọ do to lizọnyizọn aigba ji tọn etọn whenu. Sọn Pẹntikọsti 33 W.M. sọyi, okún dagbe lọ yin didó to whenuena gbigbọ wiwe yin kinkọ̀n do Klistiani yiamisisadode lẹ ji, bọ yé gbọnmọ dali yin dide taidi ovi Jiwheyẹwhe tọn lẹ.—15/3, weda 20.
• Nawẹ likun yẹhiadonu tọn he go Jesu donù to oló etọn mẹ to yinyin hinhẹnwa agbànhọ Jehovah tọn mẹ gbọn? (Mat. 13:30)
Hẹndi lọ dlẹnkan na ojlẹ de to vivọnu titonu lọ tọn. Ovi ahọluduta lọ tọn lẹ, yèdọ likun yẹhiadonu tọn lọ to yinyin hinhẹnwa agbànhọ Jehovah tọn mẹ to whenue yé yin hinhẹnwa agun Klistiani tọn he yin hinhẹngọwa lọ mẹ, kavi to whenue yé mọ ahọsumẹ olọn mẹ tọn yetọn yí.—15/3, weda 22.
• Mẹnu wẹ basi nudide kandai he yin bibẹpli do Owe-wiwe Glẹki tọn mẹ lẹ tọn?
E ma yin pipli ṣọṣi lẹ tọn kavi nukọntọ sinsẹ̀n tọn lẹ gba. Kakatimọ, Klistiani nugbo lẹ wẹ. To anademẹ gbigbọ wiwe Jiwheyẹwhe tọn glọ, yé yọ́n kandai he yin gbigbọdo nugbonugbo lẹ. E sọgbe nado dọ mọ na dopo to nunina jiawu he gbigbọ wiwe na Klistiani owhe kanweko tintan tọn lẹ mẹ wẹ “ohó gbọdo lẹ yinyọnẹn.” (1 Kọl. 12:4, 10)—1/4, weda 28.