Gbigbọ Wiwe Nọ Na Mí Huhlọn Nado Duto Whlepọn po Ninọmẹ Mẹhẹngbọjọ Tọn lẹ po Ji
“Mì na mọ huhlọn yí to whenue gbigbọ wiwe na wá mì ji.”—OWALỌ 1:8.
1, 2. Alọgọ tẹwẹ Jesu dopagbe etọn na devi etọn lẹ, podọ naegbọn yé tindo nuhudo etọn?
JESU yọnẹn dọ devi emitọn lẹ ma na penugo na yede nado yìn gbedide emitọn lẹpo gba. To nulinlẹnpọn do obá he mẹ azọ́n yetọn gbloada jẹ, huhlọn agọjẹdomẹtọ yetọn lẹ tọn, po madogán agbasa tọn yetọn po ji, e họnwun dọ yé tindo nuhudo huhlọn he hugan jọwamọ tọn. Enẹwutu, ojlẹ kleun de whẹpo Jesu do hẹji yì olọn mẹ, e na jide devi etọn lẹ dọmọ: “Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie to Jelusalẹm podọ to Jude po Samalia lẹpo po, podọ kaka yì awà he dẹn hugan aigba tọn lẹ ji.”—Owalọ 1:8.
2 Opagbe enẹ jẹ hẹndi mọyi ji to Pẹntikọsti 33 W.M., yèdọ whenue gbigbọ wiwe na huhlọn hodotọ Jesu Klisti tọn lẹ nado dọyẹwheho lẹdo Jelusalẹm pé. Agọjẹdomẹtọ depope ma penugo nado doalọtena yẹwhehodidọ yetọn. (Owalọ 4:20) “To azán lẹpo gbè kakajẹ vivọnu titonu lọ tọn,” hodotọ nugbonọ Jesu tọn lẹ kakajẹ mílọsu ji tindo nuhudo huhlọn he Jiwheyẹwhe nọ namẹ enẹ tọn taun.—Mat. 28:20.
3. Etẹwẹ huhlọn he Jehovah nọ na mí sọgan gọalọna mí nado wà?
3 Jesu dopagbe na devi etọn lẹ dọ ‘yé na mọ huhlọn yí to whenue gbigbọ wiwe na wá yé ji.’ Huhlọn he Jehovah Jiwheyẹwhe Nupojipetọ lọ nọ na devizọnwatọ etọn lẹ nọ gọalọna dopodopo mítọn nado penugo bo nọgbẹ̀ sọgbe hẹ klandowiwe mítọn podọ nado nọavùnte sọta huhlọn agọ̀ lẹ.—Hia Mika 3:8; Kọlọsinu lẹ 1:29.
4. Etẹwẹ mí na gbadopọnna to hosọ ehe mẹ, podọ etẹwutu?
4 Aliho tẹlẹ mẹ wẹ gbigbọ wiwe nọ na mí huhlọn te? Nawẹ e sọgan whàn mí nado yinuwa to ninọmẹ voovo mẹ gbọn? Dile mí to vivẹnudo nado sẹ̀n Jiwheyẹwhe po nugbonọ-yinyin po, mí nọ pehẹ aliglọnnamẹnu susu sọn Satani po aihọn ylankan etọn po dè, podọ sọn agbasa mape mítọn si. Nujọnu wẹ e yin dọ mí ni duto aliglọnnamẹnu mọnkọtọn lẹ ji nado sọgan zindonukọn taidi Klistiani, tindo mahẹ gbesisọ tọn to lizọnyizọn lọ mẹ podọ nado hẹn haṣinṣan dagbe de go hẹ Jehovah. Mì gbọ mí ni gbadopọnna lehe gbigbọ wiwe nọ gọalọna mí nado duto whlepọn ji bo pehẹ nuṣikọ po ninọmẹ mẹhẹngbọjọ tọn lẹ po do.
E Nọ Na Mí Huhlọn Nado Duto Whlepọn Ji
5. Nawẹ odẹ̀ sọgan na mí huhlọn gbọn?
5 Jesu plọn hodotọ etọn lẹ nado nọ hodẹ̀ dole: “A hẹn mí biọ whlepọn mẹ blo, ṣigba whlẹn mí sọn mẹylankan lọ si.” (Mat. 6:13) Jehovah ma na gbẹkọ devizọnwatọ nugbonọ etọn he biọ onú ehelẹ to odẹ̀ mẹ lẹ go. To ninọmẹ devo mẹ, Jesu dọ dọ “Otọ́ he to olọn mẹ [na] na gbigbọ wiwe mẹhe to bibiọ ẹ lẹ.” (Luku 11:13) Lehe opagbe Jehovah tọn nado na mí gbigbọ wiwe etọn na mí nido wà nuhe sọgbe vọ́ jidenamẹ do sọ! Na nugbo tọn, ehe ma zẹẹmẹdo dọ Jehovah na glọnalina whlepọn he mí na pehẹ lẹ gba. (1 Kọl. 10:13) Ṣigba to whenue mí pannukọn whlepọn, ojlẹ lọ niyẹn nado hodẹ̀ vẹkuvẹku.—Mat. 26:42.
6. Nado nọavùnte sọta whlepọn Satani tọn lẹ, etẹ ji wẹ Jesu ze gblọndo etọn lẹ sinai do?
6 To whenue Lẹgba whlé Jesu pọ́n, e yí Owe-wiwe do na ẹn gblọndo. Nuhe Ohó Jiwheyẹwhe tọn dọ họnwun hezeheze to ayiha Jesu tọn mẹ to whenuena e dọmọ: “E ko yin kinkan dọ . . . E ko sọ yin kinkan ga dọ . . . Tọ́n sọn fi, Satani! Na e ko yin kinkan dọ, ‘Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’” Owanyi he Jesu tindo na Jehovah po Ohó etọn po whàn ẹn nado gbẹ́ yẹdoklọmẹnu Mẹwhlepọntọ lọ tọn lẹ dai. (Mat. 4:1-10) To whenue Jesu nọavùnte sọta whlepọn lọ lẹ debọdo-dego godo, Satani jo e do.
7. Nawẹ Biblu nọ gọalọna mí nado nọavùnte sọta whlepọn lẹ gbọn?
7 Eyin Jesu ganjẹ Owe-wiwe lẹ go nado nọavùnte sọta whlepọn Lẹgba tọn lẹ, nẹmunẹmu wẹ yin míwlẹ tọn! Na nugbo tọn, nado sọgan nọavùnte sọta Lẹgba po awhànpa etọn lẹ po, mí dona magbe nado jẹakọ hẹ nujinọtedo Jiwheyẹwhe tọn lẹ whẹ́ bo tẹdo yé go gligli. Mẹsusu wẹ ko yin whinwhàn nado nọgbẹ̀ sọgbe hẹ nujinọtedo Biblu tọn lẹ to whenue yé plọn Owe-wiwe lẹ bo wá mọnukunnujẹ nujọnu-yinyin nuyọnẹn po dodowiwa Jiwheyẹwhe tọn po go. Na nugbo tọn, “ohó Jiwheyẹwhe tọn” tindo huhlọn he sọgan yọ́n “linlẹn po ojlo ahun mẹ tọn lẹ po.” (Heb. 4:12) Lehe mẹde nọ hia Owe-wiwe lẹ bo nọ lẹnayihamẹpọn do yé ji sọ, mọ wẹ e na ‘to nuyọnẹn mọ to nugbo Jehovah tọn mẹ’ do niyẹn. (Dan. 9:13) Eyin mọ wẹ, nuyọnẹnnu wẹ e yin dọ mí ni nọ lẹnayihamẹpọn do wefọ he dọhodo madogán tangan mítọn lẹ ji.
8. Etẹlẹ wẹ sọgan gọalọna mí nado mọ gbigbọ wiwe yí?
8 Gbọnvona dọ Jesu yọ́n Owe-wiwe lẹ, nudevo he gọalọna ẹn nado nọavùnte sọta whlepọn lẹ wẹ yindọ e “gọ́ na gbigbọ wiwe.” (Luku 4:1) Eyin mí na mọ huhlọn po nugopipe dopolọ po yí, mí dona dọnsẹpọ Jehovah gbọn awuwledainanu he ewọ hẹn tin-to-aimẹ nado na mí gbigbọ wiwe etọn lẹpo yiyizan to gigọ́ mẹ dali. (Jak. 4:7, 8) Awuwledainanu ehelẹ bẹ Biblu pinplọn, odẹ̀ po awukinkọndopọ hẹ yisenọ hatọ lẹ po hẹn. Humọ, mẹsusu tindo aṣa lọ nado nọ doalọ to nuwiwa Klistiani tọn lẹ mẹ, podọ ehe nọ gọalọna yé nado ze ayiha yetọn do nuhe nọ jlọmẹdote to gbigbọ-liho lẹ ji.
9, 10. (a) Whlepọn tẹlẹ wẹ gbayipe to lẹdo towe mẹ? (b) Nawẹ ayihamẹlinlẹnpọn po odẹ̀ po sọgan na we huhlọn nado duto whlepọn lẹ ji etlẹ yin to whenue nuṣikọna we gbọn?
9 Whlepọn tẹlẹ wẹ hiẹ dona nọavùnte sọta? Be hiẹ ko yin whiwhlepọn nado daihun gblewa tọn hẹ mẹhe ma yin alọwlemẹ towe de pọ́n ya? Eyin tlẹnnọ de wẹ hiẹ yin, be a ko yin whiwhlepọn nado kẹalọyi dope hẹ mayisenọ de pọ́n ya? To whenue Klistiani de to televiziọn pọ́n kavi to Internet yizan, e sọgan yin whiwhlepọn nado pọ́n onú mawé de he sọawuhia to ajiji mẹ. Be enẹ ko jọ do gowe pọ́n, eyin mọ wẹ, nawẹ a yinuwa gbọn? Nuyọnẹnnu wẹ e na yin nado lẹnayihamẹpọn do nugbo lọ ji dọ nuṣiwa de sọgan dọ̀n mí biọ devo mẹ podọ do ylando sinsinyẹn mẹ to godo mẹ. (Jak. 1:14, 15) Lẹnnupọndo awufiẹsa he hiẹ na hẹnwa Jehovah, agun lọ po whẹndo towe po ji eyin a wà ylando sinsinyẹn de. To alọ devo mẹ, nunọwhinnusẹ́n Jiwheyẹwhe tọn lẹ go titẹdo wẹ nọ gọalọ nado tindo ayihadawhẹnamẹnu wiwe de. (Hia Psalm 119:37; Howhinwhẹn lẹ 22:3.) Whedepopenu he hiẹ pehẹ whlepọn mọnkọtọn lẹ, nọ hodẹ̀ nado mọ huhlọn he na gọalọna we nado nọavùnte sọta yé yí.
10 Mí sọgan plọn nudevo sọn whlepọn Lẹgba tọn lẹ mẹ. To whenue Jesu ko blanù na azán 40 to danfafa ji godo wẹ Satani dọnsẹpọ ẹ. Matin ayihaawe, Lẹgba mọdọ “dotẹnmẹ hundote dagbe” de niyẹn nado whlé tenọgli Jesu tọn pọ́n. (Luku 4:13) Mọdopolọ, Satani nọ dín dotẹnmẹ hundote dagbe lẹ nado whlé tenọgli mítọn pọ́n. To whelọnu lo, onú titengbe wẹ e yin dọ mí ni nọ hẹn míde lodo to gbigbọ-liho na Satani nọ saba yangbé mítọn to whenuena mí ma dogán depope. Enẹwutu, whedepopenu he nuṣikọna mí kavi mí gbọjọ, mí dona magbe hugan gbede pọ́n nado vẹ̀ Jehovah dọ e ni yí gbigbọ wiwe etọn do gọalọna mí bo basi hihọ́na mí.—2 Kọl. 12:8-10.
E Nọ Na Mí Huhlọn Nado Duto Nuṣikọ po Ninọmẹ Mẹhẹngbọjọ Tọn lẹ po Ji
11, 12. (a) Naegbọn mẹsusu nọ gbọjọ to egbehe? (b) Etẹwẹ sọgan na mí huhlọn nado duto ninọmẹ mẹhẹngbọjọ tọn lẹ ji?
11 Na mí yin mapenọ wutu, mí nọ gbọjọ sọn ojlẹ de mẹ jẹ devo mẹ. Ehe yin nugbo titengbe to egbehe, na mí to gbẹnọ to ojlẹ he gọ́ na ayimajai taun de mẹ. Vlavo ojlẹ he sinyẹn hugan to whenuho gbẹtọvi tọn mẹ wẹ mí to gbẹnọ te. (2 Tim. 3:1-5) Dile Amagẹdọni to dindọnsẹpọ, nuhahun akuẹzinzan tọn, nuhahun to numọtolanmẹ-liho po kọgbidinamẹnu devo lẹ po fọ́n bo to sinsinyẹn deji. Enẹwutu, e ma dona paṣa mí dọ e to awuvẹ na mẹdelẹ nado penukundo nuhudo whẹndo yetọn tọn lẹ go. Agbọ́ nọ pé yé, onú nọ ṣikọna yé bọ yé nọ pò vẹjẹvẹjẹ. Eyin ninọmẹ he mẹ hiẹ tin te niyẹn, nawẹ a sọgan pehẹ nuhahun lọ gbọn?
12 Flindọ Jesu na jide devi etọn lẹ dọ emi na na yé alọgọtọ de—enẹ wẹ gbigbọ wiwe Jiwheyẹwhe tọn. (Hia Johanu 14:16, 17.) Ehe wẹ huhlọn he yiaga hugan to wẹkẹ lọ mẹ. Gbọn gbigbọ ehe gblamẹ, Jehovah sọgan na mí huhlọn he mí tindo nuhudo etọn “susu tlala” nado doakọnna whlepọn depope. (Efe. 3:20) Apọsteli Paulu dọ dọ eyin mí ganjẹ gbigbọ enẹ go, mí na mọ “huhlọn he hú jọwamọ tọn” yí, etlẹ yin to whenue mí yin “finfinyọ́n to aliho lẹpo mẹ.” (2 Kọl. 4:7, 8) Jehovah ma dopagbe nado de ayimajai sẹ̀ to egbehe gba, ṣigba e na mí jide dọ gbọn gbigbọ wiwe etọn gblamẹ, emi na na mí huhlọn nado pehẹ ẹ.—Flp. 4:13.
13. (a) Nawẹ jọja de mọ huhlọn yí nado pehẹ ninọmẹ sinsinyẹn de gbọn? (b) Be a tindo numimọ mọnkọtọn de ya?
13 Lẹnnupọndo apajlẹ Stephanie he yin gbehosọnalitọ whepoponu tọn bo tindo owhe 19 tọn ji. To whenuena e tindo owhe 12, e hẹnú bọ doto lẹ wá mọdọ e tindo nutitẹ̀ apọ̀nmẹ tọn de. Sọn whenẹnu gbọ́n, doto lẹ ko zẹ̀ ẹ whla awe podọ e mọ nukunpedomẹgo dotowhé tọn gigẹdẹ devo lẹ yí. Enẹgodo e sọ hẹnú to ninọmẹ awe devo lẹ mẹ bọ alọ po afọ amiyọn tọn etọn po hò plibọ podọ e masọ nọ mọnú ganji ba. Stephanie nọ yí huhlọn etọn zan na nuhe yin nujọnu na ẹn hugan lẹ taidi opli Klistiani tọn lẹ yìyì po sinsẹ̀nzọn kunnudegbe tọn po. Etomọṣo, e nọ mọdọ gbigbọ wiwe Jehovah tọn nọ gọalọna emi to aliho voovo mẹ nado doakọnnanu. Numimọ Klistiani hatọ lẹ tọn he tin to owe sinai do Biblu ji lẹ mẹ nọ na ẹn tuli to whenue e gbọjọ. Mẹmẹsunnu po mẹmẹyọnnu lẹ po nọ na ẹn tuli gbọn wekanhlanmẹ he yé nọ dohlan ẹn lẹ dali kavi gbọn hogbe tulinamẹ tọn he yé nọ dọna ẹn jẹnukọnna opli podọ to opli godo lẹ dali. Jlodotọ lẹ lọsu nọ yọ́n pinpẹn nuhe Stephanie to pinplọn hẹ yé tọn bo nọ yì owhé etọn gbè na e nido plọn Biblu hẹ yé. Ehe lẹpo zọ́n bọ Stephanie nọ dopẹna Jehovah tlala. Wefọ he e yiwanna hugan wẹ Psalm 41:3, he e yise dọ e ko mọ hẹndi to whẹho emitọn mẹ.
14. Etẹwẹ mí ma dona wà to whenue mí gbọjọ, podọ etẹwutu?
14 To whenue nuṣikọna mí kavi whenue mí to kọgbidinamẹ glọ, mí ma dona lẹn gbede dọ yonu dindọn dogodo na nuwiwa gbigbọmẹ tọn lẹ wẹ na gbọ nuhahun lọ. Onú godo tọn he mí na wà niyẹn. Etẹwutu? Na nuwiwa mọnkọtọn lẹ, taidi oplọn mẹdetiti tọn, oplọn whẹndo tọn, sinsẹ̀nzọn kunnudegbe tọn po opli lẹ yìyì po nọ gọalọna mí nado vọ́ huhlọn gbigbọ wiwe tọn mọyi. Nuwiwa gbigbọ mẹ tọn lẹ nọ fakọna mí to whepoponu. (Hia Matiu 11:28, 29.) Whlasusu wẹ mẹmẹsunnu lẹ po mẹmẹyọnnu lẹ po nọ wá opli po nuṣikọ po, ṣigba to opli godo, e nọ taidi dọ yé vọ́ huhlọn mọyi wẹ nkọ.
15. (a) Be Jehovah dopagbe dọ gbẹzan Klistiani tọn na bọawu wẹ ya? Yí wefọ do nọgodona gblọndo towe. (b) Opagbe tẹwẹ Jiwheyẹwhe do na mí, podọ kanbiọ tẹwẹ ehe fọndote?
15 Na nugbo tọn, ehe ma to didohia dọ azọngban he nọ zọnpọ hẹ Klistiani-yinyin lẹ bọawu gba. E nọ biọ vivẹnudido nado yin Klistiani nugbonọ de. (Mat. 16:24-26; Luku 13:24) Etomọṣo, Jehovah sọgan na huhlọn mẹhe nuṣikọna gbọn gbigbọ wiwe gblamẹ. Yẹwhegán Isaia wlan dọmọ: “Mẹhe nọtepọn OKLUNỌ lẹ na vọ́ huhlọn yetọn jlado; yé na yí awà do hẹaga di akùn; yé na dowezun, onú ma na dikọna yé; yé na zinzọnlin, bo ma na yọ́n nudikọ.” (Isa. 40:29-31) To whelọnu lo, nuyọnẹnnu wẹ e yin nado kanse míde dọ, Whẹwhinwhẹ́n tangan tẹ wutu wẹ mí do nọ mọdọ nuwiwa Klistiani tọn lẹ nọ hẹn agbọ́pemẹ?
16. Etẹwẹ mí sọgan wà nado dapana nuhe sọgan hẹn agbọ́pe mí kavi hẹn mí gbọjọ lẹ?
16 Ohó Jehovah tọn dotuhomẹna mí nado “mọdona nuhe yin nujọnu hugan lẹ.” (Flp. 1:10) To gbọdo glọ, apọsteli Paulu yí gbẹzan Klistiani tọn jlẹdo alewezun gaa de go bo na ayinamẹ dọmọ: ‘Mì gbọ mí nisọ de onú pinpẹn lẹpo sẹ̀, mì sọ gbọ mí ni yí akọndonanu do họ̀n alewezun he yin zizedonukọnna mí lọ.’ (Heb. 12:1) Nuhe ji e to nùzindo wẹ yindọ mí dona dapana yanwle he ma yin dandan tọn lẹ—enẹ wẹ onú pinpẹn he ma yin dandan tọn—he nọ hẹn agbọ́pemẹ lẹ. E sọgan yindọ delẹ to mí mẹ to tintẹnpọn nado kẹalọyi agbasazọ́n susu dogọ gbẹzan mítọn he ko ján dote lọ. Enẹwutu, eyin onú nọ saba ṣikọna we bọ a nọ mọ dewe to kọgbidinamẹ glọ, e na yọ́n nado vọ́ nulẹnpọn do whenu he a nọ yizan na agbasazọ́n towe, whla nẹmu he a nọ tọ́nwhẹ̀n na gbẹdudu, podọ ojlẹ he a nọ yizan na aihundida lanmẹyiya tọn kavi ayidedai devo lẹ ji. Lẹnpọn dagbe po jlẹkajininọ po dona nọ whàn mímẹpo nado yọ́n dogbó mítọn lẹ bo de nuhe ma yin dandan tọn lẹ pò.
17. Naegbọn mẹdelẹ do nọ gbọjọ, ṣigba jidide tẹwẹ Jehovah na mí gando whẹho ehe go?
17 Humọ, e sọgan yindọ delẹ to mí mẹ gbọjọ jẹ obá de mẹ na opodo aihọn ehe tọn ma yawu wá dile mí lẹn do wutu. (Howh. 13:12) Ṣigba, eyin depope to mí mẹ tindo numọtolanmẹ mọnkọtọn, hogbe Habbakuk 2:3 tọn lẹ sọgan na ẹn tuli dọmọ: “Numimọ lọ gbẹsọ tin na ojlẹ dide lọ, podọ e to unklẹn hlan opodo lọ dali, bo ma na dolalo: yin e tlẹ dọngbàn, nọtepọn ẹn; na e ma na nọma wá wutu, e ma na gọ̀n gba.” Jehovah na mí jide dọ opodo aihọn ehe tọn na wá to ojlẹ sisọ emitọn mẹ!
18. (a) Opagbe tẹlẹ wẹ nọ na we huhlọn? (b) Etẹwẹ mí na gbadopọnna to hosọ he bọdego mẹ?
18 E họnwun dọ devizọnwatọ nugbonọ Jehovah tọn lẹpo wẹ to jejeji nado mọ azán he gbè nuṣikọ po ninọmẹ mẹhẹngbọjọ tọn lẹ po na busẹ bọ mẹhe to ogbẹ̀ lẹpo na duvivi ‘huhlọn jọja whenu tọn.’ (Job 33:25) Etlẹ yin todin, gbigbọ wiwe sọgan hẹn gbẹtọ he mí yin to homẹ zun huhlọnnọ dile mí to mahẹ tindo to nuwiwa gbigbọmẹ tọn he nọ jlọmẹdote lẹ mẹ. (2 Kọl. 4:16; Efe. 3:16) Ma dike nuṣikọ ni glọnalina we nado gbọ dona mavọmavọ lẹ go blo. Eyin ninọmẹ sinsinyẹn he mí to pipehẹ to egbehe lẹpo—whlepọn wẹo, nuṣikọ kavi ninọmẹ mẹhẹngbọjọ tọn lẹ—ma tlẹ busẹ to afọdopolọji, yé na wá busẹ to aihọn yọyọ Jiwheyẹwhe tọn mẹ. To hosọ he bọdego mẹ, mí na gbadopọnna lehe gbigbọ wiwe nọ na huhlọn Klistiani lẹ nado doakọnna homẹkẹn, nọavùnte sọta kọgbidinamẹ hagbẹ tọn, bo doakọnna nuhahun voovo devo lẹ do.
Nawẹ Hiẹ Na Na Gblọndo Gbọn?
• Nawẹ Biblu hihia nọ na mí huhlọn gbọn?
• Nawẹ odẹ̀ po ayihamẹlinlẹnpọn po nọ na mí huhlọn gbọn?
• Nawẹ mí sọgan dapana nuhe nọ hẹnmẹ gbọjọ lẹ gbọn?
[Yẹdide to weda 24]
Opli Klistiani tọn lẹ sọgan vọ́ huhlọnna mí to gbigbọ-liho