Be Hiẹ Nọ Yọ́n Pinpẹn Dona Towe lẹ Tọn Nugbonugbo Ya?

TO WHENUE Islaelivi lẹ yin tuntundote to azọ́njiawu-liho sọn kanlinmọgbenu to Egipti, homẹhun yé to tintan whenu dọ yé vò nado sẹ̀n Jehovah. (Eks. 14:29–15:1, 20, 21) Ṣigba, ojlẹ vude to enẹgodo, pọndohlan yetọn diọ. Yé jẹ lewu ji gando ninọmẹ yetọn go. Etẹwutu? Na yé to nulẹnpọn zẹjlẹgo gando nuhahun he yé to pipehẹ to zungbo mẹ lẹ go hugan nuhe Jehovah ko wà na yé. Yé dọna Mose dọmọ: “Etẹwutu wẹ mìwlẹ ko hẹn mí hẹji sọn Egipti mẹ wá nado kú to zungbo lọ mẹ? Na akla de ma tin, osin de masọ tin; podọ alindọn mítọn hòwán akla madota [manna] he.”—Sọh. 21:5.

To owhe kanweko lẹ godo, Ahọlu Davidi Islaeli hohowhenu tọn jihàn dọmọ: “Ṣigba yẹn na dotudo dagbewanyi towe go; ayiha ṣie na jaya to whlẹngán towe mẹ. Yẹn na jihàn hlan OKLUNỌ; na e yí dagbewà do zọ̀n hẹ mi.” (Ps. 13:5, 6) Davidi ma wọn nuyiwa dagbewanyi tọn he Jehovah dohia ẹ lẹ gba. Kakatimọ, e nọ yí whenu zan whẹwhẹ nado lẹnnupọndo yé ji. (Ps. 103:2) Jehovah ko dona mílọsu lẹ susugege, podọ nuyọnẹnnu wẹ e na yin ma nado yí nukunpẹvi do pọ́n nuhe e wà na mí lẹ. Enẹwutu, mì gbọ mí ni gbadopọnna delẹ to dona Jiwheyẹwhe tọn he mí nọ duvivi etọn to egbehe lẹ mẹ.

‘Haṣinṣan Pẹkipẹki hẹ Jehovah’

Psalm-kantọ lọ jihàn dọmọ: “[Haṣinṣan pẹkipẹki hẹ Jehovah] tin to yé he dibusi i lẹ dè.” (Ps. 25:14) Lẹblanulọkẹyi nankọ die na gbẹtọvi mapenọ lẹ nado tindo haṣinṣan pẹkipẹki de hẹ Jehovah! Ṣigba etẹwẹ lo, eyin mí hẹn alọnu mítọn ján to nuyiwa egbesọegbesọ tọn lẹ mẹ sọmọ bọ whenu pẹvide wẹ mí nọ yizan nado hodẹ̀? Yí nukun homẹ tọn do pọ́n nuhe na jọ do haṣinṣan dagbe mítọn hẹ Jehovah go. Taidi Họntọn mítọn, Jehovah nọ donukun dọ mí ni dejido emi go, dọ nuhe tin to ahun mítọn mẹ na emi to odẹ̀ mẹ, bosọ dọ obu, ojlo, po magbọjẹ mítọn lẹ po na emi. (Howh. 3:5, 6; Flp. 4:6, 7) Enẹwutu, be e ma jẹ dọ mí ni lẹnnupọndo lehe mí na hẹn odẹ̀ mítọn lẹ pọnte dogọ do ji ya?

To whenue mẹmẹsunnu jọja de he nọ yin Paul lẹnnupọndo odẹ̀ etọn lẹ ji, e mọdọ emi dona hẹn yé pọnte dogọ.a E dọmọ, “N’wá tindo aṣa lọ nado nọ yí hogbe dopolọ lẹ zan whẹwhẹ eyin n’to dẹ̀ho hlan Jehovah.” Dile Paul basi dodinnanu do hosọ lọ ji to Index des publications Watch Tower mẹ, e mọdọ nudi odẹ̀ 180 wẹ yin kinkandai to Biblu mẹ. To odẹ̀ ehelẹ mẹ, devizọnwatọ Jehovah tọn hohowhenu tọn lẹ dọ numọtolanmẹ sisosiso yetọn lẹ tọ́n. Paul dọmọ: “Ayihamẹlinlẹnpọn do apajlẹ Owe-wiwe tọn enẹlẹ ji zọ́n bọ n’plọn nado nọ yì nuagokun lẹ ji tlọlọ to odẹ̀ ṣie mẹ. Ehe ko gọalọna mi nado nọ dọ nuhe to ahun ṣie mẹ na Jehovah. Homẹhunnu wẹ e yin na mi todin nado nọ dọnsẹpọ ẹ to odẹ̀ mẹ.”

‘Núdùdù to Ojlẹ Sisọ Mẹ’

Dona devo he Jehovah nọ kọ̀n do mí ji wẹ nugbo susugege Owe-wiwe tọn lẹ. Na núdùdù dojó gbigbọmẹ tọn susugege he mí nọ dù lẹ wutu, mí tindo whẹwhinwhẹ́n nado “jihàn na homẹvivi ayiha tọn.” (Isa. 65:13, 14) Ṣigba, mí dona tin to aṣeji ma nado dike nuyiwadomẹji ylankan lẹ ni hẹn mí nado dekanpona zohunhun mítọn na nugbo lọ. Di apajlẹ, ayidonugo nina nujijla oklọ tọn atẹṣitọ lẹ tọn sọgan yinuwado nulẹnpọn mítọn ji bo hẹn mí ma nado mọ nuhọakuẹ-yinyin “núdùdù” gbigbọmẹ tọn he mí nọ mọyi “to ojlẹ sisọ mẹ” tọn, ehe Jehovah nọ wleawuna gbọn “afanumẹ nugbonọ podọ nuyọnẹntọ lọ” gblamẹ.—Mat. 24:45-47.

André he ko sẹ̀n Jehovah na owhe susu, tindo numimọ ylankan de, na pọndohlan atẹṣitọ lẹ tọn hẹn ẹn nado danbú sọn nugbo lọ mẹ. E lẹndọ nukun yìnyìn pọ́n nọtẹn Internet ji tọn atẹṣitọ lẹ tọn ma bẹ owù hẹn. E flindọ: “To tintan whenu, nuhe taidi nugbo he atẹṣitọ lẹ nọ dọ jẹ ayidonugo ṣie dọ̀n ji. Dile n’to dogbapọnna nuhe yé nọ dọ lẹ sọ, mọ wẹ n’nọ to linlẹn dọ owhẹ̀ ṣie whẹ́n nado jo titobasinanu Jehovah tọn do niyẹn. Ṣigba to godo mẹ, to whenue n’wá basi dodinnanu delẹ gando nuhe atẹṣitọ lẹ nọ dọ sọta Kunnudetọ Jehovah tọn lẹ go, n’wá mọ ayiha wintinwintin mẹplọntọ lalo ehelẹ tọn. Nudọnamẹ he yé desọn lẹdo hodidọ de tọn mẹ wẹ yé nọ yizan to aliho devo mẹ taidi ‘kunnudenu dolido’ nado jẹagọdo mí. Enẹwutu, n’basi dide nado jẹ owe mítọn lẹ hia ji whladopo dogọ podọ nado nọ yì opli lẹ. To ojlẹ kleun de godo, n’wá mọdọ nususu wẹ ko gbọ go e.” Mí dopẹ́ dọ André lẹkọwa agun lọ mẹ.

“Pipli Mẹmẹsunnu lẹ Tọn Pete”

Pọninọ owanyi tọn mẹmẹsunnu lẹ tọn yin dona de sọn Jehovah dè. (Ps. 133:1) Owhẹ̀ apọsteli Pita tọn whẹ́n nado wlan dọmọ: “Mì tindo owanyi na pipli mẹmẹsunnu lẹ tọn pete.” (1 Pita 2:17) Na mí yin apadewhe pipli mẹmẹsunnu lẹ tọn wutu, mí nọ mọ godonọnamẹ owanyi tọn mẹhe taidi otọ́, onọ̀, nọvisunnu po nọviyọnnu mítọn po he tin to nugbo lọ mẹ lẹ tọn.—Malku 10:29, 30.

Etomọṣo, ninọmẹ voovo lẹ sọgan hẹn haṣinṣan he mí tindo hẹ mẹmẹsunnu po mẹmẹyọnnu mítọn lẹ po gble to whedelẹnu. Di apajlẹ, e bọawu nado gblehomẹ na nuṣiwa mẹde tọn podọ nado wleawuna pọndohlan agọ̀ gando mẹlọ go. To whenue enẹ wá jọ, be e ma na gọalọ eyin mí nọ flindọ Jehovah yiwanna devizọnwatọ etọn lẹ mahopọnna nuṣiwa yetọn lẹ ya? Humọ, “eyin mí dọ dọ: ‘Mí ma tindo ylando,’ mídelẹ klọ wẹ mí te podọ nugbo ma tin to mí mẹ.” (1 Joh. 1:8) Be e ma jẹ dọ mí ni dovivẹnu nado “nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii” ya?—Kọl. 3:13.

Jọja yọnnu de he nọ yin Ann plọn nuhọakuẹ-yinyin gbẹdido hẹ Klistiani lẹ tọn to aliho sinsinyẹn mẹ. E yinuwa taidi ovi duvanọ he yin nùdego to oló Jesu tọn mẹ lọ bo jo agun Klistiani tọn do. To godo mẹ, e gọ̀ biọ ede mẹ bo lẹkọwa nugbo lọ mẹ. (Luku 15:11-24) Etẹwẹ Ann plọn sọn numimọ ehe mẹ? E dọmọ: “Todin he n’lẹkọwa titobasinanu Jehovah tọn mẹ, n’nọ yí nukun họakuẹ do pọ́n mẹmẹsunnu po mẹmẹyọnnu ṣie lẹpo po mahopọnna nuṣiwa yetọn lẹ. N’nọ yawu mọhodọdo yé go dai. Ṣigba todin, n’magbe ma nado dike nudepope ni glọnalina mi nado duvivi dona he tin to yisenọ hatọ lẹ ṣẹnṣẹn tọn. Nudepope ma tin to aihọn lọ mẹ he họakuẹ hugan paladisi gbigbọmẹ tọn mítọn bọ mí nado jo e do.”

Nọ Dopẹ́ to Whepoponu Na Dona Towe Lẹ

Todido mítọn dọ Ahọluduta Jiwheyẹwhe tọn wẹ na hẹn pọngbọ wá na nuhahun gbẹtọvi lẹ tọn yin nuhọakuẹ mayọnjlẹ de. Lehe mí gọ́ na pinpẹn-nutọn-yinyọnẹn do sọ to whenue mí wá mọnukunnujẹ todido ehe mẹ to tintan whenu! Mí tindo numọtolanmẹ dopolọ taidi ajọwatọ tomẹyitọ he yin nùdego to oló Jesu tọn mẹ lọ he “sà nuhe e tindo lẹpo” nado sọgan họ̀ “peali he họakuẹ tlala de.” (Mat. 13:45, 46) Jesu ma dọ dọ peali lọ masọ wá họakuẹ to nukun ajọwatọ tomẹyitọ lọ tọn mẹ ba. Mọdopolọ, mì gbọ mí ni nọ yọ́n pinpẹn todido jiawu mítọn tọn zọnmii.—1 Tẹs. 5:8; Heb. 6:19.

Lẹnnupọndo apajlẹ mẹmẹyọnnu Jean he ko to Jehovah sẹ̀n na nuhe hugan owhe 60 tọn ji. E dọmọ: “Nuhe gọalọna mi nado hẹn Ahọluduta Jiwheyẹwhe tọn do ayiha mẹ wẹ yindọ n’nọ dọhona mẹdevo lẹ gandego. Eyin n’mọ ayajẹ he nọ sọawuhia to nukun yetọn mẹ dile yé to nukunnumọjẹ nuhe Ahọluduta lọ yin mẹ, e nọ yinuwado ji e to aliho dagbe mẹ. Dile n’to diọdo he nugbo Ahọluduta lọ tọn to hinhẹnwa gbẹzan plọnmẹ Biblu de tọn mẹ mọ, e nọ hẹn mi nado mọdọ, ‘Nugbo he jiawu lẹ wẹ n’to mimá hẹ mẹdevo lẹ.’”

Whẹwhinwhẹ́n susu wẹ mí tindo nado nọ dopẹ́ na dona gbigbọmẹ tọn he mí nọ duvivi etọn lẹ. Dile etlẹ yindọ mí sọgan pehẹ whlepọn delẹ taidi nukundiọsọmẹ, azọ̀n, yọnhowhe, apọṣimẹ sinsinyẹn, aluẹmẹninọ, po nuhahun akuẹzinzan tọn po, mí yọnẹn dọ yé ma na nọ aimẹ kakadoi. To Ahọluduta Jiwheyẹwhe tọn glọ, mí na duvivi dona lẹ tọn to agbasa-liho to yidogọ mẹ na dehe mí to mimọyi to gbigbọ-liho lẹ. Yajiji depope he mí to akọndona todin ma na tin to titonu yọyọ lọ mẹ.—Osọ. 21:4.

Ṣigba todin whẹ́, mì gbọ mí ni nọ dopẹ́ na dona gbigbọmẹ tọn mítọn lẹ bo nọ do pinpẹn-nutọn-yinyọnẹn hia taidi psalm-kantọ lọ he jihàn dọmọ: “OKLUNỌ E Jiwheyẹwhe ṣie, susu wẹ azọ́n jiawu he hiẹ ko wà, po linlẹn towe po hlan míwlẹ dali: yè ma sọgan hia yé hlan we kannukannu gba: eyin yẹn na lá, bosọ dọho yetọn, yé hú onú hihia.”—Ps. 40:5.

[Nudọnamẹ odò tọn]

[Yẹdide to weda 18]

Mí nọ duvivi godonọnamẹ gbigbọmẹ tọn to whlepọn lẹ whenu