Ayajẹ He Zọnlinzinzin to Tenọgli mẹ Nọ Hẹnwa Lẹ
“Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.”—HOWHINWHẸN LẸ 10:22.
1, 2. Naegbọn mí dona họ́ míde sọta nulinlẹnpọn glanglan do sọgodo ji?
“NULINLẸNPỌN glanglan do sọgodo ji . . . nọ glọnalina mí nado mọ awuvivi to nuhe mí tindo to alọnu din lẹ mẹ,” wẹ tamẹnuplọnmẹtọ Amelikanu de dọ. Ehe yin nugbo gando yọpọvu lẹ go he nọ to nulẹnpọndo lẹblanulọkẹyi mẹho-yinyin tọn lẹ ji sọmọ bọ yé ma nọ doayi ale ovu-whenu tọn lẹ go kakajẹ whenue e juwayi.
2 Sinsẹ̀n-basitọ Jehovah tọn lẹ lọsu ma vò sọn aliho nulẹnpọn tọn ehe si. Lẹnnupọndo nuhe sọgan jọ do mí go ji. Mí to nukundo hẹndi opagbe Jiwheyẹwhe tọn nado hẹn paladisi wá aigba ji. Mí yí jejejininọ do to tenọpọn gbẹzan he na vò sọn azọ̀n, yọnhopipo, awufiẹsa, po yajiji po si. Dile etlẹ yindọ nuhe sọgbe wẹ e yin nado donukun onú mọnkọtọn lẹ, etẹwẹ lo eyin dona agbasa tọn he na wá to sọgodo lẹ jẹ ahunmẹduna mí ji sọmọ bọ mí masọ sọgan doayi dona gbigbọmẹ tọn he mí tindo to alọnu din lẹ go ba? Lehe enẹ na wá vẹna mí do sọ! Mí sọgan gbọjọ po awubibọ po bo ‘jẹazọ̀n to ayiha mẹ na todido mítọn lẹ ko yin sisẹ do nukọn’ hugan lehe mí lẹn do wutu. (Howhinwhẹn lẹ 13:12) Nuhahun po awusinyẹnnamẹ gbẹ̀mẹ tọn lẹ po sọgan dọ̀n mí biọ omọ̀ flumẹjijẹ kavi awubla do ninọmẹ mẹdetiti tọn ji mẹ. Kakati nado pehẹ ninọmẹ ylankan lẹ, mí sọgan wleawuna gbigbọ lewuwu tọn. Mí sọgan dapana ehe lẹpo gbọn ayihamẹlinlẹnpọn do dona he mí tindo todin lẹ ji po pinpẹn-nutọn-yinyọnẹn po dali.
3. Etẹwẹ mí na gbadopọnna to hosọ ehe mẹ?
3 “Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba,” wẹ Howhinwhẹn lẹ 10:22 dọ. Be ninọmẹ dagbe gbigbọmẹ tọn he mẹ devizọnwatọ Jehovah tọn egbezangbe tọn lẹ tin te ma yin dona he dona hẹnmẹ jaya de ya? Mì gbọ mí ni gbadopọnna adà dagbemẹninọ gbigbọmẹ tọn mítọn tọn delẹ bo pọ́n nuhe yé zẹẹmẹdo na dopodopo mítọn. Na nugbo tọn, agbọji yìyì nado lẹnnupọndo dona he Jehovah ko hẹnwa ‘gbẹtọ nugbonọ he to zọnlinzin to walọpipe kavi tenọgli etọn mẹ’ ji lẹ na hẹn gbemima mítọn lodo nado to Otọ́ olọn mẹ tọn mítọn sẹ̀n po ayajẹ po zọnmii.—Howhinwhẹn lẹ 20:7.
‘Dona He Nọ Hẹn Mí Wàdọkun’ Todin Lẹ
4, 5. Nuplọnmẹ Biblu tọn tẹwẹ họakuẹ taun to nukun towe mẹ, podọ etẹwutu?
4 Oyọnẹn he pegan nuplọnmẹ Biblu tọn lẹ tọn. To paa mẹ, sinsẹ̀n Mẹylọhodotọklisti tọn lẹ nọ sọalọakọ́n dọ emi yí Biblu sè. Ṣigba, yé ma nọ kọngbedopọ do nuhe e plọnmẹ ji gba. Hagbẹ pipli sinsẹ̀n dopolọ tọn lẹ tlẹ nọ saba tindo pọndohlan he gbọnvo lẹ gando nuhe Biblu plọn mí taun go. Lehe ninọmẹ yetọn gbọnvo na devizọnwatọ Jehovah tọn lẹ tọn do sọ! Mahopọnna otò, aṣa, kavi akọ̀ he mẹ mí wá sọn, mí to Jiwheyẹwhe nugbo he mí yọ́n yinkọ etọn lọ sẹ̀n. E ma yin yẹwhe dabla atọ̀n-to-dopomẹ de gba. (Deutelonomi 6:4; Psalm 83:18; Malku 12:29) Mí sọ yọnẹn dọ whẹho titengbe nupojipetọ-yinyin Jiwheyẹwhe tọn do wẹkẹ lọ ji na yin dididẹ to madẹnmẹ podọ dopodopo mítọn nọ tindo mahẹ to whẹho enẹ mẹ gbọn tenọgligo hinhẹn mítọn hlan ẹn dali. Mí yọ́n nugbo lọ gando oṣiọ lẹ go bosọ vò sọn obu sijọsijọ tọn mẹ hlan Jiwheyẹwhe de he mẹsusu lẹndọ e nọ sayana gbẹtọvi lẹ to olọnzomẹ kavi do yé hlan lẹwezomẹ.—Yẹwhehodọtọ 9:5, 10.
5 Humọ, ayajẹ nankọtọn die nado yọnẹn dọ mí ma wá gbẹ̀mẹ gbọn kosọ nulẹ tin yededenu tọn de dali! Kakatimọ, mí yin nudida Jiwheyẹwhe tọn, he e dá to apajlẹ edetiti tọn mẹ. (Gẹnẹsisi 1:26; Malaki 2:10) “Yẹn na dopẹ́ hlan we; na awujiji po nujiawu po mẹ wẹ yè dá mi,” wẹ psalm-kàntọ lọ jihàn hlan Jiwheyẹwhe etọn dọ. “Nujiawu wẹ azọ́n towe lẹ: enẹ wẹ ayiha ṣie yọnẹn hezeheze.”—Psalm 139:14.
6, 7. Diọdo tẹlẹ to gbẹzan towe mẹ kavi to gbẹzan mẹdevo he hiẹ yọnẹn lẹ tọn mẹ wẹ ko sọawuhia nado yin dona de?
6 Tundote sọn aṣa po nuyiwa awugblenamẹ tọn lẹ po mẹ. Avase susu wẹ nọ yin nina gbọn linlinnamẹnu lẹ gblamẹ gando owù azọ̀-nùnù, ahànnunu zẹjlẹgo, po fẹnnuwiwa zanhẹmẹ tọn lẹ po go. Suhugan avase ehelẹ tọn wẹ nọ yin kọgbẹ́ e go. Ṣigba, etẹwẹ nọ yin kọdetọn lọ to whenuena ahundoponọ de plọn dọ Jiwheyẹwhe nugbo lọ gblewhẹdo onú mọnkọtọn lẹ podọ dọ mẹhe doalọ to yé mẹ lẹ nọ hẹn ẹn blawu? Etẹ nkọ, mẹlọ nọ yin whinwhàn nado doalọtena aṣa mọnkọtọn lẹ! (Isaia 63:10; 1 Kọlintinu lẹ 6:9, 10; 2 Kọlintinu lẹ 7:1; Efesunu lẹ 4:30) Dile etlẹ yindọ whẹwhinwhẹ́n tintan he wutu e do wàmọ wẹ nado hẹn homẹhun Jehovah Jiwheyẹwhe, e sọ nọ mọ ale devo lẹ yí taidi agbasalilo dagbe po jijọho ayiha mẹ tọn po.
7 E ma nọ bọawuna mẹsusu nado doalọtena aṣa ylankan lẹ. Ṣogan, gbẹtọ fọtọ́n donu ao lẹ nọ wàmọ to whemẹwhemẹ. Yé nọ klan yedelẹ do wiwe hlan Jehovah bo nọ yí baptẹm to osin mẹ, bosọ nọ gbọnmọ dali dohia to gbangba dọ yé ko jo aṣa he Jiwheyẹwhe gbẹwanna lẹ do to gbẹzan yetọn mẹ. Tulinamẹnu nankọtọn die ehe yin na mímẹpo! E nọ hẹn gbemima mítọn ma nado yin kanlinmọ na walọyizan ylankan he nọ gbleawunamẹ lẹ lodo dogọ.
8. Ayinamẹ sinai do Biblu ji tẹlẹ wẹ nọ yidogọna ayajẹ whẹndo tọn?
8 Ayajẹ to gbẹzan whẹndo tọn mẹ. To otò susu mẹ gbẹzan whẹndo tọn to doyi. Alọwle susu nọ dekọtọn do gbẹdai mẹ, bọ ovi lẹ nọ saba yin nuyiwadeji tlala to numọtolanmẹ-liho. To otò Europe tọn delẹ mẹ, diblayin whédo 20 to kanweko ji wẹ yin whẹndo mẹjitọ godoponọ tọn lẹ. Nawẹ Jehovah ko gọalọna mí nado zinzọnlin to aliho tenọgli tọn ji na nuhe dù gbẹzan whẹndo tọn gbọn? Jaale hia Efesunu lẹ 5:22–6:4; bo doayi ayinamẹ dagbe he Ohó Jiwheyẹwhe tọn na asu lẹ, asi lẹ po ovi lẹ po go. Matin ayihaawe, yíyí nuhe yin didọ tofi podọ to wefọ Owe-wiwe tọn devo lẹ mẹ do yizan mẹ nọ hẹn kanṣiṣa alọwle tọn lodo, bo nọ gọalọna mẹjitọ lẹ nado pọ́n ovi lẹ go whẹ́n to aliho dagbe mẹ, bosọ nọ yidogọna ayajẹ gbẹzan whẹndo tọn. Be e ma yin dona he dona hẹnmẹ jaya de wẹ enẹ yin ya?
9, 10. Nawẹ pọndohlan mítọn gando sọgodo go gbọnvo na aihọn tọn gbọn?
9 Nujikudo lọ dọ nuhahun aihọn tọn lẹ na yin dididẹ to madẹnmẹ. Mahopọnna nukọnyiyi lẹnunnuyọnẹn po azọ́n nuyọnẹn wintinwintin tọn po gọna vivẹnudido ahundoponọ nukọntọ delẹ tọn, nuhahun sinsinyẹn aihọn egbehe tọn lẹ ma ko mọ pọngbọ. Klaus Schwab, he yin dowatọ Tito Akuẹzinzan Aihọn tọn (Forum économique mondial ) doayi e go to agọe dọ “sọha nuhahun he aihọn to pipehẹ lẹ tọn to jijideji zọnmii ṣigba whenu he dona yin yiyizan nado didẹ yé fọ́n bo to didepo.” E dọho gando “owù delẹ go he gando akọta lẹpo go taidi nukunbianamẹ, hẹngble lẹdo tọn gọna doyiyi akuẹzinzan tọn.” Schwab dotana dọmọ: “Todin, hugan gbede pọ́n tọn, aihọn pannukọn nuhahun lẹ he biọ dọ afọdide pọmẹ tọn podọ nujikudo tọn lẹ ni yin zize.” Dile owhe kanweko 21tọ to nukọnzindo, sọgodo gbẹtọvi tọn gbẹ́ dózin.
10 Homẹhunnu nankọtọn die nado yọnẹn dọ Jehovah ko ze tito de dai he tindo nugopipe lọ nado didẹ nuhahun gbẹtọvi tọn lẹpo—enẹ wẹ Ahọluduta Mẹssia Jiwheyẹwhe tọn! Gbọn Ahọluduta enẹ gblamẹ, Jiwheyẹwhe nugbo lọ na “hẹn awhàn gbọ” bo nasọ hẹn “jijọho susu” wá. (Psalm 46:9; 72:7) Ahọlu yiamisisadode lọ, Jesu Klisti ‘na whlẹn agbátọnọ po oyanọ po sọn awusinyẹn po danuwiwa po mẹ.’ (Psalm 72:12-14) To gandudu Ahọluduta lọ tọn glọ, whèdomẹ núdùdù tọn ma na tin. (Psalm 72:16) Jehovah “nasọ súnsún dasin lẹpo sẹ̀ sọn nukun [mítọn] mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” (Osọhia 21:4) Ahọluduta lọ ko yin didoai to olọn mẹ podọ to madẹnmẹ e na ze afọdide he yin dandan lẹ nado didẹ nuhahun lẹpo to aigba ji.—Daniẹli 2:44; Osọhia 11:15.
11, 12. (a) Be afọdidona gbẹdudu nọ hẹn ayajẹ dẹn-to-aimẹ wá ya? Basi zẹẹmẹ. (b) Etẹwẹ nọ hẹn ayajẹ nujọnu tọn wá?
11 Yinyọ́n nuhe nọ hẹn ayajẹ nujọnu tọn wá. Etẹwẹ nọ hẹn ayajẹ nujọnu tọn wá taun? Walọyizan gbẹtọ tọn plọntọ de dọ dọ onú atọ̀n wẹ nọ hẹn ayajẹ wá—gbẹdudu, mẹdezejo, (mahẹ tintindo to nuwiwa delẹ mẹ taidi to azọ́nmẹ podọ to whẹndo mẹ) gọna lẹndai (vivẹnudido nado wà dagbe na mẹdevo lẹ). To onú atọ̀n lọ lẹ mẹ, e slẹ gbẹdudu taidi dehe ma yin nujọnu sọmọ bo dọmọ: “Ehe jẹna ayidego na mẹsusu wẹ nọ ze ogbẹ̀ yetọn sinai do afọdidona gbẹdudu ji.” Etẹwẹ Biblu dọ gando whẹho ehe go?
12 Ahọlu Sọlọmọni Islaeli hohowhenu tọn dọmọ: “Yẹn dọ to ohò ṣie mẹ dọ, wá dinvie, yẹn na yí aihun ayajẹ tọn do whle we pọ́n, enẹwutu to gbẹdu, sọ doayi e go, ovọ́ wẹ ehe ga. Yẹn dọna nukiko dọ, Nulú wẹ hiẹ: podọ na aihun ayajẹ tọn dọ etẹ wà wẹ hiẹ te?” (Yẹwhehodọtọ 2:1, 2) Sọgbe hẹ nuhe Owe-wiwe dọ, ayajẹ depope he gbẹdudu hẹnwa ma nọ nọ̀ aimẹ dẹn. Etẹwẹ dogbọn mahẹ tintindo to azọ́n de mẹ dali? Mí tindo azọ́n dagbe hugan lọ nado wà—enẹ wẹ azọ́n yẹwhehodidọ Ahọluduta tọn po mẹhẹnzun devi tọn po. (Matiu 24:14; 28:19, 20) Gbọn owẹ̀n whlẹngán tọn he tin to Biblu mẹ lilá na mẹdevo lẹ dali, mí nọ tindo mahẹ to azọ́n de mẹ he sọgan dekọtọn do whlẹngán mẹ na mí podọ na mẹhe to ohó mítọn sè lẹ. (1 Timoti 4:16) Taidi “azọ́nyiwahẹmẹtọ dopọ hẹ Jiwheyẹwhe,” mí nọ mọ dọ “nado namẹ do dona [kavi ayajẹ] hú nado mọyi.” (1 Kọlintinu lẹ 3:9; Owalọ lẹ 20:35) Azọ́n ehe nọ hẹn gbẹzan mítọn tindo lẹndai dogọ bo nọ hẹn Mẹdatọ mítọn penugo nado gblọnhona mẹvlẹtọ etọn, Satani Lẹgba. (Howhinwhẹn lẹ 27:11) Na nugbo tọn, Jehovah ko dohia mí dọ mẹdezejo jijọ-di-Jiwheyẹwhe tọn nọ hẹn ayajẹ nujọnu tọn he dẹn-to-aimẹ wá.—1 Timoti 4:8.
13. (a) Aliho tẹ mẹ wẹ Wehọmẹ Lizọnyizọn Yẹwhehọluduta tọn yin dona de he nọ hẹn mí jaya te? (b) Nawẹ hiẹ ko mọaleyi sọn Wehọmẹ Lizọnyizọn Yẹwhehọluduta tọn mẹ gbọn?
13 Tito azọ́nplọnmẹ tọn titengbe podọ kọdetọn dagbenọ de. Gerhard to devizọnwa taidi mẹho agun tọn de to agun Kunnudetọ Jehovah tọn lẹ tọn de mẹ. To jọja-whenu etọn flinflin mẹ, e dọmọ: “Taidi jọja de, yẹn tindo nuhahun hodidọ tọn taun. To ninọmẹ sinsinyẹn lẹ mẹ, huhlọn mẹ wẹ n’nọ dọho tọ́n te podọ n’nọ jẹ dẹ́ku ji. N’tindo numọtolanmẹ nuvọ́nọ-yinyin tọn bo nọ mọ apọ̀. Mẹjitọ ṣie lẹ basi tito hodidọ pinplọn tọn de na mi, ṣigba vivẹnudido yetọn lẹpo yin to ovọ́ mẹ. Apọ̀nmẹ wẹ nuhahun ṣie wá sọn, e ma yin agbasa-liho gba. Nalete, awuwledainanu jiawu de tin sọn Jehovah dè—yèdọ Wehọmẹ Lizọnyizọn Yẹwhehọluduta tọn. Yinkọ zizedai to wehọmẹ ehe na mi adọgbigbo. Yẹn wà nuhe go n’pé lẹpo nado yí nuhe plọn n’te lẹ zan. Podọ ehe hẹn kọdetọn dagbe wá! N’voawu dogọ, bo ma nọ mọ apọ̀ ba, bosọ yin adọgbotọ dogọ to lizọnyizọn lọ mẹ. Todin yẹn tlẹ nọ dọ togunmẹ hodidọ lẹ. N’dopẹ́ na Jehovah taun na e ko hẹn gbẹzan ṣie pọnte dogọ gbọn wehọmẹ ehe gblamẹ.” Be aliho he mẹ Jehovah nọ plọnazọ́n mí te nado wà azọ́n etọn ma na mí whẹwhinwhẹ́n nado yin ayajẹnọ ya?
14, 15. Alọgọ tẹlẹ wẹ tin-to-aimẹ na mí to ojlẹ ayimajai tọn lẹ mẹ? Basi dohia.
14 Haṣinṣan pẹkipẹki de tintindo hẹ Jehovah po godonọnamẹ mẹmẹsunnu-yinyin he tin to kọndopọ mẹ lẹdo aihọn pé tọn po. Katrin, he nọ nọ̀ Allemagne, jẹflumẹ tlala to whenuena e sè linlin lẹ dogbọn aigba sisọsisọ sinsinyẹn de po tsunami he dekọtọn sọn e mẹ to hùwaji whèzẹtẹn Asia tọn po dali. Viyọnnu etọn to gbejizọnlin sadidi tọn basi to Thaïlande to whenuena nugbajẹmẹji lọ jọ. Na ganhiho 32, onọ̀ ehe ma yọnẹn eyin viyọnnu etọn gbẹ́ pò to ogbẹ̀ kavi eyin e tin to mẹhe kú kavi gbleawu he sọha yetọn fọ́n bo to jijideji lẹ mẹ. Lehe Katrin mọ kọgbọ to godo mẹ do sọ to whenuena e mọ oylọ alokan ji tọn de yí he na ẹn jide gando dagbemẹninọ viyọnnu etọn tọn go!
15 Etẹwẹ gọalọna Katrin to ganhiho nuhiha tọn enẹlẹ gblamẹ? E wlan dọmọ: “Yẹn yí suhugan ojlẹ ehe tọn zan nado hodẹ̀ hlan Jehovah. N’doayi e go whlasusu dọ ehe na mi huhlọn po jijọho ayiha mẹ tọn po tlala. Humọ, mẹmẹsunnu gbigbọmẹ tọn owanyinọ lẹ dla mi pọ́n bo na mi tuli.” (Filippinu lẹ 4:6, 7) Lehe ninọmẹ etọn na ko ylan hugan do sọ eyin e dona ko yí ganhiho awufiẹsa tọn ehelẹ zan matin alemọyi sọn dẹ̀hiho hlan Jehovah po homẹmiọnnamẹ mẹmẹsunnu-yinyin owanyinọ de tọn po mẹ! Haṣinṣan pẹkipẹki mítọn hẹ Jehovah po Ovi etọn po gọna gbẹdido pẹkipẹki hẹ mẹmẹsunnu-yinyin Klistiani tọn mítọn yin dona vonọtaun de, ehe họakuẹ taun bo ma dona yin pinpọnhlan di nutata de.
16. Na numimọ de he do nuhọakuẹ-yinyin todido fọnsọnku tọn hia.
16 Todido lọ nado vọ́ mẹyiwanna he ko kú lẹ mọ. (Johanu 5:28, 29) Dẹpẹ de he nọ yin Matthias yin pinplọn whẹ́n taidi dopo to Kunnudetọ Jehovah tọn lẹ mẹ. Ṣigba, na e ma doayi dona he e to mimọyi lẹ go wutu, e joagọ sọn agun Klistiani tọn mẹ to whenuena e yin jọja aflanmẹ de. E wlan todin dọmọ: “Na nugbo tọn, n’ma dọho hẹ otọ́ ṣie yinukọn pọ́n gbede. To owhe ehe lẹpo gblamẹ, mí tindo nudindọn susu. Ṣogan, dagbe ṣie janwẹ otọ́ ṣie nọ dín to whepoponu. E yiwanna mi taun, ṣigba n’ma yọnẹn domọ to ojlẹ enẹ mẹ. To 1996, dile n’sinai to akanma etọn pá, bo hẹn alọ etọn go bo to avivi vivẹvivẹ, n’dọna ẹn lehe nuhe n’ko wà wayi lẹpo vẹna mi sọ podọ dọ n’yiwanna ẹn taun. Ṣigba e ma sọgan sè nuhe dọ n’te gba. To azọ̀njijẹ na ojlẹ gli de godo, e damlọn to okú mẹ. Eyin yẹn nọgbẹ̀ kaka bo wá mọ otọ́ ṣie to fọnsọnku godo, mí na súdo nuhe ko wayi lẹ tọn. Podọ matin ayihaawe, homẹ etọn na hùn nado sè dọ yẹn to devizọnwa todin taidi mẹho agun tọn podọ dọ yẹn po asi ṣie po tindo lẹblanulọkẹyi lọ nado sẹ̀n taidi gbehosọnalitọ lẹ.” Dona nankọtọn die todido fọnsọnku tọn yin na mí!
“E Ma Nọ Yí Awubla Dogọ Ẹ Gba”
17. Dagbe tẹwẹ ayihamẹlinlẹnpọn do dona Jehovah tọn lẹ ji dona wà na mí?
17 Jesu Klisti dọ gando Otọ́ etọn olọn mẹ tọn go dọmọ: “E [nọ] hẹn owhè etọn vẹ́ do mẹylankan lẹ ji, podọ do omẹ dagbe lẹ ji, bosọ [to] jikun ja do dodonọ lẹ ji, podọ do mawadodonọ lẹ ji.” (Matiu 5:45) Eyin Jehovah Jiwheyẹwhe nọ kọ̀n dona lẹ do mẹhe tlẹ yin mawadodonọ lẹ po mẹylankan lẹ po ji, nẹmunẹmu wẹ e na dona mẹhe to zọnlinzin to aliho tenọgli tọn ji lẹ! “OKLUNỌ Jiwheyẹwhe . . . ma to na whlẹn onú dagbe de do yé he to zọnlin jijlọ zin lẹ,” wẹ Psalm 84:11 dọ. Eyin mí lẹnnupọndo nukunpedomẹgo vonọtaun po mẹtọnhopọn he e ko dohia mẹhe yiwanna ẹn lẹ po ji, lehe ahun mítọn lẹ nọ gọ́ na pinpẹn-nutọn-yinyọnẹn po ayajẹ po do sọ!
18. (a) Aliho tẹ mẹ wẹ Jehovah ma nọ yí awubla dogọ dona etọn te? (b) Naegbọn devizọnwatọ nugbonọ Jiwheyẹwhe tọn susu do nọ jiya?
18 “Dona OKLUNỌ tọn”—enẹ wẹ nuhe ko hẹn omẹ etọn lẹ wàdọkun to gbigbọ-liho. Podọ mí yin hinhẹn deji dọ “e ma nọ yí awubla dogọ ẹ gba.” (Howhinwhẹn lẹ 10:22) Eyin mọ wẹ, naegbọn devizọnwatọ nugbonọ Jiwheyẹwhe tọn susu nọ jugbọn whlepọn lẹ po mẹtẹnpọn lẹ po mẹ, ehe nọ hẹn awufiẹsa po yajiji susu po wá na yé? Whẹwhinwhẹ́n tangan atọ̀n wẹ zọ́n bọ mí do nọ pehẹ nuhahun lẹ po ayimajai po. (1) Ayilinlẹn mape mílọsu tọn. (Gẹnẹsisi 6:5; 8:21; Jakobu 1:14, 15) (2) Satani po aovi etọn lẹ po. (Efesunu lẹ 6:11, 12) (3) Aihọn ylankan lọ. (Johanu 15:19) Dile etlẹ yindọ Jehovah nọ na dotẹnmẹ onú ylankan lẹ nado jọ do mí go, e ma yin ewọ wẹ nọ hẹn yé wá gba. Na nugbo tọn, “nunina dagbedagbe po nunina he sọgbe lẹpo po, aga wẹ e sọn, bosọ jẹte sọn Otọ́ hinhọ́n lẹ tọn dè.” (Jakobu 1:17) Dona Jehovah tọn lẹ ma nọ hẹn awubla wá gba.
19. Etẹwẹ to tepọn mẹhe to zọnlinzin zọnmii to tenọgli mẹ lẹ?
19 Nado duvivi dagbemẹninọ gbigbọmẹ tọn, e nọ biọ to whepoponu dọ mí ni dọnsẹpọ Jiwheyẹwhe pẹkipẹki. Eyin mí wleawuna haṣinṣan pẹkipẹki de hẹ ẹ, ‘mí na bẹpli do agbànhọ mẹ na míde dòdó dagbe de pọ́n ojlẹ he ja, na mí nido hẹn ogbẹ̀ lọ go ehe yin ogbẹ̀ nugbonugbo’—yèdọ ogbẹ̀ madopodo. (1 Timoti 6:12, 17-19) To aihọn yọyọ Jiwheyẹwhe tọn he ja lọ mẹ, dona agbasa tọn lẹ na yin yiyidogọna adọkun gbigbọmẹ tọn mítọn lẹ. To ojlẹ enẹ mẹ, mẹhe “nọ tuntoai hlan ogbè OKLUNỌ” tọn lẹpo na duvivi ogbẹ̀ nugbonugbo lọ tọn. (Deutelonomi 28:2) Po gbemima he yin hinhẹn lodo po, mì gbọ mí ni yí ayajẹ do to zọnlinzin zọnmii to tenọgli mẹ.
Etẹwẹ Hiẹ Plọn?
• Naegbọn e ma yin nuyọnẹnnu nado nọ lẹnnupọn glanglan do sọgodo ji?
• Dona tẹlẹ wẹ mí tindo to alọnu din?
• Naegbọn devizọnwatọ nugbonọ Jiwheyẹwhe tọn lẹ do nọ jiya?