‘Mì Payi Otọ́n Falesi lẹ Tọn Go’

Jesu na avase devi etọn lẹ dọmọ: “Mì payi otọ́n Falesi lẹ tọn, he yin yẹnuwiwa go.” (Luku 12:1) Kandai devo he dọho gando hogbe Jesu tọn ehelẹ go dohia hezeheze dọ “nuplọnmẹ” Falesi lẹ tọn hodọ wẹ e te.—Mat. 16:12.

To whedelẹnu, Biblu nọ yí hogbe lọ “otọ́n” zan nado dlẹnalọdo nuhe nọ hẹnmẹ flu. Ayihaawe ma tin dọ nuplọnmẹ po walọyizan Falesi lẹ tọn po nọ yinuwado hosetọ yetọn lẹ ji to aliho agọ̀ mẹ. Naegbọn nuplọnmẹ Falesi lẹ tọn do yin owùnu?

1 Falesi lẹ nọ doawagun dọ emi yin dodonọ, podọ yé nọ yí nukunpẹvi do pọ́n gbẹtọ paa lẹ.

Jesu donù dodonọ-jijlá mọnkọtọn go to oló etọn de mẹ. E dọmọ: “Falesi lọ ṣite bo jẹ dẹ̀ho ji bosọ to onú ehelẹ dọ to ede mẹ dọmọ, ‘Jiwheyẹwhe E, yẹn dopẹna we dọ yẹn ma taidi mẹhe pò lẹ, yèdọ alọslonamẹtọ lẹ, mawadodonọ lẹ, ayọdetọ lẹ, kavi etlẹ yin taidi tòkuẹ-ṣinyantọ ehe. Yẹn nọ blanù whla awe to osẹ dopo mẹ, yẹn nọ na madao nuhe yẹn tindo lẹpo tọn.’ Ṣigba, tòkuẹ-ṣinyantọ lọ he ṣite to olá ma tlẹ jlo nado ze nukun etọn lẹ daga hlan olọn, ṣigba to akọ́nnu etọn hò bosọ to didọmọ, ‘Jiwheyẹwhe E, wàlẹblanu na mi, yẹn ylandonọ.’”—Luku 18:11-13.

Jesu pà tòkuẹ-ṣinyantọ lọ na whiwhẹ he e dohia dọmọ: “Yẹn dọna mì dọ, Dawe ehe yì owhé etọn gbè bo yin dodonọ hú [Falesi lọ]; na mẹdepope he ze ede daga wẹ yè na whiwhẹ, ṣigba ewọ he whiwhẹ ede wẹ yè na zedaga.” (Luku 18:14) Mẹsusu wẹ yọnẹn dọ tòkuẹ-ṣinyantọ lẹ ma nọ dọ nugbo, etomọṣo Jesu dovivẹnu bo gọalọna tòkuẹ-ṣinyantọ he dotoaina ẹn lẹ. E whè gbau, tòkuẹ-ṣinyantọ awe—Matiu po Zaṣe po—lẹzun hodotọ etọn.

Etẹwẹ mí dona wà eyin mí jẹ linlẹn ji dọ mí pọnte hugan mẹdevo lẹ na nugopipe jọwamọ tọn mítọn, lẹblanulọkẹyi he mí tindo lẹ kavi awugbopo po madogán mẹdevo lẹ tọn po wutu? Mí dona yawu de linlẹn mọnkọtọn lẹ sọn ayiha mítọn mẹ, na Owe-wiwe lẹ dọmọ: “Owanyi nọ sinyẹnlin bo yin homẹdagbenọ. Owanyi ma nọ whànwu, e ma nọ ze ede daga, ma nọ kla, ma nọ wanu jẹagọ, ma nọ dín ale edetiti tọn lẹ, ma nọ gblehomẹ aplà. E ma nọ basi kandai nuṣiwa tọn. E ma nọ jaya to mawadodo mẹ, ṣigba nọ jaya to nugbo mẹ.”—1 Kọl. 13:4-6.

Mí dona tindo pọndohlan apọsteli Paulu tọn nkọ. To whenue e dọ dọ “Klisti Jesu wá aihọn mẹ nado whlẹn ylandonọ lẹ gán” godo, e yidogọ dọmọ: “Yẹn yin tọ́ntlọ́ngbọ́n to omẹ ehelẹ mẹ.”—1 Tim. 1:15.

Kanbiọ he ji mí dona lẹnayihamẹpọn do lẹ:

Be n’kẹalọyi dọ n’yin ylandonọ bọ whlẹngán ṣie sinai do nukundagbe majẹhẹ Jehovah tọn ji ya? Kavi be sinsẹ̀nzọn he n’wà po nugbonọ-yinyin po na owhe susu, lẹblanulọkẹyi he n’tindo to titobasinanu Jiwheyẹwhe tọn mẹ lẹ, kavi nugopipe jọwamọ tọn ṣie lẹ nọ hẹn mi nado lẹndọ n’yiaga hugan mẹdevo lẹ wẹ ya?

2 Falesi lẹ nọ tẹnpọn nado hẹn awuji mẹdevo lẹ gbọn yedelẹ didohia taidi dodonọ dali. Yé nọ jlo yindidi po tẹnmẹ-yinkọ oklọ tọn lẹ po.

Ṣigba Jesu na avase dọmọ: “Azọ́n he yé nọ wà lẹpo, yé nọ wà yé na gbẹtọ lẹ nido mọ yé; na yé nọ hẹn ayúpò yetọn he mẹ adà Owe-wiwe tọn lẹ nọ yin bibẹ do, ehe yé nọ sìn taidi hihọ́-basinamẹnu lẹ gblodeji, bosọ nọ hẹn okẹ̀yẹ̀ awù yetọn tọn lẹ gblodeji. Yé nọ yiwanna otẹn nukundeji lẹ to núdùdù whèjai tọn lẹ whenu po aisintẹn nukọn tọn lẹ po to sinagọgu lẹ mẹ, bosọ nọ yiwanna nado yin nudọdo to ahi lẹ mẹ podọ nado nọ yin yiylọdọ Labi gbọn gbẹtọ lẹ dali.” (Mat. 23:5-7) Nuyiwa yetọn gbọnvona Jesu tọn taun. Dile etlẹ yindọ ewọ yin Visunnu pipé Jiwheyẹwhe tọn, e yin whiwhẹnọ. To whenue dawe de ylọ ẹ dọ “mẹdagbe,” Jesu gblọn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo omẹ dopo, yèdọ Jiwheyẹwhe.” (Malku 10:18) To nujijọ devo whenu, Jesu klọ́ afọ na devi etọn lẹ bo gbọnmọ dali ze apajlẹ whiwhẹ tọn de dai na hodotọ etọn lẹ.—Joh. 13:1-15.

Klistiani nugbo lẹ dona nọ yilizọn na yisenọ hatọ lẹ. (Gal. 5:13) Nubiọtomẹsi de wẹ ehe yin na mẹhe jlo na pegan taidi nugopọntọ to agun mẹ lẹ. Nuhe sọgbe wẹ e yin nado “to vivẹnudo na azọ́ntẹn nugopọntọ tọn,” ṣigba e dona yin po yanwle lọ po nado gọalọna mẹdevo lẹ. “Azọ́ntẹn” ehe ma yin otẹn yindidi tọn kavi ogántẹn de gba. Taidi Jesu, mẹhe to sinsẹ̀n taidi nugopọntọ lẹ dona yin “whiwhẹnọ to ahun mẹ.”—1 Tim. 3:1, 6; Mat. 11:29.

Kanbiọ he ji mí dona lẹnayihamẹpọn do lẹ:

Be n’nọ dín nukundagbe mẹhe tin to otẹn azọngban tọn mẹ to agun mẹ lẹ tọn, vlavo po linlẹn lọ po nado diyin kavi nado tindo lẹblanulọkẹyi devo lẹ wẹ ya? Na nuhe dù sinsẹ̀n-bibasi ṣie, be nuhe na zọ́n bọ mẹdevo lẹ na doayi go e bo pà mi lẹ wẹ n’nọ jlo na wà ya? Na taun tọn, be n’nọ tẹnpọn nado dohia dọ n’pọnte hugan mẹdevo lẹ wẹ ya?

3 Osẹ́n po aṣa Falesi lẹ tọn po nọ hẹn ẹn vẹawuna gbẹtọ paa lẹ nado yìn Osẹ́n Mose tọn.

Osẹ́n Mose tọn na nudọnamẹ gigọ́ Islaelivi lẹ gando lehe yé dona nọ sẹ̀n Jehovah do go. Ṣigba Osẹ́n lọ ma bẹ zẹẹmẹ flinflin lẹ hẹn gba. Di apajlẹ, Osẹ́n lọ gbẹ́ dọ mẹde ma dona wazọ́n to Gbọjẹzangbe, ṣigba e ma basi todohukanji nuhe dona yin wiwà po nuhe ma dona yin wiwà lẹ po tọn. (Eks. 20:10) Falesi lẹ yí osẹ́n po aṣa yetọn lẹ po dogọ, na yé lẹndọ Osẹ́n Mose tọn ma bẹ nudọnamẹ gigọ́ lẹ hẹn. Dile etlẹ yindọ Jesu ma yí nukun nujọnu tọn do pọ́n osẹ́n Falesi lẹ tọn, e yìn Osẹ́n Mose tọn. (Mat. 5:17, 18; 23:23) E mọnú zẹ̀ nuhe Osẹ́n lọ jlo na dọ go. Jesu yọnẹn dọ Osẹ́n lọ yin nina na gbẹtọ lẹ nido do lẹblanu po awuvẹmẹ po hia. Ewọ do lẹnpọn dagbe hia etlẹ yin to whenue hodotọ etọn lẹ hẹn ẹn jẹflumẹ. Di apajlẹ, dile etlẹ yindọ e na tuli atọ̀n to apọsteli etọn lẹ mẹ nado gbọṣi nukle bo to alihọ́ to ozán he mẹ e yin wiwle te, whlasusu wẹ yé damlọn. Etomọṣo, e vẹawu yé bo dọmọ: “Nugbo wẹ dọ gbigbọ to jijlo taun, ṣigba agbasa yin madogánnọ.”—Malku 14:34-42.

Kanbiọ he ji mí dona lẹnayihamẹpọn do lẹ:

Be n’nọ tẹnpọn nado ze osẹ́n hẹngogo tọn lẹ dai wẹ ya kavi n’nọ diọ nuhe yin pọndohlan ṣie lẹ zun osẹ́n? Be n’nọ yin lẹnpọn-dagbenọ to nuhe n’nọ donukun sọn mẹdevo lẹ si mẹ ya?

Lẹnnupọndo vogbingbọn he tin to nuplọnmẹ Jesu tọn po Falesi lẹ tọn po ṣẹnṣẹn ji. Be hiẹ mọ adà he mẹ a sọgan basi vọjlado te lẹ ya? Eyin mọ wẹ, naegbọn hiẹ ma na magbe nado wàmọ?

[Yẹdide to weda 28]

Falesi lẹ nọ sìn ayúpò he mẹ adà Owe-wiwe tọn lẹ nọ yin bibẹ do dó nukọn ota yetọn tọn.—Mat. 23:2, 5

[Yẹdide to weda 29]

To vogbingbọn mẹ na Falesi saklanọ lẹ, mẹho agun tọn whiwhẹnọ lẹ nọ yilizọn na mẹdevo lẹ

[Yẹdide to weda 30]

Taidi Jesu, be hiẹ nọ yin lẹnpọn-dagbenọ to nuhe a nọ donukun sọn mẹdevo lẹ si mẹ ya?