“Yẹn Tin po Mì Po”
“Mẹsusu na họ̀nwezun yigodo podọ yinukọn, yè nasọ hẹn [oyọnẹn nugbo, NW] sudeji.”—DAN. 12:4.
NAWẸ HIẸ NA NA GBLỌNDO GBỌN?
Nawẹ “oyọnẹn nugbo” lọ wá họnwun to ojlẹ mítọn mẹ gbọn?
Nawẹ mẹhe kẹalọyi nugbo lọ lẹ wá lẹzun “mẹsusu” gbọn?
Aliho tẹlẹ mẹ wẹ oyọnẹn nugbo lọ “sudeji” te?
1, 2. (a) Nawẹ mí wagbọn do yọnẹn dọ Jesu tin po mẹjidugando etọn lẹ po todin bo nasọ wàmọ to sọgodo? (b) Sọgbe hẹ Daniẹli 12:4, ale tẹwẹ Owe-wiwe lẹ pinplọn po sọwhiwhe po na hẹnwa?
MÍ NI dọ dọ hiẹ tin to Paladisi mẹ. To afọnnu lẹpo, a nọ fọ́n po numọtolanmẹ lọ po dọ emi gbọjẹ ganji bo nọ to jejeji nado bẹ azán yọyọ devo jẹeji. Awutu kavi awufiẹsa depope ma to tuklado we. Madogán he a tindo dai lẹpo ko busẹ. Awutugonu towe lẹpo—yèdọ nukun, otó, awọntin, alọ po odẹ́ towe po—nọ wazọ́n ganji. A tindo agbasalilo, azọ́n towe nọ hẹn ayajẹ wá na we, a tindo họntọn susu, podọ hiẹ masọ tindo ayimajai depope ba. Dona he a sọgan duvivi etọn to Ahọluduta Jiwheyẹwhe tọn glọ lẹ niyẹn. Ahọlu mítọn, Klisti Jesu, na dona gbẹtọvi lẹ bo nasọ gọalọna mẹhe tin to aigba ji lẹpo nado tindo oyọnẹn Jehovah tọn.
2 To ojlẹ enẹ, Jiwheyẹwhe po Visunnu etọn po na gọalọna nugbonọ lẹ nado plọnnu mẹdevo lẹ gando Jehovah go. Jehovah po Jesu po ko tin po mẹhe yin nugbonọ lẹ po na owhe kanweko susu lẹ. Whẹpo Jesu do lẹkọyi olọn mẹ, e na jide devi nugbonọ etọn lẹ dọ emi na tin po yé po. (Hia Matiu 28:19, 20.) Nado hẹn yise mítọn lodo to jidenamẹ enẹ mẹ, mì gbọ mí ni gbadopọnna hodidọ dopo poun sọn dọdai gbọdo de mẹ he yin kinkandai sọn owhe 2 500 linlán die to Babilọni hohowhenu tọn. Yẹwhegán Daniẹli wlan gando “ojlẹ opodo lọ tọn” he mẹ mí to gbẹnọ te to egbehe go dọmọ: “Mẹsusu na họ̀nwezun yigodo podọ yinukọn, yè nasọ hẹn [oyọnẹn nugbo, NW] sudeji.” (Dan. 12:4) Nujijọ azán mítọn gbè tọn lẹ gọalọna mí nado mọnukunnujẹemẹ dọ hodidọ lọ “họ̀nwezun yigodo podọ yinukọn” he yin yiyizan to wefọ ehe mẹ zẹẹmẹdo nado nọ plọnnu po sọwhiwhe po. Lehe nupinplọn sọwhiwhe tọn enẹ na hẹn dona mayọnjlẹ lẹ wá do sọ! Mẹhe yí sọwhiwhe do plọn Owe-wiwe lẹ na mọ oyọnẹn nugbo kavi oyọnẹn he pegan gando Ohó Jiwheyẹwhe tọn go. Dọdai lọ sọ dohia dọ mẹsusu na kẹalọyi “oyọnẹn nugbo” lọ. Humọ, oyọnẹn enẹ na sudeji. E na gbayipe taun bo na tin-to-aimẹ na mẹsusu nado mọnukunnujẹemẹ. Dile mí na to dogbapọnna lehe dọdai enẹ mọ hẹndi do, mí na mọdọ Jesu tin po devi etọn lẹ po to egbehe podọ nudepope ma sọgan glọnalina Jehovah nado hẹn opagbe etọn lẹpo di.
“OYỌNẸN NUGBO” LỌ WÁ HỌNWUN
3. Etẹwẹ jọ do “oyọnẹn nugbo” lọ go to okú apọsteli lẹ tọn godo?
3 To okú apọsteli lẹ tọn godo, atẹṣiṣi he Biblu dọ dọ e na wá sọn Klistiani nugbo lẹ ṣẹnṣẹn lọ sọawuhia bosọ gbayipe po awuyiya po. (Owalọ 20:28-30; 2 Tẹs. 2:1-3) To owhe kanweko susu lẹ godo, “oyọnẹn nugbo” lọ ma họnwun paali na mẹhe ma yọ́n nudepope gando Biblu go lẹ podọ na mẹhe tlẹ sọalọakọ́n nado yin Klistiani lẹ lọsu. Dile etlẹ yindọ nukọntọ Mẹylọhodotọklisti tọn lẹ sọalọakọ́n dọ emi tindo yise to Owe-wiwe lẹ mẹ, yé nọ plọnmẹ lalo sinsẹ̀n tọn lẹ, yèdọ “nuplọnmẹ aovi lẹ tọn” he nọ de yẹyi sọn Jiwheyẹwhe go. (1 Tim. 4:1) Sinsẹ̀ngán lẹ hẹn suhugan gbẹtọ lẹ tọn do zinvlu gbigbọmẹ tọn mẹ. Delẹ to sinsẹ̀n-nuplọnmẹ agọ̀ yetọn lẹ mẹ wẹ yindọ Jiwheyẹwhe yin Atọ̀n-to-Dopomẹ, alindọn ma nọ kú, podọ alindọn delẹ nọ yin yasana kakadoi to olọnzomẹ.
4. Nawẹ pipli Klistiani lẹ tọn de jẹ “oyọnẹn nugbo” lọ dín ji to owhe 1870 lẹ gblamẹ gbọn?
4 Ṣigba to owhe 1870 lẹ gblamẹ—nudi owhe kande whẹpo “azán godo tọn lẹ” do bẹjẹeji—pipli kleun Klistiani ahundoponọ lẹ tọn de to Pennsylvanie, États-Unis nọ pli nado plọn Biblu po sọwhiwhe po nado sọgan dín “oyọnẹn nugbo” lọ. (2 Tim. 3:1) Yé sù-yín na yede dọ Biblu Plọntọ lẹ. Yé ma yin “nuyọnẹntọ lẹ po weyọnẹntọ lẹ po” he Jesu dọ dọ oyọnẹn na yin whiwhla do gba. (Mat. 11:25) Ṣigba, yé yin whiwhẹnọ bosọ tindo ojlo vẹkuvẹku nado wà ojlo Jiwheyẹwhe tọn. Yé nọ yí sọwhiwhe do hia Owe-wiwe lẹ, nọ dọhodeji, nọ lẹnayihamẹpọn do e ji bosọ nọ biọ alọgọ Jiwheyẹwhe tọn to odẹ̀ mẹ nado mọnukunnujẹemẹ. Yé sọ nọ dín kanṣiṣa he tin to wefọ Biblu tọn voovo lẹ ṣẹnṣẹn bo nọ gbadopọnna kandai mẹdevo he dín nugbo Biblu tọn lẹ tọn. Nugbo he dablu do gbẹtọvi lẹ na owhe kanweko susu lẹ wá jẹ wunhọ́n na Biblu Plọntọ ehelẹ ji vudevude.
5. Etẹwẹ yin lẹndai alọnuwe pẹvi debọdo-dego he yin yiylọdọ Cahiers de théologie ancienne lẹ tọn?
5 Dile etlẹ yindọ homẹhun Biblu Plọntọ lọ lẹ taun gando nuhe plọn yé te lẹ go, yé ma dike enẹ ni hẹn yé nado kla, mọjanwẹ yé masọ dohia gbẹtọ lẹ dọ onú yọyọ wẹ emi to pinplọn yé do niyẹn. (1 Kọl. 8:1) Yé zín alọnuwe pẹvi debọdo-dego delẹ jẹgbonu he yin yiylọdọ Cahiers de théologie ancienne. Lẹndai alọnuwe pẹvi enẹlẹ tọn wẹ nado hẹn nugbo Owe-wiwe tọn he tin to Biblu mẹ lẹ zun yinyọnẹn na wehiatọ lẹ. Zinjẹgbonu tintan alọnuwe pẹvi enẹlẹ tọn gọalọna gbẹtọ lẹ nado plọn Biblu nado sọgan gbẹ́ “aṣa lalo gbẹtọ tọn lẹpo” dai bo kẹalọyi nuplọnmẹ nugbo Jesu po apọsteli lẹ po tọn, yèdọ “nuplọnmẹ sinsẹ̀n tọn hoho lẹ.”—Cahiers de théologie ancienne, No. 1, avril 1889, w. 32.
6, 7. (a) Bẹsọn owhe 1870 lẹ, nugbo tẹlẹ mẹ wẹ mí wá mọnukunnujẹ? (b) Nugbo tẹlẹ wẹ hiẹ yiwanna hugan to dehe a plọn lẹ mẹ?
6 Lehe nugbo he ko họnwun sọn owhe 100 linlán todin lẹ jiawu do sọ!a Nugbo ehelẹ ma yin nuplọnmẹ he nọ ṣiapọmẹ kavi he doglẹ, ehe sinsẹ̀n-nuplọnmẹtọ lẹ kẹdẹ wẹ sọgan mọnukunnujẹemẹ lẹ gba. Kakatimọ, nugbo jiawu he nọ hẹnmẹ jẹ mẹdekannu bo nọ hẹn gbẹzan mẹtọn pọnte bosọ nọ namẹ ayajẹ po todido po wẹ yé yin. Nugbo enẹlẹ gọalọna mí nado yọ́n Jehovah—yèdọ jẹhẹnu po lẹndai etọn lẹ po. Yé sọ nọ gọalọna mí nado mọnukunnujẹ azọngban Jesu tọn, nuhewutu e wá aigba ji bo kú gọna nuhe wà e te to alọnu din mẹ. Nugbo họakuẹ ehelẹ do nuhewutu Jiwheyẹwhe jotẹnna oylan, nuhewutu mí nọ kú, lehe mí dona hodẹ̀ do po lehe mí sọgan tindo ayajẹ nujọnu tọn do po hia.
7 Dọdai voovo he yin “núsúnúdo” kavi aṣli na owhe susu ṣigba bo to hẹndi mọ to ojlẹ opodo tọn mẹ lẹ ko họnwun na mí todin. (Dan. 12:9) Susu dọdai enẹlẹ tọn tin to owe Wẹndagbe tọn lẹ po owe Osọhia tọn po mẹ. Jehovah tlẹ hẹn yọnbasi na mí nado mọnukunnujẹ nujijọ he mí ma sọgan mọ po nukun po lẹ mẹ, di apajlẹ zizedo ofìn ji Jesu tọn, awhàn he wá aimẹ to olọn mẹ po lehe Satani yin yinyan hlan aigba ji do po. (Osọ. 12:7-12) Jiwheyẹwhe sọ gọalọna mí nado tunwun zẹẹmẹ nuhe mí sọgan mọ lẹ tọn go—yèdọ awhàn, aigba sisọsisọ, azọ̀nylankan po núdùdù whèdomẹ lẹ po gọna gbẹtọ jijọ-madi-Jiwheyẹwhe tọn he nọ yidogọna “ojlẹ awusinyẹn tọn he vẹawu nado pehẹ lẹ.”—2 Tim. 3:1-5; Luku 21:10, 11.
8. Mẹnu wẹ hẹn yọnbasi na mí nado mọnukunnujẹ nugbo lọ mẹ?
8 Jesu dọna devi etọn lẹ dọmọ: “Ayajẹnọ wẹ nukun he mọ nuhe mì to mimọ ehelẹ. Na yẹn dọna mì dọ, Yẹwhegán po ahọlu susu po wẹ ko jlo nado mọ nuhe mìwlẹ to mimọ ṣigba bo ma mọ, podọ nado sè nuhe mìwlẹ to sisè ṣigba bo ma sè.” (Luku 10:23, 24) Numọtolanmẹ enẹ wẹ mí nọ tindo to egbehe. Jehovah Jiwheyẹwhe wẹ hẹn yọnbasi na mí nado mọ bosọ sè onú mọnkọtọn lẹ. Lehe mí gọ́ na pinpẹn-nutọn-yinyọnẹn dọ “alọgọtọ lọ,” yèdọ gbigbọ wiwe Jiwheyẹwhe tọn ko yin didohlan nado deanana hodotọ Jesu tọn lẹ “yì nugbo lọ lẹpo kọ̀n” do sọ! (Hia Johanu 16:7, 13.) Mì gbọ mí ni nọ pọ́n “oyọnẹn nugbo” lọ hlan di nuhọakuẹ to whepoponu bo nọ gbọn ṣejannabi matindo dali hẹn ẹn zun yinyọnẹn na mẹdevo lẹ.
“MẸSUSU” KẸALỌYI “OYỌNẸN NUGBO” LỌ
9. Oylọ-basinamẹ tẹwẹ sọawuhia to zinjẹgbonu Atọ̀họ̀-Nuhihọ́ lọ Tọn avril 1881 tọn mẹ?
9 To avril 1881, yèdọ nuhe ma pé owhe awe he zinjẹgbonu tintan Atọ̀họ̀-Nuhihọ́ lọ Tọn yin didetọn godo, oylọ-basinamẹ de sọawuhia to linlinnamẹwe ehe mẹ dọ nuhudo yẹwhehodọtọ 1 000 tọn tin. Oylọ-basinamẹ lọ dọmọ: “Na mẹhe ninọmẹ yetọn hẹn yọnbasi na nado yí mado-awe kavi hugan mọ sọn whenu yetọn mẹ zan mlẹnmlẹn na azọ́n Oklunọ lọ tọn lẹ, mí to tito de zedonukọnna mì . . ., enẹ wẹ: Nado yì tòhò daho kavi tòhò pẹvi lẹ mẹ taidi Owe-mátọ kavi Yẹwhehodọtọ lẹ sọgbe hẹ nugopipe mìtọn bo dín Klistiani ahundoponọ lẹ mọ to filẹpo, yèdọ mẹhe susu yetọn tindo zohunhun na Jiwheyẹwhe ṣigba e ma yin sọgbe hẹ oyọnẹn [nugbo]; mì dovivẹnu nado hẹn lẹblanu sisosiso Jiwheyẹwhe tọn po dona ohó Etọn tọn lẹ po zun yinyọnẹn na omẹ enẹlẹ.”
10. Nawẹ gbẹtọ lẹ kẹalọyi oylọ-basinamẹ lọ nado wazọ́n taidi yẹwhehodọtọ whenu-gigọ́ tọn lẹ gbọn?
10 Oylọ-basinamẹ enẹ yin kunnudenu de dọ Biblu Plọntọ lẹ yọnẹn dọ azọ́n titengbe de wẹ e yin na Klistiani nugbo lẹ nado lá wẹndagbe lọ. Ṣigba to whenuena e yindọ omẹ kanweko kleun delẹ wẹ nọ yì opli Biblu Plọntọ lẹ tọn to ojlẹ lọ mẹ, sọha yẹwhehodọtọ he kẹalọyi oylọ-basinamẹ lọ lẹ tọn ma sù sọ dehe yè donukun. Etomọṣo, susu mẹhe hia alọnuwe pẹvi kavi linlinnamẹwe de lẹ tọn wẹ nọ doayi e go dọ nugbo lọ die bo nọ kẹalọyi oylọ-basinamẹ lọ madọngbàn. Di apajlẹ to 1882, to whenue dawe de sọn Londres to Angleterre hia vọkan Atọ̀họ̀-Nuhihọ́ lọ Tọn de po alọnuwe apòmẹ tọn he Biblu Plọntọ lẹ zinjẹgbonu de po godo, e wlan domọ: “Mì jaale bo plọn mi lehe n’dona dọyẹwheho do po nuhe n’dona dọ po nado sọgan hẹn azọ́ndenamẹ Jiwheyẹwhe tọn di.”
11, 12. (a) Yanwle he owe-mátọ lẹ tindo tẹwẹ mílọsu tindo to egbehe? (b) Nawe owe-mátọ lẹ nọ do “klasi lẹ” kavi agun yọyọ lẹ ai gbọn?
11 To 1885, nudi Biblu Plọntọ 300 wẹ biọ azọ́n Owe-mátọ tọn kavi sinsẹ̀nzọn whenu-gigọ́ tọn mẹ. Lizọnyizọnwatọ whenu-gigọ́ tọn enẹlẹ tindo yanwle dopolọ he mí tindo to egbehe—enẹ wẹ nado hẹn gbẹtọ lẹ zun devi Jesu Klisti tọn lẹ. Ṣigba, aliho he mẹ yé nọ dọyẹwheho te gbọnvo na mítọn. To egbehe, aṣa mítọn wẹ nado plọn Biblu hẹ jlodotọ dopodopo, e ma yin po mẹsusu po to ojlẹ dopolọ mẹ. Enẹgodo, mí nọ basi oylọna plọnmẹ Biblu lọ nado wá kọnawudopọ hẹ agun he tin to lẹdo lọ mẹ. Ṣigba to dai, owe-mátọ lẹ nọ do owe lẹ gbonu, enẹgodo yé nọ pli jlodotọ lẹ dopọ nado plọn Biblu hẹ yé. Gbọnmọ dali, owe-mátọ lẹ nọ do “klasi lẹ” kavi agun lẹ ai.
12 Di apajlẹ to 1907, pipli owe-mátọ lẹ tọn de yì tòdaho de mẹ nado dín mẹhe tindo vọkan “L’Aurore du Millénium” (he sọ nọ yin yiylọdọ “Études des Écritures”) tọn lẹ mọ. Enẹgodo, owe-mátọ lọ lẹ basi oylọna yé nado wá opli to dimanche to owhé jlodotọ de tọn gbè. To dimanche enẹ, owe-mátọ de na hodidọ de gando Le divin Plan des Âges go na azán lọ blebu. To dimanche he bọdego, owe-mátọ enẹ na tuli mẹhe wá opli lọ lẹ nado nọ wá to gbesisọ mẹ. To 1911, mẹmẹsunnu lẹ yí aliho yẹwhehodidọ tọn wunmẹ devo zan nado hẹn gbẹtọ lẹ zun devi. Mẹmẹsunnu 58 zingbejizọnlin yì awà voovo États-Unis po Canada po tọn lẹ ji nado na hodidọ gbangba tọn lẹ. Yé nọ kàn yinkọ po adlẹsi jlodotọ he wá opli lọ lẹ tọn po dai. Enẹgodo, yé nọ má jlodotọ enẹlẹ do pipli voovo lẹ mẹ, podọ pipli dopodopo nọ pli to jlodotọ de sin whégbè. Mọ wẹ owe-mátọ lẹ nọ do agun yọyọ lẹ ai do niyẹn. To 1914, agun Biblu Plọntọ lẹ tọn 1 200 wẹ tin lẹdo aihọn pé.
13. Etẹwẹ nọ hẹn awuji we gando obá he mẹ “oyọnẹn nugbo” lọ ko gbayipe jẹ to egbehe go?
13 To egbehe, nudi agun 109 400 wẹ tin lẹdo aihọn pé, podọ mẹmẹsunnu po mẹmẹyọnnu diblayi 895 800 po wẹ to sinsẹ̀n taidi gbehosọnalitọ. Nudi gbẹtọ livi ṣinatọ̀n wẹ ko kẹalọyi “oyọnẹn nugbo” lọ, bosọ to gbẹnọ sọgbe hẹ ẹ. (Hia Isaia 60:22.)b Onú jiawu de wẹ enẹ yin, na Jesu dọ dọdai dọ “gbẹtọ lẹpo na gbẹwanna” devi emitọn lẹ na oyín emitọn wutu. E yidogọ dọ hodotọ emitọn lẹ na yin homẹkẹndo, yin wiwle do gànmẹ bo na tlẹ sọ yin hùhù. (Luku 21:12-17) Mahopọnna nukundiọsọmẹ Satani, aovi etọn lẹ po agọjẹdomẹtọ devo lẹ po tọn, omẹ Jehovah tọn lẹ ko tindo jideji ayidego tọn to azọ́n mẹhẹnzun devi tọn he yin didena yé lọ mẹ. To alọnu din, yé to yẹwhehodọ to “aigba fininọ lẹpo ji,” yèdọ sọn awà he ji yozò nọ sinyẹn te taun lẹ jẹ awà he ji aimẹ nọ fá te taun lẹ, to lẹdo osó tọn lẹ mẹ, to fie zungbo sù te lẹ, to tòhò lẹ mẹ podọ to fie gbẹtọ ma sù te lẹ. (Mat. 24:14) Eyin godonọnamẹ Jiwheyẹwhe tọn dẹ́n, azọ́n mọnkọtọn ma sọgan ko yin wiwà.
“OYỌNẸN NUGBO SUDEJI”
14. Nawẹ “oyọnẹn nugbo” lọ ko gbayipe gbọn owe voovo he nọ yin zinzinjẹgbonu lẹ dali gbọn?
14 “Oyọnẹn nugbo” lọ ko sudeji kavi gbayipe na mẹsusu to wẹndagbe lọ lá wutu. E ko sọ gbayipe gbọn owe voovo he nọ yin zinzinjẹgbonu lẹ dali. To juillet 1879, Biblu Plọntọ lẹ de zinjẹgbonu tintan linlinnamẹwe he plọn mí te ehe tọn tọ́n he nọ yin yiylọdọ Le Phare de la Tour de Sion et Messager de la Présence de Christ to ojlẹ lọ mẹ. Na zinjẹgbonu tintan linlinnamẹwe ehe tọn, Biblu Plọntọ lọ lẹ haya azọ́nwhé de he zín vọkan 6 000 jẹgbonu to Glẹnsigbe mẹ. Charles Taze Russell he tindo owhe 27 to ojlẹ lọ mẹ wẹ yin dide taidi mẹhe na deanana zinjẹgbonu linlinnamẹwe lọ tọn, podọ Biblu Plọntọ numimọnọ atọ́n devo lẹ sọ yin dide nado wazọ́n hẹ ẹ taidi alọgọtọ. To alọnu din, Atọ̀họ̀-Nuhihọ́ lọ Tọn nọ yin zinzinjẹgbonu to ogbè 195 mẹ. Linlinnamẹwe ehe wẹ nọ yin mimá hugan lẹdo aihọn pé, podọ vọkan etọn 42 182 000 wẹ nọ yin didetọn na zinjẹgbonu dopodopo. Linlinnamẹwe he nọ bọdego wẹ Réveillez-vous! he vọkan etọn 41 042 000 nọ yin zinzinjẹgbonu to ogbè 84 mẹ. Humọ, owe po Biblu po diblayi livi 100 wẹ nọ yin zinzinjẹgbonu to whemẹwhemẹ.
15. Nawẹ azọ́n wezinzin tọn mítọn lẹ nọ yin godonọna to akuẹzinzan-liho gbọn?
15 Azọ́n pligidi enẹ nọ yin nukunpedego gbọn nunina sọn ojlo mẹ wá lẹ dali. (Hia Matiu 10:8.) Mẹhe nọ wà azọ́n wezinzin tọn lẹ yọnẹn dọ nuwadotana daho de wẹ ehe lẹpo yin, na yé mọnukunnujẹemẹ dọ maṣinu wezinzin tọn lẹ, wema, wesin gọna nuyizan devo lẹ he nọ yin yiyizan na azọ́n ehe nọ biọ akuẹzinzan susu. Mẹmẹsunnu he nọ họ̀ azọ́nwanu wezinzin tọn na alahọ lẹ lẹdo aihọn pé de dọmọ: “Awú nọ ji ajọwatọ he nọ wá dla azọ́nwatẹn wezinzin tọn mítọn lẹ pọ́n nado sè dọ nunina sọn ojlo mẹ wá lẹ wẹ nọ hẹn yọnbasi nado họ̀ maṣinu wezinzin tọn dahodaho he gẹdẹ hugan enẹlẹ. Nudevo he sọ nọ hẹn awuji yé wẹ nado mọdọ suhugan mẹhe nọ wazọ́n to Bẹtẹli lẹ tọn yin jọja bosọ gọ́ na ayajẹ.”
AIHỌN NA GỌ́ NA OYỌNẸN JIWHEYẸWHE TỌN
16. Lẹndai tẹ wutu wẹ Jiwheyẹwhe do hẹn “oyọnẹn nugbo” lọ zun yinyọnẹn?
16 Lẹndai dagbe de wutu wẹ “oyọnẹn nugbo” lọ do sudeji. Ojlo Jiwheyẹwhe tọn wẹ yindọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Timoti 2:3, 4) Jehovah jlo dọ gbẹtọ lẹ ni yọ́n nugbo lọ, na yé nido sẹ̀n ewọ to aliho he e kẹalọyi mẹ bo mọ dona etọn. Gbọn “oyọnẹn nugbo” lọ hinhẹn zun yinyọnẹn dali, Jehovah ko bẹ pipotọ Klistiani yiamisisadode nugbonọ de tọn pli. Ewọ sọ to “gbẹtọ susugege de” he tindo todido nado nọgbẹ̀ kakadoi to aigba ji bẹpli sọn “akọta lẹpo mẹ, sọn whẹndo lẹpo mẹ, sọn gbẹtọ lẹpo mẹ podọ sọn ogbè lẹpo mẹ.”—Osọ. 7:9.
17. Etẹwẹ obá he mẹ sinsẹ̀n-bibasi nugbo gbayipe jẹ dohia?
17 Obá he mẹ sinsẹ̀n-bibasi nugbo gbayipe jẹ to owhe 130 he wayi lẹ gblamẹ hẹn mí wá tadona lọ kọ̀n dọ Jiwheyẹwhe po Ahọlu dide etọn Jesu Klisti po tin hẹ devizọnwatọ Jehovah tọn lẹ—gbọn anadidena yé, hihọ́-bibasina yé, tito-bibasina yé po nupinplọn yé po dali. Humọ, jideji he yé tindo numimọ etọn dohia dọ opagbe he Jehovah do gando sọgodo go lẹ na mọ hẹndi dandan. Na nugbo tọn, “aihọn na gọ́ na [oyọnẹn] OKLUNỌ tọn, dile osin ṣinyọ́n ohù ji do.” (Isa. 11:9) Lehe dona he gbẹtọvi lẹ na duvivi etọn to ojlẹ enẹ mẹ lẹ na sù do sọ!
[Nudọnamẹ odò tọn]
a E na yọ́n dọ hiẹ ni pọ́n DVD lọ lẹ Les Témoins de Jéhovah—La foi en action, 1re partie: La sortie des ténèbres po Les Témoins de Jéhovah—la foi en action, 2e partie: que brille la lumière po.
[Yẹdide to weda 6]
Biblu Plọntọ lẹ yin whiwhẹnọ bosọ tindo ojlo vẹkuvẹku nado wà ojlo Jiwheyẹwhe tọn
[Yẹdide to weda 7]
Jehovah nọ yọ́n pinpẹn vivẹnu he a nọ do nado hẹn “oyọnẹn nugbo” Jiwheyẹwhe tọn gbayipe lẹ tọn