Mì Nọ Yinuwa Taidi Tòvi Ahọluduta lọ Tọn Lẹ!
“Mì ni nọ yinuwa to aliho he jẹna wẹndagbe lọ . . . mẹ.”—FLP. 1:27.
NAWẸ HIẸ NA NA GBLỌNDO GBỌN?
Mẹnu lẹ wẹ sọgan yin tòvi Ahọluduta lọ tọn lẹ?
Etẹwẹ mí dona wà gando ogbè, whenuho po osẹ́n Ahọluduta lọ tọn lẹ po go?
Nawẹ tòvi Ahọluduta lọ tọn lẹ nọ dohia dọ yé yiwanna nujinọtedo Jiwheyẹwhe tọn lẹ gbọn?
1, 2. Naegbọn ayinamẹ Paulu tọn na agun Filippi tọn do jẹna ayidego?
APỌSTELI Paulu na tuli agun Filippi tọn nado “nọ yinuwa to aliho he jẹna wẹndagbe lọ . . . mẹ.” (Hia Filippinu lẹ 1:27.) Hodidọ Glẹki tọn he Paulu yizan na “mì nọ yinuwa” to wefọ ehe mẹ sọ sọgan zẹẹmẹdo “mì nọ yinuwa taidi tòvi lẹ.” Hodidọ enẹ gọ́ na zẹẹmẹ taun na hagbẹ agun Filippi tọn lẹ. Etẹwutu? Na e taidi dọ mẹhe tin to Filippi lẹ nọ yin pinpọnhlan taidi tòvi Lomu tọn lẹ. Tòvi Lomu tọn he to Filippi kavi to Ahọluigba Lomu tọn mẹ lẹ nọ doawagun nado yin tòvi Lomu tọn lẹ bosọ nọ duvivi hihọ́ vonọtaun de tọn to osẹ́n Lomu tọn glọ.
2 Hagbẹ agun Filippi tọn lẹ tindo whẹwhinwhẹ́n dagbe nado doawagun. Paulu flinnu yé dọ taidi Klistiani yiamisisadode lẹ, “olọn mẹ” wẹ tòvi-yinyin yetọn tin te. (Flp. 3:20) Tòvi ahọluigba Lomu tọn yinyin ma sọtẹ́n yiyijlẹdo lẹblanulọkẹyi enẹ go. Na nugbo tọn, tòvi Ahọluduta Jiwheyẹwhe tọn lẹ wẹ yé yin. Enẹwutu, yé nọ duvivi hihọ́ po dona mayọnjlẹ lẹ po tọn.—Efe. 2:19-22.
3. (a) Mẹnu lẹ wẹ tindo lẹblanulọkẹyi lọ nado yin tòvi Ahọluduta lọ tọn lẹ? (b) Etẹlẹ wẹ mí na gbadopọnna to hosọ ehe mẹ?
3 Omẹ tintan he go tudohomẹnamẹ Paulu tọn nado “nọ yinuwa taidi tòvi lẹ” gando wẹ mẹhe na dugán hẹ Klisti to olọn mẹ lẹ. (Flp. 3:20) Ṣigba, e sọgan sọ gando mẹhe ji Ahọluduta Jiwheyẹwhe tọn na paṣẹ do to aigba ji lẹ go. Etẹwutu? Na Ahọlu dopolọ, yèdọ Jehovah wẹ Klistiani klandowiwe lẹpo nọ sẹ̀n bosọ nọ setonuna nujinọtedo dopolọ lẹ. (Efe. 4:4-6) To egbehe, mẹsusu wẹ nọ dovivẹnu nado yin alọkẹyi taidi tòvi otò adọkunnọ lẹ tọn. Nẹmunẹmu wẹ mí dona yọ́n pinpẹn lẹblanulọkẹyi lọ nado yin tòvi Ahọluduta lọ tọn lẹ tọn! Na pinpẹn-nutọn-yinyọnẹn mítọn na lẹblanulọkẹyi enẹ nido siso dogọ, mì gbọ mí ni gbadopọnna delẹ to kanṣiṣa he tin to nubiọtomẹsi nado lẹzun tòvi gandudu gbẹtọvi tọn de tọn po nubiọtomẹsi nado lẹzun tòvi Ahọluduta Jiwheyẹwhe tọn po ṣẹnṣẹn lẹ mẹ. Enẹgodo, mí na dọhodo onú atọ̀n delẹ ji he mí dona wà eyin mí jlo na hẹn lẹblanulọkẹyi lọ nado yin tòvi Ahọluduta lọ tọn lẹ go.
NUBIỌTOMẸSI TÒVI-YINYIN TỌN LẸ
4. Etẹwẹ ogbè wiwe-ṣeke lọ nọtena, podọ etẹwẹ ogbè enẹ dido nọ biọ?
4 Ogbè lọ sisè. Gandudu delẹ nọ biọ dọ mẹhe jlo na lẹzun tòvi otò yetọn tọn lẹ ni do ogbè tangan otò lọ tọn. To whenue mẹdelẹ tlẹ ko yin alọkẹyi taidi tòvi otò de tọn godo, yé gbẹ́ nọ dovivẹnu na owhe susu nado do ogbè otò lọ tọn ganji. Dile etlẹ yindọ akọjijẹ hẹ ogbè lọ sọgan bọawuna yé, e nọ saba biọ whenu to yé si nado do ogbè lọ po awubibọ po. Mọdopolọ, Ahọluduta Jiwheyẹwhe tọn nọ biọ to mẹhe jlo na lẹzun tòvi etọn lẹ si nado tindo nuhe Biblu ylọdọ “nùflo wiwe” lọ kavi plọn ogbè wiwe-ṣeke lọ. (Hia Zẹfania 3:9.) Etẹwẹ ogbè enẹ nọtena? E nọtena nugbo lọ gando Jiwheyẹwhe po lẹndai etọn he tin to Biblu mẹ lẹ po go. Ogbè wiwe-ṣeke lọ dido nọ biọ dọ mí ni nọgbẹ̀ sọgbe hẹ osẹ́n po nunọwhinnusẹ́n Jiwheyẹwhe tọn lẹ po. Tòvi Ahọluduta Jiwheyẹwhe tọn lẹ sọgan jẹakọ hẹ nuplọnmẹ dodonu tọn Biblu tọn lẹ to ojlẹ kleun de gblamẹ bo yí baptẹm. Ṣigba to baptẹm godo, yé gbẹ́ dona to vivẹnudo zọnmii nado do ogbè wiwe-ṣeke lọ ganji. Gbọnna? Dopodopo mítọn wẹ dona dovivẹnu, e ma yin nado yọ́n nunọwhinnusẹ́n Biblu tọn lẹ kẹdẹ gba, ṣigba nado nọ nọgbẹ̀ sọgbe hẹ yé.
5. Naegbọn mí dona plọn whenuho titobasinanu he Jehovah to yiyizan lọ tọn to gigọ́ mẹ?
5 Whenuho lọ pinplọn. Mẹhe jlo na lẹzun tòvi gandudu gbẹtọvi tọn de tọn sọgan tin to dandannu glọ nado plọn onú delẹ gando whenuho otò enẹ tọn go. Mọdopolọ, mẹhe jlo na lẹzun tòvi Ahọluduta lọ tọn lẹ na wà dagbe nado plọn nususu gando Ahọluduta Jiwheyẹwhe tọn go. Mì gbọ mí ni lẹnnupọndo apajlẹ visunnu Kola tọn he wadevizọn to Islaeli hohowhenu tọn lẹ tọn ji. Yé tindo ojlo susu to Jelusalẹm po nọtẹn sinsẹ̀n-bibasi tọn etọn po mẹ bo nọ yí awuvivi do pìntàn tòdaho lọ tọn. E ma yin whanpẹ tòdaho lọ tọn wẹ duahunmẹna yé hugan gba, ṣigba nuhe tòdaho lọ po nọtẹn sinsẹ̀n-bibasi tọn lọ po nọtena. Jelusalẹm wẹ ‘tòdaho Ahọlu daho lọ, Jehovah tọn,’ na nọtẹn enẹ wẹ yin ahọnkan sinsẹ̀n-bibasi wiwe-ṣeke lọ tọn. Finẹ wẹ Osẹ́n Jehovah tọn nọ yin pinplọnmẹ te. Akọta he Ahọlu Jelusalẹm tọn nọ deanana lọ wẹ Jehovah nọ do dagbewanyi etọn hia. (Hia Psalm 48:1, 2, 9, 12, 13.) Be hiẹ lọsu nọ tindo ojlo nado plọn whenuho titobasinanu he Jehovah to yiyizan to aigba ji lọ tọn, podọ nado pìntàn etọn na mẹdevo lẹ ya? Lehe hiẹ na to nususu plọn dogọ gando omẹ Jehovah tọn lẹ po lehe ewọ nọ nọgodona yé po go do sọ, mọ wẹ Ahọluduta Jiwheyẹwhe tọn na họnwun na we dogọ do niyẹn. Taidi kọdetọn de, hiẹ na nọ yin whinwhàn to jọwamọ-liho nado dọyẹwheho wẹndagbe Ahọluduta lọ tọn.—Jel. 9:24; Luku 4:43.
6. Naegbọn e do sọgbe dọ Jehovah ni biọ to mí si nado plọn osẹ́n po nunọwhinnusẹ́n Ahọluduta etọn tọn lẹ po bosọ nọ yìn yé?
6 Osẹ́n lọ lẹ yinyọnẹn. Gandudu lẹ nọ saba biọ dọ tòvi yetọn lẹ ni plọn osẹ́n otò lọ tọn lẹ bosọ nọ yìn yé. Enẹwutu, nuhe sọgbe wẹ e yin dọ Jehovah ni biọ to tòvi Ahọluduta lọ tọn lẹpo si nado plọn bosọ nọ yìn osẹ́n po nunọwhinnusẹ́n etọn lẹ po. (Isa. 2:3; Joh. 15:10; 1 Joh. 5:3) To paa mẹ, nususu wẹ nọ jẹdò to osẹ́n gbẹtọvi lẹ tọn go. Ṣigba, “osẹ́n OKLUNỌ tọn pé.” (Ps. 19:7) Be mí nọ mọ awuvivi to osẹ́n Jiwheyẹwhe tọn mẹ bo nọ hia Ohó etọn egbesọegbesọ ya? (Ps. 1:1, 2) Aliho dopo gee lọ nado yọ́n osẹ́n Jiwheyẹwhe tọn wẹ nado nọ plọn ẹn na míde. Mẹdevo depope ma sọgan wà ehe do otẹn mítọn mẹ.
TÒVI AHỌLUDUTA LỌ TỌN LẸ NỌ YIWANNA NUJINỌTEDO JIWHEYẸWHE TỌN LẸ
7. Etẹwẹ nọ whàn tòvi Ahọluduta lọ tọn lẹ nado yìn osẹ́n Jiwheyẹwhe tọn lẹ?
7 Nado sọgan to tòvi Ahọluduta lọ tọn lẹ yin zọnmii, mí dona yọ́n nujinọtedo Jiwheyẹwhe tọn lẹ bosọ yiwanna yé. Tòvi gandudu gbẹtọvi tọn susu nọ dọ dọ emi kẹalọyi osẹ́n po nujinọtedo otò he mẹ emi tin te lẹ tọn po. Etomọṣo, eyin yé mọdọ e vẹawu nado hodo nubiọtomẹsi de bọ mẹdepope ma to yé mọ, yé nọ gbàsẹ́n enẹ. “Nukundagbe gbẹtọ tọn dintọ lẹ” wẹ suhugan yetọn yin. (Kọl. 3:22) Ṣigba, e ma yinmọ na tòvi Ahọluduta lọ tọn lẹ. Mí nọ desọn ojlo mẹ nado yìn osẹ́n Jiwheyẹwhe tọn lẹ, etlẹ yin to whenue mẹdepope ma to mí pọ́n. Etẹwutu? Na mí yiwanna Osẹ́ndoaitọ lọ wutu.—Isa. 33:22; hia Luku 10:27.
8, 9. Nawẹ hiẹ sọgan yọnẹn eyin a yiwanna osẹ́n Jiwheyẹwhe tọn lẹ nugbo gbọn?
8 Nawẹ hiẹ sọgan yọnẹn eyin a yiwanna osẹ́n Jiwheyẹwhe tọn lẹ nugbo gbọn? Lẹnnupọndo lehe a nọ yinuwa do ji eyin yè na we ayinamẹ do nuhe a nọ pọnhlan taidi whẹho mẹdetiti tọn ji—di apajlẹ, nusisọ́ po aṣọ́dido po? Whẹpo a do lẹzun tòvi Ahọluduta lọ tọn, vlavo hiẹ nọ sọnú to aliho yamakinanu tọn mẹ kavi to aliho he nọ fọ́n ojlo fẹnnuwiwa tọn dote to mẹdevo lẹ mẹ. Ṣigba, dile owanyi towe na Jiwheyẹwhe to sinsinyẹn deji, a plọn nado nọ sọnú to aliho he na hẹn pipà wá na ẹn mẹ. (1 Tim. 2:9, 10; 1 Pita 3:3, 4) Hiẹ sọgan lẹndọ emi nọ nọ̀ jlẹkaji to nusisọ́ emitọn mẹ todin. Ṣigba, nawẹ hiẹ na yinuwa gbọn eyin mẹho de dọnsẹpọ we bo dọna we dọ nusisọ́ towe nọ dotukla mẹsusu to agun lọ mẹ? Be hiẹ na dín whẹjijọ, gblehomẹ kavi sinyẹnta wẹ ya? Osẹ́n dodonu tọn Ahọluduta Jiwheyẹwhe tọn wẹ yindọ tòvi etọn lẹpo ni nọ hodo apajlẹ Klisti tọn. (1 Pita 2:21) Apọsteli Paulu wlan gando apajlẹ Jesu tọn go dọmọ: “Mì gbọ dopodopo mítọn ni hẹn homẹhun kọmẹnu etọn to nuhe yọ́n na jijlọ ẹ dote mẹ. Na Klisti lọsu ma hẹn homẹhun ede.” (Lom. 15:2, 3) Nado hẹn jijọho agun lọ tọn go, Klistiani he whèwhín lẹ nọ wleawufo nado hò ayihadawhẹnamẹnu mẹdevo lẹ tọn pọ́n kakati nado gblehomẹ.—Lom. 14:19-21.
9 Mì gbọ mí ni gbadopọnna whẹho titengbe awe devo lẹ: pọndohlan mítọn gando zanhẹmẹ po alọwle po go. Mẹhe ma ko yin tòvi Ahọluduta Jiwheyẹwhe tọn lẹ sọgan nọ miọnnukundo zanhẹmẹ to mẹhe tindo vijinu dopolọ lẹ ṣẹnṣẹn, kavi lẹndọ yẹdide fẹnnuwiwa tọn pinpọn ma ylan kavi dọ ayọdide po gbẹdai po yin whẹho mẹdetiti tọn. Ṣigba, tòvi Ahọluduta lọ tọn lẹ ko gbẹ́ pọndohlan agọ̀ kavi ṣejannabi tọn enẹlẹ dai. Dile etlẹ yindọ Klistiani susu wẹ ko nọ zan gbẹzan fẹnnuwiwa tọn dai, todin yé nọ pọ́n zanhẹmẹ po alọwle po hlan taidi nunina sọn Jiwheyẹwhe dè. Yé nọ yí nukun nujọnu tọn do pọ́n nujinọtedo yiaga Jehovah tọn lẹ bo yí ahun lẹpo do kẹalọyi dọ mẹhe zindonukọn to fẹnnuwiwa zanhẹmẹ tọn mẹ lẹ ma na dugu Ahọluduta lọ tọn. (1 Kọl. 6:9-11) To ojlẹ dopolọ mẹ, yé sọ nọ flindọ ahun yin oklenọ. (Jel. 17:9) Enẹwutu, yé nọ yọ́n pinpẹn avase họnwun he nọ gọalọna yé nado hẹn nujinọtedo walọ dagbe tọn he yiaga lẹ go tọn.
TÒVI AHỌLUDUTA LỌ TỌN LẸ NỌ YỌ́N PINPẸN AVASE LẸ TỌN
10, 11. Avase he wá do gànmẹ tẹlẹ wẹ Ahọluduta Jiwheyẹwhe tọn na, podọ etẹwẹ hiẹ lẹn gando avase enẹlẹ go?
10 Gandudu gbẹtọvi tọn lẹ nọ saba na avase tòvi yetọn lẹ gando núdùdù po amasin delẹ po go. Nugbo wẹ dọ e ma yin núdùdù po amasin lẹpo po wẹ nọ yin owùnu gba. Ṣigba, eyin núdùdù kavi amasin tangan de na ze ogbẹ̀ tòvi lẹ tọn do owù mẹ, gandudu lọ sọgan na avase nado basi hihọ́na tòvi etọn lẹ. Eyin gandudu de ma wàmọ, be ewọ gboawupo to azọngban etọn mẹ. Mọdopolọ, Ahọluduta Jiwheyẹwhe tọn nọ na avase he wá do gànmẹ lẹ gando nuhe sọgan hẹn owù wá to walọyizan-liho podọ to gbigbọ-liho lẹ go. Di apajlẹ, Internet ko lẹzun nuyizan dagbe de na hodọdopọ, wepinplọn po ayidedai po. Titobasinanu Jiwheyẹwhe tọn nọ yí Internet zan nado wà nudagbe susu dotana. Etomọṣo, nọtẹn Internet tọn susu wẹ yin owùnu to walọyizan-liho podọ to gbigbọ-liho. Nọtẹn he nọ do yẹdide fẹnnuwiwa tọn hia lẹ sọgan ze dagbemẹninọ gbigbọmẹ tọn tòvi Ahọluduta lọ tọn lẹ tọn do owù sinsinyẹn mẹ. Sọn owhe susu die wẹ pipli afanumẹ nugbonọ lọ tọn to avase na mí gando nọtẹn mọnkọtọn lẹ go. Lehe mí nọ yọ́n pinpẹn avase gbigbọmẹ tọn dagbe enẹlẹ tọn do sọ!
11 To owhe agọe tọn lẹ mẹ, nọtẹn Internet tọn wunmẹ devo lẹ tin to zoji he sọgan yọ́n-na-yizan eyin yé yin yiyizan po nuyọnẹn po. Etomọṣo, nọtẹn ehelẹ he yin nọtẹn gbẹdido Internet ji tọn lẹ sọgan yin owùnu. Yé sọgan dọ̀n mí biọ gbẹdido ylankan mẹ. (1 Kọl. 15:33) Abajọ titobasinanu Jiwheyẹwhe tọn do na avase nuyọnẹn tọn lẹ gando nọtẹn enẹlẹ yiyizan go. Be hiẹ hia nudọnamẹ agọe tọn lẹpo he afanumẹ nugbonọ lọ zinjẹgbonu gando nọtẹn gbẹdido Internet ji tọn lẹ go ya? Lehe e na yin nulunu nado nọma hia nudọnamẹ enẹlẹ bo yí nọtẹn enẹlẹ zan do sọ!a Mọwiwà na taidi amasin sinsinyẹn de nùnù matin nudọnamẹ he gandego lẹ hihia jẹnukọn.
12. Naegbọn e do yin nulunu nado gbẹkọ avase lẹ go?
12 Mẹhe nọ gbẹkọ avase afanumẹ nugbonọ lọ tọn lẹ go nọ hẹn owù plá yede po mẹyiwanna yetọn lẹ po. Mẹdelẹ ko peve to yẹdide fẹnnuwiwa tọn pinpọn mẹ kavi ko doalọ to fẹnnuwiwa zanhẹmẹ tọn mẹ bo lẹn to yede mẹ dọ Jehovah ma sọgan mọ nuhe wà yé te. Lehe e yin nulunu nado lẹndọ mí sọgan whlá walọyizan mítọn do Jehovah do sọ! (Howh. 15:3; hia Heblu lẹ 4:13.) Jiwheyẹwhe jlo na gọalọna mẹhe tin to ninọmẹ enẹ mẹ lẹ, podọ e nọ yí afọzedaitọ aigba ji tọn etọn lẹ zan nado gọalọna yé. (Gal. 6:1) Etomọṣo, dile gandudu gbẹtọvi tọn lẹ sọgan yí jlọjẹ tòvi-yinyin tọn sọn mẹhe wà nuylankan delẹ si do, mọdopolọ wẹ Jehovah na yí tòvi-yinyin sọn mẹhe tùnafọ nujinọtedo etọn lẹ ji bo ma lẹnvọjọ lẹ si.b (1 Kọl. 5:11-13) Ṣigba, lẹblanunọ wẹ Jiwheyẹwhe. Enẹwutu, mẹhe lẹnvọjọ bo diọ walọyizan yetọn lẹ sọgan vọ́ teninọ dagbe de tindo to Jehovah dè bo zindonukọn taidi tòvi Ahọluduta lọ tọn lẹ. (2 Kọl. 2:5-8) Lẹblanulọkẹyi nankọ die nado sẹ̀n Ahọlu owanyinọ mọnkọtọn!
TÒVI AHỌLUDUTA LỌ TỌN LẸ NỌ YIWANNA NUPINPLỌN
13. Nawẹ tòvi Ahọluduta lọ tọn lẹ nọ dohia dọ yé yọ́n pinpẹn wepinplọn po nupinplọn po tọn gbọn?
13 Gandudu gbẹtọvi tọn susu nọ dovivẹnu nado plọn tòvi yetọn lẹ. Yé nọ ze tito dai na tòvi yetọn lẹ nido sọgan plọn wehihia po wekinkan po gọna alọnuzọ́n delẹ to wehọmẹ. Tòvi Ahọluduta lọ tọn lẹ nọ yọ́n pinpẹn wehọ enẹlẹ tọn bo nọ plọn wehihia po wekinkan po gọna azọ́n he sọgan gọalọna yé nado penukundo yede go to akuẹzinzan-liho. Etomọṣo, nuplọnmẹ he yé nọ mọyi taidi tòvi Ahọluduta Jiwheyẹwhe tọn lẹ wẹ họakuẹ na yé hugan. Jehovah nọ yí agun Klistiani tọn zan nado plọn omẹ etọn lẹ wehihia po wekinkan po. Mẹjitọ lẹ yin tulina nado nọ hiawe na ovi pẹvi yetọn lẹ. To sunmẹsunmẹ, afanumẹ nugbonọ lọ nọ zín hosọ sinai do Biblu ji susu jẹgbonu to Atọ̀họ̀-Nuhihọ́ lọ Tọn po Réveillez-vous! po mẹ. Eyin hiẹ nọ hia weda vude egbesọegbesọ, a na penugo nado zinzọnlin afọsu-afọsi hẹ titobasinanu Jiwheyẹwhe tọn.
14. (a) Azọ́nplọnmẹ tẹwẹ mí nọ mọyi? (b) Ayinamẹ do sinsẹ̀n-bibasi whẹndo tọn ji tẹlẹ wẹ hiẹ yiwanna bo ko yizan?
14 Tòvi Ahọluduta lọ tọn lẹ nọ mọ azọ́nplọnmẹ yí to opli agun tọn yetọn lẹ ji to sẹmẹsẹmẹ. Di apajlẹ, sọn owhe kandeko linlán die gbọ́n, Wehọmẹ Lizọnyizọn Yẹwhehọluduta tọn to alọgọna wehọmẹvi susu nado plọn Ohó Jiwheyẹwhe tọn mẹdevo lẹ po kọdetọn dagbe po. Be hiẹ ko ze yinkọ dai to wehọ ehe mẹ ya? To owhe agọe tọn lẹ mẹ, whlasusu wẹ afanumẹ nugbonọ lọ ko zinnudo sinsẹ̀n-bibasi whẹndo tọn gbesisọ tọn ji. Awuwledainanu ehe nọ hẹn haṣinṣan whẹndo tọn sinyẹn deji. Be hiẹ ko penugo nado yí ayinamẹ he yin zinzinjẹgbonu gandego to owe mítọn lẹ mẹ do yizan mẹ ya?c
15. Etẹwẹ yin dopo to lẹblanulọkẹyi daho hugan he mí tindo lẹ mẹ?
15 Tòvi gandudu susu tọn wẹ nọ dọhona mẹdevo lẹ gando dagbe he tonudọgbẹ́ de sọgan wà lẹ go, bo tlẹ nọ yì sọn họndekọn jẹ họndekọn nado wàmọ. Ṣigba, tòvi Ahọluduta lọ tọn lẹ nọ wà nuhe gbloada hugan mọ gbọn zohunhun yíyí do lá Ahọluduta Jiwheyẹwhe tọn dali to alihogbó lẹ ji podọ sọn họndekọn jẹ họndekọn. Na nugbo tọn, dile mí mọ to hosọ he wayi mẹ do, Atọ̀họ̀-Nuhihọ́ lọ Tọn he nọ lá Ahọluduta Jehovah tọn wẹ yin linlinnamẹwe he nọ yin mimá hugan to aigba ji to egbehe. Dopo to lẹblanulọkẹyi daho hugan he mí tindo lẹ mẹ wẹ nado lá Ahọluduta Jiwheyẹwhe tọn na mẹdevo lẹ. Be hiẹ nọ yí zohunhun do tindo mahẹ to azọ́n yẹwhehodidọ tọn lọ mẹ ya?—Mat. 28:19, 20.
16. Nawẹ a sọgan dohia dọ emi yin tòvi dagbe Ahọluduta Jiwheyẹwhe tọn gbọn?
16 To madẹnmẹ, Ahọluduta Jiwheyẹwhe tọn kẹdẹ wẹ na dugán do aigba ji. Gandudu enẹ na penukundo nuhudo he gbẹtọvi lẹ nọ tindo lẹpo go, yèdọ nuhudo gbigbọmẹ tọn po agbasa tọn yetọn lẹ po. Be hiẹ na yin tòvi dagbe de to Ahọluduta Jiwheyẹwhe tọn glọ to whenẹnu ya? Din wẹ ojlẹ lọ nado dohia dọ hiẹ na wàmọ. To nudide egbesọ tọn mítọn lẹ dopodopo mẹ, mì gbọ mí ni nọ wà onú lẹpo na gigo Jehovah tọn bo gbọnmọ dali dohia dọ mí to nuyiwa taidi tòvi dagbe Ahọluduta Jiwheyẹwhe tọn.—1 Kọl. 10:31.
[Nudọnamẹ odò tọn]
a Di apajlẹ, pọ́n Réveillez-vous! juillet 2011, weda 24-27; août 2011, weda 10-13; po février 2012, weda 3-9 po.
c Pọ́n Atọ̀họ̀-Nuhihọ́ lọ Tọn 15 août 2011, weda 6-7 po Lizọnyizọn Ahọluduta Tọn Mítọn janvier 2011, weda 3-6 po.
[Nudọnamẹ tangan lẹ to weda 14]
Be hiẹ nọ payi avase sinai do Biblu ji gando Internet yiyizan go lẹ go ya?
[Yẹdide to weda 12]
Be hiẹ nọ mọ awuvivi to sinsẹ̀n-bibasi wiwe-ṣeke po whenuho etọn po mẹ dile visunnu Kola tọn lẹ wà do ya?
[Yẹdide to weda 15]
Sinsẹ̀n-bibasi whẹndo tọn sọgan gọalọna hiẹ po mẹyiwanna towe lẹ po taun nado yin tòvi dagbe Ahọluduta lọ tọn lẹ