Dlapọn Agun-Ji-Pọntọ lẹ Tọn

“N’MA sọgan yì dọyẹwheho sọn họndekọn jẹ họndekọn!” Mẹyọyọ susu wẹ ko tindo numọtolanmẹ enẹ gando yẹwhehodidọ na mẹhe yé ma yọnẹn lẹ go. Ṣigba, hodọtọ gbangba tọn podọ Biblu plọnmẹtọ numimọnọ he yin agun-ji-pọntọ de wẹ zan hogbe enẹlẹ.

Mẹsusu he nọ hia Le Phare de la Tour de Sion bo jo ṣọṣi yetọn do lẹ wẹ jlo vẹkuvẹku nado dogbẹ́ hẹ mẹhe yiwanna nugbo Biblu tọn di yewlẹ nkọ lẹ. Linlinnamẹwe lọ na tuli wehiatọ lọ lẹ nado dín gbẹtọ mọnkọtọn lẹ mọ na yé nido nọ pli to gbesisọ mẹ nado plọn Biblu. Sọn nudi 1894, Ogbẹ́ Watch Tower jẹ afọzedaitọ tomẹyitọ lẹ dohlan ji na yé nido nọ pli hẹ pipli he biọ dlapọn lẹ. Sunnu numimọnọ, azọ́n sinsinyẹnwatọ he wá yin yiylọdọ agun-ji-pọntọ ehelẹ yin dide na yé tindo whiwhẹ, oyọnẹn Biblu tọn, nugopipe hodidọ po mẹpinplọn po tọn podọ na yé yọ́n pinpẹn ofligọ lọ tọn wutu. Azán dopo kavi awe poun wẹ dlapọn yetọn lẹ nọ saba yí, ṣigba azán lọ lẹ nọ ján taun. Oylọ-basinamẹwe hodidọ gbangba tọn agun-ji-pọntọ de tọn lẹ mimá wẹ Biblu Plọntọ susu yí do bẹ kunnudegbe jẹeji. To whenue Hugo Riemer he wá lẹzun dopo to Hagbẹ Anademẹtọ lọ mẹ fó hodidọ whèjai tọn de to wehọ de mẹ godo, e na gblọndo na kanbiọ Biblu tọn lẹ kakajẹ zánhomẹ. Nuṣikọna ẹn ganṣo lehe opli lọ yì do vivi na ẹn taun.

Atọ̀họ̀-Nuhihọ́ lọ Tọn dohia dọ “yanwle tangan” dlapọn agun-ji-pọntọ lẹ tọn wẹ nado jlọ “whédo yise tọn lọ” dote gbọn opli he nọ yin bibasi to owhé yisenọ lẹ tọn gbè lẹ dali. Biblu Plọntọ lẹdo lọ tọn lẹ nọ wá nado sè hodidọ lẹ podọ kanbiọ po gblọndo po nọ bọdego. Enẹgodo, yé nọ dùnú dopọ. To whenue Maude Abbott gbẹ́ yin yọpọvu, e dotó hodidọ afọnnu tọn de, enẹgodo mẹlẹpo sin tafo gaa de kọ̀n to kọho ji nado dùnú. E dọmọ: “Núdùdù lọ lẹ yọ́n taun bosọ sù—yèdọ hàn-lan, koklo-lan sisọ, blẹdi wunmẹwunmẹ lẹ, ablá po akla vivi lẹ po! Mímẹpo wẹ dùnú ganji, podọ to nudi ogàn awe whèmẹ tọn mẹ, mí sọ pli nado sè hodidọ devo.” Ṣigba e yidogọ dọ, “Mímẹpo wẹ to amlọngọsa” to hodidọ lọ whenu. Benjamin Barton, agun-ji-pọntọ numimọnọ de dọ to gbèdopo dọ, ‘Eyin n’na dù núdùdù dojó he nọ yin nina mi lẹpo wẹ, n’ma na dẹn to azọ́n ehe kọ̀n.’ To godo mẹ, wekanhlanmẹ de wá sọn tatọ́-tẹnnọ to Brooklyn bo na ayinamẹ mẹmẹyọnnu lẹpo he nọ hẹjó agun-ji-pọntọ lẹ tọn dọ e na pọnte nado nọ wleawuna “núdùdù kleun de egbesọegbesọ” na yé bo nọ dike yé ni “gbọjẹ ganji.”

Nado jẹ ahun todoaitọ lẹ tọn mẹ, agun-ji-pọntọ lẹ nọ saba yí yẹdide po núzinzan voovo lẹ po kavi nuhe to alọ ji depope zan nado plọnnumẹ. Di apajlẹ, hodidọ R. H. Barber tọn lẹ “nọ whànmẹ taun to gbigbọ-liho.” W. J. Thorn taidi otọ́ de na mẹmẹsunnu lẹ podọ hodidọ etọn lẹ nọ hẹnmẹ flin tọgbo hohowhenu tọn lẹ. To gbèdopo he Shield Toutjian to mọto Ford Modèle A de mẹ po mẹdevo lẹ po jei fide, e dawhá to ajiji mẹ dọmọ: “Nọte!” E jẹte sọn mọto lọ mẹ po awuyiya po bo yì kẹ́n vounvoun delẹ wá bo jẹ hodọna mẹhe to mọto lọ mẹ lẹ ji gando nudida Jehovah tọn lẹ go.

Nuhahun susu wẹ agun-ji-pọntọ lẹ—titengbe mẹhe ko to mẹho yin lẹ—pehẹ. Ṣigba, nuhahun he sinyẹn hugan na delẹ to yé mẹ wẹ diọdo he wá aimẹ gando azọ́n yetọn go. E wá yin bibiọ to yé si nado yin nukọntọ to yẹwhehodidọ sọn whédegbè jẹ whédegbè tọn mẹ. Atọ̀họ̀-Nuhihọ́ lọ Tọn 15 mars 1924 tọn dohia dọ “dopo to azọ́ndenamẹ tangan [Klistiani nugbo lẹ tọn] lẹ mẹ wẹ nado dekunnu gando ahọluduta lọ go. Yanwle enẹ wutu wẹ agun-ji-pọntọ lẹ nọ yin didohlan.”

E taidi dọ agun-ji-pọntọ delẹ jo azọ́n tomẹyiyi tọn do na homẹ yetọn ma hùn do diọdo enẹ go wutu. Delẹ to yé mẹ tlẹ yì do sinsẹ̀n yetọn titi ai. Robie D. Adkins na numimọ dọ agun-ji-pọntọ he yin hodọtọ ayidego tọn de dọ po homẹgble po dọmọ: “Yẹwhehodidọ sọn oplò ji kẹdẹ wẹ n’yọnẹn. N’ma sọgan yì dọyẹwheho sọn họndekọn jẹ họndekọn!” Mẹmẹsunnu Adkins dọmọ: “Whedevonu he n’sọ wá mọ ẹn wẹ to plidopọ he yin bibasi to 1924 to Columbus, Ohio. Nukunmẹ etọn kúṣiọ bọ e to ote edeṣo to atin pẹvi de sá po awubla po to whenue mẹmẹsunnu fọtọ́n susu he to finẹ lẹ gọ́ na ayajẹ. N’masọ wá mọ ẹn pọ́n gbede. E ma dẹn bọ e jo titobasinanu lọ do.” Ṣigba, “mẹmẹsunnu ayajẹnọ susu to yigọyigọ basi gbọn apá etọn nado bẹ owe lẹ yì mọto yetọn lẹ kọ̀n.” E họnwun dọ yé to jejeji nado dekunnu sọn whédegbè jẹ whédegbè.—Owalọ 20:20, 21.

Agun-ji-pọntọ susu dibu nado dọyẹwheho sọn whédegbè jẹ whédegbè taidi mẹmẹsunnu he yé dona plọnazọ́n yẹwhehodidọ tọn lẹ, etomọṣo yé yí zohunhun do dọyẹwheho. Maxwell G. Friend (Freschel), agun-ji-pọntọ de he nọ do Allemagne-gbè wlan gando diọdo ehe go dọmọ: “Adà azọ́n agun-ji-pọntọ tọn ehe nọ yidogọna ayajẹ gbejizọnlin lọ tọn.” Agun-ji-pọntọ John A. Bohnet na linlin dọ suhugan mẹmẹsunnu lẹ tọn wẹ yí homẹhunhun do kẹalọyi diọdo lọ gando yẹwhehodidọ Ahọluduta lọ tọn go. E sọ dohia dọ suhugan yetọn wẹ “gọ́ na zohunhun nado yin tọ́ntlọ́ngbọ́n to azọ́n lọ mẹ.”

To owhe lẹ gblamẹ, tomẹyitọ nugbonọ enẹlẹ tindo nuyiwadomẹji dagbe do mẹdevo lẹ ji. Norman Larson, Kunnudetọ numimọnọ de dọmọ: “Dile n’tlẹ yin yọpọvu to ojlẹ lọ mẹ, e họnwun na mi dọ azọ́n agun-ji-pọntọ lẹ tọn nọ hẹn ale susu wá na mẹmẹsunnu lẹ. . . . Apajlẹ yetọn gọalọna mi taun nado tẹdo nugbo lọ go.” Kakajẹ egbé, nugopọntọ tomẹyitọ nugbonọ podọ mẹdezejotọ mọnkọtọn lẹ to alọgọna yisenọ hatọ lẹ nado dọ dọ: “Mí sọgan yì dọyẹwheho sọn họndekọn jẹ họndekọn!”

[Nudọnamẹ tangan lẹ to weda 32]

Ayajẹnu wẹ dlapọn agun-ji-pọntọ lẹ tọn nọ yin!

[Yẹdide to weda 31]

Dlapọn voovo 170 wẹ Benjamin Barton basi to 1905

[Yẹdide to weda 32]

Walter J. Thorn yin agun-ji-pọntọ de he mẹmẹsunnu lẹ yiwanna taun bo nọ ylọ ẹ dọ Papa, na e nọ yinuwa taidi otó de podọ di Klisti nkọ

[Yẹdide to weda 32]

J. A. Browne yin didohlan Jamaïque taidi agun-ji-pọntọ to nudi 1902 nado hẹn pipli pẹvipẹvi 14 lodo to gbigbọ-liho bo na yé tuli

[Yẹdide to weda 32]

Azọ́n agun-ji-pọntọ lẹ tọn nọ hẹn yise mẹmẹsunnu lẹ tọn lodo, nọ yidogọna pọninọ Klistiani tọn bosọ nọ gọalọna yé nado tẹdo titobasinanu lọ go