HOSỌ HE JẸNUKỌN | BE HIẸ NA KẸALỌYI NUNINA DAHO LỌ YA?
Nunina de He Ma Pé Awe
NUHE nọ pà wekantin (crayon) bo tindo wunmẹ bato tọn de tin to alọ Jordan tọn mẹ bo taidi nuhe ma yin nujọnu sọmọ. Amọ́, dopo to nutindo họakuẹ etọn lẹ mẹ wẹ. Jordan dọmọ: “Russell, he yin họntọn mẹhomẹ whẹndo lọ tọn wẹ na mi to whenue n’to pẹvi.” To okú Russell tọn godo, Jordan wá sè dọ Russell gọalọna baba-daho po mẹjitọ Jordan tọn lẹ po bo na yé tuli to nuhahun lẹ whenu. “Todin he n’wá yọ́n nususu gando Russell go,” wẹ Jordan dọ, “nunina pẹvi ehe họakuẹ na mi hú gbede pọ́n.”
Dile numimọ Jordan tọn dohia do, nunina de sọgan nọma họakuẹ to nukun mẹdelẹ tọn mẹ. Ṣigba na mẹde he yọ́n pinpẹn etọn, e sọgan taidi nuhe akuẹ ma sọgan họ̀ de. Biblu basi zẹẹmẹ nunina he akuẹ ma sọgan họ̀ de tọn po hogbe he yin yinyọnẹn ganji ehelẹ po dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”—Johanu 3:16.
Nunina de he sọgan hẹn ogbẹ̀ madopodo wá na mẹhe mọ ẹn yí! Nunina tẹwẹ sọgan họakuẹ humọ? Mẹdelẹ sọgan nọma yọ́n pinpẹn nunina enẹ tọn, amọ́ Klistiani nugbo lẹ nọ mọdọ e họakuẹ. (Salmu lẹ 49:8; 1 Pita 1:18, 19) Naegbọn Jiwheyẹwhe ze Visunnu etọn jo taidi nunina de do ota aihọn tọn mẹ?
Apọsteli Paulu dọ ẹ po hogbe ehelẹ po: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè.” (Lomunu lẹ 5:12) Sunnu tintan, Adam, desọn ojlo mẹ bo vẹtolina Jiwheyẹwhe bo waylando, gbọnmọ dali, e jiya okú tọn. Gbọn Adam gblamẹ, okú dlẹnkan jẹ kúnkan etọn lẹpo dè—yèdọ gbẹtọvi lẹpo.
“Ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.” (Lomunu lẹ 6:23) Nado tún gbẹtọvi lẹ dote sọn okú si, Jiwheyẹwhe do Visunnu etọn, Jesu Klisti hlan aigba ji nado yí ogbẹ̀ pipé etọn do sanvọ́ do aihọn lọ tamẹ. Gbọn avọ́sinsan enẹ he yin “ofligọ” lọ gblamẹ, mẹhe do yise hia to Jesu mẹ lẹpo na mọ ogbẹ̀ madopodo.—Lomunu lẹ 3:24.
Gando dona he Jiwheyẹwhe na na sinsẹ̀n-basitọ etọn lẹpo gbọn Jesu Klisti gblamẹ go, Paulu dọmọ: “Opẹ́ wẹ na Jiwheyẹwhe na nunina vọnu mayọnjlẹ etọn.” (2 Kọlintinu lẹ 9:15) Ofligọ lọ jiawu sọmọ bọ mí ma sọgan basi zẹẹmẹ etọn to gigọ́ mẹ. Naegbọn ofligọ lọ do jẹna ayidego sọmọ to nunina họakuẹ lẹpo, ehe Jiwheyẹwhe na gbẹtọvi lẹ mẹ? Naegbọn e do gbọnvona nunina Jiwheyẹwhe tọn devo depope?a Podọ nawẹ mí sọgan yọ́n pinpẹn etọn gbọn? Mí basi oylọna we nado hia gblọndo Biblu tọn na kanbiọ ehelẹ to hosọ awe he bọdego lẹ mẹ.
a Jesu desọn ojlo mẹ bo “ze ogbẹ̀ etọn jo na míwlẹ tọn wutu.” (1 Johanu 3:16) Ṣigba, na avọ́sinsan ehe yí adà de wà to lẹndai Jiwheyẹwhe tọn mẹ wutu, hosọ debọdo-dego ehelẹ do Jiwheyẹwhe hia taidi Mẹhe wleawuna ofligọ lọ.