Jọja lẹ Emi—Mì Zindonukọn Nado “to Azọ́nwa Na Whlẹngán Mìtọn Titi”
“Kẹdẹdile mì ko nọ setonu to whepoponu do, . . . mì nọ yí obu po sisọsisọ po do to azọ́nwa na whlẹngán mìtọn titi.”—FLP. 2:12.
1. Naegbọn baptẹm do yin afọdide titengbe de? (Pọ́n yẹdide he tin to bẹjẹeji hosọ ehe tọn.)
BIBLU plọntọ fọtọ́n susu lẹ wẹ nọ yí baptẹm to whemẹwhemẹ. Susu yetọn nọ yin jọja aflanmẹ lẹ po ovi he ma ko biọ aflanmẹ lẹ po. Yé sọgan ko yin pinplọn whẹ́n to nugbo lọ mẹ. Be a yin dopo to yé mẹ wẹ ya? Eyin mọ wẹ, a jẹna pipà. Baptẹm yin nubiọtomẹsi de na Klistiani lẹ, podọ e sọ yin afọdide dandan tọn de nado mọ whlẹngán.—Mat. 28:19, 20; 1 Pita 3:21.
2. Naegbọn mí ma dona dibu nado yí baptẹm kavi dapana ẹn?
2 Dile etlẹ yindọ baptẹm sọgan hùnali dona susu lẹ tọn dote, e sọ nọ bẹ azọngban hẹn. Gbọnna? To gbeegbe a yí baptẹm, a na gblọndo mọwẹ na kanbiọ he dọmọ: “To dodonu avọ́sinsan Jesu Klisti tọn ji, be hiẹ ko lẹnvọjọ sọn ylando towe lẹ mẹ bo ko klan dewe do wiwe hlan Jehovah nado wà ojlo etọn ya?” Baptẹm towe nọ dohia dọ a ko klan dewe do wiwe. Opà vonọtaun de wẹ, he a do na Jehovah nado yiwanna ẹn bosọ ze ojlo etọn wiwà do nukọnna nudevo depope. Opà ehe sinyẹn taun. Be e dona vẹna we dọ a do opà mọnkọ wẹ ya? Lala, e ma dona yinmọ paali. Dewe zizedo alọ Jehovah tọn mẹ ma yin afọdide ylankan pọ́n gbede. Lẹnnupọndo nuhe na ko yin kọdetọn lọ ji, eyin a ko yinuwa to aliho he gbọnvo pete mẹ! Eyin mẹde ma to adà Jehovah tọn mẹ, be aṣẹpipa Satani tọn glọ wẹ e tin te. Lẹgba ma jlo paali dọ a ni mọ whlẹngán. Na nugbo tọn, homẹ etọn na hùn taun eyin a nọ adà etọn mẹ nado gbẹ́ nupojipetọ-yinyin Jehovah tọn dai bọ ogbẹ̀ madopodo lọ gbọ gowe.
3. Dona tẹlẹ wẹ dewe kinklandowiwe hlan Jehovah nọ hẹnwa?
3 To vogbingbọn mẹ na nuhe godoninọna Satani nọ hẹnwa, lẹnnupọndo dona he a tindo lẹ ji taidi Klistiani he ko basi klandowiwe bo yí baptẹm de. Todin he a ko ze gbẹzan towe do alọmẹ na Jehovah, a sọgan dọ po nujikudo po dọ: “Jehovah tin to adà ṣie mẹ; yẹn ma na dibu. Etẹwẹ gbẹtọ sọgan wà na mi?” (Salm. 118:6) A ma sọgan tindo lẹblanulọkẹyi de to gbẹzan towe mẹ he na hugan adà Jiwheyẹwhe tọn mẹ ninọ po nukundagbe etọn tintindo po.
AZỌNGBAN MẸDETITI TỌN DE
4, 5. (a) Naegbọn mí sọgan dọ dọ klandowiwe yin azọngban mẹdetiti tọn de? (b) Avùnnukundiọsọmẹnu tẹlẹ wẹ jọja po mẹho po nọ pehẹ?
4 Taidi Klistiani he ko yí baptẹm de, haṣinṣan he a tindo hẹ Jehovah ma taidi nutindo whẹndo tọn de, kavi aigba de he a sọgan dugu etọn. To vogbingbọn mẹ, hiẹ lọsu wẹ tindo azọngban lọ todin nado wazọ́n na whlẹngán towe titi, eyin a tlẹ gbẹ́ pò to aṣẹpipa mẹjitọ towe lẹ tọn glọ. Naegbọn e do yin nujọnu nado nọ flin enẹ? Na a ma sọgan yọ́n avùnnukundiọsọmẹnu he a na pehẹ to sọgodo lẹpo jẹnukọn. Di apajlẹ, eyin a yí baptẹm jẹnukọnna owhe aflanmẹ tọn, e yọnbasi dọ hiẹ na pehẹ numọtolanmẹ po kọgbidinamẹ yọyọ lẹ po dile a to jujugbọn owhe aflanmẹ tọn lẹ mẹ. Jọja yọnnu de dọ ẹ to aliho ehe mẹ dọmọ: “To paa mẹ, e ma na vẹna yọpọvu de dọ emi ma yí akla he yin mimá to wehọmẹ nado dù jijizan hagbẹ de tọn, na emi yin Kunnudetọ Jehovah tọn wutu. Amọ́ to owhe kleun de godo, whenue kọgbidinamẹ lọ nado tindo zanhẹmẹ wá jẹ sinsinyẹn ji, e na biọ dọ yè ni gọalọna ẹn nado tindo nujikudo mlẹnmlẹn dọ tonusisena osẹ́n Jehovah tọn lẹ wẹ yin nudide dagbe hugan lọ to whepoponu.”
5 Nugbo wẹ dọ e ma yin jọja lẹ kẹdẹ wẹ nọ pehẹ avùnnukundiọsọmẹnu yọyọ lẹ. Etlẹ yin mẹhe ko yin mẹho bo yí baptẹm lẹ lọsu nọ pehẹ whlepọn yise tọn madonukun lẹ. Whlepọn enẹlẹ sọgan gando alọwle, whẹho agbasalilo tọn, kavi agbasazọ́n go. Na taun tọn, mahopọnna owhe mítọn, mímẹpo wẹ na pehẹ ninọmẹ delẹ he mẹ e na biọ te dọ mí ni yin nugbonọ na Jehovah.—Jak. 1:12-14.
6. (a) Nawẹ klandowiwe mítọn yin opà de he mí do nado sẹ̀n Jehovah mahopọnna nudepope he na to jijọ gbọn? (b) Etẹwẹ mí sọgan plọn sọn Filipinu lẹ 4:11-13 mẹ?
6 Nuhe na gọalọna we nado yin nugbonọ to ninọmẹ lẹpo mẹ wẹ ma nado wọn gbede dọ a ko dopà na Jehovah nado sẹ̀n ewọ mahopọnna nudepope he na to jijọ. Enẹ zẹẹmẹdo dọ a ko dọna Nupojipetọ wẹkẹ lọ tọn dọ emi na zindonukọn nado to ewọ sẹ̀n, eyin họntọn kavi mẹjitọ emitọn lẹ tlẹ doalọtena mọwiwà. (Salm. 27:10) To ninọmẹ depope mẹ, hiẹ sọgan tindo huhlọn—po alọgọ Jehovah tọn po—nado nọgbẹ̀ sọgbe hẹ klandowiwe towe.—Hia Filipinu lẹ 4:11-13.
7. Etẹwẹ e zẹẹmẹdo nado “yí obu po sisọsisọ po” do wazọ́n na whlẹngán towe titi?
7 Jehovah jlo dọ a ni yin họntọn emitọn. Ṣigba, e nọ biọ vivẹnudido nado hẹn haṣinṣan enẹ go bosọ to azọ́nwa na whlẹngán towe titi. Na nugbo tọn, Filipinu lẹ 2:12 dọmọ: “Mì nọ yí obu po sisọsisọ po do to azọ́nwa na whlẹngán mìtọn titi.” Hogbe enẹlẹ dohia dọ a dona lẹnnupọndo lehe a na hẹn haṣinṣan towe hẹ Jehovah go bo nasọ to nugbonọ yin na ẹn zọnmii mahopọnna avùnnukundiọsọmẹnu depope do ji. Hiẹ ma dona nọ dejido dewe go zẹjlẹgo. Devizọnwatọ Jehovah tọn ojlẹ dindẹn tọn delẹ tlẹ ko danbú sọn ali nugbo tọn lọ ji. Enẹwutu, afọdide tẹlẹ wẹ e sọgan biọ dọ a ni ze nado wazọ́n na whlẹngán towe titi?
BIBLU PINPLỌN YIN NUJỌNU
8. Etẹwẹ oplọn mẹdetiti tọn bibasi nọ biọ, podọ naegbọn e do yin nujọnu?
8 Họntọnjiji hẹ Jehovah yin haṣinṣan de he nọ bẹ hodọdopọ adà awenọ de hẹn, enẹ wẹ todidoai po hodidọ po. Biblu pinplọn mẹdetiti tọn wẹ yin aliho tintan he mẹ mí nọ dotoaina Jehovah te. Enẹ nọ biọ dọ yè ni nọ to Ohó Jiwheyẹwhe tọn po owe sinai do Biblu ji lẹ po plọn zọnmii, bosọ nọ lẹnayihamẹpọn do yé ji. Dile hiẹ to mọwà, nọ flindọ Biblu pinplọn ma taidi nupinplọn wehọmẹ tọn de poun. E ma dona taidi dọ a to nuplọn do tamẹ nado yì tẹnpọn wehọmẹ tọn de gba. Kakatimọ, nupinplọn he nọ hẹn ale wá nọ taidi gbejizọnlin dodinnanu tọn de he whenu a sọgan gbadopọnna jẹhẹnu Jehovah tọn lẹ te bosọ mọ onú yọyọ lẹ plọn sọn yé mẹ. Ehe na gọalọna we nado dọnsẹpọ Jiwheyẹwhe, podọ ewọ lọsu na dọnsẹpọ we.—Jak. 4:8.
Be a nọ tindo hodọdopọ dagbe de hẹ Jehovah ya? (Pọ́n hukan 8-11tọ)
9. Azọ́nwanu tẹlẹ wẹ ko gọalọna we to oplọn mẹdetiti tọn towe whenu?
9 Titobasinanu Jehovah tọn ko hẹn azọ́nwanu susu lẹ tin-to-aimẹ nado gọalọna we na a nido wleawuna tito nupinplọn tọn dagbe de. Di apajlẹ, “Nuplọnmẹwe Biblu Pinplọn Tọn lẹ” he tin to adà lọ “Jọja lẹ” glọ to jw.org ji sọgan gọalọna we nado mọ nuplọnmẹ yọ́n-na-yizan lẹ yí sọn nujijọ Biblu tọn lẹ mẹ. Humọ to jw.org ji, anademẹwe nupinplọn tọn lẹ he sinai do owe lọ “Etẹwẹ Biblu Plọn Mí Taun?” ji sọgan gọalọna we nado wleawuna nujikudo gando nuyise towe lẹ go. Anademẹwe nupinplọn tọn enẹlẹ sọgan gọalọna we nado plọn lehe a na nọ basi zẹẹmẹ nuyise towe lẹ tọn na mẹdevo lẹ do. Ayinamẹ devo lẹ gando nupinplọn go sọ tin to hosọ lọ “Les jeunes s’interrogent . . . Comment trouver du plaisir à lire la Bible?” (Kanbiọ He Jọja lẹ Nọ Kanse . . . Nawẹ N’Sọgan Hẹn Biblu Hihia Yin Awuvivinu Gbọn?) mẹ to Réveillez-vous! avril 2009 tọn mẹ. Nupinplọn po ayihamẹlinlẹnpọn po yin nujọnu taun, eyin a jlo na wazọ́n na whlẹngán towe titi.—Hia Salmu lẹ 119:105.
DẸ̀HIHO YIN NUJỌNU
10. Naegbọn dẹ̀hiho do yin onú titengbe na Klistiani de he ko yí baptẹm?
10 To whenuena e yindọ oplọn mẹdetiti tọn yin aliho dopo nado nọ dotoaina Jehovah, dẹ̀hiho yin aliho de nado nọ dọhona ẹn. Klistiani de ma dona nọ pọ́n dẹ̀hiho hlan taidi nuwiwa mọmọ tọn de, kavi taidi bogbèsisa tadagbe bibiọ tọn de nado tindo kọdetọn dagbe gba. Kakatimọ, dẹ̀hiho yin hodọdopọ nujọnu tọn de hẹ Mẹdatọ mítọn. Jehovah nọ jlo nado dotoaina we. (Hia Filipinu lẹ 4:6.) To whenue a to pipehẹ magbọjẹ wunmẹ depope, ayinamẹ nuyọnẹn tọn he Biblu na wẹ nado “ze agbàn pinpẹn towe dlan Jehovah ji.” (Salm. 55:22) Be hiẹ deji dọ ayinamẹ ehe na gọalọna we nugbonugbo ya? Mẹmẹsunnu po mẹmẹyọnnu livi susu lẹ po wẹ tin he sọgan hẹn we kudeji dọ mọwiwà ko gọalọna yé. Enẹ sọgan gọalọna hiẹ lọsu ga!
11. Naegbọn mí dona nọ dopẹna Jehovah to whelẹponu?
11 Dẹ̀hiho nọ hùn dotẹnmẹ dote na we nado wà nususu hugan alọgọ Jiwheyẹwhe tọn bibiọ poun. Biblu dọmọ: ‘Mì ni nọ dopẹ́.’ (Kol. 3:15) To whedelẹnu, nuhahun mítọn lẹ sọgan nọ duahunmẹna mí sọmọ bọ mí na nọ miọnnukundo dona susu he mí tindo lẹ. Naegbọn hiẹ ma na magbe dọ to azán dopodopo ji, emi na nọ lẹnnupọndo e whè gbau onú atọ̀n ji, ehe go a sọgan dopẹ́ gando? Enẹgodo, dopẹna Jehovah to odẹ̀ mẹ gando dona enẹlẹ go. Jọja de he nọ yin Abigail bo yí baptẹm to whenue e tindo owhe 12 dọmọ: “N’mọdọ Jehovah wẹ jẹna opẹ́ mítọn lẹ hú mẹdevo depope to gbẹ̀mẹ. Mí dona nọ yí dotẹnmẹ hundote lẹpo zan nado nọ dopẹna nuhe ewọ ko na mí lẹ. N’sè nuflinmẹ dagbe de wayi dọmọ: Eyin nuhe go mí dopẹna Jehovah gando to egbé lẹ kẹdẹ wẹ gbẹ́ nọ pò to ayiha mẹ na mí to wunkẹngbe, ale tẹwẹ demẹ na mí?”a
ALE HE NUMIMỌ MẸDETITI TỌN NỌ HẸNWA LẸ
12, 13. Naegbọn e do yin nujọnu nado nọ lẹnnupọndo lehe a ko dọ́ dagbewà Jehovah tọn pọ́n na dewe do ji?
12 Ahọlu Davidi hohowhenu tọn he yin whinwhlẹn sọn whlepọn sinsinyẹn susu mẹ yí hogbe ehelẹ zan to ohàn de mẹ dọmọ: “Mì dọ́pọ́n bo mọdọ Jehovah yọ́n; ayajẹnọ wẹ mẹlọ he nọ dín fibẹtado to ewọ mẹ.” (Salm. 34:8) Wefọ enẹ zinnudeji dọ nujọnu wẹ e yin nado tindo numimọ mẹdetiti tọn. To whenue a to Biblu po owe mítọn lẹ po hia, podọ to whenue a yì opli Klistiani tọn lẹ, a na sè numimọ tulinamẹ tọn lẹ gando lehe Jiwheyẹwhe ko gọalọna mẹdevo lẹ nado yin nugbonọ do go. Ṣigba, dile a to whinwhẹ́n to gbigbọ-liho, e na biọ dọ a ni nọ mọ alọ Jehovah tọn to gbẹzan towe titi mẹ. Be hiẹ lọsu ko dọ́ dagbewà Jehovah tọn pọ́n na dewe ya?
13 Aliho dopo tin he mẹ Klistiani lẹpo ko dọ́ dagbewà Jehovah tọn pọ́n te. Enẹ wẹ oylọ-basinamẹ he mí mọyi nado dọnsẹpọ Jiwheyẹwhe po Visunnu etọn po. Jesu dọmọ: “Mẹdepope ma sọgan wá dè e adavo Otọ́ he do mi hlan dọ̀n ẹn.” (Joh. 6:44) Be a nọ mọdọ hogbe enẹlẹ gando emi go ya? Jọja de sọgan nọ lẹndọ, ‘Mẹjitọ ṣie lẹ wẹ Jehovah dọ̀n bọ yẹn hodo yé poun.’ Ṣigba to whenue a klan dewe do wiwe na Jehovah bo yí baptẹm, a dohia dọ emi ko biọ haṣinṣan vonọtaun de mẹ hẹ ewọ. Todin, ewọ ko yọ́n we nugbonugbo. Biblu na mí jide dọmọ: “Eyin mẹde yiwanna Jiwheyẹwhe, omẹ ehe wẹ ewọ yọnẹn.” (1 Kọl. 8:3) Nọ tẹnpọn nado wlebòna otẹn towe to titobasinanu Jehovah tọn mẹ, bosọ nọ yọ́n pinpẹn etọn.
14, 15. Nawẹ lizọnyizọn lọ sọgan gọalọna we nado hẹn yise towe lodo gbọn?
14 Aliho devo he mẹ a sọgan dọ́ dagbewà Jehovah tọn pọ́n te wẹ nado mọ godonọnamẹ etọn dile a to nuyise towe lẹ má hẹ mẹdevo lẹ. A sọgan wàmọ to lizọnyizọn lọ mẹ, podọ etlẹ yin to wehọmẹ. E nọ vẹawuna mẹdelẹ nado dekunnuna hagbẹ yetọn lẹ to wehọmẹ. Mí sọgan mọnukunnujẹ ninọmẹ yetọn mẹ. Yè ma nọ yọ́n lehe hagbẹ lẹ na yinuwa do. E sọgan vẹawu taun nado dọhona gbẹtọgun daho de hugan nado dọhona wehọmẹvigbẹ́ dopodopo. Etẹwẹ sọgan gọalọna we?
15 Jẹnukọn whẹ́, lẹnnupọndo nuhewutu a do kudo nuyise towe lẹ ji? Be anademẹwe nupinplọn tọn lọ lẹ tin to jw.org ji to ogbè towe mẹ ya? Eyin a do ayihaawe, bo de whenu dovo nado yì dín yé. Yé yin awuwlena nado gọalọna we nado lẹnnupọndo nuhe a yise, nuhewutu a do yí enẹ sè po lehe a sọgan basi zẹẹmẹ nuyise towe lẹ tọn na mẹdevo lẹ do po ji. Eyin nujikudo towe lodo bọ a sọ wleawu ganji, a na yin whinwhàn nado dekunnu gando oyín Jehovah tọn go.—Jel. 20:8, 9.
16. Etẹwẹ sọgan gọalọna we nado duto awuwhiwhle nado dọhona mẹdevo lẹ gando nuyise towe lẹ go ji?
16 Ṣigba, eyin a tlẹ wleawufo, a sọgan gbẹ́ whleawu nado dọho gando nuyise towe lẹ go. Mẹmẹyọnnu de he tindo owhe 18 bo yí baptẹm to whenue e tindo owhe 13 yigbe dọmọ: “N’yọ́n nuyise ṣie lẹ ganji, amọ́ to whedelẹnu e nọ vẹawuna mi nado dọ linlẹn ṣie lẹ tọ́n.” Nawẹ ewọ duto aliglọnnamẹnu ehe ji gbọn? E dọmọ: “N’nọ tẹnpọn nado voawu. Klasigbẹ́ ṣie lẹ ma nọ whleawu nado dọho gando nuhe yé nọ wà lẹ go. Yẹnlọsu dona voawu nado wà nudopolọ. Enẹwutu, dile mí to hodọ, n’sọgan dọ nude taidi, ‘N’tlẹ to Biblu plọn hẹ mẹde to gbetẹgbe die bọ . . .’ Enẹgodo, n’nọ zindonukọn po nuhe dọ n’te dai po. Dile etlẹ yindọ nuhe ji mí to hodọdo lọ ma tindo kanṣiṣa de hẹ Biblu, hodidọ ṣie nọ saba fọ́n tlintlindo dindin yetọn dote gando nuhe n’nọ wà to whenue n’to Biblu plọn hẹ mẹlẹ go. To whedelẹnu, yé nọ kàn kanbiọ lẹ sè gandego. Dile n’to aliho ehe yizan sọ, mọ wẹ n’nọ voawu dogọ do niyẹn. Podọ to whedepopenu he n’wàmọ, homẹ ṣie nọ hùn taun!”
17. Nawẹ nukun he a nọ yí do pọ́n nuyise towe lẹ sọgan gọalọna we nado dọhona mẹdevo lẹ gbọn?
17 Eyin a nọ do sisi hia mẹdevo lẹ bọ onú yetọn sọ nọ duahunmẹna we, e yọnbasi taun dọ yelọsu na nọ yinuwa hẹ we to aliho dopolọ mẹ. “N’nọ dibu to whelẹponu dọ gbẹtọ lẹ na pọ́n mi di hẹngogonọ eyin n’donù Biblu go to hodọdopọ de mẹ.” Nuhe Olivia he tindo owhe 17 bo yí baptẹm to whenue e ma ko biọ owhe aflanmẹ tọn mẹ dọ niyẹn. Amọ́ to nukọn mẹ, pọndohlan etọn wá diọ. Kakati nado ze ayiha do nuhe nọ dobuna ẹn lẹ ji zẹjlẹgo, Olivia dọmọ: “Jọja susu lẹ wẹ ma yọ́n nudepope gando Kunnudetọ Jehovah tọn lẹ go. Míwlẹ ṣo wẹ yin Kunnudetọ he yé jẹakọ hẹ. Enẹwutu, aliho he mẹ mí nọ yinuwa te wẹ na zọ́n bọ yé na kẹalọyi owẹ̀n lọ kavi lala. Bọ etẹwẹ lo eyin mí nọ kuwinyan, nọ whleawu, kavi dọ e nọ vẹawuna mí nado dọhona yé gando nuyise mítọn lẹ go, kavi nọ to sisọsisọ to whenue mí to hodọna yé? To whenẹnu, yé sọgan nọ mọdọ homẹ ma nọ hùn mí do nuhe mí yin go. Yé tlẹ sọgan nọma jọmẹ hẹ mí, na mílọsu ma kudo nuhe dọ mí te ji wutu. Ṣigba, eyin mí nọ yí awuvivo po jidide po do dọho gando nuyise mítọn lẹ go, bosọ nọ dọho to jọwamọ-liho, e yọnbasi taun dọ yé na nọ na mí sisi.”
ZINDONUKỌN NADO TO AZỌ́NWA NA WHLẸNGÁN TOWE TITI
18. Etẹwẹ azọ́nwiwa na whlẹngán towe titi bẹhẹn?
18 Dile mí ko mọ do, azọngban sinsinyẹn de wẹ e yin nado wazọ́n na whlẹngán mítọn titi. Delẹ to nuhe e bẹhẹn lẹ mẹ wẹ Ohó Jiwheyẹwhe tọn hihia po ayihamẹlinlẹnpọn deji po, dẹ̀hiho hlan Jehovah, podọ nulinlẹnpọn do aliho voovo he mẹ Jehovah ko dona we te lẹ ji. Vivẹnudido to adà enẹlẹ mẹ na hẹn we kudeji dogọ dọ lẹblanulọkẹyi de wẹ e yin na we nado yin họntọn Jehovah tọn. Podọ, enẹ na nọ whàn we nado nọ dọho gando nuyise towe lẹ go.—Hia Salmu lẹ 73:28.
19. Naegbọn vivẹnu he do a te na whlẹngán towe titi wutu lẹ ma na yin to ovọ́ mẹ?
19 Jesu dọmọ: “Eyin mẹdepope jlo nado hodo mi, mì gbọ e ni mọ́n ede bo ze yatin etọn bosọ to hihodo mi zọnmii.” (Mat. 16:24) Na nugbo tọn, nado yin devi Klisti tọn de, dandannu wẹ e yin nado basi klandowiwe bo yí baptẹm. Amọ́, e nọ hùnali dona susu tọn dote na we todin, podọ ogbẹ̀ madopodo to aihọn yọyọ Jiwheyẹwhe tọn mẹ. Enẹwutu, a tindo whẹwhinwhẹ́n lẹpo nado zindonukọn nado to azọ́nwa na whlẹngán towe titi!
a Na nudọnamẹ dogọ, pọ́n “Kanbiọ He Jọja lẹ Nọ Kanse—Naegbọn N’Dona Nọ Hodẹ̀?” po azọ́nwema he zọnpọ hẹ ẹ to jw.org ji po.