Yẹwhegán lẹ Plọn Mí Mẹhe Jiwheyẹwhe Yin
To dai, yẹwhegán lẹ wẹ Jiwheyẹwhe nọ dohlan nado dowẹn vivẹ́ gbẹtọ lẹ. Be mí gán plọnnu sọn owẹ̀n yetọn lẹ mẹ nado mọ dona Jiwheyẹwhe tọn yí ya? Mọwẹ. Enẹwutu, gbọ mí ni dọhodo yẹwhegán atọ̀n delẹ he setonuna Jiwheyẹwhe ji.
ABLAHAM
Jiwheyẹwhe nọ dọ gbẹtọvi lẹpo tọn bo jlo na dona yé.
Jiwheyẹwhe dọna yẹwhegán etọn Ablaham dọ “matin ayihaawe, whẹndo aigba ji tọn lẹpo na yin didona gbọn hiẹ gblamẹ.”—Jenẹsisi 12:3.
Etẹwẹ enẹ plọn mí? Jiwheyẹwhe yiwanna mí taun bo jlo na dona mímẹpo, sunnu, yọnnu po yọpọ lẹ po, eyin mí setonu.
MOSE
Jiwheyẹwhe yin lẹblanunọ bo nọ dona mẹhe jlo na yin họntọn etọn lẹ.
Ganhunupotọ lọ na aṣẹ yẹwhegán etọn Mose nado nọ wà azọ́njiawu. Ganṣo, Mose hodẹ̀ dọ: “Hẹn mi yọ́n ali towe lẹ, na yẹn nido yọ́n we bo zindonukọn nado to nukundagbe towe mọyi.” (Eksọdusi 33:13) Homẹ Jiwheyẹwhe tọn hùn do Mose go bọ e sè odẹ̀ etọn bo gọalọna ẹn nado yọ́n ali Etọn lẹ. Di apajlẹ, Mose wá mọnukunnujẹemẹ dọ Mẹdatọ lọ yin “Jiwheyẹwhe lẹblanunọ podọ awuvẹmẹtọ.”—Eksọdusi 34:6, 7.
Etẹwẹ enẹ plọn mí? Jiwheyẹwhe na dona mímẹpo, vlavo mí yin sunnu, yọnnu kavi yọpọ, eyin mí nọ wà nuhe jẹ lẹ nado vẹ́ po e po. To Owe-wiwe mẹ, e dọ lehe mí dona sẹ̀n ẹn do bosọ dohia dọ emi to jejeji nado dona mí.
JESU
Lẹblanu sisẹ́ Jesu nado gbọ azọ̀n lẹpo
Jiwheyẹwhe gán na mí ogbẹ̀ mavọmavọ eyin mí plọnnu sọn nuhe Jesu wà po nuhe e dọ lẹ po mẹ.
Owe-wiwe dọho susu gando nuhe Jesu wà po nuhe e plọnmẹ lẹ po go. Na Jiwheyẹwhe na aṣẹ Jesu nado wà azọ́njiawu wutu, e gbọazọ̀nna nukuntọ́nnọ, tókunọ po sẹkunọ lẹ po. E tlẹ fọ́n oṣiọ lẹ. Gbọnmọ dali, Jesu do nudagbe voovo he Jiwheyẹwhe na wà na gbẹtọ lẹ to nukọn mẹ hia. E sọ dọ nuhe mí dona wà nado mọ dona enẹlẹ to whenue e dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.
Jesu jọmẹ bọ onú mẹlẹ tọn nọ biọlanmẹna ẹn. E dọmọ: “Mì . . . plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na mìde,” podọ sunnu, yọnnu, yọpọ po mẹho po wẹ nọ voawu bo nọ dọnsẹpọ ẹ. (Matiu 11:29) To ojlẹ lọ mẹ, mẹsusu wẹ nọ tafu yọnnu lẹ, amọ́ Jesu nọ yí sisi po yẹyi po do yinuwa hẹ yé.
Etẹwẹ enẹ plọn mí? Jesu yiwanna gbẹtọvi lẹ taun, bo dohia dọ mí dona nọ yinuwa hẹ mínọzo dile emi wà do.
JESU MA YIN JIWHEYẸWHE
Owe-wiwe lẹ plọn mí dọ “Jiwheyẹwhe dopo wẹ tin” podọ yẹwhegán Jiwheyẹwhe tọn wẹ Jesu Klisti yin. (1 Kọlintinu lẹ 8:6) Jesu dohia hezeheze dọ Jiwheyẹwhe hugan emi, podọ ewọ wẹ do emi hlan aigba ji.—Johanu 11:41, 42; 14:28.a