Ahọlu Agbàwhlẹntọ lẹ to Ojlẹ Opodo Tọn Mẹ
Delẹ to dọdai he to apotin ehe mẹ lẹ mẹ bẹ nujijọ he wá aimẹ to ojlẹ dopolọ mẹ lẹ hẹn. Yé dohia to aliho voovo lẹ mẹ dọ mí to gbẹnọ to “ojlẹ opodo tọn” mẹ.—Dan. 12:4.
Wefọ lẹ Osọ. 11:7; 12:13, 17; 13:1-8, 12
Dọdai “Gbekanlin” lọ to dindanpe gbọn aigba ji na owhe kanweko susu lẹ. To ojlẹ opodo tọn lọ mẹ, ota etọn ṣinawetọ yin awugblena. To godo mẹ, ota enẹ jẹgangan, podọ “aigba pete” hodo gbekanlin lọ. Satani to gbekanlin enẹ yizan nado “funawhàn hẹ kúnkan yọnnu lọ tọn he pò.”
Hẹndi To Singigọ lọ godo, gandudu gbẹtọvi lẹ tọn de fọndote he jẹagọdo Jehovah. To owhe kanweko lẹ godo, to Wẹkẹ-Whàn I whenu, huhlọn he Ahọluigba Grande-Bretagne tọn tindo depò to aliho sinsinyẹn mẹ. E gọ̀ huhlọn mọyi to whenue États-Unis wá kọnawudopọ hẹ ẹ. Titengbe to ojlẹ opodo tọn lọ mẹ, Satani to tito tonudidọ tọn aihọn etọn tọn lẹpo yizan nado dohomẹkẹn omẹ Jiwheyẹwhe tọn lẹ.
Wefọ lẹ Dan. 11:25-45
Dọdai Agbàwhinwhlẹn to ahọlu agewaji tọn po ahọlu hùwaji tọn po ṣẹnṣẹn to ojlẹ opodo tọn mẹ.
Hẹndi Gandudu Allemagne tọn po Anglo-Amérique tọn po whlẹnagbà. To 1945, Union soviétique po otò he hopódona ẹn lẹ po lẹzun ahọlu agewaji tọn lọ. To 1991, Union soviétique jai, podọ to nukọn mẹ Russie po otò he hopódona ẹn lẹ po jẹ otẹn ahọlu agewaji tọn lọ tọn mẹ.
Wefọ lẹ Isa. 61:1; Mal. 3:1; Luku 4:18
Dọdai Jehovah do “wẹnsagun” etọn hlan nado “jla aliho de do” jẹnukọnna didoai Ahọluduta Mẹsia lọ tọn. Pipli ehe jẹ “wẹndagbe [lá] na homẹmimiọnnọ lẹ” ji.
Hẹndi Bẹsọn owhe 1870 lẹ gblamẹ, C. T. Russell po gbẹdohẹmẹtọ etọn lẹ po yí zohunhun do wazọ́n nado basi zẹẹmẹ nugbo Biblu tọn lẹ tọn. To owhe 1880 lẹ gblamẹ, yé jẹ nùzindeji ji dọ devizọnwatọ Jiwheyẹwhe tọn lẹ dona nọ dọyẹwheho. Yé zín hosọ delẹ jẹgbonu taidi “Nuhudo Yẹwhehodọtọ 1 000 Tọn Tin” gọna hosọ lọ “Yin Amisisadode Nado Dọyẹwheho.”
Wefọ lẹ Mat. 13:24-30, 36-43
Dọdai Kẹntọ de do ogbé ylankan lẹ do likun he to ogle de mẹ lẹ ṣẹnṣẹn, podọ ogbé ylankan lọ lẹ yin jijodo nado whẹ́n bo ṣinyọnyẹ likun lọ lẹ ji kakajẹ jibẹwawhé whenu; enẹgodo ogbé ylankan lọ lẹ wá yin didedovo na likun lẹ.
Hẹndi Bẹsọn vivọnu owhe 1800 lẹ tọn, Klistiani nugbo lẹ jẹ yinyin yinyọnẹn dovo ji na Klistiani lalo lẹ. To ojlẹ opodo tọn lọ gblamẹ, Klistiani nugbo lẹ yin bibẹpli bo yin didedovo na Klistiani lalo lẹ.
Wefọ lẹ Dan. 2:31-33, 41-43
Dọdai Afọ gànyuu po okò po tọn lọ yin afọ boṣiọ he yin bibasi po ogàn wunmẹ voovo lẹ po de tọn.
Hẹndi Okò lọ nọtena gbẹtọ paa lẹ he nọ tindo nuyiwadomẹji sinsinyẹn do Huhlọn Aihọn Tọn He Yin Anglo-Amérique ji. Yewlẹ wẹ nọ dekanpona nugopipe he gandudu ehe tindo nado nọ yinuwa po huhlọn gànyuu tọn de po.
Wefọ lẹ Mat. 13:30; 24:14, 45; 28:19, 20
Dọdai “Likun lẹ” yin bibẹpli do “agbànhọ” mẹ, bọ “afanumẹ nugbonọ podọ nuyọnẹntọ lọ” yin dide do “devizọnwatọ whégbè tọn” lẹ ji. Yẹwheho “wẹndagbe Ahọluduta lọ tọn” jẹ yinyin didọ ji to “aigba fininọ lẹpo” ji.
Hẹndi To 1919, afanumẹ nugbonọ lọ yin dide do omẹ Jiwheyẹwhe tọn lẹ ji. Bẹsọn ojlẹ enẹ mẹ, Biblu Plọntọ lẹ zindonukọn to azọ́n yẹwhehodidọ tọn yetọn mẹ dogọ. To egbehe, Kunnudetọ Jehovah tọn lẹ to yẹwhehodọ to otò 200 linlán mẹ, bo nọ zín owe sinai do Biblu ji lẹ jẹgbonu to ogbè 1 000 linlán mẹ.
Wefọ lẹ Dan. 12:11; Osọ. 13:11, 14, 15
Dọdai Gbekanlin azò awenọ de yin nukọntọ to awuwiwlena “boṣiọ de hlan gbekanlin” lọ mẹ, bosọ na “gbọfufu boṣiọ lọ.”
Hẹndi Huhlọn Aihọn Tọn He Yin Anglo-Amérique yin nukọntọ to Alẹnu Akọta lẹ tọn didoai mẹ. Akọta devo lẹ nọgodona titobasinanu ehe. To nukọn mẹ, ahọlu agewaji tọn lọsu biọ Alẹnu lọ mẹ ga—amọ́ sọn 1926 jẹ 1933 poun wẹ. Taidi Plidopọ Akọta lẹ tọn (ONU) he wá jẹ otẹn etọn mẹ, Alẹnu Akọta lẹ tọn lọ nọ mọ gigo he Ahọluduta Jiwheyẹwhe tọn jẹna yí.
Wefọ lẹ Dan. 8:23, 24
Dọdai Ahọlu he awusọhia etọn dobu de hẹn “husudo wá to aliho he jiawu de mẹ.”
Hẹndi Huhlọn Aihọn Tọn He Yin Anglo-Amérique ko hẹn husudo daho wá. Di apajlẹ, to Wẹkẹ-Whàn II whenu, États-Unis hẹn husudo sinsinyẹn he nkọ ma ko jọ pọ́n de wá to whenue e dà bọmbu nuzanusẹvaun tọn awe do akọta he yin kẹntọ Anglo-Amérique tọn de ji.
Wefọ lẹ Dan. 11:31; Osọ. 17:3, 7-11
Dọdai Gbekanlin “vẹẹ ṣẹ́ṣẹ́” he do azò ao lọ tọ́njẹgbonu sọn odò mapote lọ mẹ, podọ ewọ yin ahọlu ṣinatọ̀ntọ de. Owe Daniẹli tọn dlẹnalọdo ahọlu ehe taidi “awuhiọnu he nọ hẹn vọjijẹ wá lọ.”
Hẹndi Alẹnu Akọta lẹ tọn doalọtena azọ́nwiwa to Wẹkẹ-Whàn II whenu. To awhàn lọ godo, Plidopọ Akọta lẹ tọn (ONU) yin ‘zizedai.’ Dile e yindo na Alẹnu Akọta lẹ tọn he jẹnukọnna ẹn, ONU lọsu nọ mọ gigo he Ahọluduta Jiwheyẹwhe tọn jẹna yí. ONU na yangbé sinsẹ̀n lẹ tọn.
Wefọ lẹ 1 Tẹs. 5:3; Osọ. 17:16
Dọdai Akọta lẹ to nulila “jijọho po hihọ́ po” tọn basi, podọ “azò ao” lẹ po “gbekanlin lọ” po yangbé “galọtọ lọ” tọn bo và ẹ sudo. Enẹgodo, akọta lẹ yin vivasudo.
Hẹndi Akọta lẹ sọgan sọalọakọ́n dọ emi ko hẹn jijọho po hihọ́ po wá aimẹ. Enẹgodo, akọta he nọgodona ONU lẹ na và titobasinanu sinsẹ̀n lalo tọn lẹ sudo. Ehe na dohiagona bẹjẹeji nukunbibia daho lọ tọn. Nukunbibia enẹ na wá vivọnu to whenue aihọn ehe na yin vivasudo to Amagẹdọni whenu.
Wefọ lẹ Ezek. 38:11, 14-17; Mat. 24:31
Dọdai Gọgi tọ́nawhàn aigba omẹ Jiwheyẹwhe tọn lẹ tọn. Enẹgodo, angẹli lẹ bẹ “mẹdide” lẹ pli.
Hẹndi Ahọlu agewaji tọn lọ, to kọndopọ mẹ hẹ gandudu aihọn tọn he pò lẹ, tọ́nawhàn omẹ Jiwheyẹwhe tọn lẹ. Ojlẹ vude to bẹjẹeji mẹgbeyinyan enẹ tọn godo, pipotọ mẹyiamisisadode lẹ tọn yin bibẹpli do olọn mẹ.
Wefọ lẹ Ezek. 38:18-23; Dan. 2:34, 35, 44, 45; Osọ. 6:2; 16:14, 16; 17:14; 19:20
Dọdai “Mẹhe sinai” to “osọ́ wewe” de ji lọ dotana “awhàngbigba etọn” gbọn Gọgi po awhànpa etọn po vivasudo dali. “Gbekanlin lọ” yin “dindọn dlan . . . do agbàdo miyọ́n tọn” lọ mẹ, bọ boṣiọ blibata lọ yin gbigbà hányán.
Hẹndi Jesu, yèdọ Ahọlu Ahọluduta Jiwheyẹwhe tọn he to gandu lọ na whlẹn omẹ Jiwheyẹwhe tọn lẹ gán. To pọmẹ hẹ gandutọgbẹ́ etọn 144 000 lẹ, gọna awhànpa etọn he bẹ angẹli lẹ hẹn, ewọ na và akọta lẹpo he to nukundiọsọ omẹ Jiwheyẹwhe tọn lẹ sudo. Enẹ wẹ na hẹn aihọn Satani tọn wá opodo.