Nuhahun Apọ̀nmẹ Tọn Gbayipe
“N’nọ do magbọjẹ to whelẹponu, eyin yẹnṣo tlẹ to aisinsin to ohọ̀ de mẹ.”
“Whenue n’mọdọ nulẹ to yìyì ganji, obu sọ nọ di mi. Na n’nọ dọna dee dọ nuhe na jọ bọdego ma na yọ́n.”
“N’nọ tẹnpọn nado dọ azán dopodopo tọn, amọ́ to whedelẹnu, nuhahun azán susu tọn wẹ nọ wá ayiha mẹ na mi.”
Nuhe mẹhe do nuhahun apọ̀nmẹ tọn delẹ dọ niyẹn. Be e nọ ṣí mọ na hiẹ kavi mẹhe go a to nukunpedo de wẹ ya?
Kudeji dọ e ma yin hiẹ ṣo wẹ e to mọ na. To egbehe, mẹsusu wẹ nuhahun apọ̀nmẹ tọn to yadona, vlavo yelọsu kavi mẹyiwanna yetọn lẹ.
Matin ayihaawe, mí to gbẹnọ to “ojlẹ awusinyẹn tọn he vẹawu nado pehẹ lẹ” mẹ, bọ ehe nọ hẹn nuhahun sinsinyẹn voovo lẹ wá. (2 Timoti 3:1) Dodinnanu de dohia dọ lẹdo aihọn pé, nudi gbẹtọ dopo to ṣinatọ̀n ji wẹ do nuhahun apọ̀nmẹ tọn. To 2020, COVID-19 zọ́n bọ sọha mẹhe nọ do ayimajai lẹ tọn jideji na nudi 26 to kanweko ji bọ sọha mẹhe nọ jẹ apọṣimẹ-zọ̀n sinsinyẹn lẹ tọn jideji na nudi 28 to kanweko ji.
E ma ylan nado yọ́n sọha mẹhe to ayimajai po nuhahun apọṣimẹ tọn po do lẹ tọn. Amọ́, nuhe yin nujọnu hugan wẹ nado yọ́n lehe hiẹ po mẹyiwanna towe lẹ po gán nọ dagbe do.
Etẹwẹ nọ yin dagbemẹninọ apọ̀nmẹ tọn?
Eyin mẹde to dagbe to apọ̀nmẹ, mẹlọ nọ to jogún-jogún bọ apọ̀n etọn nọ wazọ́n ganji. Mẹlọ gán duto lẹnpọn paa lẹ ji, nọ wazọ́n ganji bosọ do ayajẹ to gbẹ̀mẹ.
Nuhahun apọ̀nmẹ tọn . . .
E MA YIN owhẹ̀ mẹlọ tọn.
Awutu de wẹ he nọ gbàhundona mẹlọ bosọ nọ yinuwado linlẹn, numọtolanmẹ po walọ etọn lẹ po ji.
E gán nọ hẹn ẹn vẹawuna mẹlọ nado jihọntọn hẹ mẹdevo lẹ, bosọ penukundo nuwiwa egbesọegbesọ tọn lẹ go.
Mẹlẹpo wẹ gán jẹ awutu ehe, mahopọnna owhe, aṣa, sinmẹ agbasa tọn, akọ̀, sinsẹ̀n, vlavo mẹlọ sèwé kavi ma sè, e yin akuẹnọ kavi hẹntọnọ.
Alọgigọna mẹhe do nuhahun apọ̀nmẹ tọn lẹ
Eyin jijọ towe kavi mẹyiwanna towe de tọn diọ to ajiji mẹ, he zọ́n bọ hiẹ kavi mẹlọ ma nọ mọ amlọndọ kavi ma nọ dùnú ganji, nọ do lẹnpọn zẹjlẹgo, nọ to nuhà kavi nọ blawu, a gán do hudo doto de tọn nado yọ́n adọ̀ nuhahun lọ tọn lẹ bosọ didẹ yé. Amọ́, fie wẹ a gán mọ alọgọ te?
Jesu Klisti he yin dawe nuyọnẹntọ he nkọ ma ko nọgbẹ̀ pọ́n lọ dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.” (Matiu 9:12) Mẹhe to azọ̀n jẹ bo yì dotowhé bosọ zan amasin ganji lẹ gán mọ yede mẹ dogọ bosọ mọ alọgọ yí nado zan gbẹzan dagbe de he do ayajẹ. Eyin ohia azọ̀n lọ tọn lẹ sinyẹn kavi ma busẹ, nuyọnẹnnu wẹ e yin dọ omẹ mọnkọ lẹ ni ma dọngbàn nado yì dotowhé blo.a
Dile etlẹ yindọ Biblu ma yin owe he nọ namẹ ayinamẹ gando agbasalilo go, nuhe to e mẹ lẹ gán gọalọna mí nado to ganji to apọ̀nmẹ. Jaale bo hia hosọ he bọdego lẹ, a na mọ lehe Biblu gán gọalọna mí nado duto nuhahun apọ̀nmẹ tọn lẹ ji do.
a Atọ̀họ̀-Nuhihọ́ lọ Tọn ma nọ na ayinamẹ nukunpedomẹgo tangan de tọn. Mẹdopodopo wẹ dona yiagbọji bo gbeje yọnbasi voovo he tin lẹ pọ́n whẹpo do basi dide nuhe e na wà tọn.