Aʋ po Lɔtɩ ɔˈ ˈɲnɔn ɔnˈ dɩ -glʋˈ bho

Lɔtɩ -nɩn ɔɔˈ ˈˈbho ɔˈ ˈdhoudhi Ablaamʋn ˈˈtiɛ ˈo ˈbhlʋa dhueˈ ˈdhi. ˈBhlʋa -ˈnɔn ɔnˈ ˈɲnɩn -mɩn -nɩn Kanaan. Ɛɛ ˈbhɔɔa ˈbho ɛ, -nɩnandhɩ- ʋʋ ˈbhlea, ɩn -diɛˈˈ. Lɔtɩ -e Ablaamʋn ɔnˈ -nɩnandhɩ- se ˈo ˈbhlʋa ˈdhi ˈbhɛɛ-. Ɛmɛn- dɩ Ablaamʋn -ghwlu ˈe Lɔtɩ bho ɔ ˈnaan: ‘-A se ˈbhɛɛ- -a ˈye -dadhueˈ ˈˈti -dheeka. -Kɔngɩnˈ, -da -man ˈbɔan -ˈyea mun ɛn, mun ˈo -wɛeˈ ˈmɔn ˈye -da -dhee -ˈnɔɔn mun.’ Ablaamʋn ɔnˈ zi ɔɔˈ ˈsʋ ɔˈ dɩ, ɛ seɛ -mɛn?

Lɔtɩ ŋmʋan ˈbhlʋa nɩan ˈbho Sodɔmʋn glɔ ˈˈbun jha, ɔ -nmɔn ˈˈjhrii ˈjɛɛn-. ˈˈNin -e ˈkwla -diɛˈˈ ˈbhomɔn. Ɛmɛn- dɩ ɔ -za ˈo ˈˈkwiglɔ- -nɔnˈ ɔmɔn -e ɔɔˈ ˈˈgbuzɔncɛ ˈˈti ˈo ɔ ˈdhi.

Ɲʋn ˈˈtia ˈo Sodɔmʋn -e Gomɔɔ glɔ ˈdhi ɛ, ʋa nʋɛn dhɩsaɩn-. Dhɩsaɩn- ʋa nʋan ɩn -diɛˈˈ -dhe ˈjɛɛn- ˈsʋ Zoova ˈnaan ɔ ˈye ʋaˈ ˈˈkwigwlɛ- -ˈnɩn i -za. Ɔɔ ˈbɔn ɔ ˈye Lɔtɩ -e ɔɔˈ ˈˈgbuzɔncɛ ˈpʋʋ- ɛɛˈ dɩ ɔ dhbho dhbhoozii- ˈsɔɔn ˈdhe Lɔtɩ bho. Ɩn -ghwluɛ- ˈe Lɔtɩ bho ɩn ˈnaan: ‘ˈˈDoo-! -ˈGhwlʋ da ˈˈkwiglɔ- nɔn ˈdhi! Zoova ˈnaan ɔɔ muɔn in -za.’

Lɔtɩ ˈse ˈˈdoo- ɔ ˈse mun. Ɔ ˈse i telɛ- ɔ ˈse ˈo -glɔˈ ˈghwlʋ. Dhbhoozii- kpʋɛn Lɔtɩ -e ɔɔˈ ˈɲnɔn -e ɔɔˈ ˈˈɲnuun -ɲnʋnkpaeˈ nɩan ˈsɔɔn ɔnˈ sɩn in -wɛeˈ ɩn zʋbʋ ˈbho ˈˈkwiglɔ- -ˈnɔn ˈdhi. Ɩn -ghwluɛ- ˈe ʋbʋ bho ɩn ˈnaan: ‘Aʋ ple! Aʋ ple -wɛeˈ aʋ ˈye ˈpʋ. Aʋaˈ ŋmʋn -e dhe -dhe. -Bho aʋ ŋmʋn dhe ɛˈ, aʋa muɛn ˈmɛn-!’

Ʋʋ ɲnian ˈo ˈˈkwiglɔ- ɲʋn an ˈdhaa Zoaa ˈdhi ɛ, Zoova nʋɛnˈ nɛn -duuˈˈ ye ˈe ˈˈjha ˈghwlʋ ɛ ye ˈo Sodɔmʋn -e Gomɔɔ glɔ ˈˈkpe ˈkpa. ˈˈKwigwlɛ- nɩan ˈsɔɔn -ˈnɩn ɛn, ɩanˈ klɛɛ -zaa i. Lɔtɩ -e ɔɔˈ ˈˈɲnuun -ɲnʋnkpaeˈ aˈ ˈsʋ -sie ˈkmʋn dhɛ nɩan ˈo ɛ, ʋʋ ˈjheɛ Zoova ŋwɔn. Lɔtɩ ɔˈ ˈɲnɔn -mʋnˈ ɛn, ʋn ˈse Zoova ŋwɔn ˈjhe. Ʋn -ŋmʋɛn dhe ˈˈdhe ʋn ˈkpa ˈtɔn ˈˈkplo! Lɔtɩ -e ɔɔˈ ˈˈɲnuun -ɲnʋnkpaeˈ ˈˈzruu ˈjɛɛn- dhɛ ʋn ˈsea Zoova ŋwɔn ˈjhe ɛɛˈ dɩ. ˈKlaa dhɛ ʋbʋ muan -wɛeˈ ʋʋ nʋan dhɛ Zoova deea ʋbʋ i ɛ, ɛ ˈbhleɛ ʋbʋ aˈ ˈmʋnan-.