Zakɔbʋ ˈjheɛ ˈˈghwliɛ-

Izaakɩ ˈbhleɛ zɩn anˈ 40 -wɛeˈ Rebeka a ye ɔɔˈ ˈɲnɔn ˈkpa-. Ɔɔ ˈbʋʋn -dhe ˈjɛɛn-. Ʋʋ ˈghwlʋɛ ˈˈɲnuun ˈsɔɔn: -ˈGbaɲnuun-.

-Ɔ kɔan ɲan -mɔn -nɩn Ezai ˈˈdhe ˈsɔɔn nɔn -mɔn -nɩn Zakɔbʋ. Ezai -kman ˈe ˈkwla ˈi ɔˈ dɩ, ɔ -nɩɛn ˈkwlai-. Zakɔbʋ -kman ˈo -ˈglɔ i -de dɩ.

ˈDhe ɛɛˈ nɔnˈˈ tu ˈdhi ɛ, -bho ɲankɔn- -jhu ɔˈ ˈˈbho ˈmɛn ɛnˈ, ɔmɔn- -ɔɔ kpa ˈghwɛi -duuˈˈ -e glea -duuˈˈ. ˈˈGhwlii- nɩan ˈdhe Izaakɩ bho ˈˈgbu ɛ, ˈdhe ɩn ˈˈklu ɛ, ˈˈghwliɛ- dhueˈ nɩan ˈo ɛ, ɛmɛn- -nɩn Zoova a muɛn ɲankɔn- jhu i -jhii -wɛeˈ dhɩ -ɩanˈ ghwlu ɔ cɛan ˈdhe Ablaamʋn bho ɛ, ɩn ˈye ˈo ɲnin. ˈDhe Ezai -ˈmɔn bho ɛ, dhɩ -ɩanˈ ghwlu Ɲɔnsoa cɛan ˈse dhɛ ˈdha. ˈKlaa ɩn ˈdha dhɛ ˈdhe Zakɔbʋ -ˈmɔn ˈˈjhriɛ ˈdhe.

-Zɔn dhueˈ ˈsʋ Ezai nʋɛn ɔɔˈ nɔnˈˈ ɔnˈ klɛɛ ˈdhe ˈkwla ˈi. Ɔɔ jhia -glɔˈ -ˈmɛn ɔ seaˈ. Ɔ -jhɛɛ Zakɔbʋ ɔɔ yea dhiidhɛ- ˈdhɔɛe dhueˈ pi. Ezai ˈŋwɔan dhiidhɛ ˈdhɔɛe -ˈnɛn ɛnˈ ˈnʋn ˈsʋ ɛ, ɔ ˈnaan: ‘ˈMɩɛn- -ɛn ˈdhbha ˈʋn! -ˈˈƝɩn ʋn -manˈ dhidhɛ -zaan -ˈnɛn ˈyeɛ dhi!’ Zakɔbʋ -ghwluɛ- ˈe ɔ bho ɔ ˈnaan: ‘-Ao, ˈklaa, -bho ˈyeɛ ʋn ˈˈɲɩn -mɔnˈ ke ɛˈ, cɛn ghwlu -ˈye ʋn -manˈ ˈˈghwliɛ ˈˈɲɩn.’ Ezai -ghwluɛ- ˈe ɔ bho ɔ ˈnaan: ‘Kpa ˈˈghwliɛ! Ɛ se dhɛ ˈdha ˈdhe ˈˈjhriɛ ˈdhe. ˈBhɛɛˈ -ˈyeɛ ˈmʋn ˈˈdhuo-. Dhɛ ˈman ˈbɔan -mɛn -nɩn ˈye dhɛ dhi.’ ˈBho- -gwlɩˈˈ ˈdhe, dhɛ Ezai nʋan ɛ dhɛ ˈjɛɛn-? ˈˈƖɩn-, ɛ se dhɛ ˈjɛɛn -nɩn. Dhɛ -ɛ ˈdha dhɛ, ɛmɛn- Ezai ˈse dhɛ ˈdhaa- dhiidhɛ ɛˈ dɩ.

Izaakɩ ˈkpa gɩlaˈˈ, nɔnˈˈ ɲninˈ -wɛ bhla ɔ ˈye ɔɔˈ ɲankɔn- jhu ˈˈniman po. ˈSʋ Rebeka poɛ Zakɔbʋ sʋn bho ɔ ye ˈˈniman -ˈnɔn ˈjhe. Ezai ˈŋwɔan ɛɛˈ dhɛ tu ɛ, ɔ ˈkpa ˈcɛn ˈjɛɛn-. Ɔ ˈnaan ɔɔ muɛn ɔɔˈ ˈdhoudhi ˈdhbha-. Izaakɩ -e Rebeka ˈsea ˈbɔn Zakɔbʋ ˈyea ˈmɛn ˈsʋ ɛ, ʋʋ ghwluɛ ˈe ɔ bho ʋʋ ˈnaan: ‘Mun ˈdhe -manˈ ˈdhou aˈ ˈdhoudhi Labanɩn bho, -ˈye ˈe -nɩn ˈsʋ Ezai ɔˈ ˈcɛn ˈye ˈghwla.’ Zakɔbʋ poɛ ɔɔˈ ˈˈbho -e ˈdhou aˈ ghwlu -dheinˈˈ bho ɔ ye ple.