Zakɔbʋ -e Ezai zela dɩ ˈˈkpei

Zoova -ghwluɛ ˈe Zakɔbʋ bho ɔ ˈnaan ɔɔ muɔn ˈdhei -fuo- -ka ɔ fua Ablaamʋn -e Izaakɩ ˈdhei ɛ. Zakɔbʋ ˈˈtiɛ Aranɩn, ˈbho -mɔn ɔ ˈbhlee- ˈɲnɔn. Ɲʋn nɩan ˈdhe ɔɔˈ ˈˈgbu zɔnˈ ˈkpa ˈˈkpe ˈˈdhe ɔ ˈkpa ˈˈghwliɛjhei- -klaaˈˈ.

Nɔnˈˈ pla zia, Zoova -ghwluɛ ˈe Zakɔbʋ bho ɔ ˈnaan: ‘Mun ˈdhe- ˈˈbhli dhe.’ Zakɔbʋ -e ɔɔˈ ˈˈgbuzɔncɛ ˈkpa -jieˈˈ ʋʋ ye mun. Ʋʋ nɩan -jieˈˈ ˈsʋ ɛ, Zakɔbʋ ɔˈ dhbhonʋʋn- -ˈnʋʋn jhiɔ ˈtmʋʋn- -ˈnan ʋʋ ˈnaan: ‘-Manˈ ˈdhoudhi Ezai ɔ jhiɛ ʋn ˈˈɩ ˈjhaa- -ˈnan ɔmɔn- -e ɲʋn anˈ 400 -e!’ -Faʋn an nʋn Zakɔbʋ ˈmɛn dhɛ nɩan ˈo ɛ, ɔ ˈse ˈbɔn Ezai ˈye ɔmɔn -e ɔɔˈ ˈˈgbuzɔncɛ dhɛsaʋn ˈˈdhrui nʋn. Ɔ bhaeɛ- Zoova ɔ ˈnaan: ‘-Kɔngɩn ˈpʋʋ ˈmʋn.’ Zɔn -dhee -ˈnɔɔn zian ˈsʋ ɛ, Zakɔbʋ kpa ɔɔˈ ˈdhoudhi Ezai -baanˈ-. Ɔ ˈˈɲɩɔnˈˈ ˈbhlae -e -gbaeˈ -e bhliaˈ -e -ɲɔɔmɩɛnˈ -e -soofaeˈ.

ˈDhe ɔɔˈ ˈˈmaʋn -glʋ tu ˈdhi ɛ, Zakɔbʋ nɩan ˈdhue ˈsʋ ɔ ˈjheɛ dhbhoozuu-! Dhbhoozuu- -nɩn ɔ -dee vɔanˈ ˈmɛn. Ʋʋ vɔnˈ ˈsʋ zɔn ye zɩn. -Bho Zakɔbʋ -pʋa- mɔn -dhe ɛˈ, ɔ ˈse vɔn dɩ ˈbhɔ. Ɛ ˈyea ˈo ˈbhɔɔ- ɔ, dhbhoozuu- -ghwluɛ ˈe ɔ bho ʋn ˈnaan: ‘ˈˈTai ˈmʋn in ˈye mun.’ ˈKlaa Zakɔbʋ ɔ ˈbɔn ˈjɛɛn- Zoova ˈyeɔ sʋn bho po ɛɛˈ dɩ ɔ ˈnaan: ‘ˈˈƖɩn-, a po ˈʋn ˈˈniman -mɔn ke.’

ˈSʋ dhbhoozuu- poɛ Zakɔbʋ ˈˈniman. Zakɔbʋ ˈjhean ˈmɛn bhla -ka Zoova ˈsea Ezai i ˈˈtai- dhi ɔ ˈseɔ dhɛsaʋn ˈˈdhrui -nʋn in ɛn.

Ɛɛˈ zɔn zɩan, Zakɔbʋ ˈjheeɛ- ɔɔˈ ˈdhoudhi ɲan ɔɔ yea jhi. Ɔmɔn -e ɲʋn anˈ 400 -e. Ɔ ziɛ ɔɔˈ ˈˈgbuzɔncɛ ɛˈ klɛɛ ˈˈjhibhaˈ ɔ ye ɔɔˈ ˈdhoudhi ˈˈɩ ˈjhaa-. Zakɔbʋ ɔ ˈˈkʋan ɔɔˈ ˈdhoudhi I ˈsʋ ɛ, ɔ poɛ ˈkɔi glʋ kpɛ -mɛsɔn. Ezai ple ɔ ye Zakɔbʋ ˈˈɩ ˈjhaa- ˈˈdhe ɔ ˈga ˈi ɔ jhai. -Ʋʋ- nɩan ˈsɔɔn -dee ˈˈvɩanˈˈ ˈmɛn ˈˈdhe ʋʋ zela dɩ ˈˈkpei. Dhɩ Zakɔbʋ nʋan -wɛeˈ ɔ -nɩn ɔɔˈ ˈdhoudhi zela dɩ ˈˈkpei ɛ, ˈbho- -gwlɩˈˈ ˈdhe -kawɛ Zoova nʋn ɩanˈ ˈjhe sʋn -ɛn?

ˈBho ɛ ˈdhe ɛ, Ezai muɛn ˈdhe ɔ ˈˈbhli dhe. Zakɔbʋ -mɔnˈ kpa ɔɔ jie ɲan. ˈˈƝnuun -ɲmai- Zakɔbʋ ˈghwlʋa, ʋʋ -nɩɛn 12: Ribɛnɩn -e Simeɔn -e Levi -e Zida -e Dan -e Nefutali -e Gadɩ -e Azɛɛ -e Isakaa -e Zabulɔn -e Zozɛʋ -e Bɛnzamɛn. Zozɛʋ nɩan ɔɔˈ ˈˈɲnuun -ɲmai- aˈ dhueˈ ɛ, ɔmɔn- Zoova -jhii- dhi -wɛeˈ ɔ ˈpʋʋ- ɔɔˈ ˈcɛ. Jhibho- kɔ nʋan ɛɛˈ -nʋn sʋn ˈmɛn? -A muɛn ˈjhe- ˈdhe -bo -ɩan- jhia ˈdhi.