Ʋʋ cɛn ghwlu ˈdhe Zoova bho

Israɛkɔʋn ˈghwlʋa Ezipʋ ˈcɩ ˈsɔɔn zia, ʋʋ -ɲnɩɛn ˈo Sinai trʋ -gwlɩˈˈ. ˈBho -mɔn ʋʋ -poo ʋaˈ ˈkamanˈ. Zoova ˈdha Moizɩ ˈmɛn, -wɛeˈ ɔ ˈjha ˈe trʋ ˈˈkpe. ˈˈDhe Zoova -ghwlu ˈdhe ɔ bho ɔ ˈnaan: ‘ˈƖn ˈpʋʋ- Israɛkɔʋn- ˈmɛn. -Bho ʋʋ ˈjhe ˈman ghwlu ŋwɔn ˈˈdhe ʋa sa ˈman ˈtee ŋwɔn ˈjhe ɛˈ, ʋa muɛn ˈman ˈcɛ ˈkpa-.’ ˈBho ɛ ˈdhe ɛ, Moizɩ ˈghwlʋɛ ˈe trʋ ˈˈkpe ɔ ye i ˈˈsi ˈˈdhe dɩ Zoova ˈtmʋʋɔn, ɔ ˈtmʋɩn- Israɛkɔʋn. -Kawɛ ʋʋ nʋn ɩanˈ -kpʋn sʋn -ɛn? Ʋʋ -ghwluɛ ˈe ɔ bho ʋʋ ˈnaan: ‘Dhɩ aˈ klɛɛ Zoova a muan -aʋ ˈtmʋʋn- ɛn, -aa muɩn -nʋn.’

Moizɩ ˈjha ˈe Sinai trʋ ˈˈkpe -kenɛnˈ. Zoova -ghwluɛ- ˈdhe ɔˈ bho ɔ ˈnaan: ‘-Bho ˈghwɩ taan zi ɛˈ, ˈman muɛn ˈdhe- bho -ghwlu. ˈKlaa ˈtmʋʋn- ˈcɛ ɛˈ klɛɛ ʋaˈ ˈjha ˈo trʋ -ˈnʋn ˈˈkpe -dhe.’ Moizɩ ˈˈsiɛ i -kenɛnˈ ˈˈdhe ɔ ˈtmʋʋn- Israɛkɔʋn- ʋʋ ˈye ʋaˈ ˈˈjɛ kpɔˈˈ po ʋʋ ˈye Zoova aˈ ghwlu -dheinˈˈ bho po.

ˈGhwɩ taan -ˈnɩn zia, Israɛkɔʋn ˈjheɛ ˈˈnin -ɛn crɛ ˈˈjhrii ɛmɛn- -e ˈˈnin ɛnˈ ˈplɩ -ɩn -kpe ˈbho trʋ ˈˈkpe. Ʋʋ ˈŋwɔn ˈˈnin ɛnˈ -ˈˈgbu -ghwlu -e -vuɔˈ ɔˈ ghwlu. ˈSʋ Zoova ˈˈsiɛˈˈ i ˈdhe trʋ ˈˈkpe ˈdhe nɛn ˈmʋn. -Faʋn- kpʋn Israɛkɔʋn ˈmɛn ˈsʋ ʋa yea trɛ. ˈBhlʋa trɛˈ ˈjɛɛn- ɛ nʋɛnˈ trʋ ye i zia- ˈˈdhe dhaoˈ ˈˈjhi ˈdhe ʋn ˈˈkpe. -Vuɔˈ ɔˈ ghwlu a ˈkpa ˈˈkpe -kenɛnˈ. ˈSʋ Ɲɔnsoa ˈnaan: ‘ˈMɔn -nɩn Zoova. Aʋaˈ -gbɛɛ gela ˈsrʋ ˈˈjhibhaˈ -dhe.’

Moizɩ ˈjha ˈe trʋ ˈˈkpe -kenɛnˈ ˈˈdhe Zoova ˈˈɲɩɔnˈˈ ˈtee ɔ ˈye Israɛkɔʋn ˈˈɲɩn -wɛeˈ -ka ʋʋ ˈyea ɔɔˈ ˈˈɲɩn sʋn nʋn ˈˈdhe kplɩn ʋʋ ˈyea ˈbhle ɛ, ʋʋ ˈyɩ ˈcɩan. Moizɩ ˈcre ˈtee -ˈnɩn ˈmɛn -wɛeˈ ɔ zroɩ ˈdhii ˈbho Israɛkɔʋn ˈˈjhibhaˈ. Ʋʋ cɛn ghwlu ʋʋ ˈnaan: ‘Dhɩ aˈ klɛɛ Zoova ˈtmʋan -a ˈyea nʋn ɛn, -aa muɩn -nʋn.’ Ʋʋ cɛn ghwlu ˈbho Ɲɔnsoa ˈˈjhibhaˈ. ˈKlaa ghwlu ʋʋ cɛan, ʋa mun ŋwɔn ˈjhe- ˈmɛn?