Ʋʋ ˈse dhɛ -ɛɛˈ ghwlu ʋʋ cɛan nʋn

Zoova -ghwluɛ- ˈe Moizɩ bho ɔ ˈnaan: ‘-ˈJha ˈnɔn ˈɔn bho ˈdhe trʋ ˈˈkpe. ˈYe ˈtee ˈcre ˈbho ˈseiˈˈ -paeˈ ˈˈkpe ˈˈdhe ˈyɩ ʋn ˈˈɲɩn.’ Moizɩ ˈjha ˈe trʋ ˈˈkpe ɔ nʋɛn ˈe ˈghwɩ aˈ 40. Zoova ˈcreɛ ˈtee -bue- ˈbho ˈseiˈˈ -paeˈ ˈˈkpe ɔ ˈyɩ Moizɩ ˈˈɲɩn.

Nɔnˈˈ -pla zia, ˈbho Israɛkɔʋn -gwlɩˈˈ -dhe ɛ, Moizɩ sie ʋbʋ ˈmɛn ɔ ye mun. Ʋʋ -ghwluɛ ˈe Aarɔn bho ʋʋ ˈnaan: ‘-Aa ˈbɔn ɲɔn -ɔ ˈye -aʋ jie bho po. -Ba dhɛ -a ˈye ˈˈjhibhaˈ -gbɛɛ!’ Aarɔn ˈnaan: ‘Aʋ ˈˈɲɩn ˈʋn aʋaˈ ˈsanun.’ Ɔ cɛan ˈsanun ˈˈnin ˈsʋ ɔ nʋɛn bhliˈ -jhu. Israɛkɔʋn ˈnaan: ‘Bhliˈ jhu -ˈnʋn mʋn -nɩn -aaˈ Ɲɔnsoa. Ʋmʋn za -aʋ ˈdhe Ezipʋ!’ Ʋʋ -dee bhliˈ jhu -ˈnʋn anˈ ˈˈjhibhaˈ -gbɛɛ- ˈmɛn. Ʋʋ poɛ fɛtɩ -klaaˈˈ. Ɛ dhɛ ˈjɛɛn- ʋʋ nʋn? ˈˈƖɩn-, dhɛ nɩan ˈo ɛ, ʋʋ cɛn ghwlu ʋʋ ˈye Zoova aˈ ˈsʋ ˈˈɲɩn. ˈKlaa ghwlu ʋʋ cɛan, ʋʋ ˈsʋ ˈˈjhriɛ ˈˈdu.

Zoova ˈjhe dhɩ aˈ klɛɛ -nʋʋan ˈmɛn. Ɔ -ghwluɛ ˈe Moizɩ bho ɔ ˈnaan: ‘ˈˈSi i -ˈye -ˈman ˈcɛ ˈjheea mun. Ʋa bhlaa ˈman ghwlu ŋwɔn ˈˈdhe ʋa gbɛɛ -baadhɛ ˈˈjhibhaˈ.’ Moizɩ ˈbhleɛ ˈseiˈˈ paeˈ nɩan ˈsɔɔn ɔ ye i ˈˈsi.

Ɔɔ ˈˈkʋan kaman in ˈsʋ ɛ, Moizɩ ɔ ˈŋwɔn bhle -ghwlu. Ɔɔ ˈjhʋbʋ ˈmɛn ʋa yea dhee, ʋa yea ˈkɔi glu po ˈbho bhliˈ jhu ˈˈjhibhaˈ. Ɔ -ˈˈvilɛ ˈseiˈˈ paeˈ nɩan ˈsɔn ˈbho ˈbhlʋɔ- ˈˈdhe ɩn -ghwaa dhi. -Baadhɛ- ʋa gbɛɛa ˈˈjhibhaˈ -dhe ɛ, ɔ -ghwɛɛ dhi -ke. -Wɛeˈ ɔ dee- Aarɔn in ɔ ˈnaan: ‘Dhɛɛdɩ- ˈˈtai- ˈcɛ i ʋʋ ˈˈtun ʋn nʋn dhɛ ɲnian ˈˈjhrii ˈka -a?’ Aarɔn ˈnaan: ‘-Manˈ ˈkpa -e ˈcɛn -dhe. Jhibhiˈ ˈcɛ nʋn anˈ dhɛ -kmanˈˈ. Ʋa ˈbɔn gɩla- ˈsrʋ, ɛɛˈ dɩ ˈɩn ˈˈvile- ʋaˈ ˈsanun ˈbho ˈˈjhri -wɛe ˈɩn nʋn bhliˈ jhu!’ Aarɔn ˈse ɛɛˈ dhɛ tu -nʋn in -dhe. Moizɩ ˈjha ˈe trʋ ˈˈkpe dhe -wɛeˈ ɔ bhae- Zoova ɔ ˈye ɔɔˈ ˈcɛ ɛˈ dhɛsaʋn ˈˈkpe ˈghwlʋ.

Ɲʋn -ʋa ˈbɔan -ʋʋ ˈyea Zoova ŋwɔn ˈjhe ɛ, ɔ ˈghwlʋɛ ʋaˈ dhɛsaʋn ˈˈkpe. Dhɛɛdɩ- Israɛkɔʋn ˈyea Moizɩ ŋwɔn ˈjhe -dhe ɛ, ˈŋwɔɛn in -wɛ?