Ɲɔnsoa aˈ -pooˈˈ

-Da Moizɩ nɩan ˈe Sinai trʋ ˈˈkpe ɛ, Zoova ˈtmʋɔn ɔ ˈye -pooˈˈ dhueˈ nɩan ɔɔˈ -nɛn ka po -ɔ ˈdhe ˈdhi Israɛkɔʋn ˈbhɛɛa ʋʋ ˈyea Ɲɔnsoa ˈˈɲɩn. Ʋʋ ˈbhɛɛˈ ʋʋ ˈyeɔ ˈbhle ʋʋ ˈyeɔ -da ooˈˈ-da ʋa muan kpa. -Pooˈˈ -ˈnɔn ɲɔn ˈdhɔɔ- Ɲɔnsoa aˈ -pooˈˈ.

Zoova -ghwluɛ- ˈe Moizɩ bho ɔ ˈnaan: ‘ˈTmʋʋn- Israɛkɔʋn ʋʋ ˈye dhɛ ʋʋ ˈbhɛɛa -to -ɲʋn ˈye -pooˈˈ -ˈnɔn po.’ Israɛkɔʋn toɛ ˈo ˈsanun, ˈghwɛiˈ, nmanˈˈ, ˈseiˈˈ ˈdhɔɛeˈ ɛmɛn- -e -ˈblunpodhɩ -e sɩnpodhɩ-. Ʋʋ toɛ ˈo ˈfɛɛn -e -jheeˈˈ-e nmiian anˈ kui -e dhɩ -ˈnɩɩn. Ʋʋ -za dhɛ kwai ˈjɛɛn- ˈsʋ Moizɩ ye ˈe ʋbʋ bho -ghwlu ɔ ˈnaan: ‘Ɩn -diɛˈˈ bhla! Aʋaˈ jhae- dhɩ -ˈnɩɩn -dhe.’

ˈƝnʋnkpaeˈ -e ɲmai- -duuˈˈ jhibha dhbho ɔˈ nʋanˈ poɛ ɲʋn -ʋa- poa Ɲɔnsoa aˈ-pooˈˈ sʋn bho ʋʋ yeɔ po. Zoova poɛ ʋbʋ dhɛjhibhɛ- ˈˈkpe -kenɛnˈ. -ˈNʋʋn an nʋɛn -jheeˈˈ -e taeˈ ˈˈdhe ʋa jhaa taeˈ -jheeˈˈ ŋwɔin. -ˈNʋʋn an nʋʋɛn ˈseiˈˈ -e ˈsanun dhbho ˈˈdhe ʋa ba ti -ke.

Israɛkɔʋn po -pooˈˈ ˈmɛn -ka Zoova a ˈbɔan -dhe ɛ. Ʋʋ nʋɛn -draˈˈ ˈdhɔɛeˈ dhueˈ -ɔɔ za -pooˈˈ ˈfɛ ˈsɔɔn: -Da nɩan ˈPepeˈ -e -da nɩan ˈPepeˈ ɔˈ ˈPepeˈ. ˈBho -da nɩan ˈPepeˈ ɔˈ ˈPepeˈ ɛ, ˈkɛsʋˈˈ dhueˈ -nɩn ˈo -ɔ -nʋʋɛn- kasia -e ˈsanun ɲɔn ˈdhaa ˈˈduudɩ aˈ ˈkɛsʋˈˈ. ˈBho -da nɩan ˈPepeˈ ɛ, lapadhidedhɛ -nɩn ˈo -ɛ -nʋʋɛn ˈsanun ɛmɛn- -e tablʋ -e sraakpezadhɛ- -ɛ ˈbho ˈˈkpe ɲɔn ɔn poaˈ ansan ˈˈjhri -e. ˈBho zɔnˈ ɔn, ˈtasra -nʋʋan ˈˈnman -e sraakpezadhɛ- -klaaˈˈ dhueˈ -nɩn ˈo. ˈˈDuudɩ aˈ ˈkɛsʋˈˈ a poɛ Israɛkɔʋn dɩ -glʋˈ bho -ka ʋʋ cɛan ghwlu ʋʋ ˈyea Zoova ŋwɔn ˈjhe ɛ. Jhibho- dhɛ ɲɔn ɔn ˈdhaa ˈˈduudɩ- ˈmɛn? Ɛ ghwlu ɲɔn ɔn cɛn -ʋn -nɩn ʋanˈ -nɛn ka.

Zoova za ˈo Aarɔn -e ɔɔˈ ˈˈɲnuun -ɲmai ʋʋ ˈye sraazaʋn- -nɩn ˈdhe -pooˈˈ ˈdhi. Ʋʋ ˈye ɔɔˈ dɩ ˈˈdu ˈˈdhe ʋʋ ˈye -baanˈ- nʋn ˈdhemɔn ʋʋ ˈye Zoova ˈˈɲɩn. Aarɔn nɩan sraazai- -klaaˈˈ a, ɔɔˈ ˈsʋ nɩn ɛnˈ ka -ɔ ˈye ˈe -da nɩan ˈPepeˈ ɔˈ ˈPepeˈ pa. Ɔɔ pa ˈe ˈmɛn kpɔ dhueˈ ˈdhe zʋn ˈdhi ɔɔ yea ɔɔˈ ˈˈjɛ -e ɔɔˈ ˈˈgbuzɔncɛ -e Israɛkɔʋn- anˈ klɛɛ ɛˈ dhɩsaɩn- anˈ ˈsraa za.

Israɛkɔʋn ˈghwlʋa ˈe Ezipʋ ɛ nʋan -zʋn dhueˈ ɛ, ˈbhomɔn- ʋʋ po Ɲɔnsoa aˈ -pooˈˈ. -Kaan bhla, ʋʋ ˈbhleɛ -da ʋʋ ˈyea mun ʋʋ ˈyea Zoova ˈˈɲɩn.

Zoova toɛˈ -ka -pooˈˈ -ˈnɔn poɔ ˈmʋnan in ɛn. Ɔ nʋɛnˈ ˈˈnin ɛnˈ ˈplɩ ye ˈbho ɔ ˈˈdhru -nɩn. -Bho ˈˈnin ɛnˈ ˈplɩ -nɩn ˈbho -pooˈˈ ˈˈdhru ɛˈ, Israɛkɔʋn anˈ ˈghwlʋ -ˈgwliin. ˈKlaa -bho ˈˈnin ɛnˈ ˈplɩ a sa -ˈgwliin ˈghwlʋ ɛˈ, ʋʋ ˈjheanˈ ˈmɛn -kaˈ ʋʋ ˈyea mun ɛn. Ʋa za -pooˈˈ ˈˈjha ˈˈdhe ʋa bhla ˈo ˈˈnin ɛn ˈplɩ ˈdhe.