Zozue -e Gabaɔnkɔʋn -e

Ɲʋn ˈˈtiaˈˈ ˈe Kanaan anˈ ˈˈkwigwlɛ ˈdhi ɛ, ʋʋ ˈŋwɔn dhɛ -nʋʋan ˈbho Zeliko ˈmɛn. ˈSʋ ʋaˈ ˈbheɔ -ˈˈwe ˈŋwɔɔɛn- ghwlui ʋʋ ˈye -dadhueˈ ˈkpa -wɛeˈ ʋʋ ˈye Israɛkɔʋn bho vɔn. ˈKlaa ɲʋn ˈˈtiaˈˈ ˈbho Gabaɔn ɛn, tɔˈ -ˈnɔɔn ˈkpa ˈbho ʋbʋ -gwlɩˈˈ. Ʋʋ -paa ˈmʋnpaadhɩ- -paiˈˈ ˈmʋn, -wɛeˈ ʋʋ mun ˈe Zozue bho ʋʋ ˈnaan: ‘-A ˈghwlʋɛ -da -dɔɔnˈ. -A ˈŋwɔn dɩ ɲʋn ˈtmʋan ˈdhe Zoova aˈ dɩ ˈdhi -e dhɩ aˈ klɛɛ ɔ nʋan ˈdhe aʋaˈ dɩ ˈdhi ˈdhe Ezipʋ -e Moabʋ ˈmɛn. Aʋ cɛn ghwlu ˈdhe -a bho -ka aʋ ˈsea -aʋ bho -pa i ɛ ˈˈdhe -a ˈye aʋaˈ dhbhonʋʋn- ˈkpa.’

Zozue poɛ dɩ ʋbʋ ˈtmʋan tɔˈ ˈˈdhe ɔ cɛn ghwlu ˈdhe ʋbʋ bho -ka ɔ ˈsʋbʋ dhɛ -nʋʋin ɛn. ˈGhwɩ taan zia, ɔ ˈŋwɩɩnˈ -ka ʋʋ sea -da -dɔɔnˈ ˈghwlʋ ɛ, ˈklaa ɛ nɩn ˈo Kanaan -mɔn ʋʋ ˈˈti. Zozue deeɛ- ʋbʋ i ɔ ˈnaan: ‘Dhɛɛdɩ- aʋ dhii -aʋ sɩ ŋwɔn -ɔn?’ Ʋʋ -ghwluɛ- ˈe ɔ bho ʋʋ ˈnaan: ‘-Faʋn- -an nʋn aʋ -dhe! -A jhibhiˈ -ka aʋaˈ Ɲɔnsoa Zoova a vɔan aʋaˈ -gbaˈ a. Aʋ -kɔngɩnˈ, aʋaˈ ˈdhbha -aʋ -dhe.’ Ghwlu Zozue cɛan, ɔ ˈjhʋ ŋwɔn ˈˈdhe ɔ ˈsʋbʋ ˈdhbha.

Nɔnˈˈ -pla zia, Kanaankɔʋn anˈ ˈbheɔ- -mmˈˈ -e ʋaˈ ˈsʋlɩˈˈ -paa ˈbho Gabaɔnkɔʋn bho. Zozue -e ɔɔˈ ˈsʋlɩˈˈ nanˈ ˈdhe ˈˈmaʋn glu aˈ klɛɛ ˈdhi ʋʋ yʋbʋ sʋn bho -poaˈ mʋn. Ʋʋ -dee- -vɔanˈ ˈmɛn -drʋʋn pɛɛn. Kanaankɔʋn -dee- ˈkwlɩ ˈdhii ˈkpaaˈ ˈmɛn. ˈKlaa Zoova nʋɛnˈ ˈˈcɛ ˈˈkple -klaeˈˈ ye ˈe ˈˈjha ˈghwlʋ ɩn yʋbʋ ˈˈkpei gaˈ. ˈSʋ Zozue bhaeɛ- Zoova -wɛeˈ ˈjhrʋ ˈye i -ɲnan. ˈJhrʋ ˈsea i ɲnan kpɔ dhueˈ ˈdhee, dhɛɛdɩ- ɔ dee ɛˈ dhɛ tu i -ɛ? Dhɛ nɩan ˈo ɛ, Zozue deɛ Zoova -gwlɩˈˈ. ˈJhrʋ ˈse i ˈbhlu ˈdhe zɔn -ˈnɔn ɔnˈ klɛɛ ˈdhi ˈsʋ Israɛkɔʋn ye tʋ aˈ ˈˈdhru kpa.