Ɲʋnjiebhopoi- -dhee- -e ˈɲnʋnkpaeˈ ˈsɔɔn -ʋaˈ -pɛɛ kuai ɛ

Zozue poɛ Zoova aˈ ˈcɛ jie bho ˈdhe -zɩn -duuˈˈ ˈdhi. Ɔ ˈbhleɛ zɩn anˈ 110 -wɛeˈ ɔ ˈmɛn. Ɔ nɩan ˈkmʋn -dhe ɛ, Israɛkɔʋn an ˈˈɲɩɛnˈˈ Zoova. ˈKlaa ɔ ˈmɛan, ʋʋ -dee- -baadhɩ- aˈ ˈˈɲɩanˈˈ ˈmɛn -ka Kanaankɔʋn an nʋan. Dhɛ Israɛkɔʋn ˈbhɔaˈ Zoova aˈ ˈˈɲɩnˈˈ dɩ ɛ, ɛ nʋɛnˈ ɔ ye Kanaankɔʋn anˈ ˈbheɔ dhueˈ ɲɔn ɔn ˈdhaa Zabinɩn i ˈˈtai- ɔ yʋbʋ ˈkle ˈˈdu. ˈSʋ ʋa bhaeɛ- Zoova i ɔ ˈyʋbʋ sʋn bho po. ˈˈDhe Zoova ˈˈɲɩnˈˈ ʋbʋ jiebhopoi- -dhee-, ɔɔˈ ˈɲnɩn -nɩn Barakɩ. Barakɩ ˈye ˈcɛ sʋn bho po ʋʋ ˈye Zoova ˈˈɲɩnˈˈ -dheeka.

Debora nɩan ghwlukwajhaai- ɛ, ʋn ˈdha Barakɩ ˈmɛn. Ʋn -ghwluɛ- ˈe ɔ bho ʋn ˈnaan, dɩ Zoova ˈtmʋan ˈʋn ɩn ka: ‘ˈˈDhuo- ɲmai aˈ 10.000 ˈmʋn, -ˈmɛn mun Zabinɩn ɔnˈ ˈsʋlɩˈˈ bho vɔn ˈbho Kisɔnɩn ɛnˈ ˈˈninghwloˈ -gwlɩˈˈ. -Man muɛn tʋ aˈ ˈˈdhru -kpa ˈbho Sisera nɩan Zabinɩn ɔnˈ ˈsʋlɩˈˈ aˈ ˈˈdhrujhei- ˈˈkpe.’ Barakɩ -ghwluɛ- ˈe Debora bho ɔ ˈnaan: ‘ˈMan ye -mun, ˈklaa -bho ˈye mun ɛnˈ, -ˈmɛn a -nɩn ˈye mun.’ Ʋn ˈnaan: ‘ˈƖn ˈŋwɔɔn- ˈbho ˈmɛn. ˈKlaa ɛ se -mɔn -ˈye Sisera ˈdhbha -nɩn. Zoova ˈnaan ˈɲnʋnkpaoˈ dhueˈ-ʋan muɔn ˈdhbha-.’

Barakɩ -e ɔɔˈ ˈsʋlɩˈˈ -e Debora ˈjha ˈe Tabɔɔ trʋ ˈˈkpe -wɛeˈ ʋʋ ˈye ʋaˈ ˈˈjɛ kpɔ ɔˈˈ po ʋʋ ˈye tʋ vɔn. -Jɛn Sisera ˈŋwɔan ɛɛˈ dhɛ tu ˈsʋ ɛ, ɔ ˈgbooɛ- ɔɔˈ ˈˈkpenaandhɩ ɔɔ kpa tʋˈ -e ɔɔˈ ˈsʋlɩˈˈ i ˈbho ˈˈjun ˈdhi. Debora -ghwluɛ- ˈe Barakɩ bho ʋn ˈnaan: ‘Ɛ nɩn ˈnɔn ˈzɩan -zɔn nɔn ˈdhi Zoova ˈyeɛ nʋn -ˈye tʋ aˈ ˈˈdhru kpa.’ Barakɩ -e ɲmai- nɩan 10.000 ɛ, ʋa pleˈ ʋa yea ˈe trʋ ˈˈkpe ˈghwlʋ ʋa yea Sisera aˈ ˈsʋlɩˈˈ -kmanˈˈ bho -vɔanˈ mun.

Zoova nʋɛnˈ Kisɔnɩn ɛnˈ ˈˈninghwloˈ ye ˈˈjhi. Sisera aˈ ˈˈkpenaandhɩ- se ˈbhɛɛ- ɩn ˈye -ˈgwliin ˈghwlʋ ˈpɔɔˈ ɔˈ dɩ. Sisera ˈghwlʋ ˈbho ɔɔˈ ˈˈkpenaandhɛ ˈˈkpe ˈmɛn ɔ ye ple. Barakɩ -e ɔɔˈ ˈsʋlɩˈˈ kpa tʋ aˈ ˈˈdhru ˈmɛn ˈbho Sisera aˈ ˈsʋlɩˈˈ ˈˈkpe, ˈklaa Sisera pleˈ ɔ ye ˈˈmaanˈˈ mun! Ɔ ˈˈmaanˈ ˈdhe ˈɲnʋnkpaoˈ dhueˈ ɲʋn an ˈdhaa Zaɛlɩ aˈ -pooˈˈ ˈdhi. Ʋn ˈˈɲiɔnˈˈ ˈnɩnɔnˈ ɔ ye ˈnan ˈˈdhe ʋn ˈghwlɔ dhɛ ˈˈdhrui. ˈSʋlai- -klaaˈˈ -ˈnɔn seaˈ ɔɔ yea ˈmʋn. ˈˈDhe Zaɛlɩ ˈˈkʋʋɔn in -mɩɩnˈˈ -mɩɩnˈˈ -wɛeˈ ʋn ˈˈdhuo- tu ɲʋn ba ˈˈmlain ˈmʋn ˈbho ʋanˈ -pooˈˈ -ˈzɔn ˈˈdhe ʋn kɔɛ ˈbho ɔ ˈˈdhru ˈsʋ ɛ pa glu. Ɔ ˈmɛɛnˈ.

Barakɩ ɔ ˈbɔn Sisera i. Zaɛlɩ ˈghwlʋɛ ˈe ʋanˈ -pooˈˈ ˈdhi ˈˈdhe ʋn -ghwlu ˈdhe ɔ bho ʋn ˈnaan: ‘Jhi. ˈYe ʋn ˈˈjhu -man ˈbɔan in -tɔɔn.’ Barakɩ pa ˈe -pooˈˈ ˈdhi ɛ, ɔ ˈjhe Sisera aˈ ˈˈku ˈmɛn. Barakɩ -e Debora ˈbhɛɛ- Zoova ˈˈɩ, ʋʋ bhleɛ ˈdhʋ dhueˈ ʋʋ yeɔ ˈsɛ po dhɛ ɔ nʋɛn ˈˈdhe Israɛkɔʋn kpa tʋ aˈ ˈˈdhru ɛ. ˈDhe zɩn anˈ 40 tbha ˈo i ˈdhi ɛ, Israɛkɔʋn deɛ ˈkupeɛ i.