Ritɩ -e Noemi -e

-Zɔn dhueˈ ɛ, ˈmɩɛn pa ˈo Israɛ -bhlʋa- ˈdhi. ˈƝnʋnkpaoˈ dhueˈ nɩan Israɛkɔin ɲʋn an ˈdhaa Noemi ɛn, ʋmʋn -e ʋanˈ -kɔan -e ʋanˈ ˈˈɲnuun -ɲmai nɩan ˈsɔɔn muɛn ˈe Moabʋ. Ɛɛ ˈbhɔa ˈbho ɛ, ʋanˈ -kʋan ˈmɛɛnˈ. Ʋanˈ ˈˈɲnuun -ɲmai ˈˈdhuɛ- Moabʋ -ɲnʋnkpaeˈ ˈmʋn, ʋaˈ ˈɲnɩn -nɩn Ritɩ -e Ɔɔpa. Dhɛ ˈbhlea -ghwɛe- ɛ, ʋanˈ ˈˈɲnuun -ɲmai -ˈnʋn ˈmɛɛnˈ -ke.

Noemi ˈŋwɩɩn -ka ˈmɩɛn gwɛai ˈdhe Israɛ ˈsʋ ɛ, ʋn ˈnaan ʋan muɛn ˈdhe ʋn ˈˈbhli dhe. Ritɩ -e Ɔɔpa -nɩn ʋn munˈ -ke. ˈKlaa ʋʋ nɩan ˈbho -jieˈˈ ɛ, ʋn -ghwluɛ- ˈe ʋbʋ bho ʋn ˈnaan: ‘Aʋ toɛˈ -ka aʋ nɩan -jhela- -ɲnʋnkpaeˈ ˈdhɔɛeˈ ˈdhe ˈman ˈˈɲnuun bho. ˈˈDhe aʋ toɛ ˈdhiŋwɔnmɔɛn- -ke ˈdhee bho. ˈMan ˈbɔn aʋ ˈye jhela ˈˈti -dheeka. Aʋ mun Moabʋ dhe.’ Ʋʋ -ghwluɛ- ˈdhe ʋn bho ʋʋ ˈnaan: ‘-A -kman aaˈ dɩ! -A ˈse ˈbɔn -a ˈyea ʋn sie.’ Noemi ˈnɛn ʋbʋ ˈˈmlan ʋʋ ˈye dhe mun. ˈSʋ, Ɔɔpa muɛn dhe, ˈklaa Ritɩ -sieˈ. Noemi -ghwluɛ- ˈe ʋn bho ʋn ˈnaan: ‘Ɔɔpa muɛn ˈe ʋanˈ ˈcɛ -e ʋanˈ gɩlɩ bho dhe. A -nɩn ʋn mun, -ˈmɛn aʋ mun aʋaˈ ˈdhou -ˈˈwe bhoi.’ ˈKlaa Ritɩ -ghwluɛ- ˈdhe ʋn bho ʋn ˈnaan: ‘ˈƖn ˈsea ʋn -sie- i. Aaˈ ˈcɛ ɛ muɛn ˈman ˈcɛ ˈkpa- ˈˈdhe aaˈ Ɲɔnsoa a muɛn ˈman Ɲɔnsoa -nɩn.’ ˈBhoo- -gwlɩˈˈ ˈdhee, Ritɩ ˈtmʋan dɩ -ˈnɩn ɛn, dhɛwɛ- ɩn po ˈbho Noemi -gwlɩˈˈ -ɛ?

Ritɩ -e Noemi ɲnin Israɛ ˈmɛn ˈbho dhɩjhɔ ɔˈ -cɛn nɔnˈˈ. -Zɔn dhueˈ ɛ, Ritɩ muɛn ˈe ˈˈjhu dhueˈ ɲɔn ɔn ˈdhaa Boazɩ bho gleˈ -wɛeˈ ʋn ˈye dhɩjhɔ ɔˈ -kpai- ɲʋn -an cɛan dhɩjhɔ ɔ sia ˈbhlʋɔ ˈtɛn. Boazɩ -nɩɛn Raabʋ aˈ ˈˈjhu -ɲmau-. Ɔ ˈŋwɩɩnˈ -ka Ritɩ nɩan Moabʋkɔin ˈˈdhe ʋn nɩan ˈo Noemi bho ʋan pʋ sʋn bho jheejhee ɛ. Ɔ ˈtmʋʋn ɔɔˈ dhbhonʋʋn ˈmɛn ʋʋ ˈye dhɩ ʋa cɛan anˈ -daduuˈˈ i ˈˈtai- ˈbho ˈbhlʋɔ- -wɛeˈ Ritɩ ˈyɩ ˈtɛn.

Ɛɛˈ ˈˈjiejhru bho ɛ, Noemi deeɛ Ritɩ i ʋn ˈnaan: ‘ˈDhe ɲɔnwɛ- bho -gleˈ a mun dhbho nʋanˈ zɩanˈ -an?’ Ritɩ ˈnaan: ‘Ɛ nɩn ˈdhe Boazɩ bho gleˈ.’ Noemi -ghwluɛ- ˈe ʋn bho ʋn ˈnaan: ‘Boazɩ -nɩɛn- ˈman -kʋan anˈ ˈdhoudhi. A kpa dhbho nʋanˈ ɲan ˈdhe ɔ bho gleˈ ˈbho ˈɲnʋnkpaeˈ -ˈnʋʋn ˈˈbun. Ɲɔn ˈsea ʋn dhɛ -nʋʋn in ˈdhemɔn.’

Ritɩ kpa dhbho nʋanˈ ɲan ˈdhe Boazɩ bho gleˈ ˈsʋ dhɩjhɔ ɔˈ -cɛn nɔnˈˈ ye zi. Boazɩ deɛ ˈˈjhriɛ ˈˈkpe -ka ʋn kuai ˈbho dhbho -nʋanˈ ˈˈdhe ʋn nɩan ˈɲnʋnkpaoˈ ˈdhɔɛeˈ ɛ. ˈDhe ɛɛˈ nɔnˈˈ tu ˈdhi ɛ, -bho ɲmau se ˈˈjhu -ɲmau ˈghwlʋ ˈˈdhe ɔ ˈmɛn ɛnˈ, ɔɔˈ ˈdhoudhi -ɔɔ ˈˈdhuo ɔɔˈ ˈɲnɔn ˈmʋn. Ɛmɛn dɩ Boazɩ -nɩn Ritɩ ˈˈtii ˈˈbhli. Ʋʋ ˈghwlʋɛ ˈˈjhu -ɲmau ɔɔˈ ˈɲnɩn -nɩn Obɛdɩ. Ɔmɔn- ˈkpa ˈbheɔ Davidɩ ɔˈ ˈˈnan. Noemi anˈ ˈdhaiˈˈ -ˈˈwe nɩɛn ˈmʋnan in ˈjɛɛn-. Ʋʋ ˈnaan: ‘ˈBho -deenanˈ an, Zoova ˈˈɲɩɛn aʋn Ritɩ, -ʋn -nmɔn -glʋˈ ˈdhe a bho ˈˈdhe -kaanbhla, a ˈbhleɛ ˈˈnan -jhu. Zoova aˈ ˈɲnɩn ˈye ˈˈɩ ˈbhɛ.’