Israɛ ɛˈ ˈbheɔ -kɔan ɲan

Zoova ˈˈɲɩɛnˈˈ Israɛkɔʋn ˈpeejheʋn -ʋʋ ˈyʋbʋ jie bho po -dhe, ˈklaa -kaanbhla, ʋa ˈbɔn ˈbheɔ. Ʋʋ -ghwluɛ- ˈe Samiɛ bho ʋʋ ˈnaan: ‘ˈBhlʋɩ aˈ klɛɛ jhia -aʋ ˈdhei ˈbhleɛ ɩanˈ ˈbheɔ. -Abʋ -ke ɛ, -aa ˈbɔn ˈbheɔ.’ Samiɛ ˈjheɛ -ka ɛɛˈ dhɛ tu sea ˈˈjhrii -nmɔn ˈsʋ, ɔ bhaeɛ- Zoova ɛɛˈ dɩ. Zoova -ghwluɛ- ˈe ɔ bho ɔ ˈnaan: ‘Ɛ se -mɔn ʋʋ ˈvʋʋn- ɲan -nɩn. Ɛ nɩn ˈmɔn ʋʋ -vʋʋn ɲan. ˈTmʋʋn ʋbʋ -ka ʋʋ ˈbhɛɛa ʋʋ ˈyea ˈbheɔ ˈbhle ɛ. ˈKlaa ˈbheɔ -ˈnɔn ɔn muɛn ʋbʋ ˈˈdhrui -kpʋn ʋʋ ˈye dhbho -duuˈˈ nʋn ʋʋ ˈyeɔ ˈˈɲɩn.’ Israɛkɔʋn ˈnaan: ‘Ɛ se ˈˈɩ -kman. -Aa ˈbɔn ˈbheɔ!’

Zoova ˈtmʋʋn- Samiɛ ˈmɛn -ka Sailɩ ˈyea ˈbheɔ -kɔan ɲan -nɩn ɛn. -Da Sailɩ muan ˈe Samiɛ bho ˈdhe ˈˈkwiglɔ- ɲɔn ɔn ˈdhaa Rama ˈdhi ɛ, Samiɛ poɔ ˈcran ˈˈdhru -wɛeˈ ɔ ˈyeɛ -to -ka Zoova zɔ ˈo ɔ ˈyea ˈbheɔ -nɩn ɛn.

ˈBho ɛ ˈdhe ɛ, Samiɛ ˈgbooɛ- Israɛkɔʋn dhi -wɛeˈ ɔ ˈyʋbʋ ʋaˈ ˈbheɔ -dhee -tɔɔn. ˈKlaa ʋʋ ˈbɔn Sailɩ ˈmɛn ʋʋ ˈseɔ ˈjhe. Jhibho- dhɛ nɩan ˈo ˈmɛn? Ɔ ˈˈmaanˈ ˈdhe -ˈgbɩ ˈɲnɩn bho. Ɛɛ ˈbhɔɔa ˈbho ɛ, ʋʋ ˈjhe Sailɩ ˈmɛn ˈˈdhe ʋʋ jhɔ ˈo ˈcɛ ɛˈ gwɛa. Sailɩ tɛn jha ˈjɛɛn- ɔ ˈye ɲʋn anˈ klɛɛ -zii ˈˈdhe ɔ -nmɔn- ˈˈjhrii -ke -dhe. Samiɛ ˈnaan: ‘Ɲɔn Zoova -za ˈo ɛ, ɔ ka.’ ˈCɛ ɛˈ klɛɛ ˈˈghwɔɔˈ ʋʋ ˈnaan: ‘ˈBheɔ ˈye ˈkmʋn -gwle!’

ˈBho -deenanˈ an, ˈbheɔ Sailɩ ɔ poɛ Samiɛ -dheinˈˈ bho ˈˈdhe ɔɔ ˈjheɛ Zoova ŋwɔn. ˈKlaa ɛɛ ˈbhɔɔa ˈbho ɛ, ɔ zian ˈkplɩn ɩnˈˈ. -Zɔn dhueˈ ɛ, ˈsrae- ˈbheɔ ˈsea zai ɛ, ɩmɩn- Sailɩ -za. Samiɛ ˈtmʋʋn Sailɩ ˈmɛn -dhe ɔ ˈyeɔ -fuo-. ˈKlaa Samiɛ ˈsea ˈˈdoo- ɔ sea jhi ˈsʋ ɛ, Sailɩ -za ˈo ɔɔˈ ˈˈjɛ -gwlɩˈˈ ɔ ye ˈsrae- -za. -Kawɛ Samiɛ ˈjhe ɛɛˈ dhɛ tu -ɛ? Ɔ -ghwluɛ- ˈe ɔ bho ɔ ˈnaan: ‘ˈSe Zoova aˈ ghwu ŋwɔn -bhlaai -dhe.’ Dhɛ sea ˈˈjhrii -nmɔn- Sailɩ nʋan, ɔ zɛ ˈsrɩn ˈdhi ˈmɛn?

Ɛɛ ˈbhɔɔa ˈbho ɛ, Sailɩ muɛn Amalɛkikɔʋn bho -vɔanˈ. Samiɛ ˈtmʋʋɔnˈ -dhe ɔ ˈnaan ɔɔˈ siie- ʋaˈ dhueˈ ka ˈkmʋn -dhe. ˈKlaa Sailɩ za ˈo ɔɔˈ ˈˈjɛ -gwlɩˈˈ ɔ ˈse ʋaˈ ˈbheɔ Agagɩ ˈdhbha. Zoova -ghwluɛ- ˈe Samiɛ bho ɔ ˈnaan: ‘Sailɩ ˈbhɔ ˈʋn ˈmɛn ˈˈdhe dɩ ˈman ˈtmʋʋɔn, ɔɔˈ nʋɩn.’ Samiɛ ˈˈzruuˈ ˈjɛɛn- -dhe. ˈˈDhe ɔ -ghwlu ˈe Sailɩ bho ɔ ˈnaan: ‘Dhɛ -manˈ ˈjhea Zoova ŋwɔn -dheeka a, ɛɛˈ dɩ ɔ ˈye ˈbheɔ -ˈnɔɔn ˈbho -manˈ ˈgɔ ɔˈˈ po.’ ˈSʋ Samiɛ ˈˈbhilɛ i ɔɔ yea mun. Sailɩ kpʋɛn Samiɛ ɛˈ ˈmʋnpaadhɛ ɛˈ -dhounˈˈ in ˈsʋ ɛ ˈye ˈfae-. -Wɛeˈ Samiɛ -ghlwu ˈdhe ɔ bho ɔ ˈnaan: ‘Zoova za ʋn -manˈ ˈbheɔglɔ- ˈkwa.’ Zoova ˈyeɔ ɲɔn kman ɔɔˈ dɩ ˈˈdhe -ɔɔ ˈjheɔ ŋwɔn ˈˈɲɩn-.