Zoova aˈ ˈˈgbu klaaˈˈ

Salomɔn ˈkpa Israɛkɔʋn anˈ ˈbheɔ ɔ, Zoova deeɔ i ɔ ˈnaan: ‘Dhɛwɛ- -man ˈbɔn ˈye nʋn ˈye ʋn ˈˈɲɩn -ɛn?’ Salomɔn -za ɔɔˈ ghwlu aˈ kpa ɔ ˈnaan: ‘ˈƖn -nɩɛn- ɲɔnjhao- ˈɩn se dhɩ -duuˈˈ aˈ nʋanˈ jhibho-. -Kɔngɩnˈ -ˈˈɲɩn ˈˈʋn ˈtɔdhinɩɛn- ˈˈdhe ˈye -manˈ ˈcɛ jie bho po.’ ˈSʋ Zoova za ɔɔˈ ghwlu aˈ kpa ɔ ˈnaan: ‘Dhɛ muan -wɛeˈ deea ˈtɔdhinɩɛn in ɛn, ˈman muɛn -nʋn, -ˈye tɔˈ ˈdhi -nɩn -ˈye ɲʋn anˈ klɛɛ nɩan da ˈbhlʋa ˈˈkpe -zii. ˈMan muɛn -nʋn -ke -ˈye ˈˈghwliɛ ˈjhe ˈˈdhe -bho -man sa ˈman ghwlu ŋwɔn ˈjhe ɛˈ, -ˈye ˈkmʋn -gwle.’

Salomɔn -dee Ɲɔnsoa aˈ ˈˈgbu klaaˈˈ aˈ poaˈ ˈmɛn. Ɔ ˈˈdhuɛ- ˈsanʋnˈ -e ˈghwɛi -e ti -e ˈseiˈˈ ˈdhɔɛeˈ ˈmʋn. ˈƝnʋnkpaeˈ -e ɲmai aˈ ˈˈghwluu -ghwluu -ʋʋ jhibha dhbho ɔɔˈ nʋanˈ -kajɔɔnka a, ʋbʋ- po Ɲɔnsoa aˈ ˈˈgbu klaaˈˈ -ˈnʋn. Ʋʋ nʋɛn -zɩn -ˈˈmɛsɔnˈ -wɛeˈ Ɲɔnsoa aˈ ˈˈgbu -ˈnʋn anˈ poaˈ a ye ˈˈɩ -gwɛ. Ʋʋ ˈbhɛɛˈ bhla ʋʋ ˈyʋ Zoova kwa de. ˈSraakpezaadhɛ- nɩan ˈe Ɲɔnsoa aˈ ˈˈgbu klaaˈˈ ˈdhi ɛ, ˈbho ɛ ˈˈkpe ʋʋ ˈˈɲɩn Zoova -baanˈ-. Salomɔn poɛ ˈkɔi- glʋ ˈbho ˈsraankpezaadhɛ- -ˈnɩn ˈˈjhibhaˈ -wɛeˈ ɔ bhae- ɔ ˈdha ka: ‘Oo Zoova, ˈˈgbu nʋn se ˈˈɩ ˈbhɛ ˈˈdhe ʋn se ˈˈjhriinmɔn- ʋn se ˈo dhi zi ˈdhee- ˈˈjhri ˈdhe, ˈklaa ˈman bhaeɛ- ʋn dhi, -ˈŋwɔɔn -aaˈ ˈˈɲɩn sʋn ˈˈdhe po -aaˈ bhaeghwlu -dheinˈˈ bho.’ Ɲɔnsoa aˈ ˈˈgbu klaaˈˈ -ˈnʋn -e bhaeghwlu- Salomɔn toa ˈdhe ɔ bho ɛ, -kawɛ Zoova ˈjhɩ -ɛ? -Jɛn Salomɔn gwɛa bhae- nanˈ ˈsʋ ɛ, nɛn ˈghwlʋ ˈe jhaʋn ˈdhi -ɛ -siin -baanˈ- -ˈnɔn ɔnˈ klɛɛ. Zoova toɛˈ -ka ˈˈgbu- klaaˈ -ˈnʋn ˈbhlea ɔɔˈ ˈmʋnan. Israɛkɔʋn ˈjhea ɛɛˈ dhɛ tu ˈsʋ ɛ, ɛ pʋbʋ ˈmʋnan -gwlɩˈˈ.

Ɲʋn anˈ klɛɛ nɩan ˈo Israɛ -bhlʋa- ˈdhi -e ɲʋn nɩan ˈbhlʋɩ sia ˈo ˈdhii ɛ, ʋʋ jhibhiˈ -ka Salomɔn nɩan tɔˈ ˈdhi ɛ. Ɲʋn ˈbhlea ʋaˈ ˈkledɩ ɛ, ʋa jhiɛ ˈdhe ɔ bho ʋa deeɔ ˈsrɩn in ˈˈdhe ɔɔ pʋbʋ sʋn bho. ˈBheɔ -ɲnʋnkpaoˈ ˈghwlʋa Saba aˈ, ʋn jhiɛ ˈdhe ɔ bho ʋn ˈyeɔ dɩ -ɩanˈ ˈdhe -zaa kman ˈˈan i dee-. Ʋn ˈjhea -ka ɔ nʋan ɩanˈ ˈdhe -za sʋn ɛn, ʋn ˈnaan dhɛ ɲʋn an ˈtmʋan ˈɩn seɛ -gwlɩˈˈ de -dhe. ˈKlaa -kaan ka ˈman ˈjheɛ ˈˈkpei -ka nɩan tɔˈ ˈdhi ɛ -ziia- -jɛn ɲʋn ˈtmʋʋan ˈmʋn ɛn. -Manˈ Ɲɔnsoa Zoova po ʋn ˈˈniman.’ Dhɩ aˈ klɛɛ nɩan ˈbho Israɛ -bhlʋa- ˈdhi ɛ, ɩn -nɩɛn- -kajɔɔnka ˈˈdhe Israɛkɔʋn- -nɩɛn- ˈmʋnan inˈ -dhe. ˈKlaa nɔnˈˈ ɔn muɛn -ɲnin ˈˈdhe ɩanˈ dhɩ tu ˈye ˈˈɩ zian-.