ˈBheɔglɔ- ˈghwlʋɛ ˈsɔɔn

-Da Salomɔn ɔn ˈˈɲɩanˈˈ Zoova -dhe ɛ, ˈflɛ -nɩn ˈo Israɛ. ˈKlaa -mɩɩnˈˈ mɩɩnˈˈ ˈsʋ Salomɔn zianˈˈ, ɔ ˈbhleɛ ˈɲnʋnkpaeˈ ˈsrɩ -duuˈˈ -ʋa- ˈˈɲɩn -baadhɩ- -ke. Zoova ˈkpa ˈcɛn ˈjɛɛn-. Ɔ -ghwluɛ- ˈdhe ɔ bho ɔ ˈnaan: ‘ˈMan muɛn Israɛ -bhlʋa -manˈ ˈˈgbuzɔncɛ ˈkwa -za ˈˈdhe ɔ ˈye ˈfɛ ˈsɔɔn ˈghwlʋ. ˈMan muɛn ɔɔˈ ˈfɔ klaaˈˈ -manˈ dhbhonʋʋn anˈ dhueˈ ˈˈɲɩn-. ˈˈDhe ˈye ɔɔˈ ˈfɔ ˈzaan- -manˈ ˈˈgbuzɔncɛ ˈˈɲɩn.’

Dhɛ Zoova ˈyea nʋn ɛn, ɔ ˈtmʋn ɛɛˈ dɩ ˈmɛn. Zeroboamʋn nɩan Salomɔn ɔnˈ dhbhonʋʋn anˈ dhueˈ ɛ, ɔ ˈˈsiɛˈˈ naanˈ ˈsʋ ɔ -nɩn ghwlukwajhaai- Aiya -ˈŋmʋʋnˈ. Aiya ˈfaiɛ- ɔɔˈ ˈmʋnpaadhɛ i, ɔ zɛ ˈfɛ ɛˈ 12 ˈˈdhe ɔ -ghwlu ˈdhe Zeroboamʋn bho ɔ ˈnaan: ‘Zoova a muɛn Israɛ ɛˈ ˈbheɔdhɛ Salomɔn ɔnˈ ˈˈgbuzɔncɛ ˈkwa -za ˈˈdhe ɔ ˈyeɛ ˈfɛ ˈsɔɔn -za. -Za ˈo ˈfɛ 10 dhɛ nɩan ˈo ɛ, -man muɛn ˈbheɔ -nɩn ˈbho ˈcɛdhri 10 ˈˈkpe.’ Salomɔn ˈŋwɔan dɩ -ˈnɩn ɛn, ɔɔ ˈbɔn ɔ ˈye Zeroboamʋn dhbhaˈ. ˈSʋ Zeroboamʋn pleˈ ɔ ye Ezipʋ mun. Nɔnˈˈ pla zia, Salomɔn ˈmɛɛn ˈˈdhe ɔɔˈ ˈˈjhu Roboamʋn ˈkpa ˈbheɔ. Zeroboamʋn ˈnaan ɔ ˈbhɛɛˈ bhla ɔ ˈye Israɛ mun. ˈˈDhe ɛmɛn- ɔ nʋn.

Israɛ ɛˈ ɲankɔʋn -ghwluɛ- ˈe Roboamʋn bho ʋʋ ˈnaan: ‘-Bho -nmɔn ˈdhi ŋwɔn ˈdhe ˈcɛ bho ɛˈ, ʋa muɛn ˈbhoo- ˈˈbun in -kpʋn.’ ˈKlaa Roboamʋn ɔnˈ dhaiˈˈ -ˈˈwe nɩan ɲʋnjhae- -ʋʋ -nɩn ɔ ˈbhɛɛa ˈmʋn -ghwluɛ- ˈdhe ɔ bho ʋʋ ˈnaan: ‘-Manˈ peeɛ ŋwɔn -dhe ˈdhe ˈcɛ bho. Nʋɛn ʋʋ ˈye dhbho kman ˈˈan nʋn!’ Roboamʋn poɛ ɔɔˈ dhaiˈˈ -ˈˈwe -dheinˈˈ bho, ɔ -ɲniɛn- ˈdhi ŋwɔn ˈdhe ˈcɛ bho. Ɛ nʋɛnˈ ˈcɛ ˈse ˈbɔn ʋʋ ˈyeɔ ŋwɔn ˈjhe -dheeˈ ka. ˈCɛdhri 10 bhla ˈo Zeroboamʋn ˈdhe ɔ ˈye ʋbʋ aˈ ˈbheɔ -nɩn. Ɲʋn an ˈdhaa ʋbʋ Israɛ ɛˈ ˈbheɔglɔ-. ˈCɛdhri ˈsɔɔn sia ˈo ɛ, -ˈmɩn kpʋɛn ˈo Roboamʋn ˈˈbun in. Ɲʋn an ˈdhaa ʋbʋ Zida aˈ aˈ ˈbheɔglɔ-. Israɛkɔʋn anˈ ˈcɛdhri nɩan 12 ɔn, ɩn ˈghwlʋɛ ˈsɔɔn.

Zeroboamʋn ˈse ˈbɔn ˈcɛ bhla ˈbho ɔ ˈdhe ˈye Zoova ˈˈɲɩanˈ mun ˈdhe Zelizalɛmʋn. Jhibho- dhɛ nɩan ˈo ˈmɛn? Dhɛ nɩan ˈo ɛ, Roboamʋn -ɔn po Zelizalɛmʋn -glɔ jie bho. ˈˈDhe Zeroboamʋn ˈse ˈbɔn ɔɔˈ ˈcɛ ˈyeɔ dhbhaˈ -wɛeˈ ʋʋ ˈye ˈe Roboamʋn bho dhe mun ʋʋ ˈye ɔɔˈ dhbho nʋn ɛmɛn- ɛnˈ -faʋn an nʋɔn. Ɛɛˈ dɩ ɔ nʋn ˈˈbhliɲnun- ˈsɔɔn -nʋʋan ˈsanʋnˈ -wɛeˈ ɔ mun ˈe ˈcɛ bho ɔ ˈnaan: ‘Zelizalɛmʋn -tɛnˈ, aʋ ˈbhɛɛˈ aʋ ˈye Ɲɔnsoa ˈˈɲɩn da.’ ˈBhomɔn- ˈcɛ -dee ˈˈbhliɲnun- ɲʋn -nʋʋan ˈsanʋnˈ anˈ ˈˈɲɩanˈˈ. Ɛ nʋɛnˈ ʋʋ ˈˈmaeɛ- Zoova bho.