-Doaɲnɔnˈ dhueˈ aˈ ˈˈjhu -ɲmau jhiɛ ˈkmʋn dhe

ˈˈNin ˈbhɔa dhbha dɩ ɛ, Zoova -ghwluɛ ˈe Eli bho ɔ ˈnaan: ‘Mun Sarɛpʋta aˈ. -Bho ɲnin ˈe ɛˈ, ˈɲnʋnkpaoˈ dhueˈ -ʋanˈ -kʋan- ˈmɛan, ʋmʋn- ˈye ʋn dhiidhɛ ˈˈɲɩn.’ Ɔ ɲnian ˈo ˈˈkwiglɔ- -ˈnɔn ɔnˈ -paa nanˈ an, Eli ˈjheɛ -doaɲnɔnˈ dhueˈ -nɩn -nae- ˈtɛanˈ. Ɔ ˈnaan ʋn ˈˈɲɩɔnˈˈ ˈˈnin ɔ ˈye ˈnan. Ʋan muan ˈˈnin ˈbɔanˈ an, Eli -ghwluɛ ˈdhe ʋn bho ɔ ˈnaan: A -kɔngɩnˈ a -jha ˈʋn dipɛn -dhɛ ˈˈzaan ˈye dhi.’ ˈSʋ ʋn -ghwluɛ- ˈdhe ɔ bho ʋn ˈnaan: ‘ˈƖn se dipɛn ˈbhle. ˈKlaa ˈɩn ˈbhleɛ faipʋn- -dhɩ ˈˈzaain -e ˈcran ˈmɔn -e ˈman ˈˈjhu -ɲmau -a ˈyea dhi ɛ.’ Eli -ghwluɛ- ˈdhe ʋn bho ɔ ˈnaan: ‘-Bho a nʋn dipɛn a ˈˈɲɩn ˈʋn ɛnˈ, aa muɛn ˈcran -e fai ˈjhe- -ɛ ˈghwlʋa ˈnɔn -zʋn nʋn ˈdhi -ɛ ˈyea ˈˈnin ɛnˈ dhbhaaˈ -jhɛɛ, ˈkamɔn- Zoova ˈdha.’

-Doaɲnɔnˈ -ˈnʋn muɛn ˈdhe ʋn ˈˈŋwɛn ˈˈdhe ʋn nʋn dipɛn nʋn -wɛeˈ ʋn ˈˈɲɩɛnˈˈ Zoova aˈ ghwlukwajhaai-. -Ka Zoova nʋan ɛɛˈ ˈtmʋn sʋn ɛn, ʋmʋn -e ʋanˈ ˈˈjhu -ɲmau -e ʋʋ ˈjheɛ dhɛ ʋʋ ˈye dhi nɔnˈˈ ɔnˈ klɛɛ ˈˈnin ˈseaˈ dhbha. Ʋanˈ ˈcran -jhae -e fai -jhae ˈse ˈdhii -gwɛ.

Ɛ ˈyea ˈo ˈbhɔɔ- ɔ, dhɛ dhueˈ -nʋʋɛn -ɛ se ˈˈjhriinmɔn- ˈjɛɛn-. -Doaɲnɔnˈ -ˈnʋn anˈ ˈˈjhu -ɲmau ˈkpa ˈghwɛ ˈˈdhe ɔ ˈmɛɛnˈ. -Doaɲnɔnˈ -ˈnʋn bhaeɛ- Eli i ɔ ˈyʋ sʋn bho po. Eli ˈˈdhuɛ- ˈˈjhu ˈˈzaan ˈmʋn ˈdhe ʋn ˈkwa ɔ yeɔ ˈe ˈˈgbu -die- nɩan ˈe ˈˈjha ˈdhi kpa ɔ yeɔ i ˈpɛɛn- ˈbho ˈˈkpepɛndhɛ- ˈˈkpe. ˈˈDhe ɔ bhae- ɔ ˈnaan: ‘ˈMan bhae- mʋn ˈmɛn Zoova, -jha ˈˈjhu ˈˈzaan -ˈnɔn ˈkmʋn dhe.’ Dhɛ ɔɔ deea Zoova i ɛ, ɛɛ ˈˈmaan ɲʋn taiˈ. Jhibho- dhɛ nɩan ˈo ˈmɛn? Ɛmɛn -nɩn, ɲɔn ˈse ɲɔn ˈkmʋn dhe -jha kpɔ dhueˈ ɲʋn ˈse ˈŋwɔn ke -dhe. ˈˈDhe -doaɲnɔnˈ -ˈnʋn -e ʋanˈ ˈˈjhu -ɲmau se Israɛkɔʋn -nɩn.

ˈSʋ ɛ, ˈˈjhu ˈˈzaan- -dee fɔanˈ ˈmɛn: Ɔ ˈjhiɛ ˈkmʋn dhe! Eli -ghwluɛ- ˈdhe ˈɲnʋnkpaoˈ -ˈnʋn bho ɔ ˈnaan: ‘A -ŋmʋn da, aaˈ ˈˈjhu jhiɛ ˈkmʋn dhe.’ ˈMʋnan an ˈnʋn ˈjɛɛn- ˈˈdhe ʋn -ghwlu ˈdhe ɔ bho ʋn ˈnaan: ‘-Nɩɛn- Ɲɔnsoa aˈ dhbhonʋin- ˈjaa! Dhɛ nɩan ˈo ɛ, dhɩ aˈ klɛɛ -man ˈtmʋan ɩan ˈghwlʋɛ ˈe Ɲɔnsoa bho ˈˈdhe ɩan ɲnin ˈo ˈmɛn.’