Zoova -kuuɛ Eli ɔˈ -pɛɛ i

Zezabɛlɩ ˈŋwɔan dhɩ -jhiia Baalɩ aˈ ghwlukwajhaaʋn dhi ɛ, ʋn ˈkpa ˈcɛn. Ʋn dhbhoɛ ɲʋn ˈdhe Eli bho ʋn ˈnaan: ‘-Glaeˈˈ ɛ, -man muɛn ˈmɛn- -ka Baalɩ aˈ ghwlukwajhaaʋn nʋan ˈmɛn sʋn ɛn.’ -Faʋn kpʋn Eli ˈmɛn, ɔ pleˈ ɔ ye ˈdhe -bɩɛnˈˈ -bhlʋa ˈˈkpe mun. Ɔ bhaeɛ- Zoova i ɔ ˈnaan: ‘Zoova ˈɩn seɛ ˈˈŋwɛn ˈbhɛɛ- bhla, ˈˈtai- ˈmʋn in ˈye ˈmɛn. ˈSʋ ɔ ˈkpa ˈˈɲɩnɔnˈˈ ˈbho tu dhueˈ ˈzɔn, ɔ seaˈ -dhe ˈjɛɛn-.

Dhbhoozuu- dhueˈ zɔ ˈˈɲɩnɔnˈˈ ˈˈdhe ʋn ˈpɛɛn- ghwlu i ʋn -ghwlu ˈdhe ɔ bho ʋn ˈnaan: -Sɔmʋn -ˈye dhɛ dhi.’ Eli sɔan ˈmʋn ɛn, ɔ ˈjheɛ dipɛn ˈbho ˈseiˈˈ zia nɛnˈ ˈˈkpe ɛmɛn -e ˈˈninjhae -e. Ɔ dhiɛ dhɛ, ɔ ˈnaanˈ ˈˈdhe ɔ ˈkpa ˈˈɲɩnɔnˈˈ -kenɛnˈ. Dhbhoozuu- -ˈnʋn zɔ ˈˈɲɩnɔnˈˈ -kenɛnˈ ˈˈdhe ʋn -ghwlu ˈdhe ɔ bho ʋn ˈnaan: ‘Dhi dhɛ, -ˈye ˈkpɩ ˈbhle -wɛeˈ -ˈye jie ɲan kpa.’ Eli dhiɛ dhɛ -kenɛnˈ. -Wɛeˈ ɔ ˈˈdhuo- jie mun ɔ -nan ˈghwɩ aˈ 40 ˈˈmaʋn glu aˈ 40 ɔ ye ˈdhe Orɛbʋ trʋ ˈˈkpe mun. Ɔ ɲnian ˈe ɛ, ɔ pa ˈe trʋ aˈ ŋwɔn ˈdhi ɔ ˈye i ˈpɛn. ˈKlaa Zoova -ghwluɛ ˈdhe ɔ bho, ɔ deeɔ i ɔ ˈnaan: ‘Dhɛ -man nʋn da -a Eli?’ Eli -ghwluɛ- ˈe Zoova bho ɔ ˈnaan: ‘Ghwlu Israɛkɔʋn cɛan ˈdhee- bho ɛ, ʋʋ ˈsʋ i kpʋn. Ʋʋ -za -manˈ ˈsraakpeza dhi i ˈˈdhe ʋʋ dhbhaˈ -manˈ ghwlukwajhaaʋn ˈmɛn. -Kaan ka bhla, ɛ nɩn ˈmɔn- ʋa ˈbɔn ʋʋ ˈye dhbhaˈ.’

Zoova -ghwluɛ- ˈdhe ɔ bho ɔ ˈnaan: ‘ˈˈSi ˈzɔn, -ˈghwlʋ ˈe trʋ aˈ ŋwɔn ˈdhi -ˈmɛn -ŋmʋn ˈnɔn.’ Ɛ ˈyea -dee ɛ, poɔˈ klaaˈˈ dhueˈ zi ˈbho trʋ ˈˈjhibhaˈ, ˈbho ɛ ˈdhe ɛ, ˈbhlʋa trɛˈ ˈˈdhe nɛn ˈˈsi ˈzɔn. Ɛ ˈyea ˈo ˈbhɔɔ- ɔ, Eli ˈŋwɔn ghwlu -ʋn -nmɔn ˈe ɲʋn -dheinˈˈ dhii ˈˈdhe -ʋn -peeɛ ŋwɔn. ˈSʋ ɔ ˈˈdhuɛ- ɔɔˈ ˈmʋnpaadhɛ ɛˈ -dhouˈˈ ˈmʋn ɔ ˈye ɔɔˈ ˈˈjhibhaˈ i ˈˈdu ˈˈdhe ɔ mun in -ɲnaanˈ ˈbho trʋ ɔ nɩan ˈe ˈdhi ˈˈŋwɛn. Zoova dee ɔ dhi ɔ ˈnaan dhɛɛdɩ- ɔ ple -ɛ. Eli ˈnaan: ‘ˈƖn -siɛ- dhueˈ ˈman yea ʋn ˈˈɲɩn.’ Zoova -ghwluɛ- ˈdhe ɔ bho ɔ ˈnaan: ‘ˈˈƖɩn- se dhueˈ -nɩn. Ɲʋn anˈ 7.000 -nɩn ˈe Israɛ -ʋa- kpa ˈman ˈˈɲɩanˈˈ ɲan. Mun -ˈye Elize ghwlukwajhaai- po, ɔmɔn- -ˈye ˈbho -manˈ gɔˈ ˈˈɩ ˈˈsii-.’ Eli ˈˈdooˈ ɔ ye dhɛ Zoova deeɔ dhi nʋn. ˈBhoo- -gwlɩˈˈ ˈdhee -bho nʋn dhɛ Zoova a deea mʋn in ɛnˈ, ɔɔ muɛn ʋn sʋn bho -po? Ɛɛn, ɔɔ muɛn ʋn sʋn bho -po. Nɔnˈˈ -ɔ ˈdhe ˈdhi ˈˈnin seaˈ dhbha a, dhɛ -dhee -ˈnɛɛn -nʋʋɛn -kenɛnˈ. -Bo -ɔɔ jhia, ɔɔ muɛn ɛɛˈ dɩ ˈtmʋn-.