Zoadɩ ɔˈ -pɛɛikuɛ-

Zezabɛlɩ ˈbhleɛ ˈˈjhu -ɲnʋnkpao- dueˈ ʋanˈ ˈɲnɩn -nɩn Atali. Atali -ɲnɩɛn- ˈdhi ŋwɔn -dhe -ka ʋanˈ ˈdhou nɩan. Ʋn -nɩɛn- Zida aˈ ˈbheɔ ɔˈ ˈɲnɔn -dhe. Ʋanˈ -kʋan- ˈmɛan ˈsʋ ɛ, ʋanˈ ˈˈjhu ˈkpa ˈbheɔ. ˈKlaa ʋanˈ ˈˈjhu ˈmɛan ˈsʋ ʋn ˈjha ˈo ˈbheɔ -kpaa- ˈˈkpe ˈˈdhe ʋn ˈkpa ˈbheɔ. ˈBho ɛ ˈdhe ɛ, ɲʋn anˈ klɛɛ ˈbhɛɛa -ʋʋ- ˈyea ˈbheɔ ˈkpa -dhe ɛ, ʋan ˈbɔn ʋn ˈyʋbʋ i -za. Ɛɛˈ dɩ ʋn ˈdhbha ɲmai aˈ ˈklɛɛ nɩan ˈbheɔ ɔˈ -gbuzɔncɛ. Ʋn ˈdhbha ʋan ˈˈnanɲnʋʋn ˈmɛn -ke. Ʋanˈ -faʋn an nʋn ɲʋn anˈ klɛɛ ˈmɛn.

ˈSraazai- -klaaˈˈ Zoadɩ -e ɔɔˈ ˈɲnɔn Zozabɛtɩ jhibhiˈ -ka dhɩ Atali a nʋan nɩan dhɩsaɩn- ɛn. Ʋʋ ˈse ˈmɛanˈ -plee ʋʋ ye ʋanˈ ˈˈnaɲnʋʋn anˈ dhueˈ i duˈˈ -da ɔ nɩan ˈˈjhu -pliɛ. Ɔɔˈ ˈɲnɩn -nɩn Zoasɩ. Ʋʋ ˈbhʋʋɔˈ ˈdhe Ɲɔnsoa aˈ ˈˈgbu -klaaˈˈ ˈdhi.

-Da Zoasɩ ˈbhlea -zɩn -ˈˈmɛsɔnˈ ɔn, Zoadɩ ˈgbooɛ- ˈˈdhrujeʋn- -e Levi ɔˈ ˈcɛ ɛˈ klɛɛ i -wɛeˈ ɔ -ghwlu ˈdhe ʋbʋ bho ɔ ˈnaan: ‘Aʋ -de Ɲɔnsoa aˈ ˈˈgbu -klaaˈˈ aˈ -kwli ˈˈŋwɛn, aʋaˈ ˈˈtai ɲɔn in ɔɔˈ pa -dhe’. ˈˈDhe ɔ po Zoasɩ ˈBheɔ ˈbho Zida -bhlʋa ˈˈdhru, ɔ deɔ ˈbheɔgblaˈ ˈˈdhru. ˈCɛ ɛˈ klɛɛ ˈˈŋwɔɔˈ ʋʋ ˈnaan: ‘ˈBheɔ ˈye ˈkmʋn -gwle!’

Atali ˈŋwɔan ɲʋn anˈ ˈgɩ ɛ, ʋn ˈˈdooˈ ʋn ye ˈe Ɲɔnsoa aˈ ˈˈgbu -klaaˈˈ ˈdhi mnn. Ʋn ˈjhea ˈbheɔ -dhee ˈsʋ ʋn ˈˈŋwɔɔˈ ʋn ˈnaan: “Aʋ poɛ ˈʋn ˈsrɛ i! Aʋ -za ˈʋn bhʋ ˈdhe!” ˈˈDhrujeʋn- kpʋn Atali ˈmɛn ʋʋ yʋ ˈdhe ˈbheɔgbu ˈdhi kpa ˈˈdhe ʋʋ ˈdhbhʋ. ˈKlaa ˈdhe -zɩn -duuˈˈ ˈdhi ɛ, Atali nʋɛnˈ -dhe ˈcɛ ye dhɩsaɩn- nʋn. Dhɛwɛ- -ˈye -nʋʋɛn- bhla -a?

Zoadɩ poɛ Zidakɔʋn- sʋn bho, -wɛeˈ ʋʋ -nɩn Zoova ˈye dɩ ˈˈdu, dhɛ -ˈmɛn ˈdha a ɛ -mɛn -nɩn ʋʋ ˈye ghwlu cɛn ˈˈdhe ʋʋ ˈye ɔɔˈ ˈsʋ ˈˈɲɩn. Ɔ ˈtmʋʋn ʋbʋ ˈmɛn -ke ʋʋ ˈye Baalɩ ɛˈ -ˈˈgbi -e -baadhɩ- i -ghwaa. Ɔ ˈtmʋʋɛn- ˈsraazaʋn- -e Levi ɔˈ ˈcɛ ʋʋ ˈye dhbho nʋn ˈdhe Ɲɔnsoa aˈ ˈˈgbu -klaaˈˈ ˈdhi -wɛeˈ ˈcɛ ɛˈ klɛɛ ˈye jhi ʋʋ ˈye Ɲɔnsoa ˈˈɲɩn -dheeka. Ɲʋn -an dea Ɲɔnsoa aˈ ˈˈgbu -klaaˈˈ aˈ -kwli ˈˈŋwɛn ɛn, ɔ ˈtmʋʋn- ʋbʋ ˈmɛn ɔ ˈnaan, ʋaˈ ˈˈtai- ɲʋn sea i -gwɛ i -dhe ʋaˈ pa ˈe -dhe. ˈBho ɛ ˈdhe ɛ, Zoasɩ -e ˈˈdhrujheʋn- kpa Zoasɩ ˈdhe ˈbheɔgbu ˈdhi ˈˈdhe ʋʋ deɔ ˈo ˈbheɔkpaa- ˈˈkpe. Ɲʋn anˈ klɛɛ nɩan ˈe Zida a nʋɛn ˈmʋnan-. Ʋʋ ˈghwlʋa ˈe Atali -e Baalɩ ɛˈ ˈˈɲɩanˈˈ anˈ -kʋɔn- -kwlaˈ a, ʋʋ ˈbhɛɛˈ bhla ʋʋ ˈye Zoova ˈˈɲɩn. ˈDhɛ Zoadɩ -kʋʋa -pɛɛ i ɛ, ɛ nʋɛnˈ ɔ ye ɲʋn -duuˈˈ sʋn bho po, ɛ seɛ -mɛn?