Zoova ˈmain ˈdhe Zonasɩ bho

Ninivʋ -nɩɛn- Asilikɔʋn anˈ ˈˈkwiglɔ- dhueˈ. Ɲʋn ˈˈtiaˈˈ ˈo ɛ, ʋa nʋɛn dhɩsaɩn-. Zoova dhbhoɛ ɔɔˈ ghwlukwajhaai- Zonasɩ ˈdhe ʋbʋ bho -wɛeˈ ɔ ˈyʋbʋ ˈtmʋʋn- ʋʋ ˈye kplɩn ˈˈɩn zian-. ˈKlaa Zonasɩ pleˈ ɔ ye -da -dhee -ˈnɔɔn mun. Ɔ ˈjha ˈe bato -ɔɔ muan Taasisɩ ˈdhi.

Ʋa muan -wɛeˈ ʋʋ ɲnian ˈo ˈtɔnin ˈˈkpe ɛ, ˈpʋɔˈ -e ˈˈnin -dee jhiaˈ ˈmɛn. -Faʋn an nʋn ɲʋn -an tbha bato ˈmɛn. Ʋʋ bhaeɛ- ʋaˈ gɩlɩ-, ʋʋ deeɛ dɩ i ʋʋ ˈnaan: ‘Dhɛɛdɩ- -wɛeˈ pʋɔˈ -dɩ ka -a?’ Zonasɩ -ghwluɛ- ˈdhe ʋbʋ bho ɔ ˈnaan: ‘Ɛ nɩn ˈmɔn- -ɔ nʋɛn. ˈƖn pleˈ, ˈɩn ˈse dhɛ Zoova deea ˈmʋɩn nʋn. Aʋ ˈˈvile- ˈmʋn ˈbho ˈtɔnin ŋwɔn, ɛɛ muɛn -nʋn ˈˈnin -e ˈpʋɔˈ ˈye i -ɲnan.’ Ɲʋn -an tbha bato ˈse ˈbɔn ʋʋ ˈyeɔ ˈbho ˈˈniɔn po, ˈklaa ɔ ˈnʋbʋ mlanˈˈ. ˈSʋ ʋʋ ˈˈdhuɔ- ˈmʋn ˈmɛn ʋʋ yeɔ ˈˈvile- ˈbho ˈtɔnin ŋwɔn, ɛ nʋɛnˈ pʋɔˈ -e ˈˈnin ye i -ɲnan.

ˈBho Zonasɩ -gwlɩˈˈ -dhe ɛ, ɔ ˈye ˈmɛn. Ɔɔ pa ˈe ˈtɔnin ˈzɔn ˈsʋ ɛ, ɔ bhaeɛ- Zoova. Zoova -jha zmiɛn- -klaaˈˈ dhueˈ. Zmiɛn- -ˈnɛn mlɔnˈ, ˈklaa ɛ ˈseɔ dhbhaˈ. ˈDhe zmiɛn ˈdhi Zonasɩ -nɩn -wɛeˈ ɔ bhae- Zoova: ‘ˈMan cɛn ghwlu, ˈman muɛn ʋn ŋwɔn ˈjhe- -dheeˈ ka ˈdhe ˈman ˈkmʋn ˈdhi.’ Zoova -fuɛ- Zonasɩ ˈdhei ˈdhe zmiɛn- -klaaˈˈ ˈdhi ɔ ye ˈe ˈghwɩ taan nʋn. ˈˈDhe Zoova ˈtmʋʋn- zmiɛn ɛ zɔ ŋwɔn ˈbho ˈbhlʋa ˈˈkpe.

Zoova ˈpʋʋ Zonasɩ ˈmɛn. -Kaan ka bhla, -mɛnˈ Zonasɩ ˈse Ninivʋ -mun in? ˈˈƖɩn- Zoova ˈnaan, ɔ mun Ninivʋ. Zoova ˈtmʋan ɛɛˈ dhɛ tu ɛ, Zonasɩ ˈjheɔ ŋwɔn. Ɔ muɛn Ninivʋ ˈˈdhe ɔ ˈtmʋʋn- ɲʋn ɲnian ˈdhi ŋwɔn -ʋʋ ˈˈtiaˈˈ ˈe ɔ ˈnaan: ‘ˈDhe ˈghwɩ aˈ 40 ˈdhi aʋaˈ ˈˈkwiglɔ ɔ muɛn i -zaa.’ ˈSʋ dhɛ dhueˈ ɲnin ˈo -ɛ -ˈˈmaan- ɲʋn taiˈ: Ɲʋn ˈˈtiaˈˈ ˈbho Ninivʋ ɛ, ʋʋ poɔ -dheinˈˈ bho ʋʋ ye kplɩn ˈˈɩn zian-. ˈBheɔ nɩan ˈo -glɔ -ˈnɔn ˈdhi ˈtmʋʋn- ɔɔˈ ˈcɛ ˈmɛn ɔ ˈnaan: ‘Aʋ bhae- Ɲɔnsoa, aʋ jhibho- aʋaˈ dhɩsaɩn- ˈˈɩn, aʋ zian- kplɩn ˈˈɩn. Ɛgwɛ ɔ ˈse -aʋ i -za i.’ ˈCɛ bhla ˈbho ɔɔˈ ghwlu ˈdhe ʋʋ ye ʋaˈ kplɩn ˈˈɩn zian-. Dhɩ ʋa nʋan -ɩn sea ˈˈjhriinmɔn- -dhe ɛ, ʋʋ ˈbhʋɩ bho. Zoova ˈjhea ɛɛˈ dhɛ tu ɛ, ɔ ˈse Ninivʋ i -za.

Zonasɩ ˈkpa ˈcɛn, dhɛ Zoova ˈsea Ninivʋ i -za ɛɛˈ dɩ. Aʋ -naan tɔˈ i keaˈ: Zoova ˈmain ˈdhe Zonasɩ bho ɔ ˈjheɛ ɔɔˈ -ghwɛe-, ˈklaa Zonasɩ ˈse Ninivʋkɔʋn anˈ -ghwɛe ˈjhe. Ɔ ˈghwlʋ ˈo ˈˈkwiglɔ- -ˈnɔn ˈdhi ˈmɛn, ɔ muɛn ˈo tu dhueˈ ˈzɔn ɔ ye i -de ˈˈdhe ɔ ˈkpa ˈcɛn. Tu -ˈnʋn ˈmɛan ˈsʋ ɛ, ɔ ˈkpa ˈcɛn -kenɛnˈ. ˈSʋ Zoova -ghwluɛ- ˈdhe ɔ bho ɔ ˈnaan: ‘-Mɔn ˈjheɛ tu aˈ -ghwɛe-. ˈˈDhe ˈmɔn ɔn, ˈɩn ˈjheɛ Ninivʋkɔʋn anˈ -ghwɛe-. Ɛmɛndɩ ʋʋ ˈse ˈmɛn.’ ˈSrɩn -wɛ -a ˈye ˈe -bo -ˈnɔn ˈdhi -za -a? Ɲʋn ˈˈtiaˈˈ ˈbho Ninivʋ ɛ, ʋʋ ˈdha dhɛ ʋʋ ye tu -zii.