Dhbhoozii- a ˈtmʋɛn Zezi ɔˈ ˈghwlʋ -dɩ

Rɔmʋnkɔʋn anˈ ˈbheɔ Sezaa Ogisɩ ˈtmʋʋɛn- Zifʋ -ˈˈwe aˈ klɛɛ ʋʋ ˈye ˈˈkwigwlɛ- ʋʋ ˈghwlʋa ˈe ˈdhi mun ʋʋ ˈye ʋaˈ ˈɲnɩn ˈsɛɛ ˈdhi po. Ɛɛˈ dɩ Zozɛʋ -e Mai mun Bɛtelɛmʋn dhe, ˈnɔn Zozɛʋ ɔˈ ˈcɛ ˈghwlʋa. Mai aˈ -ŋmaan nɔnˈˈ ˈˈkʋaan in -dhe.

Ʋʋ ɲnian ˈbho Bɛtelɛmʋn ɛn, -da ʋʋ ˈyea ˈpɛn ˈbho se -nɩn. -Da ʋʋ ˈjhea ʋʋ ˈyea ˈpɛn ɛn, ɛ nɩn ˈdhe ˈbhlae -e -gbaeˈ aˈ ˈˈgbu ˈdhi. ˈDhemɔn- Mai ˈghwlʋʋ- ʋanˈ ˈˈjhu -ɲmau Zezi. Ʋn ˈˈfiɔn -draˈˈ i ˈˈdhe ʋn ˈpɛɛɔn in ˈdhe ˈbhlaeˈ aˈ ˈdhidhiidhɛ ˈdhi.

ˈBho Bɛtelɛmʋn glɔ ˈˈbun ɛn, ˈbhlaedheideʋn- -ʋa- fuo ʋaˈ ˈbhlaeˈ ˈdhe i ˈˈmaun ˈdhe ˈkwlai. Ʋʋ nʋan kaˈ -dhe ɛ, dhbhoozuu- dhueˈ -ŋwaan ˈbho ʋbʋ ˈˈjhibhaˈ. ˈˈDhe Ɲɔnsoa aˈ ˈˈɩˈbheeɛ ɛˈ nɛn -gbaa ʋbʋ ˈˈkpe i. -Faʋn an nʋbʋ ˈmɛn. ˈKlaa dhbhoozuu- -ghwluɛ- ˈdhe ʋbʋ bho ʋn ˈnaan: ‘-Faʋn anˈ nʋn aʋ -dhe, ˈɩn ˈbhleɛ -bɔyaˈˈ -dɩ ˈye aʋ ˈtmʋʋn-. Ɲʋnpʋʋi- ˈghwlʋʋ ˈzɩan ˈbho Bɛtelɛmʋn.’ Dhbhoozuu- ˈtmʋan dɩ -ˈnɩn ɛn, dhbhoozii- -duuˈˈ -gwɛ dhe ˈdhe jhaʋn ˈdhi -ɩn ˈnaan: ‘Ɲɔnsoa aˈ ˈɲnɩn ˈye ˈˈɩ ˈbhɛ ˈdhe jhaʋn ˈdhi, ˈˈdhe ɲʋn nɩan da ˈbhlʋa ˈˈkpe ˈjhe -pɛɛ ɛˈ bhluaˈ.’ ˈSʋ ɩn ˈˈmaan ˈbho ʋbʋ ˈˈjhibhaˈ i. ˈBhlaedheideʋn- ˈjhea ɛɛˈ dhɛ tu ɛ, -kawɛ ʋʋ nʋn ɛn?

ˈBhlaedheideʋn- ˈnaan: ‘-A mun Bɛtelɛmʋn ˈˈdoo-.’ Ʋʋ ˈˈdooˈ ʋʋ ye mun ˈˈdhe ʋʋ -jhɛɛ Zozɛʋ -e Mai ɛmɛn -e ˈˈjhu -dhee ˈdhe ˈbhlaeˈ aˈ ˈˈgbu ˈdhi.

Ɲʋn anˈ klɛɛ -ʋʋ ˈŋwɔan dhɛ dhbhoozuu- ˈtmʋan ˈdhe ˈbhlaedheideʋn- bho ɛ, ˈtai ˈˈmaan ʋbʋ ˈmɛn. Dɩ dhbhoozuu- ˈtmʋan, Mai -naan ɩn tɔˈ i ˈˈdhe ʋn ˈsɩ bho ˈˈmae-. ˈBhlaedheideʋn- muɛn ʋaˈ ˈbhlaeˈ ˈdhei -deaˈ ˈˈdhe ʋʋ poɛ Zoova ˈsɛ- dhɩ aˈ klɛɛ ʋʋ ˈŋwɔan -e ʋʋ ˈjhea ɩanˈ dɩ.