Zoova nʋɛnˈ dhɛsaʋn ˈse Zezi ˈjhe

ˈDhe ˈbhlʋa dhueˈ nɩan ˈe Israɛ ɛˈ ˈjhrʋ aˈ ˈkwla ˈghwlʋanˈ an, ɲʋn -nɩn ˈe -dhe -ʋʋ deɛ -gwlɩˈˈ -ka ˈcɩanzɩɩn ˈbhɛɛa ɩn ˈyʋbʋ jie bho po ɛ. ˈDhe ˈˈmaʋn -glu dhueˈ ˈdhi ɛ, ɲʋn ˈghwlʋa ˈe ˈbhlʋa -ˈnɔn ˈdhi ˈjheɛ dhɛ dhueˈ ˈdhe jhaʋn ˈdhi -ɛ gɔ ˈcɩanzɩɩn, -ɛɛ fan ˈˈdhe -ɛɛ ˈghwlʋ -gwlʋɩnˈ. Ʋʋ bhla ˈbho ɛ ˈdhe. Ɛ kpʋbʋ Zelizalɛmʋn. Ʋʋ ɲnian, ʋʋ deeɛ- ɲʋn in, ʋʋ ˈnaan: ‘ˈˈJhu ˈˈzaan -ɔ ˈghwlʋa -ɔ ˈyea Zifʋ -ˈˈwe aˈ ˈBheɔ -nɩn ɛn, da ɔ -nɩn -ɛn? -A jhiˈ -wɛeˈ -a ˈye ˈˈdhru glu po ˈbho ɔ ˈˈjhibhaˈ.’

Erodɩ nɩan ˈbheɔ ˈbho Zelizalɛmʋn ɛn, ɔ ˈŋwɔan ˈbheɔ -dhee -ˈnɔɔn ɔnˈ ˈɲnɩn ɛn, ɔ ˈˈduɛˈˈ -zɔnˈ. Ɔ deeɛ- ˈsraazaʋn anˈ ˈˈdhrujhei- dhi ɔ ˈnaan: ‘-Dawɛ ˈbheɔ -ˈnɔn ˈye ˈghwlʋʋ- -ɛ?’ Ʋʋ ˈnaan: ‘Ghwlukwajhaaʋn ˈnaan ɔ ˈye ˈghwlʋ ˈbho Bɛtelɛmʋn.’ ˈSʋ Erodɩ -ghwluɛ- ˈe ɲʋn ˈgwlʋa ˈe ˈjhru aˈ ˈkwla ˈghwlʋanˈ bho ɔ ˈnaan: ‘Aʋ mun Bɛtelɛmʋn aʋ ˈbɔn ˈˈjhu ˈˈzaan -ˈnɔn in. -Bho aʋ ˈjheɔ ɔˈ, -ˈmɛn aʋ jhi aʋ ˈye ˈʋn ˈtmʋʋn-. ˈˈDhe ˈye mun -ke ˈye ˈˈdhru glu po ˈbho ɔ ˈˈjhibhaˈ.’ ˈKlaa Erodɩ ɔ ˈtmʋɛn sɩ.

“ˈCɩanzɩɩn-” -ˈnɛn ˈghwlʋɛ -gwlɩin -kenɛnˈ. Ʋʋ bhla ˈbho ɛ ˈdhe ʋʋ ye Bɛtelɛmʋn mun. Ɛ ɲnian Bɛtelɛmʋn ˈsʋ ɛ -ɲnain ˈbho ˈˈgbu dhueˈ ˈˈdhru. Ʋʋ pa ˈe ˈˈgbu -ˈnʋn ˈdhi. ˈˈDhe ʋʋ -jhɛɛ Zezi -e ɔɔˈ ˈdhou Mai. Ʋʋ poɛ ˈˈdhru glu ˈbho ˈˈjhu ˈˈzaan ˈˈjhibhaˈ ˈˈdhe ʋʋ ˈˈɲɩɔnˈˈ -baanˈ- -ɛ nɩan, ˈsanʋnˈ -e oliban -e mii. Zoova dhbho ɲʋn -ˈnʋn -wɛeˈ ʋʋ mun Zezi ˈjhea -dhe? ˈˈƖɩn-.

ˈDhe ɛɛˈ ˈˈmaʋn -glu ˈdhi ɛ, Zoova -ghwluɛ- ˈe Zozɛʋ bho ˈdhe ˈjha ˈdhi, ɔ ˈnaan: ‘Erodɩ ɔ ˈbɔn ɔ ˈye Zezi dhbhaˈ. Mun Ezipʋ, -mɔn -e -manˈ ˈɲnɔn -e ˈˈjhu ˈˈzaan -e. Aʋ ˈye i -de ˈdhemɔn, -bho ˈˈɩn ˈnaan aʋ jhi dhe ˈˈdhe aʋ ˈye dhe jhi.’ ˈSʋ Zozɛʋ -e ɔɔˈ ˈˈgbuzɔncɛ ˈˈdooˈ ʋʋ ye Ezipʋ mun.

Zoova -ghwluɛ- ˈe ɲʋn ˈgwlʋa ˈdhe ˈjhru aˈ kwla ˈghwlʋa bho, ɔ ˈnaan aʋaˈ mun ˈe Erodɩ bho dhe -dhe. Erodɩ ˈŋwin -ka ʋʋ poɔ ˈˈsrɛi ˈsʋ ɛ, ɔ ˈkpa ˈcɛn. Ɔ ˈsea Zezi ˈjhe ɛ, ɔ ˈtmʋʋɛn ɲʋn ɔɔ ˈye ɲmai -mɩɩnˈˈ anˈ ˈklɛɛ -ʋʋ nɩn Zezi ˈbhea mʋn ˈdhbha. Ɔɔ nʋɛn mɛɛn, -mɛn Zezi -teɛn bho, ɔ dheɛ ˈflɛ ˈmuin ˈdhe Ezipʋ.

Ɛ ˈyea ˈo ˈbhɔɔ- ɔ Erodɩ ˈmɛɛn-. Zoova -ghwluɛ ˈe Zozɛʋ ˈbho ɔ ˈnaan: ‘-Kaanbhla, -ˈbhɛɛ -ˈye dhe mun.’ Zozɛʋ -e Mai -e Zezi muɛn Israɛ dhe ˈˈdhe ʋʋ ˈˈti ˈbho ˈˈkwiglɔ- ɲʋn an ˈdhaa- Nazarɛtɩ ˈdhi.