Zan an poɛ Zezi ɔˈ jhiaˈ kpɔ ɔˈˈ

Zan nɩan Zakari -e Elizabɛtɩ aˈ ˈˈjhu -ɲmau ˈbhɛaˈˈ ˈsʋ ɛ, ɔ ˈkpa ghwlukwajhaai-. Zoova ˈˈɲɩɔn dhbho ɔ ˈye ɲʋn ˈtmʋʋn- -ka Ɲʋnpʋʋi- ɔɔˈ jhiaˈ ˈˈkʋaan dhi ɛ. ˈKlaa Zan ˈse ɲʋn dhɛ -tɔɔn ˈdhe zuifʋ -ˈˈwe aˈ ˈˈdhruigboogbi ˈdhii -aeˈˈ ˈˈkwigwlɛ- ˈdhii, ˈbho ɛɛˈ ˈgɔ ɔˈˈ ɔɔ bhla -bo ˈdhe -beɛnˈˈ -bhlʋa- ˈˈkpe. Ɲʋn nɩan ˈe Zelizalɛmʋn -e ɲʋn nɩan Zide -bhlʋa aˈ klɛɛ ˈdhei a jhiɛ ˈdhe ɔ bho -dhe -wɛeˈ ɔɔ -tɔɔn ʋbʋ dhɛ. Ɔ ˈtmʋʋn- ʋbʋ -ˈmɛn ɔ ˈnaan, -bho ʋʋ ˈye ˈe Ɲɔnsoa ˈˈjhriɛ ˈdhei -nmɔn ɔnˈ, -mɛnˈ ʋʋ ˈye dhɩsaɩn- anˈ nʋʋanˈ i -ɲnaan-. Ʋʋ gwɛa ɔɔˈ -dheinˈˈ bho poaˈ a, ʋaˈ -da -duuˈˈ jhibhɛ- ʋaˈ dhɩsaɩn- ˈˈɩn ˈˈdhe ɔ -jhaa ʋbʋ ˈˈninzɔnˈ ˈbho Zudɛn -gbʋʋ ŋwɔn.

Zan ˈse ˈˈghwlii ˈdhe ple. ˈMʋnpaadhɛ- ɔɔ -paa ˈmʋn -dhe ɛ, -ɲɔɔmɛɛnˈ ɛnˈ ˈˈbai- ʋʋ -nʋʋɛn- ˈˈdhe dhʋ -e -kpainˈˈ- -nɩn ɔɔˈ dhiidhɩ -dhe. Ɲʋn an deeɛ ʋaˈ ˈˈjɛ i ɲɔn ɔ nɩan gblein ɛn. Faiziɛn -e Sadiseɛn -ʋa- ˈbhɛɛa ʋaˈ ˈˈjɛ ˈˈɩ ɛ, ʋa jhiɛ ˈe ɔ bho -ke. Zan -ghwluɛ- ˈe ʋbʋ bho ɔ ˈnaan: ‘Aʋ ˈye kplɩn ˈˈɩn zian- ˈˈdhe aʋ ˈye aʋaˈ dhɩsaɩn- ˈˈɩn jhibho-. Aʋaˈ nʋn ˈka -dhe aʋ ˈdha dhɛ aʋ ˈye ɲʋn -ˈnʋʋn -zii. Aʋ ˈnaan aʋ -nɩɛn- Ablaamʋn ɔnˈ ˈˈɲnuun-. Dhɛ aʋ nɩan Ablaamʋn ɔnˈ ˈˈɲnuun ɛn, ɛ se -mɛnˈ aʋ -nɩɛn- Ɲɔnsoa aˈ ˈˈɲnuun- ˈˈkpɔ ˈˈkpɔ -nɩn.’

Ɲʋn anˈ -da -duuˈˈ jhi ˈe Zan bho ˈdhe ʋʋ deeɔ i ʋʋ ˈnaan: ‘Dhɛwɛ- -a ˈye nʋn ˈˈdhe -a ˈye Ɲɔnsoa ˈtʋn nʋn -ɛn?’ Zan -ghwluɛ- ˈdhe ʋbʋ bho ɔ ˈnaan: ‘-Bho aʋ ˈbhle ˈmʋnpaadhɩ- ˈsɔɔn ɔnˈ, aʋ -za ˈo dhueˈ aʋ ˈye ɲɔn sea ˈmʋnpaadhɛ ˈbhle ˈˈɲɩn.’ Dhɛ ɔɔ ˈbɔan ɔ ˈyea ˈtmʋn ɛn, ɛmɛn -nɩn -bho ɲɔn ˈye Ɲɔnsoa ˈˈtʋn nʋn ɛnˈ, ɔ ˈye ɲʋn -dhee -ˈnʋʋn anˈ dɩkman-.

Ɲʋn -an kpʋan lɛnpo ɛ, dɩ ɔ ˈtmʋan ˈdhe ʋbʋ bho ɩn ka: ‘Aʋ ˈsrɛɩˈˈ, aʋaˈ dhie- ɲʋn ˈˈdhrui -dhe.’ Ɔ -ghwluɛ- ˈe ˈsʋlɩˈˈ bho ɔ ˈnaan: ‘Ɲʋn anˈ paa aʋbʋ i -dhe -wɛeˈ aʋ ˈye ɲʋn ˈsea dhɛ nʋn dɩ -kpʋʋn.’

ˈSraazaʋn- -e Levi ɔˈ ˈˈɲnuun jhiɛ ˈe Zan bho -ke ˈˈdhe ʋʋ -ghwlu ˈdhe ɔ bho ʋʋ ˈnaan: ‘Ɲɔnwɛ- -nɩn -ɛn? Ɲʋn anˈ klɛɛ ɛ ˈbɔn ʋʋ ˈyeɛ jhibho-.’ Zan ˈnaan: ‘ˈƖn -nɩɛn- ghwlu ɲʋn an ˈŋwɔan ˈdhe -beɛnˈˈ -bhlʋa- ˈˈkpe, ˈman poɛ ɲʋn sʋn bho ʋa yea ˈe Zoova bho mun -ka Izai nʋan ɛɛˈ ˈtmʋn sʋn ɛn.’

Dhɩ Zan an tɔɔan ɲʋn ɛn, ʋʋ -kman ɩanˈ dɩ. ˈBho ʋaˈ -da -duuˈˈ -gwlɩˈˈ -dhe ɛ, -mɛnˈ ɔmɔn -nɩn Ɲʋnpʋʋi. ˈKlaa ɔ -ghwluɛ- ˈdhe ʋbʋ bho ɔ ˈnaan: ‘Ɲɔn -ɔɔ muan -jhi ˈbhoo ˈdhe ɛ, ɔ bhɛˈˈ ɔ ye ˈʋn -zii. ˈƖn se ˈbhɛɛ- ˈye ɔɔˈ ˈˈkwlai aˈ dhbhiˈˈ bɔin-. ˈMan jhaa ɲʋn ˈˈnin -zɔnˈ, ˈklaa ɔmɔn ɔn ˈˈɲɩɛnˈ ɲʋn -zuu gwɛai.’