Zezi ɔ ˈbhɔɔaˈ

Zezi ˈˈtiɛˈˈ bho Nazarɛtɩ, ɔmɔn -e ɔɔˈ ˈcɛ Zozɛʋ -e Mai -e ɔɔˈ ˈdhoudhi -ɲmai -e ˈdhoudhi -ɲnʋnkpaeˈ -e. Tibadhbho- -mɔn Zozɛʋ ɔ nʋn -wɛeˈ ɔɔ ˈˈdu ɔɔˈ ˈˈgbuzɔncɛ ɛˈ dɩ. Ɔɔ ˈtmʋʋn ʋbʋ Zoova aˈ dɩ ˈˈdhe ɔɔ tɔɔn ʋbʋ ɔɔˈ ˈtee. Ʋa muɛn ˈe Zifʋ -ˈˈwe aˈ ˈˈdhruigboogbu ˈdhi jheejhee ʋa yea Ɲɔnsoa ˈˈɲɩn. ˈDhe zʋn ˈdhi ɛ, ʋa nan dhɛ -dɔɔnˈ ˈmʋn ʋa yea Pakɩ ɛˈ fɛtɩ poaˈ mun ˈdhe Zelizalɛmʋn.

-Da Zezi ˈbhlea zɩn anˈ -bue- ˈjhɔ ˈsɔɔn ɔn, -ka ʋa nʋan see ɛ, ʋʋ muɛn Zelizalɛmʋn. Ɲʋn ˈˈjhi ˈo ˈˈkwiglɔ- -ˈnɔn ˈdhi ˈmɛn: Ɲʋn -duuˈˈ jhi Pakɩ ɛˈ fɛtɩ poaˈ -dhe. Pakɩ ɛˈ fɛtɩ gwɛa jha a, Zozɛʋ -e Mai -dee Nazarɛtɩ dhe muanˈ ˈmɛn. ˈBho ʋbʋ -gwlɩˈˈ ɛ, Zezi -nɩɛn ˈe ɲʋn -ʋa- muan dhe ˈˈklun -dhe. ˈKlaa ʋʋ ˈbʋɔn in ˈdhe ʋaˈ ˈˈgbuzɔncɛ ˈˈklun ʋʋ ˈseɔ ˈjhe.

Ʋʋ muɛn Zelizalɛmʋn dhe ˈˈdhe ʋʋ ˈbɔn ʋaˈ ˈˈjhu i ˈghwɩ taan. Ɛɛ ˈbhɔɔa ˈbho ɛ, ʋʋ muɛn ˈe Ɲɔnsoa aˈ ˈˈgbu -klaaˈˈ ˈdhi. ˈSʋ ʋʋ -jhɛɛ Zezi ˈmɛn ˈdhemɔn. Ɔ -deɛ i ˈbho ɲʋn -an tɔɔan ɲʋn dhɛ ɛɛˈ gwɛa-, ɔɔ pʋbʋ -dheinˈˈ bho -kajɔɔnka ˈˈdhe ɔɔ poɛ ˈe ideedɩ-. -Taiˈ ˈˈmaan ɲʋn -an tɔɔan ɲʋn ˈdhɛ ˈmɛn, ˈsʋ ʋa dee ɔ dɩ i. ˈˈDhe -ka ɔɔ nʋan ʋaˈ ideedɩ- aˈ ˈdhe -za sʋn ɛn, ɛɛ ˈˈmaan ʋbʋ tɔˈ i. Dɩ ɔɔ za ˈe ɛ, ɩan toɛˈ -ka ɔɔ ˈŋwɔan Zoova aˈ ˈtee ˈmʋn in -kajɔɔnka.

Zozɛʋ -e Mai a ˈˈduɛ -zɔnˈ ɔɔˈ dɩ. Ʋʋ ˈjhea Zezi ɛ, Mai -ghwluɛ- ˈdhe ɔ bho ʋn ˈnaan: ‘ˈMan ˈˈjhu, -a ˈbɔɛn ʋn dhi -da ooˈˈ -da! -Dawɛ -nɩn ˈdhe -ɛ?’ Zezi -ghwluɛ ˈe ʋbʋ bho ɔ ˈnaan: ‘Aʋ si jhibho- -ka ˈyea ˈe ˈman ˈˈBho ɔˈ ˈˈgbu ˈdhi -nɩn ɛn?’

Zezi -e ɔɔˈ ˈcɛ muɛn Nazarɛtɩ dhe. Zozɛʋ -tɔɔn tibadhbho-. ˈBhoo- -gwlɩˈˈ ˈdhee, -kawɛ Zezi -nɩn -dhe -ɛ? -Ka ɔɔ ˈbhɔɔa, ˈkamɔn- ɔɔˈ tɔˈ ɔ ˈkpa ˈˈkpe, ɔɔ nʋɛn Ɲɔnsoa ˈtʋn ˈˈdhe ɔɔ nʋɛn ɲʋn ˈtʋn -ke.