Zezi ˈkpa Ɲʋnpʋʋi-

Zan bhla -bo dhueˈ -dhe ɔ ˈnaan: ‘Ɲɔn ˈbhɛaˈˈ ɔ -ziia ˈmʋn ɛn, ɔmɔn- -ɔn jhi.’ -Da Zezi ˈbhlea zɩn anˈ 30 -ˈˈwe ɛ, ɔ ˈghwlʋɛ ˈe Galile -wɛeˈ ɔ mʋn ˈe Zudɛn -gwlɩˈˈ, ˈˈningbuu- -ɛ ˈbho ŋwɔn Zan an jhaa ɲʋn ˈˈnin ˈzɔn ɔn. Ɔɔ ˈbɔn Zan ˈyeɔ ˈˈnin ˈzɔn -jhaa, ˈklaa Zan -ghwluɛ- ˈe ɔ bho ɔ ˈnaan: ‘Ɛ se ˈmɔn- ˈye ʋn ˈˈnin ˈzɔn -jhaa -nɩn. Ɛ nɩn -mɔn ˈye ˈʋn ˈˈnin ˈzɔn -jhaa.’ Zezi -ghwluɛ- ˈe Zan bho ɔ ˈnaan: ‘Zoova a ˈbɔn -ˈye ˈʋn ˈˈnin ˈzɔn -jhaa.’ ˈSʋ ʋʋ muɛn ˈo Zudɛn -gbuu ˈŋwɔn, ˈˈdhe Zan -paa Zezi ɔˈ ɲiɔn -jhɔɛ ɛˈ klɛɛ ˈdhe ˈˈnin ˈzɔn.

Zezi ɔ ˈghwlʋa ˈe ˈˈnin ˈzɔn ɔn, ɔ bhae-. ˈSʋ jhaʋn kaiɛn- ˈˈŋwɛn ˈˈdhe Ɲɔnsoa aˈ -zuu ˈˈsiɛ i ˈbho ɔ ˈˈkpe -ka ˈpauˈˈ nɩan. ˈDhe jhaʋn ˈdhi Zoova -nɩn -wɛeˈ ɔ -ghwlu ɔ ˈnaan: “-Nɩɛn- ˈman ˈˈJhu, ˈman dɩ -kman -jhu. -Man poɛ ˈʋn ˈmʋnan in ˈjɛɛn-.”

Zoova dhbho Zezi ˈmɛn da ˈbhlʋa ˈˈkpe -wɛeˈ ɔ ˈye dhbho dhueˈ nʋn. Zoova aˈ -zuu jhia ˈbho ɔ ˈˈkpe ɛ, ɔ ˈkpa Klisɩ -aeˈˈ Ɲʋnpʋʋi-. -Ɛ ˈghwlʋa ˈo ɔɔˈ -zɔn tu ˈdhi -mɔn ɔ -dee ɔɔˈ dhbho ɔˈ nʋanˈ.

Zezi ɔˈ -nɛɛn gwɛa ˈˈnin ˈzɔn -jhiiaˈ a, ɔ muɛn ˈe -bɩɛnˈˈ -bhlʋa ˈˈkpe. Ɔ nʋɛn ˈe ˈghwɩ aˈ 40. Ɔɔ jhia dhe ɛ, ɔ muɛn ˈe Zan bho. -Jɛn Zezi muan ˈe ɔ bho ˈsʋ ɛ, Zan ˈnaan: ‘Ɲɔnsoa aˈ ˈBhlaa -jhu ka! ɔɔ muɛn dhɛsaʋn- ˈnɔn ˈkmʋn -za.’ Dhɛ Zan an ˈbɔan ɔ ˈyea ˈtmʋn -dhe ɛ, ɛmɛn- -nɩn Zezi -mɔn -nɩn Ɲʋnpʋʋi-. Dhɛ -jhiia- Zezi i -da ɔ nɩan ˈdhe -bɩɛnˈˈ -bhlʋa ˈˈkpe -dhe ɛ, jhibhɛˈ? -Aa muɛn ˈjhee-.