Ɲɔnsaʋn ˈdɩɛnˈ Zezi i

Zezi gwɛa ˈˈnin ˈzɔn -jhiiaˈ a, -zuu gwɛai kpɔ ˈe -bɩɛnˈˈ -bhlʋa ˈˈkpe. Ɔ ˈse dhɛ dhi ɔ ye ˈghwɩ aˈ 40 nʋn, ˈsʋ ˈmɩɩɛn ɛn nʋɔnˈ ˈjɛɛn-. -Wɛeˈ Ɲɔnsaʋn jhiɔ i ˈdɩanˈ. Ɔ -ghwluɛ- ˈe ɔ bho ɔ ˈnaan: ‘-Bho -nɩn Ɲɔnsoa aˈ ˈˈJhu ˈjɛɛn- ɛnˈ, -ˈmɛn -ghwlu ˈdhe ˈseiˈˈ nɩn bho ɩn ˈye dipɛn ˈkpa.’ ˈKlaa Zezi ˈyea ˈe ɔ bho -ghwlu ɛ, ˈcreedhɩ- -mɩn ɔ -jhii- dhi ɔ ˈnaan: ‘Dhɛ ˈcreea ɛ ka: Ɛ se dhiidhɛ ɛˈ ˈsʋ ɛɛˈ dɩ -ˈye ˈkmʋn -nɩn. -ˈYe dɩ aˈ klɛɛ Zoova a ˈtmʋan -dheinˈˈ bho po -ke.’

ˈBho ɛ ˈdhe ɛ, Ɲɔnsaʋn ˈdɩɛnˈ Zezi dhi -kenɛnˈ ɔ ˈnaan: ‘-Bho -nɩn Ɲɔnsoa aˈ ˈˈJhu ˈjɛɛn- ɛnˈ, ˈghwlʋ ˈe Ɲɔnsoa aˈ ˈˈgbu -klaaˈˈ ˈˈdhru -ˈye -manˈ ˈˈjɛ ˈˈvile- ˈdhe ˈzɔn. Dhɛ ˈcreea ɛ ka: Ɲɔnsoa a muɛn ɔɔˈ dhbhoozii- jha -wɛeˈ ɩn ˈye ʋn ˈsa.’ ˈKlaa Zezi -jhiiɛ- ˈcreedhɩ- dhi -kenɛnˈ ɔ ˈye ˈe ɔ bho -ghwlu ɔ ˈnaan: ‘Dhɛ ˈcreea ɛ ka: -Manˈ ˈdɩn Zoova dhi -dhe.’

ˈBho ɛ ˈdhe -kenɛnˈ ɛn, Satan -tɔɔɛn Zezi ˈbheɔgwlɛ ɛˈ klɛɛ nɩan da ˈbhlʋa ˈˈkpe -e ɩanˈ ˈˈghwlii -e ɩanˈ ˈˈɩ ˈbheɛ-, ˈˈdhe ɔ ˈnaan: ‘ˈMan muɛn ʋn ˈbheɔgwlɛ- -ˈnɩn anˈ klɛɛ -e ɩanˈ ˈˈɩ ˈbheɛ- ˈˈɲɩn- -bho po ˈkɔi glu ˈbhoo ˈˈjhibhaˈ -wɛeˈ -ˈye ˈʋn ˈˈɲɩn kpɔ dhueˈ -ˈgbai ɛˈ.’ ˈKlaa Zezi -ghwluɛ- ˈe ɔ bho ɔ ˈnaan: ‘ˈKpaa- ˈdhe ɲan, Satan! Dhɛ ˈcreea ɛ ka: Zoova aˈ ˈsʋ -ˈye ˈˈɲɩn.’

ˈSʋ Ɲɔnsaʋn mun, ˈˈdhe dhbhoozii- jhiˈ -wɛeˈ ɩn ˈˈɲɩn Zezi dhiidhɛ-. Ɛ ˈghwlʋa ˈbho ɛɛˈ nɔnˈˈ tu ˈdhi ɛ, Zezi bhla ˈBheɔglɔ ɔˈ -bɔyaˈˈ -bo. Ɛ nɩn dhbho -ˈnɔn -mɔn ɔ ˈye nʋn ɛɛˈ dɩ ɔ jhi da ˈbhlʋa ˈˈkpe. Dhɩ Zezi ɔ tɔɔan ɲɔʋbʋ ɛ, ʋʋ kman ɩanˈ dɩ -dhe ˈˈdhe -da ooˈˈ -da ɔ muan, ʋa bhla ˈbho ɔ ˈdhe.