Zezi nʋɛn jhriiˈ- -duuˈˈ

Zezi jhi da ˈbhlʋa ˈˈkpe ˈmɛn -wɛeˈ ɔ ˈye ˈBheɔglɔ ɔˈ -bɔyaˈˈ -bo bhla. ˈKlaa Zoova ˈˈɲɩɔnˈˈ -zuu gwɛai -ke -wɛeˈ ɔ ˈye jhriiˈ nʋn. -Bho ɔ ˈkpa ˈBheɔ dhɛ ɔ ˈyea nʋn ɛn, ɛmɛn- jhriiˈ- -ˈnɩn ˈye -to. Ɔ ˈbhɛɛˈ ɔ ˈye ˈpoadhɩ- aˈ klɛɛ ˈpʋʋ-. -Da ooˈˈ -da ɔɔ muan an, ɲʋn -ʋaˈ dhɩ a ˈpoa a jhiɛ ˈdhe ɔ bho ˈˈdhe ɔɔ ˈpʋʋ- -ʋaˈ klɛɛ ˈmɛn. Ɲʋn ˈˈdhɔa ʋa ˈjheɛi, ɲʋn -ʋaˈ ˈŋwɔan in ʋa ˈŋwɔɛn in, ɲʋn -klɔɔa ʋa nanˈ, ˈˈdhe ɲʋn -ziisaɩn- an seea ɩan ˈghwlʋ ˈe ʋbʋ ˈmʋn ˈmɛn. Ʋʋ ˈbhɛɛˈ mɔn -ke ʋʋ ˈye ɔɔˈ ˈmʋnpaadhɛ ɛˈ -dhounˈˈ dhi ˈtʋn ˈsʋ ʋʋ ˈye ˈpʋ. -Da ooˈˈ -da ɔɔ muan ɲʋn an bhla ˈbho ɔ dhe. -Bho ɔɔ sa ˈbɔn ɔ ˈye dhueˈ -nɩn mɔn -dhe ɛˈ, Zezi ɔ ˈŋwɔɔn- ˈbho ˈmɛn ɔɔ yea dhɛ nʋn ɔɔ yʋbʋ ˈˈɲɩn.

-Zɔn dhueˈ ɛ, ɲʋn an ˈbɔn ʋʋ ˈye ˈˈjhu dhueˈ -klɔɔa ˈdhe ˈˈgbu Zezi nɩan ˈe ˈdhi -paa -dhe. ˈKlaa ɲʋn ˈˈjhi ˈe ˈˈgbu ˈdhi ˈmɛn ˈjɛɛn- ˈsʋ -da ʋʋ ˈyea -jhii ˈbho se -nɩn. ˈSʋ ʋʋ cɛn ˈˈbhieˈˈ ˈbho ˈˈgbu ˈˈdhru -wɛeˈ ʋʋ ˈˈsii- ˈˈjhu -ˈnɔn in ˈdhe Zezi bho. Zezi -ghwluɛ- ˈe ɔ bho ɔ ˈnaan: ‘-Sɔn ˈmʋn -ˈye -nan.’ Ɔ -sɔn ˈmʋn ˈmɛn ɔɔ ˈyea nan. Ɛ ˈˈmaan- ɲʋn anˈ klɛɛ taiˈ.

-Zɔn -dhee -ˈnɔɔn -kenɛnˈ ɛn, Zezi ɔ pa ˈo -glɔ dhueˈ ˈdhi ɛ, -ˈmɛn ɲʋn -bue- jhau ghwɛ kpʋan -tɛɛn bho ˈˈdhe ʋa ˈˈghwɔ ʋʋ ˈnaan: ‘Zezi, po -aʋ sʋn bho!’ ˈDhe ɛɛˈ nɔnˈˈ tu ˈdhi -dhe ɛ, ɲʋn jhau ghwɛ kpʋan ˈse ˈbhɛɛ- ʋʋ ˈye ɲʋn -ˈnʋʋn i ˈkpaa-. Zezi ˈtmʋʋn- ɲʋn -bue- -jhau- ˈghwɛ kpʋan ˈmɛn ʋʋ ˈye ˈe Ɲɔnsoa aˈ ˈˈgbu -klaaˈˈ ˈdhi mun. Zoova aˈ ˈtee ˈnaan, -bho jhau ghwɛ kpʋn ɲɔn -wɛeˈ ɔ ˈpʋ ɛˈ, ɛmɛn- ɔ ˈye nʋn. Ʋʋ nɩan muanˈ ˈsʋ, ʋʋ ˈpʋʋˈ ˈbho -jieˈˈ. ˈˈDhe ʋa dhueˈ jhi ˈe Zezi bho dhe -wɛeˈ ɔ ˈyeɔ ˈsɛ po ˈˈdhe ɔ ˈye Zoova aˈ ˈɲnɩn ˈˈɩ ˈbhɛɛ-. Ɔɔˈ ˈsʋ po Zezi ˈsɛ-.

ˈƝnʋnkpaoˈ dhueˈ -ʋan- pooa ˈdhe zɩn anˈ 12 ˈdhi ɛ, dhɛ ooˈˈ dhɛ ʋn ˈbhɛɛa ʋn ˈyea nʋn -wɛeˈ ʋn ˈyea ˈpʋ ɛ, ʋn nʋɛnˈ. Ʋn ˈkpa ˈe ɲʋn ˈˈklun ʋn ye ˈo Zezi ˈdhe bhla. Ʋn ˈˈkʋʋɔn in ˈsʋ ɛ, ʋn ˈtʋɛn ɔɔˈ ˈmʋnpaadhɛ ɛˈ -dhounˈˈ dhi. ˈBhomɔn- ʋn ˈˈsi ˈsʋ, ʋn ˈpʋ. ˈˈDhe Zezi dee dɩ i ɔ ˈnaan: “Ɲɔnwɛ- ˈtʋn ˈʋn dhi -ɛ?” -Bho -faʋn- kpʋn ˈɲnʋnkpaoˈ -ˈnʋn mɔn -dhe ɛˈ, ʋn jhiɛ ˈbho Zezi ˈˈbun ˈˈdhe ʋn ˈtmʋn ˈtɔdɩ ˈdhe ɔ bho. Ɔ ˈˈdu dɩ -gwlɩiˈ ɔ ˈnaan: ‘ˈMan ˈˈjhu, a ˈbhɛɛˈ a ˈye mun ˈdhe ˈflɛ ˈmʋn.’

ˈˈJhu dhueˈ nɩan ɲɔn -klaaˈˈ -ɔɔˈ ˈɲnɩn nɩan Zai ɛ, ɔ bhaeɛ- Zezi i ɔ ˈnaan: ‘-Kɔngɩnˈ jhi ˈdhee ˈˈŋwɛn! ˈMan ˈˈjhu -ɲnʋnkpaoˈ aˈ pooa i ˈjɛɛn-.’ ˈKlaa Zezi ˈse ˈdhe Zai ˈˈŋwɛn ɲnin ˈsʋ, ˈˈjhuzaan ye ˈmɛn. Zezi ɲnian an, ɔ ˈjheɛ ɲʋn -duuˈˈ -ʋʋ -nɩn ˈˈjhuzaan a ˈˈvɩn. Ɔ -ghwluɛ- ˈe ʋbʋ bho ɔ ˈnaan: ‘Aʋaˈ ˈˈvɩɩnˈ -dhe; ʋan ˈmʋʋnˈ.’ -Wɛeˈ ɔ ˈˈdhuo- ˈˈjhuzaan anˈ sʋn ˈmʋn ˈˈdhe ɔ -ghwlu ˈdhe ʋn bho ɔ ˈnaan: “ˈˈjhuzaan-, a -sɔn ˈmʋn!” ˈBhomɔn- ɔ ˈˈsi ˈsʋ, ʋn -sɔn ˈmʋn ˈˈdhe ɔ ˈtmʋʋn- ʋanˈ ˈcɛ ʋʋ ˈyʋ dhiidhɛ ˈˈɲɩn ʋn ˈye dhi. -Naan tɔˈ i -ka ɛɛˈ dhɛ tu nɩan ˈbho ʋanˈ ˈcɛ -gwlɩˈˈ ɛ!