Zezi -za ˈo dhbhoʋn anˈ -buɔˈ ˈsɔɔn

Zezi bhla bo ˈdhe -zʋn dhueˈ ˈdhe -dieˈˈ ˈdhi ɛ, dhɛ dhueˈ -kɔndɩ ɔ ˈye nʋn -dhe. Ɲʋnwɛ- ɔ ˈye ˈo -za -ʋʋ -nɩn ɔ ˈye dhbho nʋn -ɛn? Ɲʋnwɛ- ɔ ˈye dhbho -tɔɔn -wɛeˈ -ʋʋ ˈye kletiɛn -ˈˈwe aˈ -glibha jie bho po -ɛ? Zezi ɔ ˈbɔn Zoova ˈyeɔ sʋn bho po -wɛeˈ ɔ ˈye ɛɛˈ dhɛ tu ˈbho -za ɔ ˈyeɛ nʋn. Ɔ ˈjha ˈe trʋ ˈˈkpe -wɛeˈ ɔ ˈye dhueˈ -nɩn ˈdhemɔn, ˈˈdhe ɔ bhaeˈ ˈdhe ˈˈmaʋn -glu aˈ klɛɛ ˈdhi. Zɔn zɩan, ɔ ˈgbooɛ- ɔɔˈ dhɛcɩaʋn anˈ -ˈnʋʋn ˈˈdhrui ˈˈdhe ɔ -za ˈo ɔɔˈ dhbhoʋn anˈ 12. Se ʋaˈ ˈɲnɩn bho ˈˈmae-? Ʋaˈ ˈɲnɩn -nɩn Piɛɛ -e Andre -e Zakɩ -e Zan -e Filipʋ -e Batelemin -e Toma -e Matie -e Alife ɔˈ ˈˈjhu Zakɩ -e Tade -e Simɔn -e Zida Isikariɔtɩ -e.

Ɲʋn anˈ 12 -ˈnʋn -nɩn Zezi mun dhɩ ˈmʋɩn ˈmɛn -dhe. Ɔ gwɛa ʋaˈ dhbho -tɔɔn -ˈnan an, ɔ dhbhʋbʋ ˈmɛn ʋʋ ˈye -bo bhlaaˈ mun. Zoova ˈˈɲɩɛnˈˈ ʋbʋ ˈˈɩkmaan- ʋʋ ˈye -ziisaɩn- dhi nʋn ˈˈdhe ɲʋn -ʋaˈ dhɩ a pooa ʋʋ ˈyʋbʋ ˈpʋʋ-.

Zezi ˈdhaa- ɲʋn anˈ 12 -ˈnʋn ɔɔˈ ˈdhaiˈˈ -ˈˈwe ˈˈdhe ɔ deɛ ʋbʋ -gwlɩˈˈ. ˈBho faiziɛn -ˈˈwe -gwlɩˈˈ ɛ, ɛ nɩn ɲʋn -ʋʋ se ˈsɛɛ jhibho- ˈˈdhe -ʋʋ se ˈɲnɩn ˈghwlʋ. ˈKlaa dhbho ʋʋ ˈyea nʋn ɛn, Zezi -tɔɔn ʋbʋ ˈmɛn. Nɔnˈˈ kɔandɩ ˈdhe ɔɔˈ ˈkmʋn ˈdhi -ɛ nɩan -da ɔɔˈ ˈmɛanˈ an - ˈˈkʋʋan in -e ˈbho ɔɔˈ ˈkmʋndhejhiɛ- dhe ɛ, ʋʋ -nɩn ɔ nʋɩn -dadhueˈ. Dhbhoʋn nɩan 12 -ˈnʋn anˈ -daduuˈˈ -nɩn Zezi ˈghwlʋɛ ˈo Galile -ke. ˈDhe ʋbʋ ˈˈklun ɛn, -ˈnʋʋn ˈbhleɛ ˈɲnɔn.

Dhbhoʋn se i -gwɛ, ʋa zi dhɛˈˈ ˈmɛn ʋa yeɛ nʋn. -Zɔn -ˈnɔɔn ɔn, ʋaˈ -naan tɔˈ i mɔn ˈsʋ ʋa ghwlu ˈˈdhe dhɩ ʋa -za ˈo ʋa nʋan an, ɩn se ˈˈjhrii -nmɔn. -Zɔn -ˈnɔɔn -ke ɛ, ʋaˈ ˈman in. Ʋa kpʋɛn ˈˈŋwɛn -ke -wɛeˈ ʋʋ ˈye ɲɔn ˈdha dhɛ ˈdhe ʋbʋ ˈˈklun jhibho-. ˈKlaa ʋʋ -nɩɛn- ɲʋn ˈdhɔɛeˈ ˈˈdhe ʋʋ -kman Zoova aˈ dɩ. Ʋʋ kɔn ɲan -ʋʋ ˈkpa kletiɛn ˈˈdhe Zezi muan, ʋʋ nʋɛn dhɩ -duuˈˈ -ɩn po ɲɔnsoagbu sʋn bho.