Zezi ɔ tɔɔɛn ɔɔˈ dhɛcɩaʋn -ka ɲʋn ˈyea bhae- ɛ

Dhɩ aˈ klɛɛ faiziɛn -ˈˈwe a nʋan -dhe ɛ, ɛ nɩn ʋʋ ˈye ˈe ɲɔʋbʋ ˈˈjhri ˈdhei -nmɔn ɛɛˈ dɩ. -Bho ʋʋ nʋn dhɛ ˈdhɔɛeˈ ɛ, -ˈmɛn ʋa ˈbɔn ɲʋn ˈyʋbʋ ˈˈjhriɛ ˈˈkpe de. Ʋa bhae ˈkpaeˈˈ gwɛa i -wɛeˈ ɲʋn anˈ klɛɛ ˈyʋbʋ ˈjhe. Ʋa ˈcɩan bhaeghwlu -dɔɩnˈ ˈˈdhe ʋa ˈtmʋn dhɩ nɩan dhueˈ jheejhee ˈdhe zifʋ -ˈˈwe aˈ ˈˈdhruigboogbi- ˈdhii -e jie bho i -da ɲʋn ˈbhɛɛa ʋʋ ˈyea ʋaˈ ghwlu ˈŋwɔn ɔn. Ɛɛˈ dɩ -taiˈ ˈˈmaan ɲʋn -da Zezi -ghwlua ˈe ʋbʋ bho ɔ ˈnaan: ‘Aʋaˈ bhae -dhe -ka faiziɛn -ˈˈwe a nʋan bhae sʋn ɛn. ˈBho ʋbʋ -gwlɩˈˈ dɩ -duuˈˈ -duu ʋa ˈtmʋan an, ɩn ˈye Ɲɔnsoa -gwlɩiˈ -nmɔn, ˈklaa ɩanˈ nʋɔn ˈtʋn. Bhaeɛ-, ɛ nɩn ˈbho aʋbʋ -e Zoova ˈɲnɩn. Aʋaˈ bhla dɩ nɩan dhueˈ i -dhe. Dɩ nɩan ˈbho aʋ -gwlɩˈˈ ˈjɛɛn- ɛn, ɩmɩn- Zoova a ˈbɔn aʋ ˈyeɔ ˈtmʋʋn-.

‘-Ka aʋ ˈyea bhae- sʋn nʋn ˈka ka: “-Aaˈ ˈˈBho nɩan ˈe jhaʋn ˈdhi ɛ, -manˈ ˈɲnɩn ˈye i -gwɛ. -Manˈ ˈbheɔglɔ ˈye jhi. -Manˈ -ˈglʋdɩ ˈye -nʋʋɛn da ˈbhlʋa ˈˈkpe -ka ɩan nʋʋan ˈdhe jhaʋn ˈdhi ɛ.”’ Zezi ˈnaan ʋʋ ˈbhɛɛˈ ʋʋ ˈye bhae- -ke ʋaˈ zɔn ˈdhi dhiidhɛ -e ʋaˈ dhɩsaɩn anˈ ˈgɩn -e dhɩ -ˈnɩɩn kman ʋbʋ ˈˈbhli ɩanˈ dɩ.

Zezi de ˈo ɔ ˈnaan: ‘Aʋaˈ ˈbhɔ bhae- dɩ -dhe. Aʋ dee- aʋaˈ ˈˈBho Zoova dhɩ ˈdhɔɛeˈ dhi jheejhee. ˈˈƝnuunbhleʋn anˈ klɛɛ ɛ ˈbɔn ʋʋ ˈye ʋaˈ ˈˈɲnuun- dhɩ ˈdhɔɛeˈ ˈˈɲɩn. -Bho aʋaˈ ˈˈjhu dee aʋbʋ dipɛn in ɛnˈ, aʋa muɔn ˈsouˈˈ ˈˈɲɩn-? -Bho ɔ dee aʋbʋ zmiɛn dhi ɛ, aʋa muɔn sɛn ˈˈɲɩn-?’

ˈˈDhe ˈsrɩn ɲʋn ˈyea ˈdhe ɛ ˈdhi -za a, Zezi ˈtmʋn ɩanˈ dɩ ɔ ˈnaan: ‘-Bho aʋa sa aʋaˈ ˈˈɲnuun dhɩ ˈdhɔɛeˈ ˈˈɲɩn ɛn, -ˈmɛn aʋaˈ ˈˈBho Zoova a muɛn aʋ zuu gwɛai ˈˈɲɩn. Dhɛ aʋ ˈyea nʋn -mɛn -nɩn aʋ ˈyeɔ i dee-.’ -Man ˈˈdu Zezi ɔˈ ˈsrɩn ˈˈjhriɛ ˈmɛn? Dhɩwɛ- ɩanˈ dɩ -man bhae -ɛ?