-Bo Zezi bhla ˈbho trʋ ˈˈkpe ɛ

Zezi gwɛa dhbhoʋn nɩan 12 ˈbho -zaaˈ a, ɔ ˈghwlʋɛ ˈe trʋ ˈˈkpe ɔ ye -da dhueˈ ɲʋn -duuˈˈ gbooa ˈˈdhrui mun. Ʋʋ ˈghwlʋɛ Galile -e Zide -e Tii -e Sidɔn -e Siri ɛmɛn- -e ˈdhe zudɛn ɛnˈ ˈfɔ -ˈnɔɔn bho. Ʋʋ jha ɲʋn -ʋa- pooa i -e ɲʋn -ziisaɩn- an ˈˈduaˈˈ ˈkle. Zezi ˈpʋʋ- ʋaˈ klɛɛ ˈmɛn. -Wɛeˈ ɔ ˈjha ˈo trʋ ˈˈdhru ˈˈdhe ɔ -dee ʋaˈ dhɛ -tɔɔɛn-. Dhɛ ɲɔn ˈyea nʋn -wɛeˈ ɔ ˈyea Ɲɔnsoa aˈ jhbhɛɛi -nɩn ɛn, ɛmɛn ɔ -tɔɔn ʋbʋ. -Ka Zoova aˈ dɩ kman -aʋ ˈˈbhli ɛ, -a ˈyeɛ i ˈŋwɔn ˈˈdhe -a ˈye ɔɔˈ dɩ -kman ˈcɩan. ˈKlaa -a se ˈbhɛɛ- -a ˈye Ɲɔnsoa aˈ dɩ -kman -bho -a se ɲʋn anˈ dɩ -kman anˈ. -A ˈye -glʋˈ -nmɔn ˈˈdhe -a ˈye ˈˈɩ ˈsrɛ ˈdhe ɲʋn anˈ klɛɛ bho, ˈdhe -aaˈ ˈmʋnɲɛʋn bho -ke.

Zezi ˈnaan: ‘Ɛ se aʋaˈ ˈdhaiˈˈ -ˈˈwe aˈ ˈsʋ aˈ dɩ aʋ ˈye kman -nɩn. Aʋ ˈye aʋaˈ ˈmʋnɲɛʋn anˈ dɩ -kman -ke ˈˈdhe aʋ ˈye ʋaˈ dhɛsaʋn- ˈˈkpe ghwlʋˈ ˈdhe aʋaˈ -pɛɛ ɛˈ klɛɛ ˈmʋn. -Bho ɲɔn -nɩn aʋ ˈbhle dɩ ɛˈ, aʋ ˈˈdoo- aʋ ˈye ˈdhe ɔ bho mun ˈˈdhe aʋ ˈye dɩ ˈˈkpei zela-. -Ka aʋa ˈbɔan ɲʋn -ˈnʋʋn ˈyea aʋ ˈbhle ɛ, ˈkamɔn- aʋ ˈyʋbʋ ˈbhle -ke.’

Zezi toɛ- ˈo ˈsrɩn ˈdhɛɔeˈ -ke ˈdhe ˈˈghwlii aˈ dɩ ˈdhi. Ɔ ˈnaan: ‘-Nɩn Zoova aˈ ˈdhaiˈˈ -kɔndɩ ˈjɛɛn- ɛ ye ˈghwɛi- -duuˈˈ aˈ ˈbhleaˈ -zii. Ɲɔn ˈbhɛɛˈ ɔ ˈye aʋaˈ ˈghwɛi ˈˈjhri, ˈklaa ɲɔn se ˈbhɛɛ- ɔ ˈye jhbhɛɛ- nɩan ˈbho aʋbʋ -e Zoova ˈɲnɩn ˈˈjhri. Aʋ ˈbhɔ -zɔnˈ ˈˈdu dɩ dhɛ aʋa muan dhi -e aʋa muan ˈnan- -aeˈˈ dhɛ aʋa muan ˈmʋn -paa aˈ dɩ. Aʋ -ŋmʋn nɩmɩn jha. Ɲɔnsoa a ˈˈduɛˈˈ ɩanˈ dɩ jheejhee ɩan yea dhiidhɛ ˈjhe ɩan yea dhi. -Bho aʋa sa -zɔnˈ ˈˈdu ɛˈ, ɛ ˈse aʋaˈ ˈghwɩ ˈˈkpe -po i. Aʋaˈ ˈˈmae- -dhe, Zoova jhibho- dhɩ kman aʋ ˈˈbhli ˈmɛn.’

-Ka Zezi ɔ nʋan -ghwlu sʋn ɛn, ɲɔn ˈse -ghwlu -kaˈ kpɔ dhueˈ ʋʋ ˈseɔ ˈjhe. Ʋaˈ pliegbi aˈ ˈˈdhrujheʋn ˈsʋbʋ ɩanˈ dhɩ tu -tɔɔn. Dhɛɛdɩ- Zezi -nɩn ɲʋndhɛtɔɔin ˈdhɔɛeˈ -dhe -ɛ? Dhɛ nɩan ˈo ɛ, dhɩ aˈ klɛɛ ɔɔ ˈtmʋan ɩan ˈghwlʋɛ ˈe Zoova bho.