Ɲʋn -ɲnaan- Zezi i

Zezi -e ɔɔˈ dhbhoʋn- -cɛɛn ˈo Sedrɔn ɔnˈ ˈˈjun ˈdhi -wɛeˈ ʋʋ mun ˈe Olivʋti aˈ trʋ ˈˈkpe. Ɛ nɩn ˈbho ˈˈmaʋnglu aˈ gwɛa -ˈmɛn ˈcʋ a ˈfan-. Ʋʋ ɲnian ˈo ˈgle dhueˈ ɲɔn ɔn ˈdhaa Zɛsemani ˈdhi ɛ, Zezi -ghwluɛ- ˈe ɔɔˈ dhbhoʋn bho ɔ ˈnaan: “Aʋ -dei da -ˈmɛn aʋ kpa ˈˈjhriɛ ˈˈɩ -deeɛ- ɲan.” ˈSʋ ɔ muɛn ˈe ɲan dhɛ ˈˈzaan ˈˈdhe ɔ po ˈkɔi glu. Ɔɔ ˈˈduɛ -zɔnˈ -dhe ˈjɛɛn- ˈsʋ ɔ bhaeɛ- Zoova ɔ ˈnaan: “-Manˈ -ˈglʋdɩ ˈye -nʋʋɛn.” ˈSʋ Zoova jha dhbhoozuu dhueˈ ʋn ˈye Zezi ˈkpɩ po. Zezi ɔ jhia ˈe ɔɔˈ dhbhoʋn bho dhe ɛ, -ˈmɛn ʋʋ -nɩɛn ˈmʋanˈ. Ɔ -ghwluɛ- ˈe ʋbʋ bho ɔ ˈnaan: ‘Aʋ -sɔn ˈmʋn! Ɛ se ˈmʋanˈ anˈ nɔnˈˈ -nɩn! Nɔnˈˈ ɲʋn ˈyea ˈʋn -to ˈdhe ˈman ˈmʋnɲɛʋn- ˈkwa ɲninˈ -wɛ.’

ˈSʋ Zida jhiˈ, ɔmɔn- -e ɲʋn -duuˈˈ ˈbhlea -blajrɩnˈ -e ti di -e. Ɔ jhibho- -da ɔ ˈyea Zezi -jhɛɛ ˈmɛn dhɛ nɩan ˈo ɛ, ʋaˈ klɛɛ ɛ muɛn ˈe ˈgle nɛn ˈdhi ˈsee -dhe. Zida ˈtmʋʋn- ˈsʋlɩˈˈ ˈmɛn -dhe -ka ɔɔ muan ʋbʋ Zezi -tɔɔn. ˈSʋ ɔ ˈkpaa- ˈbho Zezi ˈˈbun ˈˈdhe ɔ -ghwlu ˈdhe ɔ bho ɔ ˈnaan: ‘-A ˈsɛ o Ɲʋndhɛtɔɔin,’ -wɛeˈ ɔ ˈˈɲɩɔnˈˈ bizɩ. Zezi -ghwluɛ- ˈe ɔ bho ɔ ˈnaan: ‘Zida, -za ˈʋn bhʋ ˈdhe ɛɛˈ dɩ -man ˈˈɲɩn ˈʋn bizɩ?’

Zezi ˈkpaa- ˈbho ɲʋn -nɩn ɔ jhia ˈˈbun ˈˈdhe ɔ dee ʋbʋ i ɔ ˈnaan: “Ɲɔnwɛ- aʋa ˈbɔn in -ɛn?” Ʋʋ ˈnaan: “Zezi ˈghwlʋa Nazalɛtɩ ɛ.” -Wɛeˈ ɔ -ghwlu ˈdhe ʋbʋ bho ɔ ˈnaan: “Ɛ nɩn ˈmɔn-.” Ʋʋ -zaa ˈkɩn ˈsʋ ʋʋ ga i ˈbho ˈbhlʋɔ-. Zezi deeɛ- ʋbʋ i -kenɛnˈ ɔ ˈnaan: “Ɲɔnwɛ- aʋa ˈbɔn in -ɛn?” Ʋʋ -ghwluɛ- ˈe ɔ bho -kenɛnˈ ʋʋ ˈnaan: “Zezi ˈghwlʋa Nazalɛtɩ ɛ.” Dɩ nɩan dhueˈ -mɩn ɔ ˈtmʋʋn- ʋbʋ ɔ ˈnaan: ‘ˈƖn ˈtmʋʋn- aʋ ˈmɛn -ka ɛ nɩan ˈmɔn ɔn. Aʋ ˈˈtai- ɲʋn -sia ˈo dhi ʋbʋ ˈye mun.’

Dhɛ -ɛɛ -nʋʋan Piɛɛ ˈŋwɔɛn in ˈsʋ ɛ, ɔ ˈˈdhuɛ- ɔɔˈ -blajrɛnˈ ˈmʋn ˈˈdhe ɔ cɛn ˈo ˈˈjhu dhueˈ ɲɔn ɔn ˈdhaa Maakisɩ nɩan, ˈsraazai- -klaaˈˈ aˈ -kʋɔn ɔnˈ -dhounˈˈ. Klaa Zezi ˈtʋɛn ˈˈjhu -ˈnɔn ɔnˈ -dhounˈˈ ˈdhi ˈˈdhe ɔ ˈpʋɔˈ. -Wɛeˈ ɔ -ghwlu ˈe Piɛɛ bho ɔ ˈnaan: ‘Po -manˈ -blajrɛnˈ ˈdhe ɛˈ kpla ˈdhi. -Bho ˈˈdhuo- -blajrɛnˈ ˈmʋn -man sa vɔn ɔnˈ, -blajrɛnˈ ɛn mun ʋn dhbha.’ ˈSʋlɩˈˈ kpʋn Zezi ˈmɛn ˈˈdhe ʋʋ ˈsan ɔɔˈ sɩn in. Dhbhoʋn pleˈ. ˈBho ɛ dhe ɛ, ʋʋ kpa Zezi ˈdhe Anɩn nɩan ˈsraazaʋn anˈ ˈˈdhrujhei bho. Anɩn deeɛ Zezi dɩ i ˈˈdhe ɔ kpɔ ˈdhe Kaifʋ nɩan ˈsraazai- -klaaˈˈ bho. ˈKlaa dhɛwɛ- -jhii dhbhoʋn dhi -ɛ?